კელი დეგნანის განცხადებები ხშირად რეალობას აცდენილია და ვითარებას ადეკვატურად ვერ პასუხობს, – ამის შესახებ „ხალხის ძალის“ წევრმა და დეპუტატმა, ეკა სეფაშვილმა გადაცემა „პოლიტიკურ პოსტში“ განაცხადა.

მისი თქმით, აშშ-ის ელჩისგან არც ისე პროფესიონალური და არადიპლომატიური განცხადებები უკვე ჩვეულებრივ მოვლენად აღიქმება.

„იგივე ანსამბლ „მართვეს“ შემთხვევაში, როდესაც საქმე ეხებოდა 50 არასრულწლოვანისთვის ვიზების გაცემას, კელი დეგნანი ზოგადი პასუხით შემოიფარგლა, მაშინ როდესაც უფრო კომპეტენტური პასუხის გაცემა შეეძლო. სულ მცირე, ის მაინც შეეძლო ეთქვა, რომ ამ საკითხს მოიძიებდა და შეისწავლიდა, მაგრამ მსგავსი ტიპის განცხადებებს კელი დეგნანისგან ხშირად ვისმენთ.

მაგალითად, მაშინ, როდესაც გვაფრთხილებს, საქართველომ სანქციები არ დაარღვიოს რუსეთთან პირდაპირი ფრენების გამო, რაზეც აღმასრულებელმა ხელისუფლებამ არაერთხელ განაცხადა, რომ ფრენები მხოლოდ არასანქცირებული თვითმფრინავებითა და კომპანიებით შესრულდება.

იგივე, როცა რუსეთმა სავიზო რეჟიმი მოხსნა საქართველოსთან, კელი დეგნანი გამოვიდა და დაგვმოძღვრა, თურმე ჩვენთვის ნომერ პირველი ამოცანა დეოკუპაცია უნდა იყოს. მის გარეშეც ძალიან კარგად ვიცით, რომ ეს ნომერ პირველი ამოცანაა, მაგრამ ჩვენი ძალებით რაც შეგვიძლია, არის ის, რომ მშვიდობიანი, ნდობის პოლიტიკის განხორციელებით აღვადგინოთ ტერიტორიული მთლიანობა. რამე თუ შეუძლია აშშ-ს, დაგვეხმაროს, ჩვენ წინააღმდეგნი არ ვართ. ან როდესაც „გვასწავლის“, ეს ფრენები ტექნიკური უსაფრთხოების დაცვით უნდა შესრულდესო, ეს ხომ ისედაც ყველამ ვიცით? ასე რომ, ცოტა არ იყოს, კელი დეგნანისგან მთლად პროფესიონალური და დიპლომატიური პასუხები არ ისმის ხოლმე. ამას ყველა შეჩვეული ვართ“, – განაცხადა ეკა სეფაშვილმა.

მე მაინც მგონია, რომ ისინი კარგად ვერ თამაშობენ (ალბათ ერთმანეთს თუ ეთამაშებიან). ხალხი ბრძენია და არაერთხელ დაინახა მათი ქცევები ბოლო წლების მანძილზე. მათი განცხადებები ეთერებში, საერთაშორისო პარტნიორებთან აბსოლუტურად აცდენილია რეალურ ქცევას-  ასე გამოეხმაურა გადაცემა „პოლიტიკურ პოსტში“ „ხალხის ძალის“ წევრი ზაალ მიქელაძე ხუთი ოპოზიციონერის მიერ იუსტიციის უმაღლესი საბჭოს წევრების ასარჩევ კენჭისყრაში მონაწილეობის საკითხს.

მიქელაძის თქმით, ამის გამო კენჭისყრაში მონაწილე ოპოზიციის წარმომადგენლები რადიკალური ოპოზიციის მხრიდან ბულინგის მსხვერპლნი გახდნენ.

„ზოგადად რამდენად სახელმწიფოებრივი იყო ეს გადაწყვეტილება მათი მხრიდან, ამ ეტაპზე ძალიან ძნელი სათქმელია. უნდა დაველოდოთ მათ შემდგომ ნაბიჯებს და განცხადებებს, თუმცა ძალიან დიდი ბულინგის ქვეშ აღმოჩნდნენ (ის რაც სხდომიდან გასვლის შემდეგ მათი კაბინეტებიდან ისმოდა, რა თქმა უნდა ჟურნალისტების ნაწილს ექნება ამის ჩანაწერი და თუ გაავრცელებენ თუნდაც ისევ მათი ტელევიზიებით, იქ იყვნენ და უყურებდნენ ამ თამაშს).

მე მაინც მგონია, რომ ისინი კარგად ვერ თამაშობენ (ალბათ ერთმანეთს თუ ეთამაშებიან). ხალხი ბრძენია და არაერთხელ დაინახა მათი ქცევები ბოლო წლების მანძილზე. მათი განცხადებები ეთერებში, საერთაშორისო პარტნიორებთან აბსოლუტურად აცდენილია რეალურ ქცევას. მაგრამ ზოგჯერ მეც მიჩნდება ეჭვი, რომ ესენი ეთამაშებიან კი ჩვენს სტრატეგიულ პარტნიორებს? თუ რაღაც ნაწილში საკუთარ განზრახვებსაც ასრულებენ.

თუნდაც იმ 12 რეკომენდაციის ნაწილში (აღარ ვამბობ დანარჩენ რეკომენდაციებზე, რაც სხვა პერიოდში იყო), რომლის შესრულებაშიც პრაქტიკულად ერთი წელია სამთავრობო სტრუქტურები, პარლამენტი, შეიძლება ითქვას, ყველა საჯარო მოხელე (რომელსაც ცალკე მადლობა ეკუთვნის) ჩართულია ამ პროცესში და საკმაოდ რთული პერიოდი გავიარეთ, ეს რეკომენდაციები ზედმიწევნით სრულდება. მაგრამ ბოლო ეტაპზე, იქ სადაც პარლამენტის ჩართულობა ჭირდება, უმრავლესობა ყოველთვის ვიღებთ წინააღმდეგობას. მარტო გუშინდელი დღე არ იყო გასაკვირი. სულ ცოტა ხნის სახალხო დამცველი ავირჩიეთ, თან ავირჩიეთ ოპოზიციური პარტიიდან და იქაც კი არ იყო მხარდაჭერა და თვითონ სახალხო დამცველმა შემდეგ მადლობა გადაუხადა იმ მხარდამჭერებს და იქვე თქვა, რა ბულინგი გაიარეს მისმა მხარდამჭერებმა ოპოზიციური პარტიებიდან. ახლა ვიღაცები ამბობენ, რომ კენჭისყრაზე ტექნიკური შეცდომა იყო, მაგრამ ფაქტია, რომ 2020 წელს რა რაოდენობით შემოვიდა „ნაციონალური მოძრაობა“ პარლამენტში, დღეს პრაქტიკულად განახევრებულია და სწორედ ეს მიანიშნებს იმას, რომ დარჩენილი 20-მდე დეპუტატი, შესაძლოა ხვალ, ზეგ სხვადასხვა პარტიაში თუ პოლიტიკურ ჯგუფში ვიხილოთ“, – განაცხადა ზაალ მიქელაძემ.

მიკვირს ნებისმიერი ადამიანის დამოკიდებულება, რატომ შეიძლება ერთ შემთხვევაში სულ რაღაც სამი-ოთხი წლის წინ ითხოვდე, რომ რუსეთმა მოხსნას სანქცია, ხოლო შემდეგ ამას ნეგატიურად აფასებდე, თან საქართველოს ხელისუფლების წინააღმდეგ ნარატივში გადგებოდეს, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

როგორც მამუკა მდინარაძემ აღნიშნა, რუსეთმა, პუტინმა სანქციები ცალმხრივად დააწესა და ყველა, ქართველები, ამერიკელები, დიპლომატიური კორპუსი ითხოვდა სანქციების მოხსნას, მოხსნეს და ახლა ამბობენ, თურმე, სანქციები საქართველომ უნდა დააწესოს.

„შეუძლებელია, ამაში სწორი ლოგიკა იპოვოთ. ოპოზიციის პასუხია, რომ პოზიციის შეცვლა ომმა განაპირობაო. ეს იმას ნიშნავს, რომ 2008 წლის საქართველოს ომი ომად არ მიაჩნიათ, თურმე, მხოლოდ უკრაინის ომია ომი და საქართველოში რუსეთის მიერ ომი არ ყოფილა. არ შეიძლება, ასეთი მსჯელობა და ასეთი დამოკიდებულება საკუთარი სამშობლოს მიმართ. ომი, რომელიც ყველაზე მეტად გვეტკინა, 2008 წელს იყო, რომლის შემდეგადაც, ეს ხალხი რუსეთის ფედერაციასთან ურთიერთობის ნორმალიზებაზე ლაპარაკობდა.

საქართველოს ხელისუფლებამ რუსეთს სავიზო რეჟიმი ცალმხრივად გაუუქმა და იგივე ხელისუფლების წარმომადგენლები საუბრობენ, რომ საქართველომ უნდა დაუწესოს სავიზო რეჟიმი საკუთარ მოქალაქეებს. დღეს, რაც არ უნდა გასაოცარი იყოს, 108 NGO შეკრებილა და უთქვამთ, რომ დიახ. სანქციები უნდა დაწესდესო. საკუთარი მოქალაქეების მიმართ სანქციების დაწესებას ითხოვენ მაშინ, როდესაც იმ ხალხიდან ბევრი იმ ხელისუფლების ნაწილი იყო, ბევრი გაგრძელება იყო და ბევრი მათ პათოსს დღეს იზიარებს. მათ ნარატივზე სხედან. თურმე, 2019 წლის შემდეგ, როცა ჩვენ და პარტნიორები ერთად სანქციების მოხსნას ვითხოვდით, იმით შეცვლილა, რომ ომი ყოფილა. თურმე, 2008 წლის ომი ომად არ მიაჩნდათ. ანუ, უკრაინის ომი ვიღაცებისთვის ომია და საქართველოს ომი – არა. გუშინ ერთ-ერთი ჩვენი კოლეგა ქალბატონი ბრძანებდა, პროუკრაინული უნდა გახდეს საქართველოს ხელისუფლებაო. დიახ, ზოგადად, ამ ქვეყანაში ყველა პროდასავლური უნდა იყოს, მაგრამ უპირველესად, პროქართული უნდა იყო და ამის შემდეგ პროდასავლური“, – განაცხადა მდინარაძემ.

სტრასბურგის სასამართლოსთან დაკავშირებით საერთოდ არავის აქვს რაიმე სახის კითხვა. აქ წარდგენილი იყო პოზიციები, როგორც მოსარჩელის მხრიდან, ასევე საპასუხო პოზიციები ჩვენი მხრიდან, ამ საკითხზე საერთოდ ბუნებრივია, კითხვა არავის გააჩნია, – ამის შესახებ იუსტიციის მინისტრმა, რატი ბრეგაძემ განაცხადა.

როგორც მინისტრმა საქართველოში აკრედიტებული საელჩოების წარმომადგენლებთან გამართული შეხვედრის შემდეგ განაცხადა, სტრასბურგის სასამართლო გადაწყვეტილებას იღებს მტკიცებულებების საფუძველზე და ხელმძღვანელობს სამართლებრივი ნორმებით და არა პოლიტიკური აღქმებით და შთაბეჭდილებებით.

„ჩვენ ახსნა-განმარტებებს არ ვაკეთებთ, ჩვენ გვაქვს დიალოგი ჩვენს მეგობარ სახელმწიფოებთან, მათ შორის იმ ქვეყნების დიპლომატიური კორპუსის წარმომადგენლებთან, საითკენაც მიილტვის საქართველო და ეს არის ევროკავშირი. ეს ყველასთვის ცხადია. კონკრეტულ მოთხოვნაზე, რომ მსჯავრდებული სააკაშვილი სამკურნალოდ ყოფილიყო ვარშავაში დაუყოვნებლივ, ამაზე იყო პასუხი და ეს არის საბოლოო გადაწყვეტილება ამ საკითხის. დანარჩენ სარჩელს რაც შეეხება, როდესაც დაცვის მხარე წარადგენს სარჩელს, როდესაც სასამართლო გამოგვიგზავნის ჩვენი პოზიციების მისაწოდებლად, მერე ვისაუბრებთ ამ საკითხზე. რაც შეეხება გადაწყვეტილებას, პოლონეთში მსჯავრდებულ სააკაშვილის გადაყვანაზე, ეს გადაწყვეტილება ნამდვილად არის საბოლოო“, – განაცხადა ბრეგაძემ.

იუსტიციის სამინისტროში საქართველოში აკრედიტებული დიპლომატიური კორპუსის წარმომადგენლები რატი ბრეგაძეს შეხვდნენ.