50 წელიწადი ველოდებოდი ამ დღეს, როდესაც ვიგრძნობდი, რომ მე ვარ იმ ქვეყნის წარმომადგენელი, რომლისთვისაც სუვერენიტეტი, თვითმყოფადობა, ღირებულებები, რომელზეც ეს ქვეყანაა დაფუძნებული, იქნება პრიორიტეტული და რა თქმა უნდა, იმ ხალხის აზრი და ნება, რომელიც ხელისუფლების არჩევას, ქვეყნის ბედსა და მომავალს განაპირობებს, – ამის შესახებ კინორეჟისორმა, გოგა ხაინდრავამ გადაცემაში „იმედი LIVE“ განაცხადა. მისი თქმით, იმ შეუპოვრობით, რა შეუპოვრობითაც საქართველო თავის ინტერესებს მსოფლიოში იცავს, აღმოჩნდა, რომ ეს ამით გამორჩეული ქვეყანაა. „ნაციონალიზმი, ეროვნული თვითმყოფადობა, სუვერენიტეტი და ეროვნული ინტერესები მთელს მსოფლიოში იმარჯვებს. ეს არის ცალსახა. საქართველო არის ყველაზე კარგი მაგალითი. ეს არის ძალიან პატარა ქვეყანა. მე ბევრჯერ მომიწია ურთიერთობა სხვადასხვა ქვეყნის წარმომადგენელთან, პოლიტიკოსთან, ბევრს ვიცნობ და მათგან არაერთხელ მომისმენია ბოლო პერიოდში, რომ იმას, რასაც თქვენ ვბედავთ, მსოფლიოში ვერავინ ვერ ბედავსო, პირდაპირ ითქვა. შედარება ჩვენი და თურქეთის 86 მლნ-იანი ქვეყნის, რომელიც ფაქტობრივად რეგიონული ლიდერია და ნატოში სიდიდით მეორე ჯარი ჰყავს და დღეს შესაძლოა, პირველიც კი და საქართველო, ქვეყანა, სადაც 4 მლნ ცხოვრობს. რა თქმა უნდა, ეს სხვადასხვა წონითი კატეგორიებია, თუმცა იმ შეუპოვრობით, რა შეუპოვრობითაც საქართველო თავი ინტერესებს მსოფლიოში იცავს, აღმოჩნდა, რომ ეს გამორჩეული ქვეყანაა და ეს ძალიან მნიშვნელოვანია. ბოლო პერიოდში ვამბობდი კიდევაც, რომ 50 წელიწადი ველოდებოდი ამ დღეს, როდესაც ვიგრძნობდი, რომ მე ვარ იმ ქვეყნის წარმომადგენელი, რომლისთვისაც სუვერენიტეტი, თვითმყოფადობა, ღირებულებები, რომელზეც ეს ქვეყანაა დაფუძნებული, იქნება პრიორიტეტული და რა თქმა უნდა, იმ ხალხის აზრი და ნება, რომელიც ხელისუფლების არჩევას, ქვეყნის ბედსა და მომავალს განაპირობებს“, – განაცხადა ხაინდრავამ.

კოლექტიური „ნაცმოძრაობის“ შუაშისტებად პოზიციონირება სრული სიყალბე იქნება, – ამის შესახებ „ქართული ოცნების“ თავმჯდომარემ, ირაკლი კობახიძემ „იმედის კვირას“ „ნაციონალური მოძრაობასთან“ დაახლოებულ, რადიკალურ ოპოზიციაზე საუბრისას განუცხადა. „ჩვენ ვხედავთ, რომ არსებობს პარტია „ნაციონალური მოძრაობა“ – კეზერაშვილი-მერაბიშვილი-ხაბეიშვილი და არსებობენ „ნაცმოძრაობასთან“ პირდაპირ დაკავშირებული პოლიტიკური ძალები. ეს არის იგივე „გირჩი“, „ლელო“, გახარიას პარტია, ვაშაძე და ასე შემდეგ. ეს არის კოლექტიური „ნაცმოძრაობა“, რომელიც შესაძლოა, დააპოზიციონიროს ვიღაცამ, როგორც ფსევდო შუაშისტური პოლიტიკური ძალა. საზოგადოების მხრიდან ეს არ იქნება სწორი აღქმა, თუ ისინი იქნებიან აღქმული შუაშისტებად. სინამდვილეში, ეს ყველა არის „ერთიანი ნაციონალისტური მოძრაობა“, კოლექტიური „ნაცმოძრაობა“ და მათი შუაშისტებად პოზიციონირება სრული სიყალბე იქნება“, – განაცხადა კობახიძემ.

ხან ტალახიდან, ხან ნაფთალინიდან, ხან პოლიტიკური ნაგვიდან, პერიოდულად ვიღაცები წამოყოფენ თავს და კვლავ ისევ დაპირისპირებაზე, სისხლისღვრაზე, შეჯახებებზე საუბრობენ, როგორც ამას სააკაშვილი აკეთებდა, – ამის შესახებ პარლამენტის პირველმა ვიცე-სპიკერმა, გიორგი ვოლსკიმ „იმედის კვირას“ გივი თარგამაძის ცნობილ მუქარაზე, ასევე, რადიკალური ოპოზიციის ჩაშლილ გეგმებზე საუბრისას განუცხადა.

„გივი თარგამაძეზე ამდენი საუბარი არ ღირს, თორემ გივი თარგამაძეა მთლიანობაში ყველა. შესაძლოა, ოდნავ უკეთესია, ვიდრე ვთქვათ, ლევან ხაბეიშვილი. რითაც თავი დაგვამახსოვრა, ეს არის „სულს ამოგხდით!“, რითაც ცდილობს რომ თავი დაგვამახსოვროს ამან (ხაბეიშვილმა), ეს არის „ქურქუმალ ვაითი“ – მეტი არაფერი. ამის უკან არც ინტელექტი დევს, არც კუნთი, არც ძალა, მხოლოდ პროვოცირების ასეთი დაუოკებელი, გააფთრებული ჟინი და ინტერესი.

არ ვიცი რა ვუწოდო: ხან ტალახიდან, ხან ნაფთალინიდან, ხან პოლიტიკური ნაგვიდან, პერიოდულად ვიღაცები წამყოფენ თავს და კვლავ ისევ დაპირისპირებაზე, სისხლისღვრაზე, შეჯახებებზე საუბრობენ, როგორც ამას სააკაშვილი აკეთებდა ჩვეულებრივად, მათ შორის უკრაინიდან გეგმავდა ასეთი განვითარების ორგანიზებას საქართველოში“, – განაცხადა ვოლსკიმ.

„ნაციონალური მოძრაობის“ მხარდამჭერი გარკვეული ჯგუფები ამერიკიდან ცდილობენ საქართველოში პოლიტიკურ ავანსცენაზე გამოიყვანონ ახალი აქტორები, რომლებსაც საზოგადოება შეცდომაში შეჰყავთ, თითქოს ისინი არიან დამოუკიდებლები.

„შეიძლება რაღაც მომენტში, ახალმა პერსონაჟმა გარკვეული ვნებათაღელვა გამოიწვიოს, მაგრამ ცოტა ხანში ყველაფერი ჩაჯდება კალაპოტში. საზოგადოება დაინახავს, რომ ეს არის ამ სქემის ნაწილი. როცა ლომჯარია ამბობს, რომ ურჩევნია თავზე ბომბები სცვიოდეს, ვიდრე ასეთი სირცხვილი გადაიტანოს, ჯერ ერთი, არავის სჯერა ამისი და მეორე – არავის უნდა ეს. არავის უნდა, თავზე ბომბები სცვიოდეს. იმიტომ რომ არის ომის დრო, არის მშვიდობის დრო. ჩვენთვის ახლა დადგა მომენტი, როდესაც შეიძლება აყვავება, სტაბილურობა, ეკონომიკური სარგებლიანობა. ვინც იქნება ამის წინააღმდეგი, რა თქმა უნდა, გაირიყება პოლიტიკური ცხოვრებიდან, როგორც დღეს „ნაცმოძრაობა“, – აცხადებს შათირიშვილი.

ფილოსოფოსის წერილში მოხვდა სალომე ზურაბიშვილიც, რომელიც „ეროვნული თანხმობის“ პროცესს ჩაუდგა სათავეში, ვიქტორ ყიფიანი, რომელიც წარსულის დავიწყება საუბრობს/ შათირიშვილი ამბობს, რომ „ნაციონალურ მოძრაობასთან“ მსგავსი კომპრომისი საზოგადოების ღალატს და საქართველოში იმ ძალების გამარჯვებას ნიშნავს, რომლებსაც დღეს საქართველოში მეორე ფრონტის გახსნა სურთ.

„საზოგადოებასა და ფართო გაგებით „ნაცმოძრაობას“ შორის მოლაპარაკება და მორიგება შეუძლებელია. ეს არის ძალა, რომელიც წარსულში გვექაჩება. დღეს არ არის ის სიტუაცია, რომელიც 2022 წლამდე იყო. 2022 წელს დაიწყო ომი და არის 2 ვარიანტი: ამ ომში ან უნდა ჩაერთო ან არ უნდა ჩაერთო“, – დასძინა შათირიშვილმა.

ერთ რამეს ვაღიარებ, „ქართულ ოცნებაში“ რომ ნგრევის და რღვევის პროცესი დაწყებულია, ეს კი, ნამდვილად „ნაციონალური მოძრაობის“ ბრალია , – ასე გამოეხმაურა „ერთიანი ნაციონალური მოძრაობის“ რეგიონული მდივანი, გიორგი ბოტკოველი „ქართული ოცნების“ თავმჯდომარის, ირაკლი კობახიძის განმარტებას, თუ რატომ არ ესწრებოდა 26 მაისის ღონისძიებას. „სასაცილოდ გამოიყურება ეს ყველაფერი ახლა, რას გვაბრალებს ირაკლი კობახიძე ვერ მივხვდი, მას ვარჯიში ჩვენ დავაწყებინეთ და მერე გადავიღეთ, თუ თვითონ დაიწყო ვარჯიში და მერე გადავიღეთ?! სამარცხვინოა ასეთი განცხადებები. უკვე აღარც იმალება ის პროცესი, რომ „ქართულ ოცნებაში“ ნგრევის პროცესი დაწყებულია, რაც ქვეყნისთვის სასარგებლოა. კობახიძე ივარჯიშებს, თუ არ ივარჯიშებს, ეს ნამდვილად არ აინტერესებს ამ ქვეყნის მოსახლეობას, მაგრამ ერთ რამეს ნამდვილად ვაღიარებ, „ქართულ ოცნებაში“ რომ ნგრევის და რღვევის პროცესი დაწყებულია, იშლება და ერთმანეთს ჭამენ, ეს კი ნამდვილად „ნაციონალური მოძრაობის“ ბრალია“, – განაცხადა გიორი ბოტკოველმა