ნება მომეცით, მკაფიოდ განვაცხადო, ეს არაპროვოცირებული და გაუმართლებელი ომი რუსეთმა დაიწყო. ის უმიზეზოდ შეიჭრა უკრაინაში, რათა ქვეყანა რუკიდან წაეშალა, – ამის შესახებ უკრაინაში მიმდინარე ომზე საუბრისას ევროკომისიის პრეზიდენტმა, ურსულა ფონ დერ ლაიენმა ბრატისლავას უსაფრთხოების ფორუმზე GLOSEC-ზე გამოსვლისას განაცხადა. მისი თქმით, უკრაინაში ომი აშკარა თავდასხმაა გაეროს ქარტიის პრინციპებზე. ფონ დერ ლაიენის განცხადებითვე, ესაა აგრეთვე ომი „ჩვენი ღირებულებებისა და გაერთიანებული და თავისუფალი ევროპის წინააღმდეგ“.

„პირველად ჩვენს ისტორიაში, ქვეყანა თავდასხმის ქვეშაა მისი სურვილის გამო, იყოს ევროპული ოჯახის ნაწილი“, – განაცხადა ურსულა ფონ დერ ლაიენმა.

ევროკომისიის პრეზიდენტის თქმით, უკრაინელები ასევე იბრძვიან „ჩვენი თავისუფლებისთვის, ჩვენი ღირებულებებისთვის – დემოკრატიისთვის, კანონის უზენაესობისთვის, სიტყვის თავისუფლებისთვის, საკუთარი ბედის დამოუკიდებლად განსაზღვრის უფლებისთვის“.

„აი, ამისთვის იბრძვის უკრაინა და პრეზიდენტი პუტინი ამის ჩახშობას ცდილობს“, – აღნიშნა ურსულა ფონ დერ ლაიენმა.

ევროკომისიის პრეზიდენტის თქმითვე, უკრაინელი ხალხი წლების განმავლობაში იყო ევროკავშირისკენ უკრაინის სვლის არქიტექტორი, რომელიც მათ არაერთხელ დაადასტურეს თავიანთი სიმამაცით და თავდადებით.

„აქ, “გლობსეკზე”, როგორც მესმის, ამ ომის მიზეზებს განვიხილავთ, ნება მომეცით, მკაფიოდ განვაცხადო, ეს არაპროვოცირებული და გაუმართლებელი ომი რუსეთმა დაიწყო. ის უმიზეზოდ შეიჭრა უკრაინაში, რათა ქვეყანა რუკიდან წაეშალა. რუსეთი უარს ამბობს მიიღოს უკრაინა როგორც დამოუკიდებელი სახელმწიფო, თუმცა უკრაინელების ნებამ, იბრძოლონ და იყვნენ თავისუფლები, გააოცა მთელი მსოფლიო”, – აღნიშნა ევროკომისიის პრეზიდენტმა.

ევროსაბჭოს რეზოლუციაში წერია, რომ სააკაშვილმა დაიწყო ომი. „ნაცმოძრაობას“ ჰკითხეთ, სიმართლეზე მოაწერეს ხელი თუ არა, – ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.

ირაკლი კობახიძის თქმით, 7 აგვისტოს რა მოხდა, ამ საკითხზე დეტალებში შესვლა არ სურს.

„ნაცმოძრაობას“ რეზოლუციაზე ხელი აქვს მოწერილი, სადაც ამბობდნენ, რომ მათ დაიწყეს ომი. მოქმედი პრეზიდენტი, რომელსაც დღეს ბრიუსელში გამოსვლა აქვს, ამტკიცებდა, რომ ომი სწორედ სააკაშვილმა დაიწყო. ამაში მე არ შევდივარ. თქვენ ჰკითხეთ „ნაცმოძრაობას“, სიმართლე იყო თუ არა ის, რაზეც ხელი მოაწერეს. აქვე გეუბნებით, რომ ამაზე მე არ გპასუხობთ. „ნაცმოძრაობას“ ჰკითხეთ, სიმართლეზე მოაწერეს ხელი თუ არა, სიმართლე იყო თუ არა ის, რომ სააკაშვილმა დაიწყო ომი 7 აგვისტოს. ევროსაბჭოს რეზოლუციაში წერია, რომ სააკაშვილმა დაიწყო ომი, ან სიმართლე იყო, ან ღალატად ჩაითვლება“, – განაცხადა ირაკლი კობახიძემ.

მედიის წარმომადგენელმა კობახიძეს მიმართა, რომ „ნაციონალებს“ არგუმენტი აქვთ, რომ რეზოლუციას ხელი მოაწერეს, რადგან იქ სხვა მნიშვნელოვანი საკითხები იყო. კობახიძის თქმით, ეს არგუმენტი არ არის.

„მადლობა, რომ ოკუპაცია ჩაიწერა. სინამდვილეში, ხომ ეს არგუმენტი არ არის? წარმოიდგინეთ, უკრაინაში ომი ხვალ რომ დასრულდეს და ზელენსკიმ ხელი მოაწეროს რეზოლუციას, სადაც თან ოკუპაცია ეწერება და თან უკრაინის მიერ ცეცხლის გახსნას რუსეთ-უკრაინის ომის დაწყება მოჰყვა. ეს ხომ ღალატია? მაშინ, იქ რატომ არ იყო ღალატი? საქმე მარტივად არის – მაშინ „ნაცმოძრაობამ“ ან სიმართლე თქვა და თავად დაუწყიათ ომი, ასე გამოდის, ან ჩაიდინეს ღალატი. რატომ არ ეკითხებით ამას „ნაცმოძრაობას“? რეზოლუციაში ან ჩაიწერა ღალატი, ან მათ დაწერეს ის, რაც გააკეთეს. მესამე ვარიანტი არ არსებობს. თქვენ ამაზე „ნაცმოძრაობას“ კითხვებს არ უსვამთ. კითხვას საკუთარ თავსაც არ უსვამთ, რადგან „ნაცობა“ გონების დაბინდვას ნიშნავს. ზუსტად იცით, რომ „ნაცმოძრაობამ“ ხელი მოაწერა ან სიმართლეს, ან ღალატი ჩაიდინა და ამას ეგუებით, რადგან „ნაცობა“ გონების დაბინდვას ნიშნავს. ადამიანს ამის ანალიზის საშუალება როცა გაქვს, „ნაცი“ ვეღარ იქნები. სალომე ზურაბიშვილს რატომ არ ეკითხებით, რა მოხდა 2008 წლის 7 აგვისტოს?“, – განაცხადა ირაკლი კობახიძემ.

ირაკლი კობახიძის თქმით, როცა სალომე ზურაბიშვილმა თქვა, რომ ომი სააკაშვილმა დაიწყო, მაშინ მოღალატე იყო, ხოლო ახლა პირველი ევროპელია. მისივე თქმით, ჟურნალისტებმა სალომე ზურაბიშვილს უნდა მიმართონ კითხვით, რატომ თქვა, რომ ომი სააკაშვილმა დაიწყო.

„ახლა სალომე ზურაბიშვილი პირველი ევროპელი და პირველი ნატო-ელია. მაშინ იყო მოღალატე და ახლა არის პირველი ევროპელი და პირველი ნატოელი. ამიტომ არის საინტერესო, მისთვის ამ კითხვის დასმა, თუმცა არ უსვამთ. პირობა მომეცით, რომ დაუსვამთ. ზელენსკიმ ხვალ რომ ხელი მოაწეროს, ეს არგუმენტი იქნება – მადლობა, რომ ოკუპაცია ჩამიწერეთო, ეს ხომ სირცხვილია? ისიც პირველად დაფიქსირდა, რომ ომი სააკაშვილმა დაიწყო და ამას მოაწერეს ხელი. სირცხვილი და ღალატი არ არის, რომ სააკაშვილმა მოაწერა ხელი? ამის საპირწონეა ოკუპაცია? – ოკუპაცია უკვე აღიარებული იყო, ეს იყო ჩვეულებრივი ფაქტი. ამის პარალელურად, სააკაშვილმა ხელი მოაწერა რეზოლუციას, სადაც ჩაწერა, რომ ომი თავად დაიწყო. ეს არის ან ფაქტის აღიარება, ან ღალატი. ჩვენ ამაში საერთოდ არ შევდივართ და ამ თემას ვერიდებით. ორი სუბიექტია, ვინც „ნაცმოძრაობას“ ომის დაწყებას აბრალებს – თავად „ნაცმოძრაობა“ და საქართველოს მოქმედი პრეზიდენტი. კითხვებს არც ერთს არ უსვამთ. მე მეკითხებით და მათ ჰკითხეთ. სალომე ზურაბიშვილს ჰკითხეთ, რატომ თქვა, რომ ომი სააკაშვილმა დაიწყო. სალომე ზურაბიშვილს აქვს რწმენა, რომ მაშინ სააკაშვილმა დაიწყო ომი და „ნაცმოძრაობამ“ ხელი მოაწერა იმას, რომ ომი თავად დაიწყეს. ეს არის ან ღალატი, ან ფაქტის კონსტატაციაა“, – განაცხადა კობახიძემ.

ირაკლი ღარიბაშვილმა სწორად თქვა, რომ ჩვენი ხელისუფლების პირობებში 2008 წლის ომი არცერთ შემთხვევაში არ იქნებოდა, რადგან ყველამ კარგად ვიცით, რა მასშტაბის ავანტიურაზე წავიდა მიხეილ სააკაშვილი, მათ შორის, როცა აღადგინა სამხრეთ ოსეთის საზღვრები, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

მისი თქმით, „ნაციონალური მოძრაობა“ დღეს რომ ხელისუფლებაში ყოფილიყო, თბილისში რუსული ტანკები იდგებოდა.

„ნებისმიერი ხელისუფლების ერთ-ერთი მთავარი საზრუნავია, რომ ჰქონდეს რაციონალური და პრაგმატული პოლიტიკა, რომელიც ქვეყანას საფრთხეებს თავიდან ააცილებს. ამისთვის არსებობენ უსაფრთხოების სამსახურები, უსაფრთხოების პოლიტიკა და ა.შ. რა თქმა უნდა, ჩვენ ვართ უმძიმეს რეგიონში, უმძიმეს სამეზობლოში და ასეთ დროს არის რისკები. ყველა ხელისუფლების პასუხისმგებლობაა, ქვეყანას ეს რისკები თავიდან ააცილოს, რაც სამი სხვადასხვა ხელისუფლების პირობებში ვერ მოხერხდა იქიდან გამომდინარე, რომ შეცდომები იქნა დაშვებული. ირაკლი ღარიბაშვილმა სწორად თქვა, რომ ჩვენი ხელისუფლების პირობებში 2008 წლის ომი არცერთ შემთხვევაში არ იქნებოდა, რადგან ყველამ კარგად ვიცით, რა მასშტაბის ავანტიურაზე წავიდა მიხეილ სააკაშვილი, მათ შორის, როცა აღადგინა სამხრეთ ოსეთის საზღვრები. 90-იანი წლების დასაწყისში კატასტროფული შეცდომები იყო დაშვებული, რასაც მაშინ ყველა აღიარებდა და ეს დღემდე აღიარებულია. 90-იანი წლების დასაწყისში საზოგადოებაც არ იყო მომზადებული სახელმწიფოებრიობისთვის, უამრავი კატასტროფული შეცდომა იყო დაშვებული, რამაც გამოიწვია ის უმძიმესი შედეგები, რაც არ დამდგარა სხვა საბჭოთა რესპუბლიკებში. მაშინდელი პრობლემების ერთ-ერთი მთავარი მიზეზი იყო კატასტროფული შეცდომები, რომლებიც იყო დაშვებული კონკრეტული ადამიანების მხრიდან. ამას მოჰყვა 1991-93 წლებში უმძიმესი პრობლემები. 2008 წელზე საუბარი საერთოდ არ მინდა. უმძიმესი ავანტიურა იყო, რაზეც მიხეილ სააკაშვილი წავიდა. გახსოვთ, რომ შემდეგ ხელი მოაწერა რეზოლუციას, სადაც მითითებული აქვს, რომ მან დაიწყო ომი ცხინვალში. ამას ხელი თავად მოაწერა. 2008 წელს არცერთ შემთხვევაში საქართველოში ომი არ იქნებოდა, მაშინ ხელისუფლებაში „ქართული ოცნება“ რომ ყოფილიყო. რუსეთი არის პრობლემა და პრობლემას მუდმივი მუშაობა სჭირდება. უსაფრთხოების დაცვა გჭირდება არა უწყინარი ქვეყნებისგან, არამედ პირველ რიგში, პრობლემური მეზობლებისგან. სწორი პოლიტიკა უნდა გქონდეს, რათა თავი დაიცვა არა უწყინარი ქვეყნებისგან, არამედ პირველ რიგში, სწორედ პრობლემური მეზობლებისგან. „ნაციონალური მოძრაობა“ დღეს რომ ხელისუფლებაში ყოფილიყო, თბილისში რუსული ტანკები იდგებოდა“, – განაცხადა ირაკლი კობახიძემ.

კითხვაზე, „როგორ აიცილებდით თავიდან?“, – ირაკლი კობახიძე პასუხობს: „ჩვენ არ აღვადგენდით სამხრეთ ოსეთის საზღვრებს, არ გვექნებოდა მძიმე რიტორიკა ტერიტორიების დაბრუნებასთან დაკავშირებით. ის ტერიტორიების დაბრუნებაზე პირდაპირ დაპირებებს გასცემდა. დევნილებს დაჰპირდა, რომ მომავალ ახალ წელს აფხაზეთში შეხვდებოდნენ. მას უმძიმესი რიტორიკა ჰქონდა. სამხრეთ ოსეთის საზღვრები აღადგინა. გარდა ამისა, კოდორის ხეობას ზემო აფხაზეთი უწოდა. ცხინვალის რეგიონში ალტერნატიული სეპარატისტული არჩევნები ჩაატარა. ერთდროულად ორი სეპარატისტული არჩევნები ჩატარდა – ერთი იყო სააკაშვილის მიერ მხარდაჭერილი“.