მეტ ნაკლებად იყო დაბალანსებული გამოსვლა – ამის შესახებ დავით მათიკაშვილმა მედიასთან პრეზიდენტ სალომე ზურაბიშვილის განცხადების შეფასებისას განაცხადა. ,,ეს იყო მეტ ნაკლებად დაბალანსებული გამოსვლა და ტრიბუნა იქნა გამოყენებული იმისთვის, რომ ჩვენი ქვეყნის ევროპული არჩევანი კიდევ უფრო ხაზ გასმულიყო. თუმცა, აქვე ისიც შეიძლება ითქვას, რომ ანალოგიური ტონალობა, სიტყვათა წყობა და ა.შ. არამხოლოდ ევროპული ტრიბუნიდან უნდა ჟღერდეს, არამედ საქართველოში არსებული ტრიბუნებიც იმსახურებს, რომ ანალოგიურად მოხდეს პრეზიდენტის მხრიდან იმის გაჟღერება, რაც მართლა ჩვენი ქვეყნის სურვილიც, დამსახურებაც და სწრაფვაც არის” – განაცხადა მათიკაშვილმა.

სინამდვილეში, რაც არ უნდა ეაქტიურა პარტიას, პარტიის აქტიურობით მიხეილ სააკაშვილს დახსნა იყო შეუძლებელი – ამის შესახებ პარლამენტის წევრმა რომან გოცირიძემ მედიასთან განაცხადა. ,,მარტივად უნდა ვთქვათ, შეეძლო თუ არა პარტიას მეტი გაეკეთებინა? კი. ეს მეტი გაკეთება გამოუშვებდა თუ არა სააკაშვილს ციხიდან ? არა… ხომ ვიცით შიდა სამზარეულო. ვინ დაგშალა, ორი კაცი არ რჩებოდა ღამით. ვინც ყველაზე მეტად აკაკუნებდა ფეისბუქზე, რატომ დაგვშალეთ, რისთვის დაგვშალეთ. ერთხელ დავრჩით და შვიდი კაცი იყო ღამე… თუ დარჩენა დაიშლებოდა ორ დღეში, მაშინ იქნებოდა სასაცილო და პირიქით, უსუსურობის გამოხატულება იქნებოდა. შიდა პარტიულ ბრძოლაში ყოველთვის ისმოდა შენ რატომ არ აკეთებ მეტს? ახლა გაისმის სააკაშვილს დავიხსნით, ფიზიკურად შევვარდებით ,,ვივამედში” და რატომ არ შევარდებით? ეს არის შიდაპარტიული ბრძოლის ნაწილი და იყენებენ ძალაუფლების მოპოვებისთვის. სინამდვილეში, რაც არ უნდა ეაქტიურა პარტიას, პარტიის აქტიურობით მიხეილ სააკაშვილს დახსნა იყო შეუძლებელი, მაგრამ პარტიის აქტიურობა ქმნიდა საერთაშორისო და შიდა კლიმატს”, – განაცხადა რომან გოცირიძემ.

სენატის ყოფილი თანამშრომელი ტარა რედი ჯო ბაიდენი სექსუალურ ძალადობაში ადანაშაულებს.

მისი თქმით ძალადობის  ფაქტი 1993 წელს მოხდა. 2020 წელს არჩევნების დროს ეს ფაქტი ამოტივტივდა და მაშინ ბაიდენმა ძალადობა უარყო. როგორც რედი ამბობს, ახლა კვლავ დაიწყო მუქარები და ის იძულებული გახდა მოსკოვში წამოსულიყო და თავშესაფარი  რუსეთის მთავრობისათვის ეთხოვა.

მისი თქმით, ის თავს დაცულად აღარ გრძნობს ამერიკაში.

პარლამენტის პლენარულ სხდომაზე მესამე მოსმენით განიხილეს და 81 ხმით დაუჭირეს მხარი საქართველოს მთავრობის მიერ ინიცირებულ კანონპროექტს „იარაღის შესახებ კანონში“ ცვლილებების შეტანის თაობაზე.

პროექტით ახლებურად გაიწერა იარაღთან დაკავშირებული რეგულაციები; კერძოდ: თავდაცვის იარაღად ჩაითვლება ცეცხლსასროლი იარაღი, რომლის საერთო სიგრძე 55 სანტიმეტრზე ნაკლებია, ხოლო ყველა სხვა იარაღი, რომლის სიგრძე აღემატება 55 სანტიმეტრს ჩაითვლება სანადირო იარაღად. ასევე პოლიციას ექნება უფლებამოსილება ადგილზე მივიდეს და შეამოწმოს რამდენად იცავს იარაღის მფლობელი იმ წესებს, რაც დადგენილია იარაღის შენახვისთვის და თუკი სახლში არ მოხდება პოლიციელის დაშვება, ამ შემთხვევაში, ეს ადამიანი ვალდებული იქნება 7 დღის ვადაში თავად წარადგინოს პოლიციაში მის საკუთრებაში არსებული იარაღები.

პარლამენტის წევრების, რომან გოცირიძის და ხატია დეკანოიძის მიერ საკანონმდებლო ინიციატივის წესით წარმოდგენილ კანონპროექტს „საქართველოს პარლამენტის რეგლამენტში ცვლილების შეტანის შესახებ“, პარლამენტმა მესამე მოსმენით, 89 ხმით მხარი დაუჭირა.

წარმოდგენილი პროექტის მიხედვით, რეგლამენტში ცვლილების შედეგად პოლიტიკური ჯგუფის შექმნის შესაძლებლობა ექნებათ უფრაქციო პარლამენტის წევრებს, რომლებმაც დატოვეს შესაბამისი პოლიტიკური პარტიის ან საარჩევნო ბლოკში შემავალი პარტიის წევრობა, რის საფუძველზეც, ისინი შეძლებენ უკეთ განახორციელონ საპარლამენტო საქმიანობა და 2024 წლის არჩევნებში არჩეული პარლამენტის უფლებამოსილების ცნობამდე, ისარგებლონ პარლამენტის პოლიტიკური ჯგუფისთვის რეგლამენტის შესაბამისად მინიჭებული უფლებამოსილებებით.