მე არ ვეთანხმები არცერთ ჩემს კოლეგას ოპოზიციიდან, ვინც დღეს რიგგარეშე არჩევნებზე საუბრობს ან საზოგადოებაში აღვივებს განცდას ან ქმნის ისეთ მოლოდინს, თითქოს ამ ქვეყანას არ ექნება კანდიდატის სტატუსი არავითარ შემთხვევაში, – ამის შესახებ ხათუნა სამნიძემ განაცხადა.

„რესპუბლიკური პარტიის“ ლიდერის თქმით, რეკომენდაციის შესასრულებლად დრო ჯერ კიდევ არის, ვადამდელ არჩევნებზე საუბარს კი პოლიტიკურ შეცდომად მიიჩნევს.

„რიგგარეშე არჩევნებზე საუბარი სერიოზული პოლიტიკურ შეცდომა მგონია და შეცდომაში შეყვანა როგორც საზოგადოების, ასევე ჩვენი საერთაშორისო პარტნიორების, რომლებიც ჩვენგან მოქმედებას ელოდებიან“, – მიიჩნევს სამნიძე.

კობა ნაყოფიას განცხადებით, მას ეჭვიც არ ეპარება, რომ „თუ საქართველო კანდიდატის სტატუსს ვერ მიიღებს, ვადამდელი არჩევნები იქნება – ოპოზიცია უნდა იყოს მზად და სტრატეგიულ საკითხებზე შეთანხმებული“.

“საზოგადოების, ერის, ბერის, ხელისუფლების ერთობამ მოიტანა ის შედეგი, რომ დღეს ჩვენს ქვეყანაში მშვიდობაა და ამ მონაპოვარს არცერთ შემთხვევაში არ დავთმობთ”, – ამის შესახებ კონსერვატიული პორტალის, “საქართველო უპირველეს ყოვლისას” დამფუძნებელმა,ვატო შაქარიშვილმა მედიაჰოლდინგ “კვირას” პრესკლუბში გამართულ პრესკონფერენციაზე განაცხადა.

შაქარიშვილმა 30 აპრილს, რესპუბლიკის მოედანზე დაგეგმილი აქციის მიზნებზე ისაუბრა.

“ წლებია, ქართული საზოგადოება თვალს ვადევნებთ, რომ ქართულ სახელმწიფოებრიობაზე, მის სუვერენიტეტზე, მის ყველა საყრდენ ღირებულებაზე ორგანიზებული შეტევა, თავდასხმები მიმდინარეობს, რაც, ცხადია, ქვეყნის გარედან იმართება. ამ პროცესს ქვეყნის შიგნით მეხუთე კოლონის სახით უამრავი აღმსრულებელი ჰყავს. ბრძოლა ქართული სახელმწიფოებრიობის, სუვერენიტეტის წინააღმდეგ კიდევ უფრო გაძლიერდა და ახალი მასშტაბები შეიძინა მას შემდეგ, რაც უკრაინაში ომი დაიწყო, მას შემდეგ, რაც საქართველომ უარი თქვა, სხვისი ინტერესების სამსხვერპლოზე საკუთარი ხელით საკუთარი ქვეყანა მიეტანა, რითაც ჩვენს მომავალ არსებობას კითხვის ნიშნის ქვეშ დააყენებდა. ამის გამო ქვეყნის გარედან მომდინარე ამ ბრძოლამ ახალი ძალა შეიძინა და ყველანაირი აკრძალული მეთოდის გამოყენებით მიმდინარეობს, ამაში ჩართულები არიან სერიოზული ძალები, რომლებსაც ჩვენს” დაუძინებელ მეგობრებს” ვუწოდებთ ხოლმე.
შესაბამისად, გასაგებია, რომ ამ ყველაფერმა საზოგადოებაში ძალიან სერიოზული აღშფოთება და წუხილი გამოიწვია. ჩვენ გვსურს, საზოგადოებამ კიდევ ერთხელ გააგონოს ყველას საკუთარი ხმა. ეს შეკრება იქნება გამოძახილი და ხმა იმ საზოგადოებისა, იმ უმრავლესობისა, რომელიც ყოველდღიურად საკუთარ საქმეში, ოჯახში საკუთარი საქმიანობით საკუთარ სახელმწიფოს, ქვეყანას , იმ ფუნდამენტურ ღირებულებებს იცავს, რაზეც ღრმად გვწამს, რომ ჩვენი ქვეყანაა დაშენებული. საუბარია იმ ფუნდამენტური ღირებულებების შენარჩუნებაზე, როგორიცაა ოჯახის ინსტიტუტი, ეკლესია, მორალი. გვწამს , რომ სწორედ ამ ღირებულებების შენარჩუნებით შეგვიძლია, შევინარჩუნოთ ჩვენი თვითმყოფადობა, გადავრჩეთ და განვითარდეთ. თუ რა შედეგები მოიტანა ერის, ბერის, სახელმწიფოს, ჩვენი ხელისუფლების ერთიანობამ, ვფიქრობ, ეს უკვე ხელშესახებია დღეს, როდესაც მსოფლიო ცეცხლის პირობებში ჩვენი ქვეყანა ფეხზე დგას. მის მიმართ ინტერესი იზრდება. ეს ყველაფერი კონვერტირდება ეკონომიკურ განვითარებაში, დოვლათის შექმნაში, ჩვენი ქვეყნის სტაბილურობის და მშვიდობის ნიადაგზე მყარად დადგომაში, რასაც ასე ებრძვიან. საზოგადოების, ერის, ბერის, ხელისუფლების ერთობამ მოიტანა ის შედეგი, რომ დღეს ჩვენს ქვეყანაში მშვიდობაა და ამ მონაპოვარს არცერთ შემთხვევაში არ დავთმობთ. ეს შეკრება ამ მიზანს მოემსახურება. საზოგადოება კიდევ ერთხელ მკაფიოდ გააჟღერებს მთავარ გზავნილს, რაც გამოიხატება შემდეგში, რომ საქართველოს, მის თაობებს არ უბრძოლიათ იმისთვის, რომ ბატონი გამოგვეცვალა. ბატონი მოსკოვში იჯდებოდა ბრიუსელში თუ ვაშინგტონში – ამ არჩევანს ქართული საზოგადოება არ აკეთებდა მაშინ, როდესაც საკუთარი სისხლით და შრომით თავისუფლებისა და დამოუკიდებლობისთვის იბრძოდა”, – განაცხადა შაქარიშვილმა.

მისივე თქმით, საზოგადოება მშვიდობას შეინარჩუნებს.

” ჩვენი ქვეყნის გარედან მომავალი განცხადებები დემოკრატიასთან დაკავშირებით ტყუილია და ფარსია. მათ ჩვენს ქვეყანაში არანაირი დემოკრატიის განვითარება არ სურთ, მათ სურთ საელჩოკრატიის დამყარება. ეს არ არის მხოლოდ საქართველოს ლოკალური პრობლემა. ამაზე ღიად ლაპარაკობს თურქეთი, ისრაელი სხვადასხვა ევროპული სახელმწიფო და ლიდერი. თურქეთის შს მინისტრმა გააკეთა განცხადება, რომ ევროპა რეალურად აშშ- ის საელჩოების მიერ იმართება. აშშ- ს სურს, საქართველოში – პატარა, მაგრამ დიდი ისტორიის კულტურის ქვეყანაში საელჩოკრატია შეინარჩუნოს, არც ხალხი გაითვალისწინოს, არც ამ ხალხის არჩეული ხელისუფლება და საერთოდ არავინ. ჩვენ მოგვიწოდებენ, რომ მათ ინტერესებს მოვემსახუროთ და თავიც შევწიროთ. ამას აკეთებენ ე.წ. რბილი ძალის მეშვეობით. უკრაინაში ომის დაწყების შემდეგ ეს რბილი ძალა საქართველოს წინააღმდეგ ღია დაპირისპირებად გადაიქცა. ეს ჩვენი ქვეყნის წინააღმდეგ შეთქმულებაა. ამას ქართული საზოგადოება მშვიდად ვერ უყურებს. სწორედ ამიტომაც, 30- ში შეიკრიბება. ჩვენ მშვიდობას შევინარჩუნებთ. არავის აქვს უფლება, კითხვის ნიშნის ქვეშ დააყენოს დღევანდელი ხელისუფლების ლეგიტიმაცია.ძალაუფლების წყარო ხალხია. ამ ხალხმა ბოლო საპარლამენტო არჩევნებში, 2020 წელს ამ ძალაუფლების დელეგირება სწორედ არსებულ ხელისუფლებაზე მოახდინა”, – განაცხადა შაქარიშვილმა.

მიგვაჩნია, რომ საქართველოს მომავალი წევრობა ევროკავშირსა და ნატო-ში არის არა მხოლოდ საქართველოს, არამედ ტრანსატლანტიკური გაერთიანების/საზოგადოების ინტერესიც. ევროპისთვის ეს არის შანსი და არა საფრთხე, –ამის შესახებ პოლონეთის საგარეო საქმეთა მინისტრმა ზბიგნევ რაუმ საგარეო საქმეთა მინისტრ, ილია დარჩიაშვილთან გამართული შეხვედრის შემდეგ განაცხადა.

მისივე თქმით, დღევანდელი სამუშაო ვიზიტი თბილისში ინტენსიური დიპლომატიური და პოლიტიკური კომუნიკაციის ელემენტი და გამოხატულებაა.

“მიგვაჩნია, რომ საქართველოს მომავალი წევრობა ევროკავშირსა და ნატო-ში არის არამხოლოდ საქართველოს, არამედ ტრანსატლანტიკური გაერთიანების/საზოგადოების ინტერესშიც. ევროპისთვის ეს არის შანსი და არა საფრთხე. იმისთვის, რომ ეს შანსი გამოვიყენოთ და საქართველომ შეძლოს შემდგომი ნაბიჯის გადადგმა ევროკავშირსა და ნატო-ში გაწევრიანებისკენ, აუცილებელია გაფართოებაში მონაწილე ყველა მხარის – როგორც ევროპული და ტრანსატლანტიკური ინსტიტუტების, ისე საქართველოს მთავრობისა და საქართველოს საზოგადოების ჩართულობა და ძალისხმევა. გვიახლოვდება ვილნიუსის, ნატო-ს სამიტი და წლის ბოლომდე ევროკავშირმა შესაძლოა, მიიღოს გადაწყვეტილება საქართველოსთვის ევროკავშირის წევრი ქვეყნის სტატუსის მინიჭების შესახებ. აქედან გამომდინარე, აქტიურდება დაინტერესებულ მხარეთა დიპლომატიური ქმედებები, მათ შორის, ჩვენი პარტნიორების მხრიდან ვაიმარის სამკუთხედიდან.

ცოტა ხნის წინ, საქართველოში შედგა გერმანიის საგარეო საქმეთა მინისტრის ვიზიტი და უახლოეს მომავალში დაგეგმილია საფრანგეთის საგარეო საქმეთა მინისტრის ვიზიტიც. ჩემი დღევანდელი სამუშაო ვიზიტი თბილისში დიპლომატიური და პოლიტიკური ინტენსიური კომუნიკაციის ელემენტი და გამოხატულებაა. მისი მიზანია საქართველო-პოლონეთის ტრადიციული მეგობრული სულისკვეთებით განვიხილოთ გამოწვევები, პრობლემები და შანსები, ასევე, პრობლემების გადაჭრის შესაძლებლობები, მათ შორის, პოლონეთის ჩართულობა გამოსავლის ძიების პროცესში,” – აღნიშნა მინისტრმა.

“ნაციონალური მოძრაობის” წევრის პეტრე ცისკარიშვილის განცხადებით, ლევან ხაბეიშვილის იმპიჩმენტის საკითხი სასაცილოა.

მისი თქმით, მნიშვნელოვანია შიდაპარტიული დემოკრატია და “ნაციონალური მოძრაობის” გაძლიერება, “რაც თავის მხრივ ბიძინა ივანიშვილის რეჟიმის სწრაფად დასრულებას ემსახურება”.

„ნაციონალურ მოძრაობაში“ არჩევნები დასრულებულია. ჩვენ ვგეგმავთ რეგიონებში თავმჯდომარეების, რეგიონალური პოლიტიკური საბჭოებს არჩევნებს. ყველას, ვისაც შიდაპარტიული დემოკრატია აინტერესებს, ამ საკითხებზე ფოკუსირდეს. ლევან ხაბეიშვილის იმპიჩმენტის საკითხი სასაცილოა. ჩვენთვის მნიშვნელოვანია ერთის მხრივ შიდაპარტიული დემოკრატია, რომელიც ემსახურება „ნაციონალური მოძრაობის” გაძლიერებას და მეორეს მხრივ, “ნაციონალური მოძრაობის” გაძლიერება თავის მხრივ ემსახურება რაც შეიძლება სწრაფად ბიძინა ივანიშვილის რეჟიმის დასრულებას”, – განაცხადა ცისკარიშვილმა.

საქართველოს პრემიერ-მინისტრი ირაკლი ღარიბაშვილი პოლონეთის რესპუბლიკის საგარეო საქმეთა მინისტრს ზბიგნევ რაუს შეხვდა.

პრემიერ-მინისტრის პრესსამსახურის ინფორმაციით, მთავრობის ადმინისტრაციაში გამართულ შეხვედრაზე განიხილეს ორ ქვეყანას შორის არსებული ურთიერთობები.

ყურადღება დაეთმო ორმხრივ სავაჭრო და ეკონომიკურ თანამშრომლობას და აქვე ხაზი გაესვა აღნიშნული მიმართულებით კავშირების შემდგომი გაძლიერების მნიშვნელობას. საუბრისას ყურადღება გამახვილდა საქართველოს ევროკავშირში გაწევრიანების მიმართ პოლონეთის მტკიცე მხარდაჭერის მნიშვნელობაზე.

ირაკლი ღარიბაშვილის თქმით, საქართველო მიესალმება პოლონეთის მხარდამჭერ განცხადებებს ყველა შესაძლო ფორმატში საქართველოსთვის კანდიდატის სტატუსის მინიჭებასთან დაკავშირებით.

შეხვედრას საქართველოში პოლონეთის რესპუბლიკის საგანგებო და სრულუფლებიანი ელჩი მარიუშ მაშკევიჩი, საგარეო საქმეთა სამინისტროს აღმოსავლეთის საქმეთა დეპარტამენტის უფროსი მალგოჟატა კოსიურა-კაზიმერსკა, მინისტრის აპარატის უფროსი ელჟბეტა ბოხენსკა, ხოლო საქართველოს მხრიდან საქართველოს საგარეო საქმეთა მინისტრი ილია დარჩიაშვილი, მთავრობის ადმინისტრაციის უფროსი რევაზ ჯაველიძე და პოლონეთის რესპუბლიკაში საქართველოს საგანგებო და სრულუფლებიანი ელჩი დიანა ჟღენტი ესწრებოდნენ.

შესაძლებლობა, რომ „ნაციონალურ მოძრაობაში“ მხარეებს შორის გარკვეული ტიპის შეთანხმება მოხდეს, ჯერ ამოწურული არ არის, – ამის შესახებ „ერთიანი ნაციონალური მოძრაობის“ წევრმა, კობა ნაყოფიამ განაცხადა.

„მიუხედავად იმისა, რომ არის შემთხვევები, როცა ადამიანებს განსხვავებული მოსაზრებების გამო შეიძლება, ავიწროებენ, შესაძლებლობა მაინც ამოწურული არ არის. კარგად გახსოვთ, როგორ ჩატარდა „ნაციონალურ მოძრაობაში“ თავმჯდომარის არჩევნები, ღია და გამჭვირვალე პროცესი იყო, 50 000-მა ადამიანმა მიიღო მონაწილეობა, არჩევნების შედეგებთან დაკავშირებით არც ერთ მხარეს პრობლემა არ ჰქონია, წაგებულმა მხარემ მოგებულ მხარეს მიულოცა. შემდეგ განვითარდა პროცესები, რაც მართლა არასასურველი იყო. შეცდომა იყო, როცა ახალი პოლიტსაბჭო აირჩია ყრილობამ, სადაც ბევრი ის ადამიანი ვერ მოხვდა, რომელიც მოქმედ პოლიტსაბჭოში იყო, თან ისე, რომ საერთოდ არ იცოდა ამის შესახებ. ძალიან ბევრი, გულანთებული თანამებრძოლი და „ნაციონალური მოძრაობის“ აქტიური წევრი, განაწყენდა, მათი ასეთი რეაქცია ბუნებრივია. ამას სხვა პროცესებიც მოჰყვა, საქართველოს რეგიონებში, თუმცა, ჯერჯერობით ამოწურული არ არის ის შესაძლებლობები, რომ მხარეებს შორის შეთანხმება მოხდეს. მოლაპარაკება იმას ნიშნავს, რომ პარტიაში არ არსებობდეს არანაირი გავლენის ჯგუფები, პარტიას ჰყავს მენეჯმენტი, თავმჯდომარე და პოლიტსაბჭო. იმ პოლიტსაბჭოში, სადაც მე თავმჯდომარე ვიყავი, იმდენად იყო აზრთა სხვადასხვაობა და იმდენად იყო რთული ნებისმიერი საკითხის გატანა, რადგან ბევრი საინტერესო ლიდერი, განსხვავებული მოსაზრების ადამიანი მოდიოდა ამა თუ იმ საკითხზე განსახილველად. ბევრი კამათი, აზრების შეჯერება იყო, ეს იყო დემოკრატიული და კარგი პროცესი პარტიაში“, – განაცხადა ნაყოფიამ „პალიტრანიუსის“ გადაცემაში „360 გრადუსი“.

მისი თქმით, თუ გარკვეული შეთანხმება მოხდება, პარტიაში გავლენის ჯგუფები აღარ იარსებებს.

„გარკვეული ტიპის შეთანხმება თუ შედგა, ეს იმას ნიშნავს, რომ არანაირი გავლენის ჯგუფები, არანაირი ადამიანები, რომლებიც შესაძლოა, გარედან ახდენენ გავლენას „ნაციონალური მოძრაობაში“ გადაწყვეტილების მიღების პროცესში ან სხვა მიმართულებით, არ იარსებებს, ეს იქნება შეთანხმების უმთავრესი ნაწილი. პარტია ცოცხალი ორგანიზმია, მას ჰყავს თავმჯდომარე, პოლიტსაბჭო, აღმასრულებელი სამდივნო, ეს ადამიანები არიან პოლიტიკოსები და ისინი უნდა იღებდნენ გადაწყვეტილებას ჩარევის გარეშე. თუ მოხდა ბევრი, საინტერესო, განსხვავებული მოსაზრების ადამიანების გაერთიანება, ეს შექმნის იმ წინაპირობას, რომ ვერავინ ჩაერევა და ვერ განახორციელებს ამა თუ იმ გავლენას. ამაზეა აქ საუბარი, მიმდინარეობს ეს კონსულტაციები, დაველოდოთ, იმედია, ყველაფერი გამოვა და კარგად იქნება. არც იმას გამოვრიცხავ, შიგნით პარტიაში ლიდერები ვერ შეთანხმდნენ, ამ შემთხვევაში, ალბათ, შეიძლება სხვა პროცესები განვითარდეს, თუმცა, მე ნაკლებად ვუშვებ ასეთ რამეს“, – განაცხადა ნაყოფიამ.

ნაყოფიას განაცხადებით, თუ ისე მოხდა, რომ კანდიდატის სტატუსი საქართველომ ვერ მიიღო, არჩევნები შეიძლება უფრო ადრე ჩატარდეს.
„შემდეგი არჩევნები შეიძლება, ბევრად უფრო სწრაფად იყოს, ვიდრე წარმოგვიდგენია, რადგან კარგად მოგეხსენებათ, შემოდგომაზე საქართველომ კანდიდატის სტატუსი უნდა მიიღოს, ღმერთმა დაიფაროს ჩვენი ქვეყანა, რომ არ მიიღოს სტატუსი, მაგრამ ამ შემთხვევაში შეიძლება პროცესები კიდევ უფრო დაჩქარდეს და არჩევნები კიდევ უფრო სწრაფად ჩატარდეს, ვიდრე ჩვენ წარმოგვიდგენია. თუ ისე მოხდა, რომ ეს სტატუსი საქართველომ ვერ მიიღო, რა თქმა უნდა, ეჭვიც არ მეპარება, რომ არჩევნები შეიძლება უფრო ადრე ჩატარდეს, ვიდრე ამას ველოდებით, ამიტომ ამ არჩევნებისთვის ოპოზიცია უნდა იყოს მზად და ბევრ სტრატეგიულ საკითხთან მიმართებაში შეთანხმებული იყოს. ეჭვიც არ მეპარება, რომ თუკი, სტატუსს ქვეყანა ვერ მიიღებს, ვადამდელი არჩევნები იქნება“, – განაცხადა ნაყოფიამ.