ვოლოდიმირ ზელენსკი კახოვკის კაშხლის აფეთქების შედეგად დაზარალებულ ხერსონის ოლქში ჩავიდა (ვიდეო)

14:19 - 08/06/2023

უკრაინის პრეზიდენტი ვოლოდიმირ ზელენსკი კახოვკის კაშხლის აფეთქების შედეგად დაზარალებულ ხერსონის ოლქში ჩავიდა.

ამის შესახებ ზელენსკი სოციალურ ქსელში წერს.

„სამუშაო ვიზიტი ხერსონის ოლქში. საკოორდინაციო თათბირი კახოვკის ჰიდროელექტროსადგურის კაშხლის აფეთქების შედეგების ლიკვიდაციასთან დაკავშირებით. ბევრი მნიშვნელოვანი საკითხია: კატასტროფის შედეგად ოლქში შექმნილი ოპერატიული მდგომარეობა, დატბორვის პოტენციური ზონებიდან მოსახლეობის ევაკუაცია, კაშხლის აფეთქების შედეგად გამოწვეული საგანგებო სიტუაციის ლიკვიდაცია, დატბორილი ტერიტორიების სასიცოცხლო უზრუნველყოფის ორგანიზება. ასევე, რეგიონის ეკოსისტემის აღდგენის პერსპექტივები და ტექნოგენური კატასტროფის ზონაში ოპერატიული სამხედრო ვითარება“, – წერს ზელენსკი.

როგორც უკრაინის პრეზიდენტი აღნიშნავს, მნიშვნელოვანია ზარალის დაანგარიშება და კატასტროფის შედეგად დაზარალებული მოსახლეობისთვის კომპენსაციის გადასახდელად თანხების გამოყოფა.

უკრაინის ხელისუფლების ცნობით, რუსეთის ძალებმა მდინარე დნეპრზე მდებარე კახოვკის ჰიდროელექტროსადგურის კაშხალი 6 ივნისს, გამთენიისას ააფეთქეს, რის შედეგადაც მდინარის ორივე ნაპირზე ათობით დასახლებული პუნქტი დაიტბორა.

https://www.facebook.com/watch/?v=218900210946639&t=0

„მე პირადად გამოვრიცხავ” – გიული ალასანია სააკაშვილის პრემიერ-მინისტრობაზე

14:12 - 08/06/2023

საქართველოს მესამე პრეზიდენტის დედა, გიული ალასანია გამორიცხავს გავრცელებულ ინფორმაციას, რომ შესაძლოა, 2024 წლის არჩევნების დროს პარტია „ნაციონალური მოძრაობის“ პრემიერ-მინისტრობის კანდიდატი მიხეილ სააკაშვილი იყოს.

მისი ვარაუდით, ყოფილი პრეზიდენტი საქართველოს პოლიტიკაში დაბრუნებას არ გეგმავს.

„მე პირადად გამოვრიცხავ. რამდენადაც მისი განწყობა ვიცი, არა მგონია. ეს ყველაფერი ძალიან საეჭვოდ მეჩვენება. პირველ რიგში, არ ველოდები, რომ ის საქართველოში პოლიტიკაში ჩართვას აპირებს, არა მგონია.

მისი ჯანმრთელობის მდგომარეობა დიდად არ გაუმჯობესებულა, ჩემი ხედვით არის სუსტად და ველოდებით, რომ კიდევ დამატებითი გამოკვლევა იქნება“, – ამის შესახებ გიული ალასანიამ „ტვ პირველთან“ განაცხადა.

ცნობისთვის, პარტია „ნაციონალური მოძრაობის“ თავმჯდომარემ, ლევან ხაბეიშვილმა „ტვ პირველის“ ეთერში საქართველოს მესამე პრეზიდენტის, მიხეილ სააკაშვილის 2024 წლის საპარლამენტო არჩევნებში პრემიერ-მინისტრად დასახლება არ გამორიცხა. მისივე თქმით, ყოფილი პრეზიდენტის როლი მომავალ არჩევნებში დიდი იქნება.

“ახალ სეზონზე ახალი სერია იწყება: მიხეილ სააკაშვილი პრემიერად” – ირაკლი ქადაგიშვილი

13:34 - 08/06/2023

წინა სეზონი იყო – მოწამლეს, მოკლეს, აშიმშილეს, აწამეს და ამ სერიალმა თავისი მაყურებელი დაკარგა ქვეყნის გარეთ და ქვეყნის შიგნითაც და ახლა ახალ სეზონზე ახალი სერია იწყება – მიხეილ სააკაშვილი პრემიერად. ვნახოთ, ამ სერიალს რამდენი ხანი ექნება სიცოცხლისუნარიანობა, – ამის შესახებ უმრავლესობის წევრმა ირაკლი ქადაგიშვილმა განაცხადა, რითაც შეაფასა „ნაციონალური მოძრაობის“ მხრიდან პრემიერ-მინისტრობის კანდიდატად მიხეილ სააკაშვილის შესაძლო დასახელება.

ქადაგიშვილის თქმით, მიხეილ სააკაშვილის პრემიერობას სერიოზულად არ უყურებს.

„მე აღარ ვაფასებ სერიოზულად მის პრემიერ მინისტრობას. 5%-იანი ბარიერის გადალახვის შანსი „ნაციონალურ მოძრაობას“ აქვს, თუმცა მის პრემიერობას არასერიოზულად ვუყურებ“, – განაცხადა ქადაგიშვილმა.

“ეს ისტორიული შანსი გამოყენებულ უნდა იქნას” – მარინა კალიურანდი

13:15 - 08/06/2023

საქართველოს ხელისუფლებასა და დასავლელ პარტნიორებს შორის და განსაკუთრებით ევროპარლამენტთან ურთიერთობა, გასული წლის განმავლობაში მშფოთვარე და ქაოტური იყო, – ამის შესახებ ევროპარლამენტარმა, მარინა კალიურანდმა ბრიუსელში, ევროკავშირი-საქართველოს საპარლამენტო ასოცირების კომიტეტის (PAC) მე-12 სხდომაზე განაცხადა.

მისი თქმით, ევროპული კომისია უახლოეს თვეებში შეაფასებს იმ პროგრესს, რასაც საქართველომ 12 პრიორიტეტის შესრულების კუთხით მიაღწია.

„ევროკავშირთან ასოცირების შეთანხმების შესრულება უაღრესად მნიშვნელოვანია. ეს საკითხი კიდევ უფრო აქტუალურია დღეს, რადგან ევროკომისია რამდენიმე თვეში შეაფასებს მიღწეულ პროგრესს 12 პრიორიტეტთან დაკავშირებით, რომელიც საქართველოს ხელისუფლებამ უნდა შეასრულოს, თუ მათ სურთ, რომ ქვეყანას ევროკავშირის კანდიდატის სტატუსი მიენიჭოს. ჩვენ ბევრი რამ გვაქვს განსახილველი და არ არის საჭირო იმის დამალვა, რომ საქართველოს ხელისუფლებასა და დასავლელ პარტნიორებს შორის და განსაკუთრებით ევროპარლამენტთან ურთიერთობა მშფოთვარე, და მინდა ვთქვა, რომ ქაოტური იყო გასული წლის განმავლობაში. დარწმუნებული ვარ, რომ თქვენ იცნობთ ევროპარლამენტის ბოლო ორ რეზოლუციას საქართველოში მედიის თავისუფლებისა და ჟურნალისტების უსაფრთხოების დარღვევისა და ყოფილი პრეზიდენტის მიხეილ სააკაშვილის მდგომარეობის შესახებ“, – აღნიშნა ევროპარლამენტარმა.

მისი თქმით, ევროკავშირი-საქართველოს საპარლამენტო ასოცირების კომიტეტის სხდომაზე ბევრი რთული საკითხის განხილვა მოუწევთ.

„ნება მომეცით დავიწყოთ კიდევ ერთი დადებითი ნოტით, საზოგადოებრივი აზრის გამოკითხვამ, რომელიც IRI-ს დაკვეთით აპრილში ჩატარდა და აჩვენა, რომ ქართველების 89% ეთანხმება ევროკავშირში გაწევრიანებას, რაც ყველა დროის რეკორდული მაჩვენებელია. საქართველოს მთავრობამ და საპარლამენტო უმრავლესობამ ახლა უნდა შეასრულონ დაპირებები არა ჩვენთვის, არამედ უპირველეს ყოვლისა მათი მოქალაქეებისთვის, რომლებიც ნამდვილად ისწრაფვიან ევროკავშირში გაწევრიანებისკენ. როგორც ადრე ვთქვი, ეს არის უნიკალური შესაძლებლობების ფანჯარა და ჩვენ არ ვიცით, რამდენ ხანს იქნება ის ღია, ის შეიძლება სწრაფად დაიხუროს, ამიტომ ეს ისტორიული შანსი გამოყენებულ უნდა იქნას“, – აღნიშნა ევროპარლამენტარმა.

“ჰეგემონია რომ შენარჩუნდეს, პროქსი-ქვეყნებით დაიწყო რუსეთის განადგურების მცდელობა” – დემურ გიორხელიძე

13:08 - 08/06/2023

“ჯორჯიან თაიმსის” ბლოგი

ავტორი: დემურ გიორხელიძე

რუსეთისა და ევროკავშირის, ასევე ჩინეთი, ინდოეთის, პაკისტანისა და ინდონეზიის, ასევე ირანისა და თურქეთის დაახლოება ევრაზიის სუპერ-კონტინენტს მშვიდობისა და განვითარების ოაზისად აქცევს! ეს იცის ყველამ!

რა ხდება ახლა?!

ჰეგემონია რომ შენარჩუნდეს, პროქსი-ქვეყნებით დაიწყო რუსეთის განადგურების მცდელობა: ჩვენც ამ ფიჩხად განწირულ ქვეყნად მოვიაზრებით და სწორედ ამიტომ გამოზარდეს ბოლო 30 წელია იდეოლოგიზებული ნაგავი, საკუთარი სახელმწიფოს წინააღმდეგ მოქმედი!

მილიარდზე მეტი დოლარია ჩადებული ამ არარაობებში! მაგრამ ბოლო რესურსი, რომელსაც ორმაგი ფუნქცია აკისრია – ევროკავშირია! ევროკავშირმა რუსეთთან დაპირისპირებით მასზე დაკისრებული ორი მისია უნდა შეასრულოს:

(ა) გაანადგუროს რუსეთი
(ასეა განსაზღვრული, თუმცა, აქედან არაფერი გამოვა);
(ბ) გაინადგუროს საკუთარი თავი!

განადგურებულს “მიხედავენ” დღევანდელი უბედურების გამჩაღებლები.

სწორედ ამიტომაა ევროპის ქვეყნებში ხელისუფლებებში იმდენი არარაობა, იდეოლოგიით განადგურებული და საკუთარი ქვეყნების წინააღმდეგ მებრძოლი ნეოლიბერალური ნაგავი. მაგრამ ევროკავშირს სხვა უდიდესი ნაღმიც ჩაუდეს!

“დიდი ალბანეთის” იდეა გააცოცხლეს და ტერორისტულ ქვეყანაში, სადაც ნატოს უდიდესი ბაზაა, – ბალკანეთის აფეთქება დაგეგმეს: სხვანაირად “დიდი ალბანეთი” ვერ “შეიქმნება”. არც ამ იდეიდან გამოვა რამე, მაგრამ ევროპის კატასტროფები ყოველთვის ბალკანეთიდან იწყებოდა და არეულობა ბალკანეეთში რუსებს არ მისცემს ამ რეგიონში გავლენის აღდგენის საშუალებას.

რა გამოვა აქედან?! ბევრი არაფერი, მაგრამ ყველაზე დიდი საშინელებები და დაპირისპირებები წინაა. ორმა ტოტალიტარულმა სახელმწიფომ დატოვა ბრწყინვალე პრაქტიკული შედეგი იდეოლოგიის ძალისა და ხალხის უდიდეს მასებზე მისი გამანადგურებელი გავლენისა!
მე-20 ს..-ის ორი ტოტალიტარული სახელმწიფოს შემდეგ, დასავლური სამყარო ვერაფრით დარჩებოდა მის კლასიკურ ფორმაში, – მისი ტოტალიტარიზაცია – თანდათანობითი ტოტალიტარიზაცია, -გარდაუვალი იყო და ამას იდეოლოგია სჭირდებოდა!

საძებნი არაფერი იყო – დესტრუქციული გამანადგურებელი და უსასტიკესი შეხედულებათა სისტემა, რომელიც ტროცკიზმის სახელს ატარებს, – გამოცდილი იდეოლოგიაა ნგრევისა და გლობალური მიზნებისა – სრულად იქნა აღებული, მაგრამ ნიუანსი ისაა, რომ პირდაპირი სახით მისი გამოყენება ასევე პირდაპირ ასოციაციებს შექმნიდა და… შეფუთული იქნა უდამპლეს ნეოლიბერალიზმში!

“დასავლური” გლობალიზმი – ეს უბრალოდ, ტროცკის იდეის გადამღერებაა და სხვა არაფერი. გლობალიზმს კი ტროცკის თანახმად, მსხვერპლი სჭირდება: ტროცკის ამ მსხვერპლად რუსეთი სჭირდებოდა, დიდი კოცონის დასანთებად. თითქმის მიაღწიეს კიდეც მიზანს.

თითქმის!

მაგრამ მოულოდნელად ქართველთა ჯგუფმა გაანადგურა ისინი, თუმცა ბოლომდე ვერ! მაგრამ იმ ეტაპზე ქართულმა ჯგუფმა იხსნა მიწასთან გასწორებული რუსეთი სრული გაქრობისგან. ეს ასეა, ამას არც რაიმეს მიმატება უნდა და არც გამოკლება. ამ შეფასებაში თემა “კარგი/ცუდი” პოლიტიკის მიღმაა!

ახლა რა იქნება?!
ერთადერთი, რაც აშკარად გამოკვეთილია: საშინელი დაძაბულობა განუსაზღვრელობის პირობებში გარდაუვალია.

” საკუთარი ზე-ამბიციურობის ნიადაგზე ავადმყოფურად შეპყრობილი ვაშაძე, მოკლებულია რეალობის ადეკვატურად შეფასებას”- დავით ქართველიშვილი

13:03 - 08/06/2023

თუ შეიძლება ოპოზიციურ ფლანგზე ვინმეს მიუსადაგო ფსიქო-პოლიტიკური დაავადება „მანია-გრანდიოზა“, ეს არის გიორგი ვაშაძე. მისი ფსიქოლოგიური პორტრეტი მოიცავს გარემოზე ღრმა შიშნარევ და გარეგნულად მოჩვენებით აგრესიულ თავდასხმით ტაქტიკას, საკუთარი ღრმად ჩამოყალიბებული კომპლექსების გამო, რომელთა დაძლევას ცდილობს შეუსაბამოდ გადამეტებული პოლიტიკური ამბიციებით, რომლებიც განაპირობებენ მის თითოეულ ქმედებას“, – ამის შესახებ სოციალურ ქსელში „ხალხის ძალის“ წევრი, ანალიტიკოსი დავით ქართველიშვილი წერს.

მისი თქმით, ოპოზიციურ სპექტრში ნაცმოძრაობის შემდეგ ყველაზე ამბიციური გეგმები აქვს სწორედ ვაშაძეს, რომელიც ღიად პოზიციონირებს, როგორც ე.წ. „სამეულის“ პრემიერ-მინისტრობის კანდიდატი

ოპოზიციურ სპექტრში, ნაცმოძრაობის „კლასიკური“ შემადგენლობის შემდეგ, ყველაზე ამბიციური და თვალსაჩინო როლი და გეგმები აქვს გიორგი ვაშაძეს, რომლის მხრიდან აშკარად იმატა პოლიტიკურმა აქტივობამ. თავის ეკლექტიკურ „ტროიკაში“ ის ღიად პოზიციონირებს, როგორც ე.წ. „სამეულის“ პრემიერ-მინისტრობის კანდიდატი. პარალელურად, ლევან ხაბეიშვილთან საკუთარი ურთიერთობის წყალობით, ცდილობს მოახდინოს ზემოქმედება „ე.ნ.მ.“-ზე და სთხოვს ვანო მერაბიშვილს, თავისი ზეგავლენა გამოიყენოს ნაცმოძრაობაზე, რათა მათ მხარი დაუჭირონ მის მომავალ „გაპრემიერებას“.

ვაშაძე ასევე აქტიურად არის ინტეგრირებული ე.წ. სააკაშვილის „საოჯახო“ ფრთასთანაც (ჩალაძე, ალასანია) და ცდილობს მონაწილეობის მიღებას მიხეილ სააკაშვილის გათავისუფლებასთან დაკავშირებულ ყველა წამოწყებაში – ყოველ შემთხვევაში თვალსაჩინოდ „ფართხალებს“ ამ მიმართულებით. გარდა ამისა, ელენე ხოშტარიას მეშვეობით, არწმუნებს მამუკა ხაზარაძესაც, სამომავლოდ შეუერთდეს მათ ე.წ. „სამეულს“.

შექმნილი ვითარებიდან ვხედავთ, რომ გიორგი ვაშაძეს აქვს ამბიციური სურვილი მოახდინოს ოპოზიციური ფრონტის, საკუთარი პერსონის ირგვლივ გაერთიანება. თუმცა ამასთანავე, მის მიმართ პირდაპირ პროპორციულად მატულობს ნეგატივიც: მისი ზე-აქტიურობის გამო, გარკვეულ უკმაყოფილებას გამოხატავს ელენე ხოშტარია და მისი გარემოცვა.

არანაკლებად უკმაყოფილოა ზურა ჯაფარიძის უახლოესი წრეც, რომელიც მიიჩნევს, რომ „გირჩის“ რეიტინგის კლება განპირობებულია სწორედ რომ ელენე ხოშტარიასა და გიორგი ვაშაძესთან გაერთიანებით. გირჩელებს აქვთ მისი აშკარა მიუღებლობა, გარდა ამისა სწორედ ვაშაძის პერსონა წარმოადგენს „სამეულში“ „ლელოს“ ინტეგრაციის მთავარ პრობლემას. ასევე, მისი პერსონით უკმაყოფილებას ღიად გამოხატავს „მიშისტების“ კონკრეტული ფრთა და კეზერაშვილის „ე.ნ.მ.“-ს ფლანგი – განსაკუთრებით ლევან ბეჟაშვილი.

თუ შეიძლება ოპოზიციურ ფლანგზე ვინმეს მიუსადაგო ფსიქო-პოლიტიკური დაავადება „მანია-გრანდიოზა“, ეს არის გიორგი ვაშაძე. მისი ფსიქოლოგიური პორტრეტი მოიცავს გარემოზე ღრმა შიშნარევ და გარეგნულად მოჩვენებით აგრესიულ თავდასხმით ტაქტიკას, საკუთარი ღრმად ჩამოყალიბებული კომპლექსების გამო, რომელთა დაძლევას ცდილობს შეუსაბამოდ გადამეტებული პოლიტიკური ამბიციებით, რომლებიც განაპირობებენ მის თითოეულ ქმედებას. სერიოზული საიმიჯო ზიანი მიაყენა მას ე.წ. „ქოლ-ცენტრებთან“ დაკავშირებულმა სკანდალმა, რამაც მოკლე და გრძელვადიან პერსპექტივაში შეიძლება არსებითად შეასუსტოს მისი ისედაც „პლინტუსქვედა“ რეალური პოლიტიკური პოზიციები.

თუმცა საკუთარი ზე-ამბიციურობის ნიადაგზე ავადმყოფურად შეპყრობილი ვაშაძე, მოკლებულია რეალობის ადეკვატურად შეფასებას. ამიტომ მისი მხრიდან მომავალი „გაპრემიერების“ პერსონიფიცირების დემონსტრირებას კიდევ დიდი ხანი ექნება ადგილი. მაგრამ ვაშაძის ეს ფსიქო-პოლიტიკური გადახრა აღიზიანებს პრაქტიკულად ყველას მის ირგვლივ, ყოველგვარი გამონაკლისების გარეშე, რაც სამომავლოდ უქმნის მის დღევანდელ პარტნიორებს მის წინააღმდეგ ერთობლივი მოქმედების მძლავრ მოტივაციას. რამდენად სერიოზული პოზიციები უკავია მას ხელისუფლების „აყირავების“ სქემაში – თავად განსაჯეთ. ჩვენ კი აუცილებლად გავაგრძელებთ სხვა, დანარჩენი „ამყირავებელი“ გარემოებების მიმოხილვას“, – წერს ქართველიშვილი.

“მსოფლიო ბანკის გლობალური ეკონომიკის ანგარიშში საქართველო ლიდერი ქვეყანაა” – ზურაბ ქადაგიძე

12:58 - 08/06/2023

როგორც მოსალოდნელი იყო, მსოფლიო ბანკის გლობალური ეკონომიკის ანგარიშში საქართველო ლიდერი ქვეყანაა და უსწრებს ევროკავშირისა და ნატოს რიგ წევრებს. 2023 წელს ეკონომიკის ზრდის ტემპი 0.4% გაზრდილია, რაც საერთო ჯამში 4.4% მიაღწევს და მომდევნო 2024-25 წლებში მდგრადი 5% იქნება, – ამის შესახებ „ხალხის ძალის“ წევრმა, ზურაბ ქადაგიძემ, სოციალურ ქსელში დაწერა.

მისი თქმით, საქართველოს ეკონომიკური ზრდის ტემპი 0.4%-ით გაიზარდა და ჩვენი ქვეყანა მსოფლიო ბანკის გლობალური ეკონომიკის ანგარიშში ლიდერია, რაც ჩვენი ეროვნული პოლიტიკის დამსახურებაა.

„როგორც მოსალოდნელი იყო, მსოფლიო ბანკის გლობალური ეკონომიკის ანგარიშში საქართველო ლიდერი ქვეყანაა და უსწრებს ევროკავშირისა და ნატოს რიგ წევრებს.

2023 წელს ეკონომიკის ზრდის ტემპი 0.4% გაზრდილია, რაც საერთო ჯამში 4.4% მიაღწევს და მომდევნო 2024-25 წლებში მდგრადი 5% იქნება.

მე მგონი, არავის ეპარება ეჭვი, თუ რამ გამოიწვია საქართველოს ეკონომიკური, სტაბილური განვითარება.

მშვიდობის პოლიტიკა, სტაბილური განვითარება, ეკონომიკური სტრატეგია და რეგიონული გამოწვევების სწორი, რაციონალური გამოყენება განაპირობებს საქართველოს მდგრად განვითარებას.

ეს არის რეალ-პოლიტიკა, ეროვნული პოლიტიკა და აუცილებლად შეუქცევად პროცესად უნდა ვაქციოთ, ჩვენი ჯანსაღი და სწორი გადაწყვეტილებებით!“ – წერს ზურაბ ქადაგიძე.

მსოფლიო ბანკმა გლობალური ეკონომიკის პერსპექტივების მორიგი ანგარიში გამოაქვეყნა. მსოფლიო ბანკის შეფასებით, საქართველოს ეკონომიკა წელს გაიზრდება 4,4%-ით, ხოლო მომდევნო ორ წელიწადში სტაბილურად 5%-იან ზრდას აჩვენებს.

თიბისის Meliora 2022-ის ჯილდო გამჭვირვალობა და ანგარიშგება კორპორაციული პასუხისმგებლობისა და მდგრადობის საკითხებში გადაეცა

12:47 - 08/06/2023

თიბისიმ „საქართველოს პასუხისმგებელი ბიზნესის კონკურსის Meliora 2022″-ის ჯილდო მიიღო კატეგორიაში „გამჭვირვალობა და ანგარიშგება კორპორაციული პასუხისმგებლობისა და მდგრადობის საკითხებზე“. აღნიშნული ჯილდო თიბისის პროექტისთვის „2021 წლის მდგრადი განვითარების ანგარიში“ გადაეცა.

კონკურსი Meliora, რომელიც პროექტ „სამოქალაქო საზოგადოების ინიციატივის“ ფარგლებში ტარდება, ყოველწლიურად ავლენს და აჯილდოებს საქართველოში მოქმედ სამაგალითო კომპანიებს კორპორაციული სოციალური პასუხისმგებლობის მიმართულებით განხორციელებული პროექტებისთვის. თიბისი კონკურსის არაერთგზის გამარჯვებულია. ბანკი სხვადასხვა კატეგორიის ჯილდოს მფლობელად 2018 და 2019 წლებშიც დასახელდა.

ჯილდო ექვს თემატურ კატეგორიაში გაიცემა, რომლებიც მოიცავს კორპორაციული სოციალური პასუხისმგებლობის ყველა ძირითად სფეროს: მწვანე ინიციატივა, პასუხისმგებელი დამსაქმებელი, კეთილსინდისიერი საქმიანობა ბაზარზე, საზოგადოების მხარდაჭერა, სექტორთა პარტნიორობა – გაზიარებული პასუხისმგებლობა, გამჭვირვალობა და ანგარიშგება კორპორაციული პასუხისმგებლობის და მდგრადობის საკითხებზე. გამარჯვებულები უცხოელმა და ქართველმა ექსპერტებმა, საერთაშორისო და ადგილობრივმა საზოგადოებრივმა ორგანიზაციებმა გამოავლინეს.

„ჩვენთვის ძალიან მნიშვნელოვანია საზოგადოებისთვის გამჭვირვალე ინფორმაციისა და ობიექტური მაჩვენებლების მიწოდება. ამიტომ 2019 წლიდან ვაქვეყნებთ თიბისის წლიურ მდგრადი განვითარების ანგარიშს. ანგარიშში ინფორმაცია საერთაშორისო ანგარიშგების ინიციატივის (GRI) სტანდარტების მიხედვით არის წარმოდგენილი და, ამავდროულად, გაეროს ქალთა გაძლიერების პრინციპების (WEPs) შესაბამის ანგარიშგებას წარმოადგენს. ეს ანგარიში არის იმ პასუხისმგებლობის დასტური და განაცხადი, რომელიც თიბისის 30 წელზე მეტია, აღებული აქვს და მომავალში კიდევ უფრო აქტიურად გააგრძელებს ამ მიმართულებით მომხმარებლების, თანამშრომლების, გარემოსა და საზოგადოების გაძლიერებას“. – მაკა ბოჭორიშვილი, გარემოს დაცვის, სოციალური და მმართველობის საკითხების კოორდინატორი.

თიბისი მრავალწლიანი არსებობის მანძილზე აქტიურად ახორციელებს ინიციატივებს კორპორაციული სოციალური პასუხისმგებლობის მიმართულებით, რასაც არაერთხელ მოუპოვებია საერთაშორისო აღიარება. გარემოსა და საზოგადოების გასაძლიერებლად მომავალში კიდევ უფრო მეტი სამაგალითო პროექტი განხორციელდება.

(R)

“ალიანსის ზოგიერთი წევრი, შესაძლოა, უკრაინაში ჯარების გაგზავნაზე დათანხმდეს” – ანდერს ფოგ რასმუსენი

12:31 - 08/06/2023

ალიანსის ზოგიერთი წევრი, შესაძლოა, უკრაინაში ჯარების გაგზავნაზე დათანხმდეს, – ამის შესახებ ნატო-ს ყოფილი გენერალური მდივანი, ანდერს ფოგ რასმუსენი აცხადებს.

რასმუსენის თქმით, თუ ნატო ვილნიუსის სამიტზე ვერ გადაწყვეტს უკრაინის გაწევრიანების ნაბიჯებს ან უსაფრთხოების გარანტიას, „არსებობს აშკარა შესაძლებლობა, რომ ზოგიერთმა ქვეყანამ ინდივიდუალური ზომები მიიღოს“.

„ცნობილია, რომ პოლონეთი ძალიან ჩართულია უკრაინისთვის კონკრეტული დახმარების გაწევაში და არ გამოვრიცხავ, რომ პოლონეთი კიდევ უფრო მეტად ჩაერთოს და მას ბალტიისპირეთის ქვეყნებიც მიჰყვნენ“, – განაცხადა რასმუსენმა.

შეგახსენებთ, ალიანსისა და დასავლეთის სახელმწიფოების ოფიციალურმა წარმომადგენლებმა არაერთხელ კატეგორიულად უარყვეს უკრაინაში საკუთარი ჯარების შეყვანის შესაძლებლობა, ამტკიცებენ, რომ ეს საფუძველს ჩაუყრის ნატო-სა და რუსეთს შორის პირდაპირ დაპირისპირებას.

არასრულწლოვანი გოგონას ცოლად შერთვის მიზნით თავისუფლების აღკვეთის ფაქტზე ორი პირი დააკავეს

12:19 - 08/06/2023

შინაგან საქმეთა სამინისტროს ქვემო ქართლის პოლიციის დეპარტამენტის მარნეულის რაიონული სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1994 წელს დაბადებული ჯ.ჰ. და 1981 წელს დაბადებული გ.ა. არასრულწლოვნის მიმართ ჯგუფურად ჩადენილი თავისუფლების უკანონო აღკვეთის ბრალდებით დააკავეს.

როგორც შსს-ის მიერ გავრცელებულ ინფორმაციაშია ნათქვამი, დანაშაული 7-დან 10 წლამდე ვადით თავისუფლების აღკვეთას ითვალისწინებს.

„გამოძიებით დადგინდა, რომ მიმდინარე წლის 7 ივნისს, მარნეულის მუნიციპალიტეტის ერთ-ერთ სოფელში, ჯ. ჰ.- მ ცოლად შერთვის მიზნით, 2007 წელს დაბადებულ ს.კ. – ს თავისუფლება უკანონოდ აღუკვეთა. აღნიშნულ დანაშაულებრივ ქმედებაში მონაწილეობდა ამჟამად ბრალდებულის სახით დაკავებული გ.ა. -ც. პოლიციამ, ცხელ კვალზე ჩატარებული ინტენსიური ოპერატიულ-სამძებრო და საგამოძიებო ღონისძიებების შედეგად, გატაცებული გოგონას ადგილსამყოფელი დაადგინა. სამართალდამცველებმა ჯ.ჰ. და გ.ა. ბრალდებულის სახით დააკავეს.

წინასწარი შეთანხმებით ჯგუფის მიერ არასრულწლოვნისთვის თავისუფლების უკანონო აღკვეთის ფაქტზე გამოძიება საქართველოს სისხლის სამართლის კოდექსის 143-ე მუხლის მე-3 ნაწილის „ა“ და „დ“ ქვეპუნქტებით მიმდინარეობს”, – ნათქვამია ინფორმაციაში.

მსოფლიო ბანკის შეფასებით, საქართველოს ეკონომიკა წელს ოთხი პროცენტით გაიზრდება

12:18 - 08/06/2023

მსოფლიო ბანკმა გლობალური ეკონომიკის პერსპექტივების მორიგი ანგარიში გამოაქვეყნა.

2023 წელს საქართველოს რეალური ეკონომიკის ზრდის ტემპი გაზრდილია 0,4 პროცენტული პუნქტით. ბანკის მიერ გამოკვლეულ ქვეყნებს შორის საქართველოს წამყვანი პოზიცია უკავია ევროპის მასშტაბით ეკონომიკური ზრდით, როგორც 2023 წელს, ისე 2023-2025 წლების პროგნოზით.

მსოფლიო ბანკის შეფასებით, საქართველოს ეკონომიკა წელს გაიზრდება 4,4%-ით, ხოლო მომდევნო ორ წელიწადში სტაბილურად 5%-იან ზრდას აჩვენებს.

„მსოფლიო ბანკის შეფასებით საქართველოს ეკონომიკა წელს 4,4%-ით გაიზრდება, ხოლო მომავალ წელსა და 2025 წელს ეს ზრდა იქნება 5%-ის დონეზე. საქართველო ამ თვალსაზრისით გამორჩეულია. მშვიდობაზე დაფუძნებული, კერძო სექტორის მხარდაჭერაზე დაფუძნებული ეკონომიკური პოლიტიკა ქვეყანას სწორი მიმართულებით განვითარების საშუალებას აძლევს და, დარწმუნებული ვარ, უფრო მაღალი ეკონომიკური ზრდის ტემპები დაფიქსირდება“, – აღნიშნა ფინანსთა მინისტრის მოადგილემ მიხეილ დონდუამ.

“ასეთ ვითარებაშიც კი ურდო ცეცხლს უხსნის სამოქალაქო მაშველებს” – ალექსი პეტრიაშვილი

12:15 - 08/06/2023

ალექსი პეტრიაშვილი სოციალურ ქსელში უკრაინაში მიმდინარე მოვლენებს ეხმაურება:

“კიდევ ერთი ქართველი მებრძოლი ზურაბ მუშუქია დაგვეღუპა რუსი ოკუპანტების წინააღმდეგ ბრძოლაში, დიდება გმირებს და მარადიული ხსოვნა მათ!

კახოვკის ჰესის აფეთქებაზე პასუხისმგებლობის აღება არ უნდა ცოცხალი თავით ტერორისტ რუსეთს! პრეზიდენტი ერდოღანი ესაუბრა ტერორისტ პუტინს და ამ უტიფარმა ნაძირალამ ეს ტერორისტული აქტი უკრაინელების ბარბაროსულ ქმედებად შეაფასა! უფრო მეტიც, საგანგებო სიტუაციების სამსახურს დაავალა მოსახლეობის ევაკუაცია.

თეთრი სახლის პრეს-სპიკერმა დააკისრა სამაგიეროდ პასუხისმგებლობა რუსეთს! რუსეთი აკონტროლებდა კახოვკის ჰეს-ს, რუსეთმა წამოიწყო სრულმასშტაბიანი აგრესია და რუსეთია პასუხისმგებელი იმ კატასტროფაზე, რაც მოხდა კახხოვკის წყალსაცავზე!

წყლის დონემ დაიწყო ნელ-ნელა კლება! როცა დაიწევს საფუძვლიანად, იქ კი გამოჩნდება, სად და როგორ მოხდა აფეთქება, მაგრამ ამ უტიფარი რუსების ატანა მართლა ძალიან ძნელია და ტაკერ კარლსონის მსგავსი რუპორები რომ ჰყავთ კიდევ, ეს უფრო ამძიმებს ვითარებას! როდის რა უღიარებია რუსეთს თავისით, რომ ეს ეკოციდი აღიაროს!

უბრალოდ მე მგონია, რომ როდესაც უტყუარი ფაქტები დაიდება, აშშ-ს და სხვა ქვეყნებსაც მაინც მოუწევთ ოფიციალურად რუსეთის ტერორიზმის სპონსორ სახელმწიფოდ აღიარება და შესაბამისად სრულიად ახალ დონეზე ავა რუსეთთან კონტაქტებში შეზღუდვა!

გაერო და წითელ ჯვარზე კი თქვა ზელენსკიმ ბილდთან ინტერვიუში, შოკში ვარ, 2 დღე გავიდა და არცერთი გამოჩენილა სტიქიური უბედურების ზონაში და არც პასუხი გაუცია ჩვენს მოთხოვნებზეო!

წყლის დონის კლება შეიძლება საფრთხე იყოს ზაპოროჟიეს ატომური ელექტროსადგურისთვის, გააჩნია დაიწევს თუ არა 12.7 მეტრს ქვემოთ! ალტერნატიული ვარიანტებიც განიხილება!

სრული ზარალის და კატასტროფის მასშტაბების შეფასება ჯერ კიდევ ნაადრევია. დრო დაჭირდება სრული სურათის შექმნას. ფაქტია, რომ უკრაინის ხელისუფლება ყველაფერს აკეთებს ხალხის და ცხოველების ევაკუაციისთვის, მიუხედავად იმისა, რომ ასეთ ვითარებაშიც კი ურდო ცეცხლს უხსნის სამოქალაქო მაშველებს.

ფრონტის ხაზზე გუშინ სერიოზული ღამე იყო: ჩვენი არტილერია და ჰაიმარსერია, ზაპოროჟიეს მიმართულებაზე ამუშავდა მთელი დატვირთვით. გარდა ამისა, ოკუპირებულ ზაპოროჟიეს ტოკმაკში 30-მდე აფეთქების ხმას თავად ურდოსებიც ადასტურებენ! პანიკა იყო ძალიან სერიოზული ურდოს პროპაგანძიაში, დაიძრა სატანკო კოლონებიო! დღეს დილიდან გულს იმაგრებდნენ, მაგარი ღამე გადავაგორეთ, მაგრამ ტალღებად გაგრძელდება უკრაინელების შეტევებიო, თუმცა ეგენიც კი აღიარებენ ფრონტის ცალკეულ მონაკვეთებზე გარღვევებს. დილიდან ურდო წერს, ჯავშანტექნიკის დახმარებით ორეხოვო-ტოკმაკის მიმართულებაზე უკრაინელებმა ჩვენს წინა პოზიციებზე დამაგრება შეძლესო, არაბიჯო და მოსკოვს დაეკითხებოდნენ!

ჩვენი მხრიდან დუმილია! ასეც უნდა იყოს! ლაივში ვერ მოხდება მოსამზადებელი ფაზის რეპორტაჟი! ვიმეორებ, ეს არის ძირითადად დაზვერვა ბრძოლით სუსტი ადგილების გამოსავლენად. მართალია, პრეზიდენტმა ზელენსკიმ დანაყოფების გადაადგილების გრაფიკები დაამტკიცა, მაგრამ ნურავინ იჩქარებს რაიმეს გამოცხადებას. იგრძნობს ურდო და დანარჩენი მსოფლიოც, როდესაც მართლა დაიწყება სრულმასშტაბიანი კონტრიერიში!

ბახმუტის ფლანგებზე კი აკეთებენ ჩვენები თავის საქმეს! ჩრდილოეთით ბერხივკასკენ, სამხრეთით კი კლეშჩეევკასკენ მიიწევენ მედგრად და სტაბილურად!

მშვენივრად უჭირავთ ვითარება ანტიპუტინისტურ ძალებს ბელგოროდის ნოვა ტავოლჟანკაში! მე-7 დღეა უკვე ეს დასახლებული პუნქტი მათი კონტროლის ქვეშ არის, მიუხედავად ურდოს მხრიდან დაბომბვებისა! კიდე ამბობენ ამაზე გაჩერებას არ ვაპირებთ, 2024 წელს სხვანაირ ქვეყანაში უნდა შევხვდეთო! ღმერთმა ხელი მოუმართოთ!

ახლა საერთაშორისო ამბები:

ნატოს ყოფილმა გენერალურმა მდივანმა ანდერს ფოგ რასმუსენმა განაცხადა, რომ თუ უკრაინა კონკრეტულ უსაფრთხოების გარანტიებს არ მიიღებს ნატოს ვილნიუსის სამიტზე, შესაძლოა, რამდენიმე ევროპულმა ქვეყანამ ინდივიდუალურად მიიღოს გადაწყვეტილება უკრაინაში ჯარების გაგზავნის შესახებ. ცხადია ამ ქვეყნებს შორის პირველი პოლონეთი მოიაზრება და მასთან ერთად ბალტიის ქვეყნები.

შვეიცარიის სენატმა მიიღო გადაწყვეტილება, რომლის თანახმად შვეიცარიულ კომპანიებს ექნებათ უკრაინისთვის შეიარაღების და ამუნიციის მიყიდვის უფლება;

გერმანიამ კიდევ ახალი სამხედრო დახმარება გადასცა უკრაინას, მათ შორის 8 ერთეული ყველგანმავალი ჯავშანტრანსპორტიორი, ამუნიცია, სარადარო სისტემები და სხვა ტიპის შეიარაღება;

სულ უფრო საინტერესო ხდება სერბეთის პრეზიდენტის განცხადებები. აშშ-ს ეროვნული გვარდიის ხელმძღვანელთან გენერალ დენიელ ჰოკანსონთან შეხვედრის შემდეგ ვუჩიჩმა განაცხადა, რომ მართალია სერბეთი ინარჩუნებს სამხედრო ნეიტრალიტეტს, ის მზად არის გააუმჯობესოს თანამშრომლობა ამერიკულ არმიასთან ბალკანეთის რეგიონში სტაბილურობის უზრუნველყოფის მიზნით! გამოვარდა ეგრევე ალკო სპიკერი მარია ზახაროვა, არიქა სერბეთში კაი არაფერი მოხდებაო. არსად კარგი არაფერი გელოდებათ ურდოს და მის მაქებრებს!

უკრაინა გაიმარჯვებს 2023-ში! საქართველო არ გარუსდება 2023-ში! პუტლერის ბოროტების იმპერია გრუხუნით ჩამოინგრევა 2023-ში!
დიდება უკრაინას!
დიდება გმირებს!
დიდება ერს!
სიკვდილი მტერს!” – წერს ალექსი პეტრიაშვილი.

1...2,0202,0212,022...2,317 Page 2,021 of 2,317