მიხეილ ყაველაშვილის თქმით, აგენტების ამერიკულ კანონს „რუსული“ საქართველოში აშშ-ის საელჩოში დაერქვა. ამ თემაზე „ხალხის ძალის“ წევრმა მედიასთან ისაუბრა.

„სანამ ამ კანონპროექტზე დავიწყებდით საუბარს, წლის ბოლოს გავაკეთეთ კომენტარი, რომ ვიწყებთ ამ საკითხზე მუშაობას. შემდეგ ბრიფინგი გვქონდა, სადაც პირდაპირ დავაანონსეთ, რომ არის კანონი გამჭვირვალობის შესახებ, არასამთავრობო სექტორს ეხება და ა.შ. და პირდაპირ იყო შეტევა. გვქონდა კულუარული ინფორმაცია, რომ როგორც კი გაიგეს ამ კანონის შესახებ, ამერიკის საელჩოს წარმომადგენელმა პირდაპირ თქვა: „ჩვენ ამ კანონს დავარქმევთ რუსულს, ასე მოვნათლავთ და ასე იქნება საზოგადოებისთვის მიწოდებული“, – განაცხადა ყაველაშვილმა.

„ოპოზიცია არ უნდა იყოს მთხლე, ქუჩა უნდა გრგვინავდეს“, – ამის შესახებ პარტია „კანონის და სამართლის“ ლიდერმა თაკო ჩარკვიანმა განაცხადა.

მისი თქმით, ოპოზიციამ უნდა აიძულოს ხელისუფლება, გადადგას ნაბიჯები და არა ისაუბროს დანაწევრებაზე.

„ახლა რა დროს საუბარია, რომ არ დავდგები ამასთან, იმასთან, მინუს „ნაციონალური მოძრაობა“ და ა.შ. უკვე ეჭვი მაქვს ხელისუფლებას ხომ არ უნდა 12 პუნქტის შესრულება? მგონი ხაზარაძესაც უნდა. როდესაც ხედავ, ხელისუფლება არაფერს აკეთებს, შენ რას ელოდები? რატომ არ გინდა, აიძულო და აიძულო ნიშნავს ქუჩის მომძლავრებას, დანაწევრებაზე საუბარს კი არა. ისეთი განცხადებები კეთდება, შეიძლება, არ მოგვანიჭონ სტატუსი, თუ ვხედავთ, ხელისუფლება არაფერს აკეთებს, მაშინ ოპოზიცია არ უნდა იყოს მთხლე, ქუჩა უნდა გრგვინავდეს“, – აცხადებს თაკო ჩარკვიანი.

ვერსად ნახავთ ჩემს განცხადებას, რომ რუსეთთან ეკონომიკური ურთიერთობის წინააღმდეგი ვარ, პრობლემაა, როდესაც რუსეთთან აღრმავებ ურთიერთობას, ჩართული გაქვს ანტიდასავლური პროპაგანდა და დასავლეთს შორდები, – ამის შესახებ „გირჩი-მეტი თავისუფლების“ ლიდერმა, ზურაბ ჯაფარიძემ საქართველოს პირველ არხს განუცხადა. ჯაფარიძის თქმით, არაერთხელ უთქვამს, რომ რუსეთთან მიმართებით პრობლემა ეკონომიკა არ არის. „არაფერი საწინააღმდეგო არ მითქვამს. რუსეთთან მიმართებით პრობლემა ეკონომიკა არ არის, არაერთხელ მითქვამს. მათ შორის ფრენები იქნებოდა, თუ რუსების შემოსვლა, ჩემი პოზიცია სულ ეგ იყო. პრობლემაა, რომ ევროკავშირი, რომლისკენაც მივდივართ, გვეუბნება, რომ ჩვენი საგარეო უსაფრთხოების პოლიტიკა უნდა იყოს მათთან თანხვედრაში. გვეუბნებიან, რომ მათ ფრენები აკრძალული აქვთ, დასანქცირებულია ავიაციის სექტორი და ჩვენც უნდა ვიყოთ ამის ნაწილი. ამას ვეთანხმები და არა იმას, რომ ზოგადად ეკონომიკური ურთიერთობები არ ასწორებს. მეორე პრობლემა არის ის, რომ როდესაც რუსეთთან აღრმავებ ეკონომიკურ ურთიერთობას და ამ დროს, ჩართული გაქვს ანტიდასავლური პროპაგანდა და დასავლეთს შორდები, ეგ არის პრობლემა. თქვენ ვერსად ნახავთ ჩემს ნათქვამს, რომ მე რუსეთთან ეკონომიკური ურთიერთობის წინააღმდეგი ვარ. მე ეგ არასდროს მითქვამს. შეიძლება, სხვა ოპოზიციურ პარტიებში გეშლებით, რადგან სხვა ოპოზიციური პარტიები გამოდიან ეგეთი განცხადებებით. ეკონომიკური ურთიერთობა ჯამში კარგია და სწორია, მხოლოდ ერთი – ჩვენ არ უნდა ვაღრმავებდეთ ეკონომიკურ ურთიერთობას რუსეთთან და არ უნდა ვშორდებოდეთ ევროპას, პირიქით, ევროპისკენ უფრო უნდა ვაღრმავებდეთ და მეორე, ჩვენ უნდა ვიყოთ თანხვედრაში ევროკავშირთან საგარეო და უსაფრთხოების საკითხებში, მათ შორის ეს კავშირი არის ევროკავშირის სტატუსის მიღება-არ მიღებასთანაც“, – განაცხადა ზურაბ ჯაფარიძემ.

2023 წლის 11 ივნისს, საქართველოში ვიზიტით მყოფი ლიხტენშტაინის საგარეო საქმეთა, განათლებისა და სპორტის მინისტრი დომინიკ ჰასლერი, საოკუპაციო ხაზის მიმდებარე სოფელ ოძისს ეწვია. ინფორმაციას საგარეო საქმეთა სამინისტრო ავრცელებს.

საქართველოს საგარეო საქმეთა მინისტრის პირველმა მოადგილემ, ლაშა დარსალიამ და სახელმწიფო უსაფრთხოების სამსახურის წარმომადგენელმა ლიხნტენშტაინის საგარეო უწყების ხელმძღვანელს მიაწოდეს ინფორმაცია ადგილზე არსებული მძიმე ჰუმანიტარული ვითარების შესახებ.

ლაშა დარსალიამ ყურადღება გაამახვილა საქართველოს სუვერენიტეტისა და ტერიტორიული მთლიანობისადმი საერთაშორისო თანამეგობრობის მხარდამჭერის მნიშვნელობაზე.

როგორც ცნობილია, საქართველოს 11-13 ივნისს ვიზიტით ლიხტენშტაინის საგარეო საქმეთა, განათლებისა და სპორტის მინისტრი დომინიკ ჰასლერი სტუმრობს. ვიზიტის ფარგლებში, დომინიკ ჰალსერი საქართველოს აღმასრულებელი და საკანონმდებლო ხელისუფლების უმაღლეს პირებს შეხვდება.

ზურაბ ჯაფარიძეს არავინ ეკითხება რას იტყვის, რა კითხვას დაუსვამენ და რას უპასუხებს. მაშინ დაავალეს და უთხრეს, რომ შენ ახლა რუსეთთან დაკავშირებით არ უნდა ილაპარაკო ცუდი რაღაცები: ეკონომიკაზე, ურთიერთობის გაღრმავებაზე უნდა ილაპარაკო. ზურაბ ჯაფარიძემ, ისევე როგორც მისმა პოლიტიკურმა მეგობრებმა, ასე ილაპარაკეს, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ პარტია „გირჩი – მეტი თავისუფლების“ ლიდერის, ზურაბ ჯაფარიძის შესახებ დასმული კითხვის პასუხად განაცხადა.

მდინარაძეს დაუსვეს კითხვა, თუ რას უკავშირებს ჯაფარიძის რიტორიკის და შეხედულებების შეცვლას, რომელიც 2011 წელს რუსეთთან ვაჭრობის მომხრე იყო.

„ქართული ოცნების“ ერთ-ერთი ლიდერის თქმით, ზურაბ ჯაფარიძეს ახლა დავალებული აქვს, რომ „აჟრიალებდეს ყველაფერ რუსულზე“, ხოლო მომავალში, შესაძლოა, კვლავ დაავალონ ნარატივის შეცვლა, რაც, მდინარაძის თქმით, აგენტის ხვედრია.

„დღეს ავალებენ, რომ შენ ახლა უნდა ჩახვიდე სადღაც და უნდა ჩაიხადო, უკაცრავად ამის თქმა რომ მიწევს. შენ ახლა გევალება, რომ უნდა გაჟრიალებდეს ყველაფერ რუსულზე, უნდა გაგიჟდე, გადაირიო და უნდა დაგბურძგლოს და ამას აკეთებს. ხვალ სხვა რამეს დაავალებენ, ისევ შეცვლის ამ ნარატივს და ისევ იტყვის, რომ რუსეთთან ურთიერთობა მხოლოდ​ ეკონომიკურია ​ და ცუდი არ არის – ეს არის აგენტის ხვედრი. საბედნიეროდ, უდიდეს უმრავლესობას ამ ქვეყანაში, შეუძლია საკუთარი აზრებით ილაპარაკოს რასაც თვითონ ფიქრობს. ზურაბ ჯაფარიძეს და მისნაირებს თანავუგრძნოთ, რადგან მათ არ შეუძლიათ საკუთარი აზრი ჰქონდეთ, რასაც დაავალებენ, იმას ილაპარაკებენ. რუსეთზე ხან ასე ილაპარაკებენ, რომ ეკონომიკას ეხება საქმე, ხან ისე ილაპარაკებენ, რომ თითქოს ბრაზდებიან, რადგან გაბრაზება აქვთ დავალებული“, – განაცხადა მამუკა მდინარაძემ.