Home Blog Page 2008

21 ნოემბერს მართლმადიდებლური ეკლესია მთავარანგელოზობის დღესასწაულს აღნიშნავს

21 ნოემბერს მართლმადიდებლური ეკლესია მთავარანგელოზობის დღესასწაულს აღნიშნავს.

დღესასწაულთან დაკავშირებით ყველა მოქმედ ტაძარში სადღესასწაულო წირვა აღევლინება.

მთავარანგელოზ მიქაელისა და სხვა უხორცოთა ზეცისა ძალთა კრების დღესასწაულის აღნიშვნა გადაწყდა ლაოდიკიის ადგილობრივ კრებაზე, რომელიც IV საუკუნის დასაწყისში ნიკეის I მსოფლიო კრებამდე რამდენიმე წლით ადრე გაიმართა.

ლაოდიკიის კრებამ დაგმო და უარყო ანგელოზებისადმი ღვთაებრივი პატივის მიგება და დაამტკიცა მათი მართლმადიდებლური თაყვანისცემა. დღესასწაული აღინიშნება მარტიდან (საიდანაც ძველად წელიწადის ათვლას იწყებდნენ) მეცხრე თვეს – ნოემბერში, რაც ანგელოზთა ცხრა დასს შეესაბამება.

ანგელოზთა დასნი სამ იერარქიად განიყოფებიან. უმაღლეს იერარქიას შეადგენენ: სერაბიმნი, ქერუბიმნი და საყდარნი. ანგელოზთა საშუალო იერარქიას შეადგენენ: უფლებანი, ძალნი და ხელმწიფებანი. უმდაბლესი იერარქია მოიცავს სამ დასს: საწყისნი, მთავარანგელოზნი და ანგელოზნი.

მთავარანგელოზნი უფლის ნებას გვაუწყებენ. გვიხსნიან სარწმუნოების საიდუმლოებებსა და წინასწარმეტყველებებს. ანგელოზნი ყველაზე ახლოს დგანან ადამიანებთან. ისინი ღვთის განგებულებას გვამცნობენ. არასოდეს გვტოვებენ და მუდამ მზად არიან შეგვეწიონ. ანგელოზთა დასის მთავრად დადგენილია მთავარანგელოზი მიქაელი.

საქართველოში მთავარანგელოზთა სახელობის მრავალი ტაძარი არსებობს, მათ შორის არის ქუთაისის მწვანეყვავილას, მენჯის, ალგეთის, ჯუმათის (ოზურგეთის რაიონის), დიმის (ბაღდათის რაიონი), ერკეთის (ჩოხატაურის რაიონი), გრემის, შუა მთის (თეკლესეული), ქვედა საზანოს (ზესტაფონის რაიონი), სართიჭალის, ონის, მარტყოფის, გლდანის და ა.შ.

მთავარანგელოზნი უფლის ნებას გვაუწყებენ. გვიხსნიან სარწმუნოების საიდუმლოებებსა და წინასწარმეტყველებებს. ანგელოზნი ყველაზე ახლოს დგანან ადამიანებთან. ისინი ღვთის განგებულებას გვამცნობენ. არასოდეს გვტოვებენ და მუდამ მზად არიან შეგვეწიონ. ანგელოზთა დასის მთავრად დადგენილია მთავარანგელოზი მიქაელი.

ტროპარი:

ზეცისა მხედრობათა მთავარანგელოზნო, გევედრებით ჩუენ უღირსნი ესე, რაჲთა მეოხებითა თქუენითა შემზღუდნეთ ჩუენ საფარველითა ფრთეთა თქუენთაჲთა, და უხორცოსა მის დიდებისა თქუენისა მიერ დაცულნი შეგივრდებით და ხელაღპყრობით გიღაღადებთ: ღელვათა და განსაცდელთაგან გვიხსნენით ჩუენ, დიდნო მთავარნო ზეცისა ძალთანო.

კონდაკი:

მთავარანგელოზნო ღმრთისანო, მსახურნო საღმრთოჲსა მის დიდებისანო, ანგელოზთა მთავარნო და წინამძღუარნო შეცთომილთანო, უმჯობესისა ჩუენცა გვიოხენით და დიდსა წყალობასა, უხორცოთა ძალთა ერისმთავარნო.

თუ რუსეთი არ დამარცხდება, კვლავ განახორციელებს თავდასხმას -ანჯეი დუდა

თუ რუსეთი არ დამარცხდება, ის კვლავ განახორციელებს თავდასხმას, – ამის შესახებ პოლონეთის პრეზიდენტმა, ანჯეი დუდამ განაცხადა.

„თუ რუსეთი არ დამარცხდება, ის კვლავ განახორციელებს თავდასხმას. ჩვენ ეჭვი არ გვეპარება, რომ დღეს უკრაინა არის ადგილი, სადაც ჩვენი უსაფრთხოების ბედი წყდება“, – განაცხადა პოლონეთის პრეზიდენტმა ფინელ კოლეგასთან, საული ნიინისტოსთან ერთად გამართულ პრესკონფერენციაზე.

დუდას თქმით, პოლონეთი უკრაინის მხარდაჭერას გააგრძელებს.

„როგორც პოლონეთი, ჩვენ მხარს ვუჭერთ უკრაინას და ამის გაკეთებას გავაგრძელებთ. ჩვენი აზრით, ეს უნდა გაკეთდეს სრულ გამარჯვებამდე, ანუ საერთაშორისოდ აღიარებული საზღვრების აღდგენამდე. უკრაინამ უნდა მიიღოს უსაფრთხოების მტკიცე გარანტიები და ჩვენი აზრით, ეს არის ნატოში შესვლის გარანტია. ჩვენ ამ გზაზე ჩვენს მეზობელს მხარს ვუჭერთ“, – აღნიშნა ანჯეი დუდამ.

ანჯეი დუდამ იმედი გამოთქვა, რომ პოლონეთის მთავრობა უკრაინის მხარდაჭერას გააგრძელებს.

„იმედი მაქვს, რომ პოლონეთის მთავრობა, მიუხედავად პოლიტიკური ბანაკისა, გააგრძელებს იმ პოლიტიკას, რომელიც პოლონეთისა და ევროპული ინტერესების პოლიტიკას წარმოადგენს“, – დაამატა პოლონეთის პრეზიდენტმა.

შეძრწუნებული ვართ ღაზის ინდონეზიურ საავადმყოფოზე თავდასხმით -ჯანმოს დირექტორი

ჯანდაცვის მსოფლიო ორგანიზაცია შეძრწუნებულია ღაზის ინდონეზიურ საავადმყოფოზე თავდასხმით , – ამის შესახებ ჯანდაცვის მსოფლიო ორგანიზაციის დირექტორმა, ტედროს ადანომ გებრეისუსმა განაცხადა.

„ჯანდაცვის მსოფლიო ორგანიზაცია შეძრწუნებულია ღაზის ინდონეზიურ საავადმყოფოზე თავდასხმით, რის შედეგადაც, გავრცელებული ინფორმაციით, 12 ადამიანი დაიღუპა, მათ შორის პაციენტები და ათობით დაშავდა, მათ შორის მძიმე და სიცოცხლისთვის საშიში ფორმით. ჯანდაცვის მუშაკები და სამოქალაქო პირები არასდროს არ უნდა გახდნენ ასეთი საშინელების მომსწრენი, განსაკუთრებით კი საავადმყოფოში ყოფნის დროს“, – წერს ტედროს ადანომ გებრეისუსი „ტვიტერის“ გვერდზე.

ღაზას ჯანდაცვის სამინისტროს ცნობით, სულ მცირე 12 ადამიანი დაიღუპა მას შემდეგ, რაც ღაზის ჩრდილოეთით მდებარე ინდონეზიის საავადმყოფოზე საარტილერიო იერიში განხორციელდა.

საავადმყოფოზე თავდასხმა დაგმო ინდონეზიამ, რომელიც ღაზაში მდებარე ობიექტს აფინანსებს.

21 ნოემბრის ასტროლოგიური პროგნოზი

ვერძი

ბოლო დროს ძალიან ბევრი მუშაობა მოგიწიათ და ახლა შეგიძლიათ, საქმიანი აქტივობა შეამციროთ. გაუკეთეთ საკუთარ თავს საჩუქარი – დღე ისე გაატარეთ, როგორც გინდათ. ამ დღეს გარშემომყოფები თქვენს განწყობაზე ძალიან მოქმედებენ, ამიტომ მოერიდეთ ნეგატიურ ადამიანებთან ურთიერთობას. ვარსკვლავები გირჩევენ, რომ არც ფიზიკური ვარჯიშისა და დასვენების შესახებ დაივიწყოთ.

კურო

21 ნოემბერს საყვარელ ადამიანებთან ურთიერთობა რთული იქნება – ნებისმიერ უწყინარ შენიშვნას ან ხუმრობას შეიძლება ჩხუბი მოჰყვეს. ცოტა მოითმინეთ, ხვალ სიტუაცია უკეთესობისკენ შეიცვლება. გაუფრთხილდით ჯანმრთელობას და ამინდის შესაბამისად ჩაიცვით.

ტყუპები

ამ დღეს შეიძლება მოულოდნელმა უსიამოვნებამ ძალიან აგანერვიულოთ. ვარსკვლავები გირჩევენ, რომ დასკვნების გამოტანა არ იჩქაროთ, მით უმეტეს, რომ ვიღაც თქვენს მოტყუებას ეცდება. აკონტროლეთ, რა ხდება თქვენ ირგვლივ, რაციონალურად იაზროვნეთ და ეცადეთ, რთული სიტუაციიდან მაქსიმალური სარგებელი მიიღოთ. ყურადღებით უსმინეთ გარშემო მყოფთა საუბრებს და შეიძლება, ყველა კითხვაზე პასუხი იპოვოთ.

კირჩხიბი

ამ დღეს პრიორიტეტული ფინანსური საკითხების მოგვარება იქნება. გადაწყვეტილებები სწრაფად, მაგრამ ფრთხილად უნდა მიიღოთ. მეტი ყურადღება მიაქციეთ ურთიერთობებს. ახლა პირად ცხოვრებაში რაიმეს შეცვლა დამატებით პრობლემებს მოგიტანთ, ამიტომ ყველაფერი ძველებურად დატოვეთ. ეცადეთ, სპორტული აქტივობებისთვის დრო გამონახოთ ან სუფთა ჰაერზე მაინც გაისეირნოთ.

ლომი

თუ ურთიერთობებს შეზღუდავთ და განმარტოვდებით, გაცილებით მეტი საკითხის მოგვარებას შეძლებთ და საკუთარი მუშაობის შედეგით კმაყოფილი დარჩებით. საყვარელ ადამიანებთან ურთიერთობა და წარსულის გახსენება სასიამოვნო ემოციებს მოგიტანთ. მარტოხელა ლომებს სამსახურებრივი რომანი ელით, რომელიც, კოლეგების გაკიცხვის და პრობლემების გარდა, არაფერს მოგიტანთ.

ქალწული

ამ დღეს ახალი საქმე არ უნდა დაიწყოთ, განსაკუთრებით – რთულ და მნიშვნელოვან პროექტებს უნდა მოერიდოთ. ვარსკვლავები, ძირითადად, რუტინული სამუშაოს და მცირე დავალებების შესრულებას გირჩევენ. ყურადღება არ მოადუნოთ, რათა შეცდომა არ დაუშვათ, რომელიც თქვენს შემოსავალზე აისახება. გირჩევთ, საქმიან მოლაპარაკებებში პიროვნული ხიბლი გამოიყენოთ და თანამოსაუბრის კეთილგანწყობა მოიპოვოთ.

სასწორი

პლანეტების ხელსაყრელი განლაგება საშუალებას მოგცემთ, ეს დღე ნაყოფიერად გაატაროთ. შესაფერისი დროა, რომ დიდ და მნიშვნელოვან პროექტზე მუშაობა დაიწყოთ. ეცადეთ, შუა გზაზე არ გაჩერდეთ – ყველაფერი, რასაც დღეს დაიწყებთ, უნდა დაასრულოთ. ვარსკვლავები თქვენს მხარეს არიან, ამიტომ თამამად შეგიძლიათ აკეთოთ ყველაფერი, რასაც ადრე ვერ ბედავდით.

მორიელი

ვარსკვლავები გირჩევენ, რომ ეს დღე ისე გაატაროთ, როგორც თქვენ გსურთ და არა – გარშემო მყოფებს. საქმიანი მოლაპარაკებები თქვენთვის სასურველი სცენარით განვითარდება, მაგრამ ყველა დაპირებას, რომელსაც დღეს მოისმენთ, არ უნდა დაუჯეროთ. გაუფრთხილდით ჯანმრთელობას. დროა იმუნური სისტემის გაძლიერება დაიწყოთ.

მშვილდოსანი

წარმატებული მუშაობისთვის საჭიროა აქტიურ მუშაობასა და მშვიდ ემოციურ მდგომარეობას შორის ბალანსი იპოვოთ. პირად ურთიერთობებში ყველაფერი კარგადაა. თუ მარტოხელა ხართ და მონათესავე სულს ეძებთ, შეიძლება ვიღაც ძალიან საინტერესო ადამიანი იპოვოთ. გირჩევთ, უცნობ ადამიანებთან ურთიერთობა მინიმუმამდე შეამციროთ. მოერიდეთ ნაჩქარევ შესყიდვებს და ფული დაუფიქრებლად არ დახარჯოთ.

თხის რქა

21 ნოემბერს საყვარელ ადამიანებთან შეიძლება ურთიერთობა დაგეძაბოთ. გეჩვენებათ, რომ ახლობლები თქვენს პროვოცირებას ცდილობენ და კონფლიქტში გითრევენ. უცნაურია, მაგრამ ზოგჯერ თქვენი კოლეგებს უკეთ ესმით, ვიდრე ოჯახის წევრებს. ყურადღებით იყავით – შესაძლოა, წარმატებას ერთი ნაბიჯი გაშორებთ. შეთავაზებაზე, რომელსაც საღამოს მიიღებთ, უარი არ უნდა თქვათ.

მერწყული

ვარსკვლავები გირჩევენ, რომ ამ დღეს ექსპერიმენტებს მოერიდოთ და საკუთარ ცხოვრებაში არაფერი შეცვალოთ. საყვარელ ადამიანებთან რამდენიმე მნიშვნელოვანი საკითხის განხილვა მოგიწევთ, თუმცა გადაწყვეტილების მიღება გაგიჭირდებათ. დღის მეორე ნახევარი უფრო ნაყოფიერი იქნება, ასე რომ, ყველაზე რთული საკითხები საღამოსთვის უნდა შემოინახოთ.

თევზები

ნუ ინერვიულებთ, თუ თქვენი გეგმები მოულოდნელად შეიცვლება და მნიშვნელოვანი ღონისძიების გადადება მოგიწევთ. ვარსკვლავები ამით განიშნებენ, რომ მოძრაობის ვექტორი უნდა შეცვალოთ და ყურადღება სხვა საქმეებზე გადაიტანოთ. შეიძლება რომელიმე საკითხში გასარკვევად ძველი კავშირების ან ურთიერთობების აღდგენა მოგიწიოთ. სასურველია საღამო მყუდრო ოჯახურ გარემოში გაატაროთ.

ეს საშუალებას მისცემს მფლობელებს, თავი აარიდონ ძალიან კომპლექსურ პროცედურას, რომელიც დაკავშირებულია ნებართვის აღებასთან და ლეგალიზებასთან – ბექა ოდიშარია სამშენებლო ამნისტიაზე

პარლამენტის დიასპორისა და კავკასიის საკითხთა კომიტეტის თავმჯდომარე ბექა ოდიშარია მთავრობის სხდომაზე სამშენებლო ამნისტიის პროექტთან დაკავშირებით დღეს მიღებულ გადაწყვეტილებას გამოეხმაურა.

მისი თქმით,  მნიშვნელოვანია, რომ ამნისტიის პროექტის ძალაში შესვლის შემდეგ,  მფლობელებს არ დასჭირდებათ ლეგალიზაციის პროცედურის გავლა.

„აქ საუბარი არის ინდივიდუალურ სახლებზე და არა კორპუსებზე და ინდივიდუალური პირების საკუთრებაში არსებულ ქონება-ნაგებობებზე. ეს საშუალებას მისცემს მათ, რომ  თავი აარიდონ ძალიან კომპლექსურ  პროცედურას, რომელიც დაკავშირებულია ნებართვის აღებასთან  და ლეგალიზებასთან“, – განაცხადა ბექა ოდიშარიამ.
ამნისტიის პროექტი 2024 წლის პირველ იანვრამდე ფიზიკური პირის საკუთრებაში არსებულ მიწის ნაკვეთზე გავრცელდება.

პრემიერ-მინისტრის ირაკლი ღარიბაშვილის გადაწყვეტილებით, ამნისტიის პროექტზე იუსტიციის სამინისტრო იმუშავებს.

ამნისტიის პროექტი  განსახილველად პარლამენტს უახლოეს პერიოდში გადაეცემა.

ამნისტიის პროექტი 2024 წლის პირველ იანვრამდე ფიზიკური პირის საკუთრებაში არსებულ მიწის ნაკვეთზე გავრცელდება.

ღაზის სექტორში, ინდონეზიურ საავადმყოფოსთან ისრაელის თავდასხმებს 12 ადამიანი ემსხვერპლა

ღაზის ჩრდილოეთით მდებარე ინდონეზიის საავადმყოფოზე საარტილერიო იერიში განხორციელდა.

ამის შესახებ ინფორმაციას Aljazeera „ჰამასის“ მიერ მართულ ღაზის ჯანდაცვის სამინისტროზე დაყრდნობით ავრცელებს.

მათივე ცნობით, ისრაელის მხრიდან ნასროლი ჭურვი ინდონეზიის საავადმყოფოს მეორე სართულს მოხვდა, რასაც სულ მცირე, 12 ადამიანი ემსხვერპლა, ათობით კი დაშავდა.

ღაზის ჯანდაცვის სამინისტროს სპიკერმა, აშრაფ ალ-ქუდრამ Aljazeera-ს განუცხადა, რომ „სიტუაცია კატასტროფულია“.

„ინდონეზიის საავადმყოფოს პერსონალი ამტკიცებს, რომ დაჭრილების სამკურნალოდ დარჩებიან. საავადმყოფოში 700-მდე ადამიანია, მათ შორის სამედიცინო პერსონალი და დაშავებულები“, – განაცხადა მან.

ინდონეზიის საავადმყოფოს სამედიცინო მუშაკი, მარვან აბდალაჰი ამბობს, რომ ისრაელის ტანკები საავადმყოფოდან 200 მეტრის (656 ფუტი) დაშორებით ოპერირებდნენ და ისრაელის სნაიპერები ახლომდებარე შენობების სახურავებზე ჩანდნენ.

თუ რაიმე შანსი ჰქონდა დარჩენილი “ნაცმოძრაობას”, თემურ ალასანიამ თავისი გამოსვლით გაუნულა -გურამ მაჭარაშვილი

თემურ ალასანიას განაცხადი არ არის მხოლოდ მისი, არამედ არის აქაური რადიკალებისაც – მართალია, ალასანიას სიტყვები არ გაიმეორეს „ნაცმოძრაობაში“, მაგრამ არც გაემიჯნენ, – ამის შესახებ მედიასთან „ხალხის ძალის“ ერთ-ერთმა ლიდერმა, დეპუტატმა გურამ მაჭარაშვილმა განაცხადა.

მისი თქმით, თემურ ალასანიამ თავისი განცხადებით, რომლითაც ის ქვეყნის გახლეჩას იწონებს, ხოლო დაკარგული ტერიტორიების ძალადობრივი გზით დაბრუნების მომხრეა, „ნაცმოძრაობას“ ნიღაბი ჩამოხსნა.

„თუ რაიმე შანსი ჰქონდა დარჩენილი „ნაცმოძრაობას“, თემურ ალასანიამ თავისი გამოსვლით, პრაქტიკულად, გაუნულა. მოცელა, როგორც იტყვიან. ალასანია ხომ არ არის მურმან დუმბაძე, რომ მისი გამოსვლა მხოლოდ გააშაყირო, თემურ ალასანია არის მიხეილ სააკაშვილის ბიძა და მას სერიოზული გავლენები ჰქონდა და აქვს „ნაცმოძრაობაზეც“ და – არა მხოლოდ. ვიცით, ჯერ კიდევ რუსული კვოტით როდის იყო დანიშნული გაეროში და იარაღის შესყიდვას კურირებდა. შესაბამისად, თემურ ალასანიას განაცხადი არ არის მხოლოდ მისი, არამედ არის აქაური რადიკალებისაც. მართალია, ალასანიას სიტყვები არ გაიმეორეს „ნაცმოძრაობაში“, მაგრამ არც გაემიჯნენ, იმიტომ, რომ ვერ გაბედეს. ალასანიამ ამ განცხადებით „ნაცმოძრაობას“ ნიღაბი ჩამოხსნა“, – განაცხადა გურამ მაჭარაშვილმა.

თემურ ალასანია თავისი განცხადებებით ადასტურებს, რომ არათუ “ნაცმოძრაობის” ხელისუფლებაში დაბრუნება არ უნდა დავუშვათ, ქვეყნის მართვაში მათი მონაწილეობაც კი უკიდურესად საშიშია -თეა წულუკიანი

ის უბრალოდ თავისი ახალი განცხადებებით და გამონათქვამებით ადასტურებს, რომ არავითარ შემთხვევაში არ უნდა დავუშვათ არამც თუ მისი ოჯახის წევრების, უფრო ფართოდ „ნაცმოძრაობის“ და მსგავსების დაბრუნება ხელისუფლებაში, არამედ ქვეყნის მართვაში მონაწილეობაც კი უკიდურესად საშიშია, – ამის შესახებ საქართველოს კულტურის მინისტრმა, თეა წულუკიანმა განაცხადა.

მისი თქმით, ყველამ იცის, რომ თემურ ალასანია ჩვენი ქვეყნის წინააღმდეგ ქმედებებში მავნებლობით სახელგანთქმულია.

„ამგვარი განცხადებები მიზნად ისახავს მტრობას საკუთარი ქვეყნისადმი, მტრობას საკუთარი სამშობლოს მშვიდობიანი, სტაბილური აწმყოსა და მომავლისადმი. ჩვენ ყველაფერს გავაკეთებთ პოლიტიკურად, რათა ამ ადამიანებს ქვეყნის ბედის მართვაში არავითარი ბერკეტი არ ჰქონდეთ, ვინაიდან ისინი ძალიან, ძალიან საშიშნი არიან“, – განაცხადა თეა წულუკიანმა.

ამერიკაში ემიგრანტებთან შეხვედრაზე თემურ ალასანიამ რუსეთის მიერ ოკუპირებული ტერიტორიების ძალისმიერი გზით დაბრუნებაზე ისაუბრა და აღნიშნა, რომ ძალით წართმეული ტერიტორიების მშვიდობიანად დაბრუნება ისტორიას არ ახსოვს. მან ასევე თქვა, რომ გაყოფილი, გახლეჩილი, ერთმანეთს დატაკებული საქართველო ურჩევნია, რადგან ეს არის პლურალიზმი, დემოკრატია და სხვადასხვა აზრის წახალისება.

უკრაინა აშშ-სგან 100 მილიონი დოლარის სამხედრო დახმარებას მიიღებს

აშშ-ის თავდაცვის მდივნის, ლოიდ ოსტინის თქმით, უკრაინა ამერიკისგან 100 მილიონი აშშ დოლარის სამხედრო დახმარებას მიიღებს. ოსტინმა აღნიშნული განცხადება უკრაინის ოფიციალურ პირებთან, მათ შორის ვოლოდიმირ ზელენსკისთან შეხვედრის შემდეგ გააკეთა.

დიპლომატის თქმით, დახმარების ახალი პაკეტი მოიცავს ისეთ იარაღს, როგორიცაა ტანკსაწინააღმდეგო იარაღი და საჰაერო თავდაცვის სისტემები.

„ჩვენი მხარდაჭერა გრძელდება. ნება მომეცით, გითხრათ, რომ ამერიკელებსა და ხალხზე მთელს მსოფლიოში შთაბეჭდილება მოახდინა თქვენმა გამბედაობამ, ერთგულებამ და მზადყოფნამ გააკეთო ის, რაც საჭიროა უკრაინის სუვერენიტეტის დასაცავად“, – აღნიშნა ლოიდ ოსტინმა.

თავის მხრივ, ვოლოდიმირ ზელენსკიმ ყოველდღიური მიმართვისას მადლობა გადაუხადა ამერიკას დახმარების ახალი პაკეტისთვის.

„აშშ-სგან გვაქვს ჩვენი სახელმწიფოს თავდაცვის ახალი პაკეტი. ამისთვის მადლიერი ვარ. კერძოდ, იქნება მეტი არტილერია, ჭურვები, რაც ახლა საჭიროა“, – განაცხადა ზელენსკიმ ყოველდღიური მიმართვისას.

“მე და კიდევ ბევრ ადამიანს ვეღარასოდეს დაგვიბრუნდებიან ჩვენი მამები, იმიტომ რომ შენ ისინი მოკალი!”-გიორგი ზერეკიძე მიხეილ სააკაშვილს

გიორგი ზერეკიძე, რომელიც „ნაციონალური მოძრაობის“ მმართველობის დროს, 14 წლის ასაკში დააკავეს, სოციალურ ქსელში მიხეილ სააკაშვილის განცხადებას ეხმიანება, სადაც აღნიშნულია, რომ სალომე ზურაბიშვილს შეუძლია, ერთი ხელის მოწერით დაუბრუნოს მის შვილებს მამა.

ზერეკიძის განცხადებით, სააკაშვილი სასჯელის მოხდის შემდეგ შეძლებს შვილებს დაუბრუნდეს, ხოლო მისი პრეზიდენტობის დროს მოკლული მამები ვერასდროს დაუბრუნდებიან შვილებს.

„სამწუხაროდ, შენ მხოლოდ 6 წელი გაქვს მოსჯილი და ადრე თუ გვიან, დაუბრუნდებათ შენ შვილებს მამა, მაგრამ მე და კიდევ ბევრ ადამიანს ვეღარასოდეს დაგვიბრუნდებიან ჩვენი მამები, იმიტომ რომ შენ ისინი მოკალი!”, – წერს გიორგი ზერეკიძე Facebook-ზე.

2011 წელს რუსთავის N 6 დაწესებულებაში, გიორგი ზერეკიძის მამა, პატიმარი მამუკა ზერეკიძე გარდაიცვალა, სიკვდილის მიზეზად დენის დარტყმა დასახელდა. ცხედრისთვის ჩატარებული ალტერნატიული ექსპერტიზით კი გამოიკვეთა, რომ ცხედარს სხეულზე სხვადასხვა დაზიანება აღენიშნებოდა, ხოლო დენის კვალი არსად იყო.

„ქალბატონ სალომეს შეუძლია, ერთი ხელის მოწერით დაუბრუნოს ჩემს შვილებს მამა და აღადგინოს პოლიტიკური ბალანსი საქართველოში“, – ამის შესახებ მიხეილ სააკაშვილმა სასამართლო პროცესზე დისტანციურად დასწრებისას განაცხადა.

რუსეთის საოკუპაციო ძალის წარმომადგენლებმა ოკუპირებულ სოფელ ზემო არცევის მიმდებარედ უკანონოდ დააკავეს ადგილობრივი მცხოვრები, რომელიც ამ ეტაპზე თავისუფალია -სუს-ი

სახელმწიფო უსაფრთხოების სამსახურის განცხადებით, რუსეთის საოკუპაციო ძალის წარმომადგენლებმა ოკუპირებულ სოფელ ზემო არცევის მიმდებარედ უკანონოდ დააკავეს ადგილობრივი მცხოვრები, რომელიც ამ ეტაპზე თავისუფალია და საქართველოს ცენტრალური ხელისუფლების მიერ კონტროლირებად ტერიტორიაზე იმყოფება.

„მომხდართან დაკავშირებით კომუნიკაცია მიმდინარეობდა საქართველოში ევროკავშირის მონიტორინგის მისიის (EUMM) უშუალო ჩართულობით მოქმედი „ცხელი ხაზის“ მეშვეობით. ინფორმაცია დაუყოვნებლივ მიეწოდა ჩვენს საერთაშორისო პარტნიორებს. საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა საოკუპაციო ძალას ეკისრება.

ცენტრალური ხელისუფლება, საერთაშორისო პარტნიორებთან ერთად, განაგრძობს აქტიურ მუშაობას ოკუპირებულ ტერიტორიებზე უკანონო პატიმრობაში მყოფი საქართველოს ყველა მოქალაქის გასათავისუფლებლად“, – აცხადებენ სუს-ში.

გასაგებია, რომ სააკაშვილი სალომე ზურაბიშვილს ნამუსზე აგდებს და ბუა, ბუას ძახილით არის დაკავებული, მაგრამ მე ბუა არ ვარ -თეა წულუკიანი

გასაგებია, რომ სააკაშვილი ქალბატონ სალომეს ნამუსზე აგდებს და ბუა, ბუას ძახილით არის დაკავებული, მაგრამ მე ბუა არ ვარ, – ამის შესახებ საქართველოს კულტურის მინისტრმა, თეა წულუკიანმა განაცხადა.

წულუკიანს კითხვა დაუსვეს დღევანდელ სასამართლო პროცესზე მიხეილ სააკაშვილის მიერ შეწყალების საკითხზე სალომე ზურაბიშვილის მიმართ გაკეთებული იმ განცხადების შესახებ, სადაც სააკაშვილი აღნიშნავს: „არ გაკლიათ გამბედაობა და შეგიძლიათ, ძალიან აქტიური ქმედებების განხორციელებაც, თუ მოინდომებთ და გაქვთ ამის ძალიან დიდი საერთაშორისო მხარდაჭერა. მათ (ხელისუფლებას) ერთი სული აქვთ, როცა თქვენ აღარ იქნებით პრეზიდენტი. უკვე მომზადებული ჰყავთ წულუკიანი პრეზიდენტობაზე, წულუკიანი სჭირდებათ, რათა არასდროს არავინ დაპატიმრებული არ გამოუშვას, ჩემი ჩათვლით“.

რაც შეეხება პოლიტიკურ საბჭოსთან დაკავშირებით სააკაშვილის განცხადებას, თეა წულუკიანი ამბობს, რომ მიხეილ სააკაშვილს უსურვებს, ნაყოფიერად და შინაარსიანად გაიყვანოს დრო.

„რაც შეეხება მის მოსაზრებებს, რომ ციხიდან უნდა შექმნას პოლიტსაბჭო, უნდა შექმნას პოლიტიკური დოკუმენტები და იბრძოლოს, ამას საკმაოდ მარტივად ვუყურებ – პატიმარმა თავისი დრო უნდა გაიყვანოს და თუკი ის ამას აკეთებს დროის გასაყვანად, ვინაიდან უწევს სასჯელის მოხდა, ნებისმიერი მშვიდობიანი მეთოდით შექმნას მანიფესტები, წაიკითხოს წიგნები, დაწეროს პოლიტიკური ბრძოლის გეგმა, ხაბეიშვილს ასწავლოს რამე, თუ ამის პერსპექტივა არსებობს. რა თქმა უნდა, დრო უნდა გაიყვანოს ყველა პატიმარმა, ამიტომ მე მას ვუსურვებ, რომ დრო გაიყვანოს ნაყოფიერად და შინაარსიანად, რადგან ყველა ადამიანი, ვისაც ადევს ბორკილები, ჩვენთვის არის თანასწორი და მათი უფლებები ჩვენი ხელისუფლების პირობებში დაცულია“, – განაცხადა თეა წულუკიანმა.

საქართველოს ყოფილმა პრეზიდენტმა, მიხეილ სააკაშვილმა დღევანდელ სასამართლო პროცესზე დისტანციურად ჩართვისას განაცხადა: „ჩემს თავზე ვიღებ პოლიტიკურ პასუხისმგებლობას, ყველა ჩვენი გამოცდილი მებრძოლი და ძალიან ბევრი დამსახურებული ადამიანი, რომელიც რატომღაც გარიყული აღმოჩნდა პოლიტიკური საბჭოდან, დაბრუნდეს. ჩემს თავზე ვიღებ პოლიტიკური საბჭოს კოორდინაციას. დღევანდელი პოლიტსაბჭო კიდევ უფრო ლეგიტიმური გახდება, თუ ადრე არჩეულ ხალხსაც დავაბრუნებთ“.

1...2,0072,0082,009...3,002Page 2,008 of 3,002
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი