ვფიქრობ, რომ საქართველოს პარლამენტის დელეგაციამ სამივე დასახულ მიზანს წარმატებით მიაღწია. მნიშვნელოვანია, რომ ისეთ დიდ ასამბლეაში, სადაც 120 ქვეყანაა და 50-მდე პარლამენტის თავმჯდომარე იმყოფება, ასე ძლიერად ვართ წარმოდგენილი, – განაცხადა პარლამენტის თავმჯდომარემ შალვა პაპუაშვილმა, რითაც საპარლამენტთაშორისო კავშირის (IPU) 147-ე ასამბლეის მუშაობაში საქართველოს პარლამენტის დელეგაციის მონაწილეობა შეაფასა.

შალვა პაპუაშვილის განმარტებით, საპარლამენტო დელეგაციას სამი ამოცანა ჰქონდა და სამივე ამოცანას თავი წარმატებით გაართვა.

„პირველი – ეს იყო ასამბლეაში მონაწილეობა, ასევე მსოფლიო საპარლამენტო კავშირის პრეზიდენტის არჩევნებში მონაწილეობა, იმისთვის, რომ ის ადამიანი იყოს არჩეული, ვინც მომავალი სამი წლის განმავლობაში ასამბლეას გაუძღვება და ექნება ის პოზიციები, რითაც საერთაშორისო სამართლის აღიარებულ პრინციპებს უჭერს მხარს. მეორე ამოცანა იყო – ორმხრივი ურთიერთობების დამყარება ისეთ პარლამენტებთან, რომელთანაც გეოგრაფიულად ადვილი არ არის წვდომა. ჩვენ ამ მხრივ, მრავალი პარლამენტის თავმჯდომარეს შევხვდით და ურთიერთგაგების მემორანდუმის თაობაზე შევთანხმდით. ასევე შევხვდით საპარლამენტო მეგობრების ჯგუფებს და კომუნიკაცია გვექნება, რომ არაღიარების პოლიტიკა იყოს ხელშეწყობილი. ჩვენი კოლეგები დავარწმუნეთ, რომ მნიშვნელოვანია საერთაშორისო სამართლის ძირითადი პრინციპების შენარჩუნება. მესამე ამოცანა ევროპასთან ინტეგრაციის საკითხები იყო. ასამბლეაში მონაწილეობას ევროკავშირის წევრი ქვეყნების პარლამენტების თავმჯდომარეები იღებდნენ და ამ საკითხზე მათთან მქონდა საუბარი. ყველას მხრიდან პოზიტიური გზავნილები ისმის. მათ ვესაუბრე საქართველოს პარლამენტის მიერ განხორციელებულ ცვლილებებსა და ჩვენს მოლოდინზე, რომ შეფასება იქნება პოზიტიური. მათი მოლოდინიც ასეთია, რომ შეფასება და გადაწყვეტილება პოზიტიური უნდა იყოს”, – განაცხადა შალვა პაპუაშვილმა და დასძინა, რომ საქართველოს საპარლამენტო დელეგაციამ სამივე დასახულ მიზანს წარმატებით მიაღწია.

საქართველოს საპარლამენტო დელეგაციამ პარლამენტის თავმჯდომარის შალვა პაპუაშვილის ხელმძღვანელობით, საპარლამენტთაშორისო კავშირის (IPU) 147-ე ასამბლეის ფარგლებში, 20-მდე შეხვედრა გამართა. სხვადასხვა ქვეყნის პარლამენტის თავმჯდომარესთან შეხვედრის ძირითადი მიზანი არაღიარების პოლიტიკის ხელშეწყობა და საპარლამენტო ურთიერთობების განვითარება იყო.

საპარლამენტთაშორისო კავშირის ასამბლეაზე, პარლამენტის თავმჯდომარესთან ერთად, საპარლამენტო დელეგაცია საგარეო ურთიერთობათა კომიტეტის თავმჯდომარის ნიკოლოზ სამხარაძის და გარემოს დაცვისა და ბუნებრივი რესურსების კომიტეტის თავმჯდომარის მოადგილის სალომე ქურასბედიანის შემადგენლობით იმყოფებოდა.

მოგესალმებით ჩემო ძვირფასო მასწავლებლებო, მივესალმები პატივცემულ სტუმრებს, ელჩებს, პარლამენტის წევრებს, მთავრობის წევრებს. ჩემთვის დიდი პატივია თქვენს წინაშე გამოსვლა, ძვირფასო მასწავლებლებო, – ამის შესახებ საქართველოს პრემიერ–მინისტრმა ირაკლი ღარიბაშვილმა მასწავლებლის ეროვნული პრემიის დაჯილდოების ცერემონიაზე განაცხადა.

როგორც მთავრობის მეთაურმა აღნიშნა, საზოგადოების და განათლების სისტემის განვითარების საქმეში განსაკუთრებული წვლილის მქონე პედაგოგები დაჯილდოვდებიან  მასწავლებლის ეროვნული პრემიით და გადაეცემათ ფულადი პრიზი– 10 000 ლარის ოდენობით.

 „მოგესალმებით ჩემო ძვირფასო მასწავლებლებო, მივესალმები პატივცემულ სტუმრებს, ელჩებს, პარლამენტის წევრებს, მთავრობის წევრებს. ჩემთვის დიდი პატივია თქვენს წინაშე გამოსვლა, ძვირფასო მასწავლებლებო. სიტყვა „მასწავლებელი” გვეუბნება, თუ რაოდენ დიდი მნიშვნელობის მატარებელია ზოგადად ეს სტატუსი. თუ რაოდენ საპასუხისმგებლო არის ეს სტატუსი და რაოდენ საპატიოა. მე განსაკუთრებული პატივისცემა მინდა დაგიდასტუროთ, ვინაიდან თქვენ ხართ ჩვენი საზოგადოების გამორჩეული წევრები.  ჩვენი ქვეყნის გამორჩეული მოქალაქეები. ჩვენი ქვეყნის და საზოგადოების განვითარების, მე ასე ვიტყოდი, ჩვენი შვილების სახელმწიფოებრივად მოაზროვნე პატრიოტებად ჩამოყალიბების საქმეში მთავარი როლი და ფუნქცია სწორედ თქვენ, ჩვენს დამსახურებულ, ღვაწლმოსილ და გმირ პედაგოგებს გაკისრიათ.

მე ასე ვიტყოდი, რომ ყველაზე დიდი გავლენა, ვინც შეიძლება მოახდინოს მოზარდის, მოსწავლის განვითარებაზე, აზროვნებაზე, მის ცნობიერებაზე, მისი მსოფმხედველობის განსაზღვრასა და ჩამოყალიბებაზე, ოჯახის ინსტიტუტთან ერთად ხართ თქვენ. სკოლა, მასწავლებლები და ეკლესია. საზოგადოებაში თქვენი განსაკუთრებული როლის ხაზგასმისა და დაფასებისთვის მთავრობის გადაწყვეტილებით, პირველად ჩვენი ქვეყნის უახლეს ისტორიაში დაწესდა მასწავლებლის ეროვნული დღე და პრემია. თანაც ჩვენი მინისტრის ინიციატივით, თარიღიც სიმბოლურად იქნა შერჩეული, 27 ოქტომბერი, ქართული პედაგოგიკის ფუძემდებლის, ჩვენთვის– ყველასთვის საყვარელი საბავშვო მწერლის და საზოგადო მოღვაწის, დიდი იაკობ გოგებაშვილის დაბადების დღე.

საზოგადოების და განათლების სისტემის განვითარების საქმეში განსაკუთრებული წვლილის მქონე პედაგოგები დაჯილდოვდებიან  მასწავლებლის ეროვნული პრემიით და გადაეცემათ ფულადი პრიზი– 10 000 ლარის ოდენობით“,- განაცხადა ირაკლი ღარიბაშვილმა.

საქართველოს ცენტრალური საარჩევნო კომისიის თავმჯდომარე, გიორგი კალანდარიშვილი და „ერთიანი ნაციონალური მოძრაობის“ წევრი, ლაშა ფარულავა „ჰოლიდეი ინნ თბილისში” გამართულ პრეზენტაციაზე ერთმანეთს სიტყვიერად დაუპირისპირდნენ.

სიტყვიერი დაპირისპირება ლაშა ფარულავას პროტესტს მოჰყვა, რომელიც აცხადებდა, რომ 1 -ელ ოქტომბერს გამართული შუალედური/რიგგარეშე არჩევნების და აღნიშნულ არჩევნებზე გამოყენებული ელექტრონული საშუალებების შესაბამისობის დასადგენად აუდიტორული კომპანიის შერჩევა დახურული და გასაიდუმლოებული იყო და ამის შესახებ ოპოზიციამ არაფერი იცოდა.

ასევე, ლაშა ფარულავა ამტკიცებს, რომ აუდიტორულ კომპანიას აშშ-ში პრობლემები აქვს, მის წინააღმდეგ მიმდინარეობს არაერთი სასამართლო დავა და მისი რეპუტაცია კითხვის ნიშნის ქვეშ დგას.

„ერთადერთი შეკითხვა მაქვს – ასეთი დაბალი სტანდარტებით აპირებენ არჩევნების ჩატარებას? ეს ჩვენთვის არის მიუღებელი, მათ შორის მიუღებელია ასეთი დაბალი სტანდარტით არჩეული და ლეგიტიმაციის არ მქონე თავმჯდომარემ ჩაატაროს ისეთი მნიშვნელოვანი პროცესი, რომელიც გველოდება 2024 წელს, ამიტომ მოვედი აქ და ამ შეკითხვას დავსვამ ყველგან. ჩვენ გვინდა გამჭვირვალე, სამართლიანი და თავისუფალი არჩევნები და ასე თავისუფალი არჩევნები არ ტარდება.

ჩვენ პრეტენზია გაგვაჩნია იმასთან დაკავშირებით, პროცესი იყო დახურული, არ არის გამჭვირვალე და ასეთი დაბალი სტანდარტით ჩატარებული არჩევნები ჩვენთვის არის მიუღებელი. თავისუფალი სამყაროსთვის ასეთი პროცესი არის მიუღებელი და შევეწინააღმდეგებით, არავის არ ჰქონდეს იმის ილუზია, რომ ასეთი ჩავარდნებით ჩავატარებინებთ არჩევნებს. პროცესი უნდა იყოს გამჭვირვალე და სამართლიანი.

მოქალაქეთა პოლიტიკური გაერთიანება „ერთიანი ნაციონალური მოძრაობა“ ჩვენი ემიგრანტებისთვის, ისინი, ვინც ამ ქვეყნიდან გააქციეს, ჩვენი პატრიოტებისათვის ვითხოვთ ონლაინ არჩევნებს, ჩვენ ამ საკანონმდებლო ინიციატივას მალე ოპოზიციასთან ერთად შევიტანთ საკანონმდებლო ორგანოში. მიუღებელია იმ სტანდარტით არჩევნების ჩატარება, როგორიც ვიხილეთ 2020 და 2021 წლებში. ასეთი დახურული პროცესით, თავისუფალი გამჭვირვალე და სამართლიანი არჩევნები არ ჩატარდება“, – განაცხადა ლაშა ფარულავამ.

ცესკო-ს თავმჯდომარის, გიორგი კალანდრიშვილის განცხადებით, ლაშა ფარულავა ღონისძიებაზე „ასარევად არის მოსული“.

„აპელირება იმაზე, თითქოს კომისიის წევრებმა რაიმე ინფორმაცია იმაზე, აუდიტორული კომპანიის შერჩევასთან მიმართებაში არ ჰქონდათ, ეს არის სიცრუე. არა თუ ახლა, ორი თვით ადრე იყო ცნობილი ამ პროცესის დაწყებისა და ინცირების შესახებ“, – განაცხადა კალანდრიშვილმა.

ცნობისთვის, „ჰოლიდეი ინნ თბილისში” ცესკოს თავმჯდომარე ელექტრონული საშუალებების გამოყენებით 1 ოქტომბერს გამართული შუალედური/რიგგარეშე არჩევნების და აღნიშნულ არჩევნებზე გამოყენებული ელექტრონული საშუალებების შესაბამისობის აუდიტის შედეგების პრეზენტაცია გამართა.