ღაზას სექტორში საომარი მოქმედებების შეჩერება სასწრაფოდ არის საჭირო, რათა შესაძლებელი გახდეს ჰუმანიტარულ დახმარებაზე წვდომა, – ამის შესახებ ევროკავშირის უმაღლესი წარმომადგენელი ჯოზეფ ბორელი X-ის პირად გვერდზე წერს.

„ღაზა სრულიად ჩაბნელებულია და იზოლაციაშია მაშინ, როდესაც მასიური დაბომბვა გრძელდება. გაერო-ს პალესტინელი დევნილების დახმარების სააგენტო გვაფრთხილებს ღაზას მოსახლეობის სასოწარკვეთილი მდგომარეობის შესახებ ელექტროენერგიის, საკვების, წყლის გარეშე. ძალიან ბევრი მშვიდობიანი მოქალაქე დაიღუპა, მათ შორის ბავშვები. ეს საერთაშორისო ჰუმანიტარულ სამართალს ეწინააღმდეგება. საომარი ქმედებების შეჩერება სასწრაფოდ არის საჭირო, რათა შესაძლებელი გახდეს ჰუმანიტარულ დახმარებაზე წვდომა. მშვიდობიანი მოსახლეობის წინააღმდეგ ყველა თავდასხმას ვგმობთ, მათ შორის ისრაელის წინააღმდეგ განურჩეველი სარაკეტო თავდასხმების გაგრძელებას და ვითხოვთ ყველა მძევლის დაუყოვნებლივ და უპირობო გათავისუფლებას” – წერს ბორელი.

რუსეთის საგარეო საქმეთა მინისტრის, სერგეი ლავროვის თქმით, ისრაელის მიერ ღაზის დაბომბვა საერთაშორისო სამართალს ეწინააღმდეგება და ქმნის კატასტროფის რისკს, რომელიც შეიძლება, ათწლეულების განმავლობაში გაგრძელდეს, – ამის შესახებ Al Jazeera წერს.

„მიუხედავად იმისა, რომ ჩვენ ვგმობთ ტერორიზმს, კატეგორიულად არ ვეთანხმებით, რომ თქვენ [ისრაელს] შეგიძლიათ, ტერორიზმს უპასუხოთ საერთაშორისო ჰუმანიტარული სამართლის ნორმების დარღვევით, მათ შორის – ძალის განურჩევლად გამოყენებით იმ ობიექტებზე, რომლებშიც მშვიდობიანი მოქალაქეების, მათ შორის მძევლების ყოფნის შესახებ ფლობთ ინფორმაციას. თუ ღაზა განადგურდება და მისი ორი მილიონი მცხოვრები ამ ტერიტორიიდან განიდევნება (როგორც ამას ისრაელსა და მის ფარგლებს გარეთ მყოფი ზოგიერთი პოლიტიკოსი ვარაუდობს), ეს გამოიწვევს კატასტროფას მრავალი ათწლეულის, შესაძლოა, საუკუნეების განმავლობაშიც კი”, – თქვა ლავროვმა.

ლიბანისა და ისრაელის საზღვარზე მზარდი დაძაბულობის ფონზე ჭურვი სამხრეთ ლიბანში გაეროს სამშვიდობო მისიის (Unifil) შტაბბინაში ჩამოვარდა, – ამის შესახებ გაეროს წარმომადგენელმა განაცხადა.

ჭურვი არ აფეთქდა და არავინ დაშავებულა, მაგრამ დაზიანდა ბაზა.

Unifil-ი მუშაობს თავდასხმის  წარმოშობის დადგენაზე.

ლიბანური დაჯგუფება „ჰეზბოლასა“ და ისრაელის სამხედროებსა შორის ცეცხლის გახსნა საღვრის გასწვრივ, ბოლო სამი კვირის განმავლობაში გახშირდა.

მას შემდეგ, რაც გასულ ღამეს ღაზის სექტორში ისრაელის თავდაცვის ძალებმა სახმელეთო ოპერაციების მასშტაბი გაზარდეს და ინტენსიური საჰაერო იერიშები მიიტანეს, ქვეყნის თავდაცვის მინისტრმა, იოავ გალანტმა აღნიშნა, რომ „ჰამასთან“ ომის „ახალ ეტაპზე“ გადავიდნენ.

„ღაზაში მიწა ზანზარებდა. იერიშები მივიტანეთ მიწის ზევითაც და ქვევითაც, თავს დავესხით ყველა რანგის ტერორისტს, ყველგან. ძალების ბრძანება ცხადია: ოპერაცია გაგრძელდება მანამ, სანამ ახალი წესრიგი არ დამყარდება“, – თქვა გალანტმა.

ისრაელის თავდაცვის მინისტრმა აღნიშნა, რომ ქვეყნის ჩრდილოეთში, ცენტრალურ ნაწილსა და ყველა დანარჩენ რეგიონში, მოქალაქეების დასაცავად უსაფრთხოებას აუმჯობესებენ.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში

„თურქეთი ისრაელს მთელი საერთაშორისო თანამეგობრობის წინაშე სამხედრო დამნაშავე ქვეყნად გამოაცხადებს“. ამის შესახებ თურქეთის პრეზიდენტმა რეჯეფ თაიფ ერდოღანმა განაცხადა. ინფორმაციას teletrader.com ავრცელებს.

თურქეთის პრეზიდენტმა ეს განცხადება სტამბოლში ათათურქის სახელობის აეროპორტში გააკეთა, სადაც პალესტინის მხარდამჭერი მრავალათასიანი მიტინგი გაიმართა. ერდოღანმა დაამატა, რომ ისრაელის სამხედრო დამნაშავედ გამოცხადების საკითხზე მუშაობა უკვე მიმდინარეობს.

მან ასევე ისრაელს „ოკუპანტი დაჯგუფება“ უწოდა. ასევე ერდოღანი ამბობს, რომ პალესტინური მოძრაობა „ჰამასი“ ტერორისტული ორგანიზაცია არ არის.