„სალომე ზურაბიშვილი საპრეზიდენტო კამპანიის დროს აკრიტიკებდა წინა პრეზიდენტის, მარგველაშვილის პრაქტიკას და აცხადებდა, რომ ის არ იქნებოდა ვეტომდებელი და ა.შ. თუმცა ასეთი ვეტო მარგველაშვილსაც კი არ დაუდია“- ამის შესახებ „ქართული ოცნების“ თავმჯდომარე ირაკლი კობახიძემ საქართველოს პირველი არხის გადაცემაში „დღის თემა“, ეროვნული ბანკის შესახებ კანონში შესულ ცვლილებებთან დაკავშირებით პრეზიდენტის ვეტოზე ისაუბრა.

კითხვაზე, რა კონსულტაციები მიმდინარეობდა პრეზიდენტთან და იყო თუ არა შეთანხმება, რომ სალომე ზურაბიშვილი ლაშა ხუციშვილის კანდიდატურას წარადგენდა, ირაკლი კობახიძემ აღნიშნა, რომ „იმართებოდა კონსულტაციები მმართველ გუნდსა და პრეზიდენტს შორის და ამ კონსულტაციების საფუძველზე თანხმობა განაცხადა პრეზიდენტმა კონკრეტულად ლაშა ხუციშვილის წარდგენასთან დაკავშირებით. დროც კი იყო დაკონკრეტებული, თუმცა, ამის შემდეგ რატომღაც პრეზიდენტმა თავისი პოზიცია შეცვალა და ბოლოს ისიც კი თქვა, რომ წლის ბოლომდე საერთოდ არ წარადგენდა კანდიდატურებს. ეს მიუღებელია.“

შეკითხვაზე, რამდენად უზრუნველყოფდა ინსტიტუციის დამოუკიდებლობას ლაშა ხუციშვილის შესვლა ეროვნულ საბჭოში, ვინაიდან ის არის მოქმედი ფინანსთა მინისტრი, კობახიძემ გაიხსენა შემთხვევა, როდესაც სალომე ზურაბიშვილმა ასევე წარადგინა ყოფილი მინისტრი მმართველი გუნდიდან, რომელიც დღეს არის ეროვნული ბანკის ვიცე-პრეზიდენტი. მისივე თქმით, გაუგებარია თუ წინა შემთხვევაში სალომე ზურაბიშვილს კითხვები არ ჰქონია, საინტერესოა ამ შემთხვევაში რატომ აქვს. კობახიძის განმარტებით ეს მხოლოდ საბაბია. „პრეზიდენტმა წარადგინა მაგალითად, ასევე ყოფილი მინისტრი, მერე მინისტრის მოადგილე იყო იმ პერიოდისთვის, მმართველი გუნდის წევრი, რომელიც დღეს არის ეროვნული ბანკის ვიცე-პრეზიდენტი. იქ თუ არ ჰქონდა კითხვის ნიშნები, აქ რატომ აქვს?! ხომ აშკარად ჩანს, რომ ეს საბაბია. ერთ შემთხვევაში არ გაწუხებს და მეორე შემთხვევაში გაწუხებს, ჩანს რომ ეს საბაბია. საზოგადოებასაც რომ განვუმარტოთ რაშია განსხვავება. არის ორი კანონი, ერთი არის პრეზიდენტის ვეტო და მეორე ჩვენს მიერ მიღებული კანონი. ერთადერთი განსხვავება არის ის, რომ პრეზიდენტის ვეტო ითვალისწინებს სამ ვიცე-პრეზიდენტს და ჩვენი კანონი ითვალისწინებს პირველ ვიცე-პრეზიდენტს და ორ ვიცე-პრეზიდენტს. ამაზე როგორ შეიძლება ან გაოგნდე, ან თქვა რომ დამოუკიდებლობას დააკარგვინებს ორგანოს,“- განაცხადა ირაკლი კობახიძემ.

“ნაციონალური მოძრაობის” ყოფილი თავმჯდომარის განცხადებით, ლევან ხაბეიშვილი არის სხვის მიერ მიღებული გადაწყვეტილებების გამხმოვანებელი. როგორც ნიკა მელია “ღამის კურიერის” ეთერში განმარტავს, “ნაციონალური მოძრაობა” არ იმსახურებდა იმ მოცემულობას, რომლის წინაშეც ახლა პარტია დგას.

,,მავანმა ჩათვალა, რომ პარტია  არის რამდენიმე ადამიანის, რომლებმაც ზურგი შეაქციეს საკუთარ ამომრჩეველს და ახლა ბატონი ხაბეიშვილი იკითხეთ-არ მქონდა მოსმენილი თითქოს ჩვენ არ ვართ პარტიის წევრები. მე მასთან დაკავშირებით არ ვისაუბრებ, არა იმიტომ, რომ არ ვკადრულობ მასთან დაკავშირებით საუბარს, მან იმ ხალხსაც კი შეაქცია ზურგი, ვინც ხმა მისცა მას შიდაპარტიულ არჩევნებში. ის არ წარმოადგენს, როგორც ამ ადამიანებს, ასევე არ წარმოადგენს პარტიის მართვის პროცესში საკუთარ თავსაც,” – აცხადებს ნიკა მელია.

წამყვანის კითხვაზე, როდესაც ჩრდილოვან მმართველობაზე საუბრობს ენმ-ს ყოფილი თავმჯდომარე, გულისხმობს თუ არა იმას, რომ ხაბეიშვილი სხვის მიერ მიღებული გადაწყვეტილებების გამხმოვანებელია?!

,,პარტია არ არის არც ლოგო, არც საარჩევნო ნომერი, საბიუჯეტო დაფინანსება, არც რამდენიმე მანდატი პარლამენტში, მანქანა, მძღოლი, ვიქნები იქ, სადაც იქნება შანსიც და საშუალებაც პოზიტიური ცვლილებების”

„ნაციონალური მოძრაობა“ და დესტრუქციული ოპოზიცია რას იტყვის, ნაკლებ საინტერესოა… – ამის შესახებ ვატო შაქარიშვილმა მედიასთან განაცხადა.

„ჩვენ ღრმად ვართ დარწმუნებული, რომ ამ ქვეყანას დღეს, ისე როგორც არასდროს ყველაზე მეტად სჭირდება სიმშვიდე. მშვიდობა, რომელმაც უნდა გაგვიყვანოს გრძელვადიანი სტაბილური განვითარების გზაზე. დღეს არის ვითარება, როდესაც ახალი მსოფლიო წესრიგი, ახალი მსოფლიო რეალობა დგება. დღევანდელი გადმოსახედიდან ვერავინ ვერ იტყვის საბოლოო ჯამში ეს როგორ ფორმირდება, მაგრამ ერთი ნამდვილად ნათელი და ცხადია, რომ ის, რაც აქამდე არსებობდა ის ასე ვეღარ გაგრძელდება. ახალი წესრიგი, ახალი რეალობა დგება  და ჩვენ უნდა ვიფიქროთ იმაზე, თუ როგორ მოვიპოვოთ ღირსეული ადგილი ამ რეალობაში “, – განაცხადა ვატო შაქარიშვილმა.

ხაბეიშვილს ვურჩევ, რომ თავის პარტიას მიხედოს, პარტიაში აჯაფსანდალი რომ აქვს… – ამის შესახებ ალეკო ელისაშვილი, ხაბეიშვილის მიერ გაკეთებულ განცხადებებზე და ოპოზიციურ პარტიებთან გაერთიანებაზე მედიასთან განაცხადა. „ლევან ხაბეიშვილს ვურჩევ რომ თავის პარტიას მიხედოს. აშკარად, დიდი აჯაფსანდალი აქვთ შიგნიდან, დავიდარაბა, გამიშვი და გამატარე. თავის პარტიას მიხედოს, ჩვენზე ნუ იდარდებს და თვითონ მოემზადოს კარგად არჩევნებისთვის…“, – განაცხადა ალეკო ელისაშვილმა.

პრემიერ-მინისტრმა ირაკლი ღარიბაშვილმა ბელგიაში, კულტურის საერთაშორისო ფესტივალის – „ევროპალიისა” და საქართველოს დამოუკიდებლობის დღისადმი მიძღვნილ საზეიმო მიღებაზე სიტყვით გამოსვლისას განაცხადა:

„ძვირფასო სტუმრებო, დღეს ჩვენ ასევე აღვნიშნავთ საქართველოს დამოუკიდებლობის 105-ე წლისთავს. 105 წლის წინ, როგორც კი საქართველომ რუსეთისგან დამოუკიდებლობა მოიპოვა, ჩვენმა პირველმა დემოკრატიულმა რესპუბლიკამ მიიღო პირველი კონსტიტუცია. ეს კონსტიტუცია, რომელსაც ჩვენი დღევანდელი კონსტიტუცია ეფუძნება, ასახავდა იმ პერიოდის ევროპაში ყველაზე პროგრესულ ტენდენციებს. ახალგაზრდა, მაგრამ ხანმოკლე ქართული დემოკრატიული რესპუბლიკა უკვე მხარს უჭერდა ისეთ ღირებულებებს, როგორიცაა თავისუფლება, დემოკრატია და კანონის უზენაესობა. ბელგიაში ყოფნისას არ შემიძლია არ აღვნიშნო ის ფაქტი, რომ ამ კონსტიტუციას განსაკუთრებით აფასებდნენ 1920 წელს საქართველოში ჩამოსული ევროპელი სოციალისტების დელეგაციის ბელგიელი წევრები“.

მთავრობის მეთაურმა ამ კონტექსტში მიხეილ მუსხელიშვილი (მიშელ მუსხელი) გაიხსენა.

„ამ კონტექსტში მინდა გავიხსენო ძალიან ცნობილი ქართველი ადამიანი მიხეილ მუსხელიშვილი (მიშელ მუსხელი), ქართველი მეცნიერი და ევროკონსტიტუციის პროექტის თანაავტორი, ადამიანი, რომელმაც თავის დროს გაუსწრო და გაერთიანებული ევროპის იდეით გატაცებულმა, მისი ჩამოყალიბება იწინასწარმეტყველა. მან ერთხელ თქვა, რომ „საქართველომ იცის, რომ მისი ადგილი ევროპაშია და საჭიროა, რომ საქართველომ დაიკავოს თავისი ადგილი ევროპაში და დასავლურმა ქვეყნებმა მიიღონ საქართველო თავიანთ ოჯახში“. ეს სიტყვები, ძვირფასო მეგობრებო, თითქმის ერთი საუკუნის წინ იყო წარმოთქმული. დღეს ჩვენ უკვე გვიღებენ ევროპული ერების ოჯახში და ჩვენც გვინდა ეს თქვენთან ერთად ვიზეიმოთ“,- განაცხადა პრემიერმა.

რატომ განაცხადა კელი დეგნანმა, რომ უკრაინამ დეოლიგარქიზაციის შესახებ კანონი ვენეციის კომისიიდან გაიწვია – აშშ-ის საელჩო საქართველოში „ქრონიკის“ კითხვის პასუხად განმარტავს, რომ მაშინ ელჩი უკრაინის პრეზიდენტის მოთხოვნას დაეყრდნო, რადგან ოფიციალურ კიევს კანონის გამოწვევა სურდა, დეგნანმა კი თქვა, რომ გამოიწვიეს.

„მოვუწოდებთ ყველას, სრულად გაეცნონ [ვენეციის კომისიის] მოსაზრებას უკრაინის შესახებ, კონკრეტულად მე-4 და მე-5 პუნქტებს, სადაც აღნიშნულია, რომ უკრაინელმა ოფიციალურმა პირებმა 2021 წლის დეკემბერში ორჯერ მიმართეს კანონის განხილვის გაწვევის მოთხოვნით.

ვენეციის კომისიის რეკომენდაცია, ევროკავშირის განცხადებასთან ერთად, საქართველოს ლიდერებს ურჩევს არ მიიღონ ეს კანონი. ქართველი ხალხი ელის, რომ მათი არჩეული თანამდებობის პირები ყველაფერს გააკეთებენ იმისთვის, რომ ევროპასთან დაახლოვდეს და არა დაშორდეს“, – აღნიშნავენ საელჩოში