„აუტანელი არის რადიკალური ოპოზიციისთვის ნებისმიერი წარმატება, რასაც შეიძლება საქართველომ მიაღწიოს, მათ შორის ევროინტეგრაციის გზაზე“, – ამის შესახებ საპარლამენტო უმრავლესობის წევრმა ირაკლი ქადაგიშვილმა განაცხადა.

უმრავლესობის დეპუტატის თქმით, ოპოზიცია გააფთრებულია იმ მიღწევებით, რაც საქართველოს საპარლამენტო დელეგაციამ საერთაშორისო პარტნიორებთან შეხვედრისას მიაღწია.

„კოლეგებო, ახლა ჩვენ ვიხილეთ საქართველოს დელეგაციების წარმატებული ვიზიტების შეფასება ოპოზიციის მხრიდან, ანუ, საქართველოს საპარლამენტო, თუ სამთავრობო დელეგაციებმა, რომ მოახერხეს ევროპის ყველა მინდორზე, ჩვენი ქვეყნის პოზიციების სწორად წარმოჩენა, აგერ მაგალითი იმისა, როგორი გააფთრებული შეტევა მიიტანეს საქართველოს ამ მნიშვნელოვან მომენტში, საქართველოს საპარლამენტო დელეგაციების მიღწეულ პროგრესზე

ეს არის კლასიკური მაგალითი იმისა, რომ აუტანელი არის რადიკალური ოპოზიციისთვის ნებისმიერი წარმატება, რასაც შეიძლება საქართველომ მიაღწიოს, მათ შორის ევროინტეგრაციის გზაზე. ეს აუტანლობა გამოწვეული იმ ტკივილით, რასაც ჰქვია ამ ხელისუფლების წარმატება და მათი რევოლუციური სცენარის არ განხორციელებისა“, – აცხადებს ირაკლი  ქადაგიშვილი.

მოვუწოდებ „ქართულ ოცნებას“, შეწყდეს დეოლიგარქიზაციის კანონის მიღება, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

მისივე თქმით, ევროკომისია რეკომენდაციებიდან დეოლიგარქიზაციის შესახებ ჩანაწერს ვერ ამოიღებს.

„ვენეციის კომისიის რეკომენდაცია ზუსტად ეხება ჩვენს შენიშვნებს, რაზეც ოპოზიცია დიდხანს საუბრობდა. ძალიან მკვახედ არის აღწერილი დასკვნაში, რომ საქართველოს პარლამენტმა არ უნდა მიიღოს უმრავლესობის მიერ შემუშავებული დეოლიგარქიზაციის კანონი, რომელიც დემოკრატიის პრინციპებს ეწინააღმდეგება და საქართველოს ხელისუფლებამ, რეალურად, სისტემური მიდგომა უნდა განახორციელოს, რათა საქართველოში ოლიგარქიზაცია არ იყოს. ხაზგასმულია ოლიგარქიული მმართველობა საქართველოში. სისტემურ მიდგომასა და რეფორმაში ვენეციის კომისია გულისხმობს უსამართლო სისტემის, სხვადასხვა სახელმწიფო სისტემის გაძლიერებას, რაც რეალურად ქვეყანაში არ არსებობს. ასევე, პირდაპირ არის ხაზგასმული, რომ დეოლიგარქიზაციის კანონი შეიძლება კონკრეტულად სხვა ადამიანების რეპრესირებისთვის გამოიყენოს „ქართულმა ოცნებამ“. ამიტომ მოვუწოდებ „ქართულ ოცნებას“, შეწყდეს დეოლიგარქიზაციის კანონის მიღება. ამ კანონს მაინც თუ მიიღებს, მაშინ ერთ-ერთი პუნქტი, რომელიც არის დეოლიგარქიზაცია, არ იქნება შესრულებული. ეს იქნება ჩავარდნილი ვალდებულება საქართველოს ხელისუფლების მხრიდან.

უმრავლესობის განცხადებებს რაც შეეხება, რომ ევროკომისიამ რეკომენდაციებიდან ამოიღოს პუნქტი, რომელიც დეოლიგარქიზაციას ეხება, ეს არ მოხერხდება და არ მოხდება, რადგან ყველა რეზოლუციაში, მათ შორის ვენეციის კომისიაშიც, ხაზგასმულია ძალიან სერიოზული პრობლემა ოლიგარქიული მმართველობის კონტექსტში. ევროკომისია ხაზს უსვამს საგანგაშო ფაქტს, რომ საქართველოში არსებობს ოლიგარქიული მმართველი. დეოლიგარქიზაცია ნიშნავს, რომ საქართველოში ჩრდილოვანი მმართველობის მიტაცების ფაქტები აღარ იყოს. ეს მხოლოდ იმას ნიშნავს, რომ ბიძინა ივანიშვილი ჩამოსცილდეს მმართველობას. ამიტომ როგორც არ უნდა გადათარგმნოს ირაკლი კობახიძემ ან „ოცნების“ ნებისმიერმა წარმომადგენელმა, ევროკომისიის მხრიდან ეს პუნქტი არ შეიცვლება. ჩვენ შეგვიძლია, ვივარაუდოთ, რომ ამ კანონის მიღების და ვენეციის კომისიის წინააღმდეგ წასვლის შემთხვევაში, ეს პუნქტი იქნება შეუსრულებელი“, – განაცხადა ხატია დეკანოიძემ.

ვენეციის კომისიამ საქართველოს მმართველი პარტიის მიერ შემუშავებული „დეოლიგარქიზაციის კანონპროექტის“ შესახებ დასკვნა გამოაქვეყნა, რომლის მიხედვითაც, დეოლიგარქიზაციის კანონპროექტი არსებული ფორმით არ უნდა იყოს მიღებული. საკითხთან დაკავშირებით დღეს განცხადებები გაკეთდა მმართველ გუნდში. „ქართული ოცნების“ წარმომადგენლები აღნიშნავენ, რომ როგორც კი ევროკომისია დაეთანხმება ვენეციის კომისიას და ამოიღებს 12 პუნქტიდან ჩანაწერს დეოლიგარქიზაციის შესახებ, თებერვალში კანონს გააუქმებენ.