ჩეხეთის თავდაცვის მინისტრი, იანა ჩერნოხოვა გაერო-ს გენერალური ასამბლეის რეზოლუციას აკრიტიკებს, რომელიც ისრაელს ღაზას სექტორში ოპერაციების შეწყვეტისკენ მოუწოდებს და ჩეხეთს გაერო-ს დატოვებას ურჩევს.

„სამი კვირის წინ „ჰამასმა“ 1400-ზე მეტი ისრაელელი დახოცა. „ჰამასის“ ტერორისტების მიერ განხორციელებულ უპრეცედენტო ტერორისტულ თავდასხმას წინ მკაფიოდ და სრულად მხოლოდ 14 ქვეყანა აღუდგა, მათ შორის ჩვენი ქვეყანაც! მრცხვენია გაერო-ს გამო. ჩემი აზრით – ჩეხეთი არაფერს უნდა ელოდოს ორგანიზაციაში, რომელიც მხარს უჭერს ტერორისტებს და პატივს არ სცემს თავდაცვის ძირითად უფლებას. მოდით, დავტოვოთ ის“, – განაცხადა ჩეხეთის თავდაცვის მინისტრმა.

ცნობისათვის, პარასკევს, გაერო-ს გენერალურმა ასამბლეამ 120 ხმით 14-ის წინააღმდეგ მიიღო რეზოლუცია, რომელიც მხარეებს ღაზის სექტორში „დაუყოვნებლივი, გრძელვადიანი და მდგრადი ჰუმანიტარული ზავისკენ” მოუწოდებს. რეზოლუციის პროექტი იორდანიამ და კიდევ 40-ზე მეტმა ქვეყანამ მოამზადა.

ისრაელის თავდაცვის ძალების ინფორმაციით, გამანადგურებელმა თვითმფრინავებმა, გასული დღის განმავლობაში, ღაზას სექტორში „ჰამასის“ 450-მდე ობიექტს დაარტყეს.

ისრაელის თავდაცვის ძალების ცნობით, სამიზნეები მოიცავდა „ჰამასის“ სამეთაურო ცენტრებს, სადამკვირვებლო პუნქტებს და ტანკსაწინააღმდეგო მართვადი რაკეტების გამშვებ პოზიციებს.

ისრაელის არმიამ ღაზას სექტორში ღამით, დამატებითი ძალების შეყვანით, სახმელეთო ოპერაცია გააფართოვა.

ისრაელის თავდაცვის ძალებში აცხადებენ, რომ სახმელეთო ჯარებმა „ჰამასის“ ტერორისტულ უჯრედებს და რაზმებს დაარტყეს, რომლებიც სარაკეტო თავდასხმებს ამზადებდნენ.

„ჰამასის“ პოლიტბიუროს წევრმა და საგარეო ურთიერთობების დეპარტამენტის ხელმძღვანელმა მუსა აბუ მარზუკმა განაცხადა, რომ რუსეთის საგარეო საქმეთა სამინისტროსგან მიიღეს მძევლად აყვანილი რუსების სია.

მისი თქმით, ჰამასი ამ ადამიანებს ეძებს და მზადაა მათ გაათავისუფლოს.

„რუსული მხარისგან, საგარეო საქმეთა სამინისტროს მეშვეობით მივიღეთ იმ მოქალაქეების სია, რომლებსაც ორმაგი მოქალაქეობა აქვთ. ამ სიას ძალიან ყურადღებით ვექცევით და დეტალურად შევისწავლით, რადგან რუსეთს ვუყურებთ როგორც ჩვენს უახლოეს მეგობარს“, – აღნიშნა „ჰამასის“ წარმომადგენელმა.

მარზუკის თქმით, სიაში სულ რვა პირია.

„რაც შეეხება სამოქალაქო პირებს, ვინც აიყვანეს და ახლა ღაზაში არიან, ჩვენ მათ ვექცევით ისე, როგორც სტუმრებს. ახლა ჩვენ ვეძებთ ამ ადამიანებს, რთულია, მაგრამ ვეძებთ. და როგორც კი ვიპოვით გავათავისუფლებთ. მიუხედავად დღევანდელი სიტუაციიდან გამომდინარე არსებული სირთულეებისა“, – აღნიშნა მარზუკმა.

ისრაელი ღაზას მშვიდობიან მოსახლეობას ჩრდილოეთ ნაწილიდან სამხრეთში გადასვლისკენ მოუწოდებს და აცხადებს, რომ სამხედროები ტერორისტულ დაჯგუფება „ჰამასთან“ ომის შემდეგ ეტაპზე გადადიან და ოპერაციებს აფართოებენ.

„ჩრდილოეთ ღაზას მშვიდობიანი მოსახლეობა დროებით ღაზას სამხრეთით უნდა გადავიდეს. შედარებით უსაფრთხო ზონაში, სადაც მათ შეუძლიათ მიიღონ წყალი, საკვები და მედიკამენტები“, – აცხადებს ისრაელის თავდაცვის ძალების სპიკერი დანიელ ჰაგარი.

ის დასძენს, ღაზას მიმართულებით ჰუმანიტარული დახმარება, ეგვიპტისა და შეერთებული შტატების ხელმძღვანელობით, გაფართოვდება.

“ისრაელმა ღაზის სექტორში წითელი ხაზები გადაკვეთა”, – ამის შესახებ ირანის პრეზიდენტი, იბრაჰიმ რაისი საუბრობს და განმარტავს, რომ ამან “შესაძლოა, აიძულოს ყველა, მიიღონ შესაბამისი ზომები”.

“ვაშინგტონი გვთხოვს, არაფერი გავაკეთოთ, მაგრამ ისინი ისრაელის ფართო მხარდაჭერას განაგრძობენ. აშშ-მ გაუგზავნა შეტყობინებები წინააღმდეგობის ღერძს, მაგრამ მიიღო მკაფიო პასუხი ბრძოლის ველზე”, – ამბობს რაისი.

ღაზის სექტორში მიმდინარე სახმელეთო ოპერაცია ომის მეორე ეტაპია ძალიან მკაფიო მიზნებით – თქვა ისრაელის პრემიერ მინისტრმა ჟურნალისტებისთვის გამართულ პრესკონფერენციაზე.

ნეთანიაჰუმ მედიის შეკითხვებს, ღაზაში დატყვევებული მძევლების ოჯახის წევრებთან შეხვედრის შემდეგ უპასუხა.

ნეთანიაჰუმ აღნიშნა, რომ ისრაელის სახმელეთო ჯარები შევიდნენ, “ბოროტების ციხესიმაგრეში” (ღაზას სექტორს), ჰამასის ლიკვიდაციისა და მძევლების გათავისუფლების მიზნით.

ჯარისკაცები და მეთაურები ახლა ღაზას სექტორში არიან, ისინი ყველგან არიან განლაგებული.  ეს იქნება ხანგრძლივი და რთული ომი. ჩვენ გავიმარჯვებთ – ამბობს ნეთანიაჰუ.

მან უარყო ბრალდებები, რომელიც დღეს თურქეთის პრეზიდენტმა გააკეთა და ისრაელს “ომის დამნაშავე” უწოდა, თუმცა ერდოღანი არ უხსენებია.

„ჩვენ არ უნდა დაგვადანაშაულონ ომის დანაშაულებში, ეს ფარისევლობაა. ჩვენ ვართ ყველაზე მორალური არმია მსოფლიოში” – თქვა ისრაელის პრემიერმინისტრმა.

ნეთანიაჰუს თქმით, ისრაელის არმია სიფრთხილის ზომებს იღებს მშვიდობიანი მოსახლეობის დასაცავად. მან ჰამასი დაადანაშაულა კაცობრიობის წინააღმდეგ დანაშაულის ჩადენაში და აღნიშნა, რომ  დაჯგუფება ხალხს ცოცხალ ფარად იყენებს.

პრესკონფერენციამდე ბენიამინ ნეთანიაჰუ მძევლების ოჯახის წევრებს შეხვდა და პირობა დადო, რომ ყველაფერს გააკეთეს მათი ახლობლების სახლში დასაბრუნებლად.

მძევლები ჰამასის მებრძოლებმა 7 ოქტომბერს, სამხრეთ ისრაელზე უპრეცედენტო თავდასხმის დროს აიყვანეს. არსებული მონაცემებით, ტერორისტების ტყვეობაში 229 პირია. მათ შორის, ბავშვები, მოხუცები და სამხედრო მოსამსახურეები.

ისრაელის მთავრობის ცნობით, მძევლებიდან მინიმუმ 135 უცხოელია, ან ორმაგი მოქალაქეობა აქვს.

ისრაელმა დღეს ოფიციალურად გამოაცხადა , რომ ომი ახალ ეტაპზე გადავიდა. თავდაცვის მინისტრის, იოავ გალანტის თქმით, ისრაელის არმია გააგრძელებს ოპერაციას, რომელიც ღამით დაიწყო ღაზის სექტორში და რომელიც მიზნად ისახავს ჰამასის გვირაბებისა და სხვა ინფრასტრუქტურის განადგურებას, ასევე ისლამისტური მოძრაობის ლიდერების ლიკვიდაციას.