ეს გაუგებრობა გამოიწვია თავად ევროკომისიამ. ეს უნდა აღიარონ, უპირველეს ყოვლისა. როდესაც ვკითხულობდით, რა არის ნაგულისხმები ჩანაწერში დეოლიგარქიზაციის შესახებ, ვერავინ ვერაფერს ამბობდა, – ამის შესახებ პარლამენტის თავმჯდომარემ შალვა პაპუაშვილმა განაცხადა.

როგორც შალვა პაპუაშვილმა აღნიშნა, არ შეიძლება საქართველოს სთხოვდნენ კანონის არ მიღებას და უკრაინას იმავე კანონის იმპლემენტაციას.

მისი თქმით, ამ რეკომენდაციის ირგვლივ გარკვეული ბუნდოვანება წარმოიშვა.

„ამან გააჩინა ბუნდოვანება. ამ ბუნდოვანებას შემდეგ მოჰყვა ევროპარლამენტის რეზოლუციები, სხვადასხვა ევროპარლამენტარის განცხადებები. შემდეგ, ევროკომისიის წარმომადგენლები გვეუბნებოდნენ, რომ პასუხისმგებლობას არ იღებენ ამ განცხადებებზე. ფაქტობრივად, აღმოვჩნდით სიტუაციაში, როდესაც დეოლიგარქიზაცია, როგორც რეკომენდაცია ჩაიწერა და ევროკომისია არაფერს განმარტავდა და, მეორე მხრივ, ევროპარლამენტარები ხან ბიძინა ივანიშვილზე ამბობდნენ, რომ ის უნდა იყოს ამის ობიექტი და ხან რას. ამიტომ, ასე, ქვეყნის მიმართ მოპყრობა, არ შეიძლება.

ასეთი ურთიერთგამომრიცხავი განცხადებები არასერიოზულია. კეთილი ინებოს, მათ შორის, ევროკომისიამ ან ევროკავშირის დელეგაციამ საქართველოში, გაემიჯნონ ამ განცხადებებს და პერსონალურ მიდგომებს. მაგრამ ასე სიტყვებით თამაში, რომ თან არც უნდათ ევროპარლამენტარზე რაღაც ძვირი სიტყვა თქვან და თითქოს სისტემურ მიდგომას უჭერენ მხარს, ასე არ გამოვა. მეორე საკითხი, თუ რატომ მოვუწოდებ სერიოზულ მიდგომებს ევროკომისიას, მათ შორის, როდესაც კანდიდატის სტატუსი მონიჭების საკითხი იდგა, ყველას გვახსოვს, პირდაპირ ეთერში ვუყურებდით, რომ ევროკომისიის პრეზიდენტმა უკრაინა შეაქო ამ კანონისთვის და მოუწოდა მისი იმპლემენტაციისკენ და ეს კანონი არ არის, რომელიც მეორე მოსმენით მივიღეთ გუშინ? ამიტომ, ჩვენ ვითხოვთ კეთილსინდისიერ და სამართლიან მიდგომას საქართველოს მიმართ. ჩვენ ვთქვით, რომ კანდიდატის სტატუსის არ მონიჭება იყო უსამართლო გადაწყვეტილება და უსამართლობა არის აქაც. როგორ გამოდის, რომ თუკი უკრაინას ეუბნებიან, რომ კანონი სწორია და მიიღე, სხვათაშორის უკრაინასთან დაკავშირებით იგივე ნეგატიური დასკვნა დაიდო, რაც ბუნებრივია, რადგან ერთი და იგივე კანონი არის და ვნახოთ, უკრაინა გააუქმებს თუ არა ამ კანონს და ევროკავშირი მოსთხოვს თუ არა ამ კანონის გაუქმებას. ჩვენ თუ გვეუბნებიან, რომ არ მივიღოთ ეს კანონი, მაშინ ავტომატურად ნიშნავს, რომ უკრაინას უნდა უთხრან გააუქმოს ეს კანონი.

ჩვენ ყველასგან – ოპოზიციისგან, ევროკავშირისგან, ვითხოვთ სერიოზულ, კეთილსინდისიერ და სამართლიან მიდგომას საქართველოს მიმართ.

არ შეიძლება ასე ქვეყანა ათამაშო – ხან უთხრა დეოლიგარქიზაცია, თქვა, რომ უკრაინული კანონი კარგია, საქართველო მიჰყვეს ამ მაგალითს. მერე თქვა, რომ შეიძლება სხვა მიმართულება ჯობს. ჯერ უნდა ჩამოყალიბდნენ,” – განაცხადა შალვა პაპუაშვილმა გადაცემაში „იმედი LIVE“ .

კვერცხის სროლა ყოფილა ბარბაროსობა და ჩვენი ისტორიული, ძირძველი კუთხეების მიწასთან გასწორებას რა ჰქვია მაშინ? – ესაა ღირსების საკითხი და ზურაბ აბაშიძე თავად უნდა გადადგეს,- ასე ეხმაურება  “სტრატეგია აღმაშენებლის” წევრი პაატა მანჯგალაძე,  გავრცელებულ ჩანაწერს,  რომელშიც, სავარაუდოდ, ფიგურირებენ რუსეთთან ურთიერთობის საკითხებში პრემიერ-მინისტრის მრჩეველი ზურაბ აბაშიძე და მარკ ზილბერკვიტი, რომელიც ვლადიმერ პოზნერს თბილისში ვიზიტის დროს ახლდა, რასაც პროტესტი მოჰყვა.

მანჯგალაძის განცხადებით, ამით ხელისუფლების ლუსტრირება კიდევ ერთხელ მოხდა.

„აბაშიძეზე ამბობენ, რომ გამოცდილი დიპლომატია, რას ახმარს მის დიპლომატიას – საქართველოს ინტერესის გატარებას, თუ რუსეთის ინტერესს? კვერცხის სროლას ეძახის ბარბაროსობას და არ გახსენებია ცხინვალი და გასწორებული თამარაშენი.

რუს პროპაგანდისტებს კვერცხის სროლის გამო უხდის ბოდიშს, ბოდიში მოიხადოს 8-9-10 აგვისტოს დაღუპული გმირი ბიჭების მშობლების წინაშე. კვერცხის სროლა ყოფილა ბარბაროსობა და ჩვენი ისტორიული, ძირძველი კუთხეების მიწასთან გასწორებას რა ჰქვია მაშინ? ღარიბაშვილის წარმომადგენელია და მის ინტერესს გამოხატავდა, როცა პრემიერი ისეთი გვყავს, “რასაც გინდა დაუძახებ”, არ მიკვირს აბაშიძის დამოკიდებულება. ეს არის ღირსების საკითხი, თვითონ უნდა გადადგეს. რისთვის იხდიდა ბოდიშს- ელარჯის გაწელვა რომ ბოლომდე არ დააცადეს? ეს არის ლუსტრაცია იმ რუსული საქმის, რასაც “ქართული ოცნება” ემსახურება,”- განაცხადა მანჯგალაძემ.

Youtube-ზე გავრცელდა აუდიოჩანაწერი, რომლის თანახმად, სავარაუდოდ, რუსეთთან ურთიერთობის საკითხებში პრემიერ-მინისტრის მრჩეველი ზურაბ აბაშიძე საუბრობს ჩაიკოვსკის საქველმოქმედო ფონდის პრეზიდენტ მარკ ზილბერკვიტთან, რომელიც ვლადიმერ პოზნერს თბილისში ახლდა.

ჩანაწერის თანახმად, აბაშიძე მათ, ვინც პოზნერის თბილისში ვიზიტი გააპროტესტა, „ნაცისტების ჯგუფს“ უწოდებს. ჩანაწერი, რომლის ავთენტურობაც დადასტურებული არ არის, 2021 წლით არის დათარიღებული.

საქართველოს პრეზიდენტი სალომე ზურაბიშვილი აცხადებს, რომ მიწვევის შემთხვევაში, მზად არის, უკრაინაში ჩავიდეს.

ამის შესახებ სალომე ზურაბიშვილმა უკრაინულ გამოცემა „უკრაინსკაია პრავდასთვის“ მიცემულ ინტერვიუში განაცხადა.

ჟურნალისტმა პრეზიდენტს ჰკითხა, რატომ არ ჩავიდა ის უკრაინაში ვიზიტით ომის დაწყების შემდეგ.

„ყოველთვის მზად ვიყავი ჩამოსვლისთვის და დღესაც მზად ვარ. ასე რომ, თუ ქვენ გადასცემთ შეტყობინებას, შემიძლია, უკვე ხვალ ჩამოვიდე“, – აღნიშნა პრეზიდენტმა.

კითხვაზე – „მისი აზრით, რატომ არ მიიწვია ის ვოლოდიმირ ზელენსკიმ“, სალომე ზურაბიშვილმა აღნიშნა: „ეს არ არის პირადი, და მე ვფიქრობ, რომ ეს არის ის, რაც ჩვენ აღვწერეთ, როგორც სამთავრობო წრეებს შორის მოცემულ ეტაპზე არადამაკმაყოფილებელი ურთიერთობები. ამიტომ, გარკვეული თვალსაზრისით, მე ვგრძნობ ამის შედეგებს, თუმცა მზად ვარ და დარწმუნებული ვარ, რომ ასეთი შესაძლებლობა გვექნება. ვიმედოვნებ, რომ ასეთი შემთხვევა გაჩნდება ყირიმის პლატფორმაზე

გასულ წელს ევროპელმა ლიდერებმა გადაწყვიტეს, მიეცათ საქართველოსთვის ევროპული პერსპექტივა. ისინი ასევე შეთანხმდნენ 12 პრიორიტეტზე, 12 საკითხზე, სადაც საქართველომ უნდა გაზარდოს რეფორმები, ეს არის სამუშაო პროცესი, ძალიან ბევრი რამ უკვე გაკეთდა, – ამის შესახებ საქართველოში ევროკავშირის ელჩმა, პაველ ჰერჩინსკიმ განაცხადა.

როგორც ჰერჩინსკი აცხადებს, ევროკავშირში იმედს გამოთქვამენ, რომ საქართველოს დიდი პროგრესი ექნება 12 რეკომენდაციის შესრულების გზაზე.

„მსურს, მივულოცო მთავრობას ბევრი რეფორმა, ბევრი გადაწყვეტილება, რომელიც უკვე მიღებულია, მაგრამ სხვა გადაწყვეტილებები ჯერ კიდევ მოსალოდნელია. ჩვენ გულწრფელად ვიმედოვნებთ, რომ ვნახავთ პროგრესს. ვიმედოვნებთ, რომ მაქსიმალურად დიდი პროგრესი იქნება მიღწეული 12 პრიორიტეტზე. ამავე დროს ჩვენ გვჭირდება, პოზიტიური და კონსტრუქციული ამბები მოდიოდეს საქართველოდან. ჩვენ გვჭირდება ევროკავშირის ინსტიტუტებში საქართველოს აღქმის გაუმჯობესება, ასევე 27 წევრ ქვეყანაში. ეს ჩვენი საერთო ამოცანაა და, ჩვენი მხრივ, ვეცდებით, ვიმუშაოთ საქართველოს ხელისუფლებასთან, დავეხმაროთ მთავრობას პოზიტიური ატმოსფეროს შესაქმნელად 12 პრიორიტეტის შესრულების საფუძველზე, ასევე საქართველოს საერთო აღქმის საფუძველზე“, – განაცხადა ელჩმა.