ოპოზიციიდან ზოგიერთს პენიტენციურ სისტემაზე საუბრის უფლება აქვს, თუმცა, საოცრებაა როცა ამაზე „ნაციონალური მოძრაობის“ წარმომადგენლები ლაპარაკობენ, – ამის შესახებ „ხალხის ძალის“ ერთ-ერთმა ლიდერმა, დეპუტატმა სოზარ სუბარმა პარლამენტის პლენარულ სხდომაზე განაცხადა, სადაც „მინისტრის საათის“ ფორმატში იუსტიციის მინისტრს, რატი ბრეგაძეს მოუსმინეს.

სოზარ სუბარის თქმით, საქართველოს პენიტენციურ სისტემაში ბოლო 9 წლის განმავლობაში რამდენი პატიმარიც გარდაიცვალა, იმდენი „ნაციონალური მოძრაობის“ რეჟიმის დროს მხოლოდ ერთი წლის განმავლობაში კვდებოდა.

„მინდა იმ პრობლემატურ საკითხებს მივუბრუნდე, რომლებიც ჩვენმა კოლეგებმა წამოჭრეს. ერთ-ერთი საკითხი არის პატიმრების რაოდენობა საქართველოში. ნამდვილად, პატიმრების რაოდენობით ევროპაში ერთ-ერთი მძიმე მაჩვენებელი გვაქვს. დაახლოებით, 110 არის ევროპის საშუალო მაჩვენებელი და 125-მდე – საქართველოს მაჩვენებელი. ოპოზიციიდან ზოგიერთს ამ თემაზე საუბრის უფლება აქვს, თუმცა, საოცრებაა როცა ამაზე „ნაციონალური მოძრაობის“ წარმომადგენლები ლაპარაკობენ. როდესაც ისინი ხელისუფლებაში მოვიდნენ, 6000 კაცი იყო საქართველოს პენიტენციურ სისტემაში, 4 წელიწადში კი 400%-ით გაიზარდა ეს მაჩვენებელი – 24 000-ზე ავედით და საქართველო ამ მხრივ, აშშ-სა და რუსეთის შემდეგ, მსოფლიოში მესამე ადგილზე გავიდა. ასეთი სწრაფი ზრდა ამ მხრივ მსოფლიოს არცერთ ქვეყანას არ ჰქონია. ამ ზრდას, ბუნებრივია, საპატიმროების პირობები ვერ მიჰყვა. 24-საწოლიან საკანში 120-130 პატიმარი იყო და წარმოიდგინეთ, ამ საკანში მყოფი ხალხის მდგომარეობა როგორი იქნებოდა. ეს იყო საკანი, რომლის ფანჯარაც არ იღებოდა, რომლის კარსაც არ აღებდნენ და სადაც საპირფარეშო შიგნითვე იყო მოწყობილი. ამ საკანში, უბრალოდ, ჰაერი არ მოძრაობდა. ამიტომ იყო პატიმრებში სიკვდილიანობის მაღალი მაჩვენებელი. 144 პატიმარი გარდაიცვალა 2010 წელს, 140 – 2011 წელს. საქართველოს პენიტენციურ სისტემაში ბოლო 9 წლის განმავლობაში რამდენი პატიმარიც გარდაიცვალა, „ნაციონალური მოძრაობის“ რეჟიმის დროს, მხოლოდ ერთი წლის განმავლობაში კვდებოდა იმდენი. რატომ იყო სიკვდილიანობის ასეთი მაღალი მაჩვენებელი იმ დროს? იმიტომ, რომ აწამებდნენ პატიმრებს, არ მკურნალობდნენ მათ; როცა პატიმარი მკურნალობას ითხოვდა, ამის ნაცვლად ის მორგში ჩაჰყავდათ და უსასტიკესად აწამებდნენ. ამოწერილი მაქვს მაგალითები მოხსენებებიდან, რომლებიც ეკუთვნის გიორგი ტუღუშს, ადამიანს, რომელიც პარლამენტში „ნაციონალური მოძრაობის“ სიით შემოვიდა. მანაც კი ვერ დამალა ის უმძიმესი ფაქტები, თუ როგორ აწამებდნენ ადამიანებს იმის გამო, რომ ისინი ითხოვდნენ წამალს, ან იმიტომ, რომ მათი საქმეები სტრასბურგში მიჰქონდათ. პატიმრების წამების, ცუდი მოპყრობის, მკურნალობის არქონის ან ციხეში არსებული ცუდი მდგომარეობის გამო, არცერთი საქმე არ არის წასული სტრასბურგში 2012 წლის პირველი დეკემბრის შემდეგ.

წელიწადში იყო ტუბერკულოზის დაახლოებით 1500-2000 ახალი შემთხვევა, მაშინ, როდესაც ახლა ეს შემთხვევები ათეულის ფარგლებშიც აღარ არის და სულ რაღაც ასზე ნაკლებია იმ პატიმრების რაოდენობა, რომლებიც ამ დაავადებაზე მკურნალობენ. დაახლოებით 10-12-ჯერ შემცირდა სტრასბურგში მთლიანად ქვეყნიდან წასული საჩივრების რაოდენობა (და ეს იმის გამოკლებით, რაც რუსეთის წინააღმდეგ იყო გაგზავნილი), ვგულისხმობ ჩვეულებრივ, ხელისუფლების წინააღმდეგ გაგზავნილ საჩივრებს. დღეს კი რაზე ვსაუბრობთ ციხეებთან დაკავშირებით? მინისტრმა მოგვაწოდა ინფორმაცია, რამდენი სპორტული ღონისძიება ტარდება ციხეებში, საუბრობდა, რომ ხანგრძლივი პაემნების უფლება უკვე ბრალდებულებსაც უნდა ჰქონდეთ და არა მხოლოდ – მსჯავრდებულებს, რომლებიც ადმინისტრაციის შეფასებით, კარგად იქცევიან. დღეს ვსაუბრობთ, რამდენი კულტურული ღონისძიება ტარდება ციხეებში, როგორი დასაქმების პირობებია პატიმრებისთვის და როგორ იყიდება მათი ნაწარმი მთელი ქვეყნის მასშტაბით; რესოციალიზაციის რა პირობებია და ა.შ. მიუხედავად ამისა, რა თქმა უნდა, ვეთანხმები ჩემს კოლეგებს, რომლებიც ამბობენ, რომ რაღაც უნდა მოვიმოქმედოთ, რათა პატიმრების რაოდენობა საშუალო ევროპულ სტანდარტს მივუახლოვოთ და ამ შემთხვევაში, ჩვენთვის ნამდვილად არ არის მისაღები ის სტანდარტი, რომელიც ჩვენს სტრატეგიულ პარტნიორთან – ამერიკის შეერთებულ შტატებში არის დამკვიდრებული – ბოლო რამდენიმე ათწლეულის განმავლობაში ყოველ 100 000 პატიმარზე 600-700 ადამიანი იხდის სასჯელს და ეს მათთან არის ჩვეულებრივი ამბავი“, – განაცხადა სოზარ სუბარმა.

იუსტიციის სამინისტრო არის ერთ-ერთი საკვანძო უწყება სახელმწიფო უწყებებს შორის, რომელიც ყოველდღიურად ათიათასობით ჩვენს მოქალაქეს ემსახურება და ათი ათასი მოქალაქისთვის არის მნიშვნელოვანი ამ სამინისტროს მუშაობა. ერთი მხრივ, სერვისების მიმართულება, მსურს, გამოვყო, მეორე მხრივ, ძალიან საინტერესოა კანონშემოქმედებითი მუშაობა, რომელსაც სამინისტრო ეწევა და, შესაბამისად, კანონიდან კანონამდე უმჯობესდება ჩვენი მოქალაქეების უფლებრივი მდგომარეობა, – განაცხადა ფრაქცია „ქართული ოცნების“ თავმჯდომარის მოადგილემ, რატი იონათამიშვილმა პარლამენტის პლენარულ სხდომაზე, რომელზეც იუსტიციის მინისტრს, რატი ბრეგაძეს „მინისტრის საათის“ ფორმატში მოუსმინეს.

რატი იონათამიშვილის თქმით, ასევე მნიშვნელოვანია, რომ სამინისტრო საერთაშორისო სასამართლოებზე იცავს საქართველოსა და საქართველოს მოქალაქეების ღირსებას.

როგორც იონათამიშვილმა აღნიშნა, დღეს ყველამ იხილა, თუ როგორ იწონებდნენ „ნაციონალური მოძრაობის“ ლიდერები თავს იმით, რომ თვეების განმავლობაში საქართველოს მიმართ დეზინფორმაციის კამპანიას აწარმოებდნენ.

„ისინი არიან ადამიანები, რომლებსაც პასუხების მოსმენაც კი არ შეუძლიათ, მარტო ბრალდების კორიანტელს დააყენებენ, დეზინფორმაციულ კამპანიას გააგრძელებენ და შემდეგ შარშანდელი თოვლივით იკარგებიან და ეს სიმბოლურია, ვინაიდან ასევე გაქრებიან ქართული პოლიტიკიდან, ვინაიდან ამდენ სიცრუესა და დეზინფორმაციას ამ ადამიანებს, პირველ რიგში, საკუთარი ამომრჩეველი არ აპატიებს. ეს ჩანს თუნდაც ბოლო სოციოლოგიური კვლევებიდან, სადაც ნახევრდება „ნაციონალური მოძრაობის“ მხარდაჭერა. სინამდვილეში, როდესაც ისინი უტიფრობასა და ამორალურობაზე საუბრობენ, ყველაზე დიდი ამორალურობა არის, როდესაც შენ შენი ქვეყნის წინააღმდეგ აწარმოებ დეზინფორმაციის კამპანიას, ამაში ხარჯავ მილიონობით დოლარს და დღეს ამას ამაყად და უტიფრად იწონებ, თითქოს ამით რაღაც კარგი გააკეთე. ცხადია, სწორედ ასეთ ქმედებებზე ძალიან მკაცრ პასუხს გასცემს მათ ჩვენი საზოგადოება“, – განაცხადა რატი იონათამიშვილმა.

სახელმწიფო ინტერესებით მოთამაშე პოლიტიკურ ლუდომანებს დღეს შევახსენე სახელმწიფოს წინააღმდეგ მათ მიერ გადადგმული ნაბიჯები. ეს არის ისტორიული სირცხვილი ჩვენი თავდაცვის ძალების წინაშე – ის განცხადებები, რაც ამ ადამიანებმა გააკეთეს და ის რეზოლუცია, რასაც ამ ადამიანებმა მოაწერეს ხელი, – ასე აფასებს იუსტიციის მინისტრი რატი ბრეგაძე ყოფილი ხელისუფლების მიერ გადადგმულ ნაბიჯებს 2008 წლის აგვისტოს ომის გმირებთან მიმართებით.

ბრეგაძის შეფასებით, „ნაციონალური მოძრაობის“ ხელისუფლებაში ყოფნის პერიოდს ისტორიული სირცხვილი უწოდა.

„თავდაცვის ძალები გმირულად, სისხლის უკანასკნელ წვეთამდე იბრძოდნენ და უამრავი ადამიანი დაიღუპა, რომლებიც დღეს მუხათგვერდის ძმათა სასაფლაოზე განისვენებენ. მათ იმ ტერიტორიებისთვის იბრძოლეს, რომლებსაც ენმ-ის ბელადი, ყოფილი მთავარსარდალი, რომელმაც უარი თქვა საქართველოს მოქალაქეობაზე, „ქვაგორიან ადგილებს” უწოდებდა, რომლებსაც ნულოვანი ღირებულება აქვს“, – განაცხადა ბრეგაძემ.

აღნიშნულ ინფორმაციას იუსტიციის სამინისტრო ავრცელებს.

ვერც პრეზიდენტ სააკაშვილს მოკლავთ და ვერც საქართველოს ევროპულ მომავალს, – განაცხადა საპარლამენტო ფრაქციის „ერთიანი ნაციონალური მოძრაობის“ თავმჯდომარემ, თინა ბოკუჩავამ პარლამენტში პლენარულ სხდომაზე „მინისტრის საათის“ დროს.

თინა ბოკუჩავას განცხადებით, პრეზიდენტი სააკაშვილის სიკვდილამდე მიყვანის მცდელობა „ოცნების“ მხრიდან ქვეყნის ევროპეიზაციის მკვლელობის მცდელობაა.

მისივე თქმით, პრეზიდენტი ზურაბიშვილი უნდა აცნობიერებდეს რამხელა პოლიტიკური პასუხისმგებლობა აკისრია და რამხელა შესაძლებლობა გააჩნია, რომ ქვეყნისთვის და ქვეყნის ევროპული მომავლისთვის მნიშვნელოვანი ნაბიჯი გადადგას და შეიწყალოს პრეზიდენტი სააკაშვილი.

„თქვენი დღევანდელი მოხსენება სწორედ რუსი ოლიგარქის, მორიგი ჩინოვნიკის, მორიგი არაფრისმთქმელი მოხსენება იქნებოდა, რომელიც სახელმწიფოს მთავარ მიღწევად 12 წლის წინ ჩვენი ხელისუფლების მიერ გახსნილ იუსტიციის სახლს ასახელებს. რუსი ოლიგარქის, მორიგი ჩინოვნიკის, მორიგი მოხსენება, რომელსაც გულწრფელად გეუბნებით არც კი გამოვეხმაურებოდი, რომ არა ერთი გარემოება – თქვენ, როგორც ივანიშვილის იუსტიციის მინისტრი პირადად პასუხისმგებელი ხართ ქვეყნის მესამე პრეზიდენტი სააკაშვილის უკანონო ტყვეობაზე, რომელიც რეგიონში პრეზიდენტ ზელენსკისთან ერთად, ერთ-ერთი ყველაზე დიდი ანტიპუტინისტია და ის თქვენმა რუსულმა რეჟიმმა, რომელიც რუს „ეფესბეს“ აგენტებზე დგას, სწორედ პუტინის საამებლად დაატყვევეთ. თქვენი მთავრობის მეხოტბის გზავნილებს ყურადღებით ეცნობით ალბათ, მაგრამ ფაქტია, რომ უგულებელვყოფთ იმ გზავნილებს, რასაც დასავლეთიდან ვისმენთ პრეზიდენტი სააკაშვილის უკანონო ტყვეობაზე, ამიტომ მე მინდა ეს შესაძლებლობა გამოვიყენო და საზოგადოების წინაშე წაგიკითხოთ, რას ამბობს ცივილიზებული სამყარო და რას ამბობენ საქართველოს დასავლელი მეგობრები და ჩვენი ქვეყნის ევროპული მომავლის ქომაგები პრეზიდენტი სააკაშვილის ტყვეობაზე. პირველი მე მინდა წაგიკითხოთ ევროპარლამენტის რეზოლუცია, რომელიც ევროპარლამენტის ხუთმა ყველაზე მსხვილმა პოლიტიკურმა ჯგუფმა დააინიცირა, ინიციატორებში არიან ლიტვის ყოფილი პრემიერ-მინისტრი ანდრიუს კუბილიუსი, ლიტვის ყოფილი თავდაცვის მინისტრი რასა იუკნევიჩიანე, პოლონეთის ყოფილი საგარეო საქმეთა მინისტრები რადისლავ სიკორსკი და ანა ფოტიგა, ესტონეთის ყოფილი საგარეო საქმეთა მინისტრი და სხვა ევროპარლამენტარები სხვადასხვა ქვეყნიდან, ესპანეთიდან, გერმანიიდან, ჰოლანდიიდან, საფრანგეთიდან და სხვა. ეს რეზოლუცია, რომელიც კონკრეტულად პრეზიდენტ სააკაშვილს ეხება, ევროპარლამენტმა აბსოლუტური უმრავლესობით მიიღო 2023 წლის მარტში, რომელსაც 577-მა ევროპარლამენტარმა დაუჭირა მხარი. გასაგებია, რომ ევროკავშირის წევრი ქვეყნების მინისტრების სიტყვა თქვენთვის, როგორც რუსული რეჟიმის წარმომადგენლებისთვის ღირებული არ არის, პუტინის პროპაგანდისტების და თავად პუტინის სიტყვებისგან განსხვავებით, რომლებიც „რუსული ოცნების“ ქებას არ იშურებენ, მაგრამ მე საზოგადოებისთვის მაინც კიდევ ერთხელ წავიკითხავ რა წერია ევროპარლამენტის ამ რეზოლუციაში – „ევროპარლამენტი მოუწოდებს საქართველოს ხელისუფლებას გაათავისუფლონ პრეზიდენტი სააკაშვილი, რაც ხელს შეუწყობს პოლიტიკურ დეპოლარიზაციას.“ – ეს წერია სიტყვა სიტყვით ევროპარლამენტის იმ რეზოლუციაში, რომელსაც 577-მა ევროპარლამენტარმა დაუჭირა მხარი. როგორ წარმოგიდგენიათ, ბატონო რატი, თქვენ, თქვენი მთავრობის მეთაურ ღარიბაშვილთან და მის უფროს ოლიგარქთან, ბიძინა ივანიშვილთან ერთად ქვეყანაში შესაძლებელია დეოლიგარქიზაცია, სანამ ივანიშვილის მთავარი პოლიტიკური ოპონენტი და ქვეყანაში ყველაზე დიდი ელექტორალური მხარდაჭერის პოლიტიკოსი გამოკეტილი გყავთ სატუსაღოში, რომელსაც პოლიტიკურ პატიმრად აღიარებს მთელი ცივილიზებული სამყარო და რომლის გამოშვებისკენაც ღიად მოგიწოდებთ დასავლეთი. ამავე რეზოლუციაში ევროპარლამენტი სთავაზობს სალომე ზურაბიშვილს გამოიყენოს მის ხელთ არსებული კონსტიტუციური უფლება და შეიწყალოს მიხეილ სააკაშვილი. მე იმედი მაქვს, რომ პრეზიდენტი ზურაბიშვილი აცნობიერებს რამხელა პოლიტიკური პასუხისმგებლობა აკისრია მას და რამხელა შესაძლებლობა გააჩნია, რომ ქვეყნისთვის და ქვეყნის ევროპული მომავლისთვის ესოდენ მნიშვნელოვანი ნაბიჯი გადადგას და შეიწყალოს პრეზიდენტი სააკაშვილი.

მესმის, რომ „რუსული ოცნების“ რეჟიმის პირობებში, რომელსაც რუსი ოლიგარქი მართავს, რასაც გუშინდელი ინტერვიუს შემდეგ თავად პრეზიდენტი ზურაბიშვილიც ადასტურებს, ამგვარი ნაბიჯის გადადგმა დიდ პოლიტიკურ გამბედაობას მოითხოვს. ივანიშვილს არაერთხელ უჩვენებია, რომ ის არ ერიდება ბრძოლის ყველაზე ბინძური მეთოდების გამოყენებას, მათ შორის ქალი მოწინააღმდეგეების წინააღმდეგ, ქალი ოპონენტების წინააღმდეგ, მათ შორის მისი გუნდის ყოფილი წევრი ქალების წინააღმდეგ, თუმცა დღეს, როგორც არასდროს, დროა პოლიტიკური გამბედაობის და ქვეყნის ეროვნული ინტერესების დაცვის ნებისმიერ ფასად, რადგან თუ მომავალი რამდენიმე თვე საქართველომ არ გამოიყენა დეპოლარიზაციისთვის, საქართველომ შესაძლოა დაკარგოს ისტორიული შანსი, რომ ჩვენ დავეწიოთ უკრაინასა და მოლდოვას და ჩვენ გავხსნათ მოლაპარაკებები ევროკავშირთან გაწევრიანების შესახებ. ამავე რეზოლუციაში ნათქვამია, რომ პრეზიდენტ სააკაშვილის ჯანმრთელობის მდგომარეობა, რაზეც პასუხისმგებლობა ხელისუფლებას ეკისრება, დიდ ზიანს აყენებს ქვეყნის საერთაშორისო იმიჯს და ევროპეიზაციის მიზანს, რომ პრეზიდენტი სააკაშვილის სიკვდილი – რაზედ თქვენი მთავრობის სამარცხვინო წევრები და პრემიერად წოდებული ღარიბაშვილი ხშირად ქილიკობთ – უდიდესი დარტყმა იქნება საქართველოსთვის. პრეზიდენტი სააკაშვილის სიკვდილამდე მიყვანის მცდელობა თქვენი მხრიდან ქვეყნის ევროპეიზაციის მკვლელობის მცდელობაცაა, მაგრამ – არა – როგორც მიშა იტყოდა – ნურას უკაცრავად, ვერ მოგართვით, ვერც პრეზიდენტ სააკაშვილს მოკლავთ და ვერც საქართველოს ევროპულ მომავალს“, – განაცხადა თინა ბოკუჩავამ.

იუსტიციის მინისტრის მიერ წარმოდგენილი ანგარიში ყველა შესაბამის საკითხთან მიმართებაში ორიენტირებული იყო მომავალზე, ორიენტირებული იყო იმაზე, თუ რა ვითარდება სერვისების მიმართულებით ჩვენი მოქალაქეებისთვის და რა იცვლება უკეთესობისკენ მათი ინტერესების შესაბამისად, – ამის შესახებ საპარლამენტო უმრავლესობის წევრმა, ანრი ოხანაშვილმა პლენარულ სხდომაზე იუსტიციის მინისტრის, რატი ბრეგაძის „მინისტრის საათის“ ფორმატში მოსმენის დროს განაცხადა.

ანრი ოხანაშვილმა ყურადღება გაამახვილა იუსტიციის სამინისტროს მიერ გატარებულ რეფორმებზე.

„ბატონმა მინისტრმა ისაუბრა სერვისების ხელმისაწვდომობაზე, რომელიც ჩვენს მოქალაქეებს უზოგავს დროს და ეფექტიანი ადმინისტრირების საშუალებას აძლევს, ისაუბრა მიწის სისტემურ რეგისტრაციაზე, რომელიც ძალიან მნიშვნელოვანია სახელმწიფოსთვის და ჩვენი მოქალაქეებისთვის, ისაუბრა არა ყველას დასჯაზე და ნულოვან ტოლერანტობაზე, არამედ მსჯავრდებულთა რესოციალიზაცია-რეაბილიტაციაზე, მედიაციაზე და იმ სერვისებზე, რომლებიც განვითარდა და კიდევ ვითარდება იუსტიციის სამინისტროში.

ასევე, ძალიან მნიშვნელოვანია, რომ იუსტიციის სამინისტროს ამჟამინდელი ხელმძღვანელობით მომზადებულია „პენიტენციური კოდექსი“, რომელიც ჩვენ უკვე ორი მოსმენით განვიხილეთ და ის მნიშვნელოვან უფლებრივ სტანდარტებს ითვალისწინებს ჩვენი მსჯავრდებულებისთვის“, – აღნიშნა იურიდიულ საკითხთა კომიტეტის თავმჯდომარემ.