„ნაციონალური მოძრაობის“ წევრი გიორგი ბარამიძე ტელეკომპანია „პირველის“ ეთერში ამავე პარტიის წევრის ნიკა მელიას მიერ გაკეთებულ განცხადებებს გამოეხმაურა და გააკრიტიკა.

ბარამიძის თქმით, ნიკა მელიას მიერ გაკეთებული განცხადებები ნიშნავს იმას, რომ მას „ნაციონალურ მოძრაობაზე“ გული არ შესტკივა.

„ნიკა მელიამ დაიდოს გულზე ხელი და თქვას, დღეს მას „ნაციონალურ მოძრაობაზე“ გული შესტკივა? ახლა მაინც მოიქცეს პატიოსნად. ნიკას მე გვერდში ვედექი. 2021 წელს რაღაცა რომ მოხდა, ის დღეს გაიგო? პოლიტსაბჭოს თავმჯდომარე იყო და მერე პარტიის თავმჯდომარე იყო.

თუ სიმართლის მოყვარულია, უკაცრავად მაგრამ მაშინ სად იყო? მე მაინტერესებს ის, რაზედაც გუშინ ილაპარაკა, ახლა გაიგო? როგორც ჩანს მაშინ გაიგო, თუ ჭურში იჯდა თავმჯდომარე როცა იყო? მაშინ რატომ არ ამოიღო ხმა? მაშინ დათო კეზერაშვილი ცუდი იყო როცა პარტიას ეხმარებოდა?

მაშინ როცა ნიკა აირჩა პარტიის თავმჯდომარედ, მთელი კონფიგურაცია შეიცვალა. მე მაშინ არავის არ დავუჭირე მხარი. როდესაც კეზერაშვილმა დაიწყო ჩვენთან თანამშრომლობა და დახმარება, სამდივნოს კონფიგურაცია შეიცვალა, ვიყავი მდივანი თავდაცვის და უსაფრთხოების საკითხებში და ეს თანამდებობა საერთოდ გაუქმდა.

ახლა რომ ლაპარაკობ კეზერაშვილი მიუღებელიაო, ახლა გახდა მიუღებელი? გია ბარამიძის გაგდებაზე ყაბულს იყავი ანუ ეს წითელი ხაზი არ იყო ანუ შენ დააწესე როდის არის კეზერაშვილი მისაღები და როდის არა? ეგ როგორ არის ჩემო ძმაო ნიკა?“ – აღნიშნა ბარამიძემ.

საფრანგეთის ელჩთან ვისაუბრეთ კანდიდატის სტატუსთან მიმართებაში პრეზიდენტ სააკაშვილის თავისუფლების მნიშვნელობაზე. ასევე, დავუფიქსირეთ ღიად ჩვენი დამოკიდებულება კანდიდატის სტატუსთან დაკავშირებით, რომ ქართველ ხალხს ეკუთვნის კანდიდატის სტატუსი ყოველ მიზეზ გარეშე და ქართველი ხალხი თავად გავცემთ პასუხს პუტინის კარის ოლიგარქს – ბიძინა ივანიშვილს , – ამის შესახებ განცხადება “ერთიანი ნაციონალური მოძრაობის“ თავმჯდომარემ, ლევან ხაბეიშვილმა პარტიის გენერალური მდივანთან, პეტრე ცისკარიშვილთან ერთად საფრანგეთის ელჩთან საქართველოში, შერაზ გარსთან შეხვედრის შემდეგ გააკეთა.

მისი თქმით, „აპრიორი მნიშვნელოვანია“ პარტნიორებისათვის პრეზიდენტ სააკაშვილის ჯანმრთელობა და თავისუფლება.

„ყველამ კარგად იცის, რომ კანდიდატის სტატუსთან დაკავშირებით უნდა იქნას მიღებული პოლიტიკური გადაწყვეტილება და ამას უმაღლესი პოლიტიკური თანამდებობის პირები მიიღებენ და ამ პოლიტიკოსების უმეტესი ნაწილი მხარს უჭერს პრეზიდენტ სააკაშვილის გადაყვანას და მკურნალობას ევროკავშირის ქვეყანაში. ცხადია, ვისაუბრეთ კანდიდატის სტატუსთან მიმართებაში პრეზიდენტ სააკაშვილის თავისუფლების მნიშვნელობასთან და პირდაპირ ვთქვათ, რომ აბსოლუტურად შეთანხმებულია ყველა, რომ ხელს უშლის კანდიდატის სტატუსის მიღებას პრეზიდენტის ამ მდგომარეობაში ყოფნა. ცივილიზებულ სამყაროში პრეზიდენტის მკვლელებს და მწამებლებს არ ელოდებიან და დიახ, ამ საკითხთან დაკავშირებით გვქონდა საუბარი საფრანგეთის ელჩთან. ასევე, ვისაუბრეთ რუსული პარტიის შესახებ და ჩვენ მივაწოდეთ ინფორმაცია პუტინისტების, რუსული პარტიის რუსულ მოქმედებებზე, როგორიცაა საპენსიო რეფორმის შეხვედრებზე ქვის სროლა კასპში, საგარეჯოში ძალადობრივი მოქმედებები, ასევე პოლიტიკურ ლიდერებზე თავდასხმების შესახებ ვისაუბრეთ დეტალურად, ისევე, როგორც „ფორმულას“ დამფუძნებელზე მომხდარი დაგეგმილი ძალადობა. დეტალურად ვისაუბრეთ რუსული პარტიის მავნებლურ საქმიანობაზე და ასევე, ცხადია, დავუფიქსირეთ ღიად ჩვენი დამოკიდებულება კანდიდატის სტატუსთან დაკავშირებით, რომ ქართველ ხალხს ეკუთვნის კანდიდატის სტატუსი ყოველ მიზეზ გარეშე და რომ ქართველი ხალხი თავად გავცემთ პასუხს პუტინის კარის ოლიგარქს – ბიძინა ივანიშვილს“, – განაცხადა ლევან ხაბეიშვილმა

“ლელოს” გენერალურმა მდივანმა, ირაკლი კუპრაძემ, სპეციალურ ბრიფინგზე განაცხადა: “ქართული ოცნება” ყოველდღიურად ხელს უშლის ქართველი ხალხის დაბრუნებას ჩვენს ქვეყანაში. “ქართული ოცნება” ყოველდღიურად ხელს უშლის და ეწინააღმდეგება ემიგრაციის შინ დაბრუნებას, რაც არის რუსეთის ინტერესების მსახურება ქართველი ხალხის ინტერესების საზიანოდ. ეს ყველაფერი გამოხატულია იმაში, რომ მოქალაქეები, რომლებიც 90-იანი წლებიდან დღემდე გადახვეწილები იყვნენ ემიგრაციაში, საკუთარი შრომით ემიგრაციიდან ინახავდნენ საქართველოს ეკონომიკას და ოჯახებს, ისინი დღეს ბრუნდებიან რიგი მიზეზების გამო საქართველოში. ეს არის, მათ შორის, რუსეთ უკრაინის ომი, მათ შორის უკრაინიდან, მათ შორის რუსეთიდან და დღეს “ქართული ოცნება” უარით ისტუმრებს ჩვენს თანამემამულეებს, ეროვნებით ქართველ მოქალაქეებს, ადამიანებს, რომლებიც დაბადებული არიან საქართველოს ტერიტორიაზე და მათ ან უბრუნებს მოქალაქეობას ან უარს ეუბნება საერთოდ მოქალაქეების მიღებაზე, ეს არის დანაშაული ქართველი ხალხის და საქართველოს ეროვნული ინტერესების წინააღმდეგ. ეს პროცესი ნათლად მიუთითებს, რომლის მთავარი აქტორიც არის “ქართულ ოცნებას” დაქვემდებარებული სუსი, რომელიც მოქალაქეობის კომისიაში ბლოკავს და უარს ეუბნება ჩვენს თანამემამულეებს, ცალსახად მიუთითებს, რომ “ქართული ოცნება” არ არის დაინტერესებული საქართველოში ემიგრაციის დაბრუნების, ადამიანებისა, რომლებიც არიან ეთნიკურად ქართველები ან დაბადებულნი საქართველოს ტერიტორიაზე. საქართველოს პრეზიდენტს მოვუწოდებთ, რომ გამოიყენოს საკუთარი დისკრედიციული უფლება და მყისიერად გადადგას ნაბიჯები იმისთვის, რომ ყველა მსგავს ადამიანს მისცეს მოქალაქეობა დაჩქარებული წესით, რომლებიც ბრუნდებიან შინ, საკუთარ სამშობლოში. სალომე ზურაბიშვილს ამის შესაძლებლობა აქვს, ჩვენ გვაქვს ცალსახა ინფორმაცია, რომ სუსი საკუთარი ე.წ. რეკომენდაციებით ხელს უშლის პრეზიდენტის ადმინისტრაციას მოქალაქეობის მინიჭებაში, მაგრამ პრეზიდენტს უნდა ეყოს გამბედაობა. მთავარი მიზანი არის ის, რომ საქართველოში დაბრუნდნენ ქართველები, მაგრამ ეს წინააღმდეგობა “ქართული ოცნების” ინტერესებს, რომელიც ცდილობს, რომ საქართველო გაივსოს მხოლოდ და მხოლოდ რუსეთის მოქალაქეები, რომელთა ექსპანსია ეკონომიკური თუ სხვა მხრივ, არის თვალსაჩინო, მათ შორის, დედაქალაქში და სხვადასხვა ქალაქებში. “ლელო” იდგება თითოეული იმ ადამიანის გვერდით, რომელიც ეცდება დაბრუნებას საკუთარ სამშობლოში მხარდამხარ მათ შორის ჩვენ გვექნება რამდენიმე სასამართლო პროცესი იმ პირებთან ერთად, ვისაც უკვე უთხრეს უარი საქართველოს მოქალაქეობის მიღებაზე.

ჩვენი ინტერესი არის, რაც შეიძლება ნაკლები რადიკალური ინტერესების გამტარი პარტია იყოს. ეს მხოლოდ ჩვენი, როგორც პარტიის ინტერესი კი არა, ეს ხალხისა და საზოგადოების ინტერესშია, რომ ქვეყანაში იყოს მშვიდობა, ჯანსაღი პოლიტიკური გარემო, კრიტიკული, საინტერესო პოლიტიკა კეთდებოდეს – არგუმენტებზე, იდეებზე, ხედვებზე დაფუძნებით და არა რადიკალიზაციით, – ამის შესახებ ანრი ოხანაშვილმა მედიასთან განაცხადა.

პარლამენტის იურიდიულ საკითხთა კომიტეტის თავმჯდომარის თქმით, „ნაციონალური მოძრაობა“ და გიორგი ვაშაძე ყოველთვის რადიკალური ხაზის გამტარები იყვნენ ქართულ პოლიტიკაში.

„ვაშაძის პოლიტიკური წონა ყველასთვის ნათელია. დეპუტატების ერთ ხელზე ჩამოსათვლელი რაოდენობის გაყვანა შეძლო პარლამენტში და მას შემდეგ მისი პოლიტიკური წონა რომ შემცირებულია და გაზრდილი არ არის, მგონი ყველასთვის ცხადი უნდა იყოს. ვერ ვიტყვით, რომ რაღაც ფერიცვალება მოხდა ამ ადამიანის შინაგანად პოლიტიკური თვალსაზრისით. ეს ადამიანი შინაგანად, თავისი პოლიტიკური ხედვითა და აზროვნებით იყო დაკავშირებული „ნაციონალურ მოძრაობასთან“. წლების განმავლობაში იყო ადეიშვილის კადრი. შესაბამისად, ის იყო დაკავშირებული და კიდევ ერთხელ დაუკავშირდა ამ პარტიას. ამიტომ ჩვენთვის ამას არსებითი მნიშვნელობა არ აქვს.

ხაბეიშვილი იქნება თუ ვაშაძე ბილბორდზე გამოსახული პირველ ნომრად, ეს შინაარსობრივად და თვისებრივად რაიმეს ვერ შეცვლის პოლიტიკური თვალსაზრისით. მთავარი ის არის, რომ ადამიანებს არავითარი პოლიტიკური წონა არ შესწევთ იმისთვის, რომ ქვეყნის პოლიტიკურ პროცესებზე რაიმე გავლენა მოახდინონ. ასევე ნათელია ყველასთვის, რომ ეს ადამიანები რეალურად დავალებების განმხორციელებლები არიან, განსაკუთრებით რადიკალური ხაზის გააქტიურებით. რეალური გადაწყვეტილებები რომ კულისებს მიღმა მიიღება მათი ხელმძღვანელების დაკვეთით, ესეც გასაგებია“, – აღნიშნა ოხანაშვილმა