„ქართული ოცნების“ თავმჯდომარის ირაკლი კობახიძის განცხადებით, მმართველი გუნდი რუსეთთან ურთიერთობის საკითხებში პრემიერ-მინისტრის მრჩევლის ზურაბ აბაშიძის თანამდებობიდან გათავისუფლებას არ გეგმავს.

როგორც მან აღნიშნა, ამ პროვოკაციასთან დაკავშირებით პოზიციისა და სინანულის გამოხატვა, ჩვეულებრივი ამბავია, ჯანსაღი მოვლენაა.

„რა თქმა უნდა, არავითარ თანამდებობიდან გათავისუფლებაზე არ შეიძლება იყოს საუბარი. თავის დროზე იყო აბსოლუტურად მიუღებელი ინციდენტი, რომელიც ხოშტარიამ შეასრულა. ამ ინციდენტთან დაკავშირებით თავისი პოზიცია დააფიქსირა ზურაბ აბაშიძემ, რაც იყო აბსოლუტურად სწორი. როცა ელენე ხოშტარია, რომელიც რუსეთის სახელმწიფო ბიუჯეტიდან იღებს რუსულ რუბლებს, უწყობს პროვოკაციას კონკრეტულ ჯგუფს, ეს არის ორმაგი სტანდარტი, არაეთიკური ქმედება და ა.შ. ამაზე ჰქონდა საუბარი ზურაბ აბაშიძეს. თქვენ კითხვები უნდა დასვათ იმასთან დაკავშირებით, რატომ იღებს ელენე ხოშტარია რუსულ რუბლებს და თან აწყობს პროვოკაციას. ზურაბ აბაშიძე იყო და არის პასუხისმგებელი სავაჭრო ეკონომიკურ და ჰუმანიტარულ ურთიერთობებზე. ამ პროვოკაციასთან დაკავშირებით პოზიციასა და სინანულის რომ გამოხატავ, ჩვეულებრივი ამბავია, ჯანსაღი მოვლენაა.

„ლიაკა რუბლიაკა“ ხოშტარია იყო ამ პროვოკაციის ორგანიზატორი და ამ პროვოკაციაზე შეიძლება ბოდიშიც მოიხადოს ადამიანმა, იმიტომ, რომ იყო უხეში პროვოკაცია და თან ეს პროვოკაცია იყო მოწყობილი „რუბლიაკა“ ხოშტარიას მიერ, რომელიც რუსულ რუბლებს იღებს რუსეთის სახელმწიფო ბიუჯეტიდან. არასდროს საქართველოს ხელისუფლებას არ გადაუდგამს ისეთი ნაბიჯი რუსეთის ფედერაციასთან მიმართებით, რომელიც ხელყოფდა ჩვენი სახელმწიფოს, ან ჩვენი საზოგადოების ღირსებას. როცა მიხეილ სააკაშვილი გარბოდა გორში, როცა მაშინდელი ხელისუფლების წარმომადგენლები გარბოდნენ წითელი ხიდიდან, როცა ზურა ჯაფარიძე მივიდა საოკუპაციო ზოლთან, „ტრუსიკი” ჩაიხადა და შიშველი უკანალი აჩვენა რუს სამხედროებს, ეს იყო ქართველი ხალხის ღირსების ხელყოფა, არასდროს ჩვენ არ გაგვიკეთებია განცხადება, რომელიც ხელყოფდა ჩვენი ქვეყნის და ჩვენი ხალხის ღირსებას. ეს ადამიანები ამტკიცებენ, რომ ყველაფერ რუსულზე აჟრიალებთ, თუმცა, რატომღაც, ამავე „ნაციონალებს“ არ აჟრიალებთ ლიაკა ხოშტარიას მიერ რუსეთის სახელმწიფო ბიუჯეტიდან მიღებულ რუსულ რუბლებზე. რატომ არ აჟრიალებთ? – იმიტომ, რომ ეს ჟრიალი არის ხელოვნური“, – განაცხადა კობახიძემ.

სალომე ზურაბიშვილი მაინც არ ლახავს გარკვეულ წითელ ხაზებს, რაც ძალიან მისასალმებელია, – ამის შესახებ ჟურნალისტებთან საპარლამენტო უმრავლესობის ლიდერმა, პარტია „ქართული ოცნების“ თავმჯდომარემ, ირაკლი კობახიძემ საქართველოს პრეზიდენტის, სალომე ზურაბიშვილის მიერ მიხეილ სააკაშვილის შეწყალების შესახებ გაკეთებულ განცხადებაზე კომენტირებისას აღნიშნა.

კობახიძის თმით, სალომე ზურაბიშვილის ეს განცხადება მისასალმებელია და სახელმწიფო ინტერესებიდან გამომდინარე მოქმედების მაგალითია, რაც აღნიშვნას იმსახურებს.

„ჩვენ ვთქვით, რომ არ შევდივართ პოლემიკაში სალომე ზურაბიშვილთან, არცერთ შემთხვევაში ამას არ გავაკეთებთ. ასევე ვთქვით, რომ თუ პრეზიდენტი გააკეთებს ისეთ განცხადებებს, რომლებიც შეესაბამება ჩვენს ეროვნულ ინტერესებს, ამას სათანადოდ აღვნიშნავთ. ეს არის ერთ-ერთი განცხადება, რომელიც სათანადო აღნიშვნის ღირსია. ჩვენ ვთქვით, რომ სალომე ზურაბიშვილი მაინც არ ლახავს გარკვეულ წითელ ხაზებს, რაც ძალიან მისასალმებელია და ეს არის ამის მორიგი მაგალითი, ანუ სალომე ზურაბიშვილი ამ შემთხვევაში მოქმედებს სახელმწიფო ინტერესებიდან გამომდინარე, რაც იმსახურებს სათანადო აღნიშვნას ჩვენი მხრიდან. ყოველთვის დავუფასებთ სალომე ზურაბიშვილს ნებისმიერ განცხადებას და მოქმედებას, რომელიც გამომდინარეობს და შეესაბამება ეროვნულ ინტერესებს“, – განაცხადა ირაკლი კობახიძემ.

რაც შეეხება სალომე ზურაბიშვილის განცხადებას, რომ მას ბევრმა ადამიანმა სთხოვა სააკაშვილის შეწყალება, ირაკლი კობახიძის თქმით, „გლობალური ომის პარტიამ დააორგანიზა ლამის ნახევარი მსოფლიო“, რათა სააკაშვილის გათავისუფლების მიზნისთვის მიეღწია.

„რა თქმა უნდა, ჩვენც ხომ ვიცით, ვინ იყო ჩართული ამ ყველაფერში. გლობალური ომის პარტიამ დააორგანიზა ლამის ნახევარი მსოფლიო, რათა მიზნისთვის მიეღწია. გლობალური ომის პარტიას არ აქვს არც ხაბეიშვილის იმედი, არც მელიას იმედი, არც ხოშტარიას, არც ზურა ჯაფარიძის, არც ხაზარაძის, არც სხვების იმედი და რაღაცნაირად იმედი ჰქონდათ, რომ სააკაშვილის გათავისუფლებით ააყირავებდნენ აქ ვითარებას, ამიტომ ჩართეს ლამის ნახევარი მსოფლიო, რომ გაეთავისუფლებინათ მიხეილ სააკაშვილი, თუმცა მიზანს ვერ მიაღწიეს და ვერც მიაღწევენ“, – აღნიშნა ირაკლი კობახიძემ.

დღემდე, უკრაინას საქართველოში ელჩი არ ჰყავს დანიშნული, მაშინ, როდესაც ბელარუსიდანაც კი არ გაუწვევიათ ელჩი. აქ, რა თქმა უნდა, ჩანს გლობალური ომის პარტიის გავლენები, – ამის შესახებ “ქართული ოცნების” თავმჯდომარემ, ირაკლი კობახიძემ ჟურნალისტებს განუცხადა.

მისი თქმით, უკრაინის მიერ ელჩის გაწვევა, საქართველოში მღელვარების გამოწვევისკენ იყო მიმართული.

“როდესაც ელჩი გამოიწვიეს აბსოლუტურად გაუგებარი მიზეზით გაუგებარ დროს, მაშინაც გლობალური ომის პარტიის გათვლა იყო, რომ ზელენსკის ეს გადაწყვეტილებასაქართველოში გამოიწვევდა ვნებათაღელვას , თუმცა, რეალურად ეს ასე არ მოხდა. გაუგებარი მიზეზების გამო, დღემდე არ არის ელჩი საქართველოში, ასეთ დროს, ძალიან ბევრი რამის ახსნა არის ძალიან რთული.” – განაცხადა “ქართული ოცნების” თავმჯდომარემ.

კობახიძის თქმით, უკრაინელი მაღალი თანამდებობის პირების მხრიდან მეორე ფრონტის გახსნისკენ მოწოდებებიც ისმის, რაც ბევრ კითხვის ნიშანს ბადებს, თუმცა, მან ასევე აღნიშნა, რომ საქართველო უკრაინელი ხალხის და მათი ინტერესების ერთგული რჩება.

გაგახსენებთ, რომ ჩვენ გვესმის მეორე ფრონტისკენ მოწოდებები და ამას აკეთებს არა ვიღაც რიგითი უკრაინელი პარლამენტარი, ამას აკეთებს უშიშროების საბჭოს მდივანი, რომელიც არის მესამე-მეოთხე კაცი უკრაინის ხელისუფლებაში, ამას აკეთებს უკრაინის პრეზიდენტის მთავარი მრჩეველი – პოდოლიაკმა გააკეთა ეს განცხადება. თან მოგიწოდებენ მეორე ფრონტისკენ, თან გაიწვიეს ელჩი, რაც საქართველოში მღელვარების გამოწვევისკენ იყო მიმართული, თან არ აგზავნიან მოწვევებს – ეს აბსოლუტურად გაუგებარია და ბუნებრივია, სერიოზულ კითხვის ნიშნებს აჩენს. ჩვენ ვრჩებით უკრაინელი ხალხის, ამ ქვეყნის ერთგული, ჩვენ ვართ იმ იდეის ერთგული, რასაც ჰქვია უკრაინის ტერიტორიული მთლიანობა, დამოუკიდებლობა და ყველა საერთაშორისო პლატფორმაზე, ბოლომდე დავიცავთ ამ ინტერესებს“, – აღნიშნა ირაკლი კობახიძემ.

საპარლამენტო უმრავლესობის ლიდერი, პარტია „ქართული ოცნების“ თავმჯდომარე ირაკლი კობახიძე აცხადებს, რომ საქართველოსთვის კანდიდატის სტატუსის მინიჭების შანსები კვლავ 50/50-ზეა.

როგორც კობახიძემ ჟურნალისტებს განუცხადა, გადაწყვეტილებას იღებს 27 ქვეყანა და თუ ერთმა მაინც თქვა უარი, საქართველოს არ მიენიჭება კანდიდატის სტატუსი.

„ჩვენ იმედი გვაქვს, რომ მივიღებთ კანდიდატის სტატუსს. რაც შეეხება ჩვენს პროგნოზს, იმავეს გავიმეორებ, რომ შანსები არის 50/50-ზე, ერთი მარტივი მიზეზის გამო, რომ ეს არის პოლიტიკური გადაწყვეტილება. პოლიტიკური გადაწყვეტილება ყოველთვის არის 50/50-ზე. რა თქმა უნდა, რისკები ისევ მაღალია. საკმარისია, 27 ქვეყნიდან ერთს ათქმევინო უარი საქართველოსთვის კანდიდატის სტატუსის მინიჭებაზე, ქვეყანას უკვე არ მიეცემა კანდიდატის სტატუსი. აქედან გამომდინარე, გლობალური ომის პარტიისთვის ძალიან მარტივია მანიპულირება ევროკავშირის გადაწყვეტილებების სფეროში, შესაბამისად, რისკები არის მაღალი. მაგრამ ჩვენ თუ დავანახებთ გლობალური ომის პარტიას, რომ ქვეყნის შიგნით არის სიმყარე, ჩვენ გვაქვს მყარი პოზიციები ქვეყნის შიგნით – ეს უნდა აჩვენოს გლობალური ომის პარტიას როგორც ხელისუფლებამ, ასევე საზოგადოებამ – ამ შემთხვევაში გაიზრდება ჩვენი შანსები, რომ მივიღოთ კანდიდატის სტატუსი. საბოლოო ჯამში, მაქვს იმედი, რომ ჩვენ მოგვენიჭება კანდიდატის სტატუსი დეკემბერში“, – აღნიშნა ირაკლი კობახიძემ.