ჩვენთვის სალომე ზურაბიშვილი მხოლოდ ფორმალურად არის საქართველოს პრეზიდენტი. სინამდვილეში, ის არის „ნაცმოძრაობის“ პრეზიდენტი, დღესაც ვნახეთ სატელევიზიო ჩართვის დროს, რა არის მისი სულისკვეთება და როგორია მისი გზავნილები, – ამის შესახებ პარტია „ქართული ოცნების“ თავმჯდომარემ და საპარლამენტო უმრავლესობის ლიდერმა, ირაკლი კობახიძემ პარტიაში გამართულ ბრიფინგზე განაცხადა.

მისი თქმით, სალომე ზურაბიშვილი მიდის სააგიტაციოდ ევროპაში კანდიდატის სტატუსის წინააღმდეგ.

„როდესაც ჩადიხარ ევროპაში, შენს კოლეგებს ესაუბრები იმაზე, რომ საქართველოს ხელისუფლებას არ სურს ევროინტეგრაცია, ეს ნიშნავს, სტატუსის წინააღმდეგ აგიტაციას. როგორ შეიძლება ასეთი ადამიანი გაუშვა ევროპაში, როდესაც შენ გინდა რომ დღე-დღეზე მიიღო კანდიდატის სტატუსი. რა თქმა უნდა ის არ არის ევროპაში გასაშვები ასეთი გზავნილების ფონზე. კიდევ ერთი მტკიცებულება შემოგვთავაზა მან დღეს, როდესაც უცხოურ ტელევიზიაში გააჟღერა მორიგი გზავნილი იმის შესახებ, რომ ეჭვები აქვს ხელისუფლების ევროპული სულისკვეთების თაობაზე. ერთი წელი აქვს სალომე ზურაბიშვილს დარჩენილი, ის აღარ არის აქტუალური. ერთ წელიწადში გაუვა უფლებამოსილების ვადა, ვერც ქვეყანას დააქცევს. საბოლოოდ, ის ვერ მოახერხებს ვერც კანდიდატის სტატუსის მიღების აღკვეთას. ჩვენ გვაქვს ოპტიმისტური მოლოდინი, რომ დეკემბერში მოგვენიჭება კანდიდატის სტატუსი. ადრე ვამბობდით, რომ 50-50-ზე იყო, თუმცა ეს შანსები თვისებრივად არის გაუმჯობესებული, ზურაბიშვილი ვერ შეუშლის ხელს საქართველოს მიერ კანდიდატის სტატუსის მიღებას“, – განაცხადა კობახიძემ

ხელისუფლების გადატრიალების მცდელობით რომელი ძალები არიან დაინტერესებულნი და ვინ ფიქრობს ამაზე, ყველამ კარგად იცის. რაც შეეხება მიხეილ სააკაშვილის მიერ გაჟღერებულ ინფორმაციას, მას ჰქონია ინფორმაცია დანაშაულთან დაკავშირებით და უნდა ეთანამშრომლოს შესაბამის ორგანოებს, თუ მას ამოძრავებს სახელმწიფო ინტერესები, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, მიხეილ სააკაშვილი განცხადებებს ხშირად მარტივად აკეთებს.

„ჩვენ ვიცით, მიჩვეულები ვართ მისგან, რომ ძალიან მარტივად აკეთებს ხოლმე განცხადებებს, დიდი პასუხისმგებლობა არ აქვს ამ კაცს საკუთარი განცხადებების მიმართ. აქედან გამომდინარე, სერიოზულად ვერ მოვეკიდებით ასეთ განცხადებას, მაგრამ თუ აქვს ინფორმაცია დანაშაულთან დაკავშირებით, კეთილი ინებოს და ეთანამშრომლოს საგამოძიებო სტრუქტურებს“, – განაცხადა კობახიძემ.

საქართველოს ყოფილმა პრეზიდენტმა, მიხეილ სააკაშვილმა დღევანდელ სასამართლო სხდომაზე განაცხადა, რომ დღეს ქვეყანა უნდა იყოს მობილიზებული, რადგან საფრთხის ქვეშ იმყოფება. სააკაშვილის თქმით, საქართველოში შემოსულია დივერსიული ჯგუფი, რის გამოც „სამოქალაქო თავდაცვისთვის“ ცხელი ხაზის შექმნა სურს.

ოპოზიციის წარმომადგენლები ვერ მალავენ საკუთარ უარყოფით დამოკიდებულებას კანდიდატის სტატუსთან დაკავშირებით, – ამის შესახებ ჟურნალისტებს პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ განუცხადა.

„ჩვენ ამდენი ხნის განმავლობაში ვამტკიცებდით, რომ ოპოზიცია აწარმოებდა აგიტაციას კანდიდატის სტატუსის წინააღმდეგ, რაც საბოლოო ჯამში მათივე კოლეგებმა გათქვეს. პირდაპირ აღნიშნეს, რომ რეალურად, ოპოზიციის წარმომადგენლები ეწეოდნენ აქტიურ აგიტაციას კანდიდატის სტატუსის წინააღმდეგ. ახლა უკვე საკუთარ განწყობას აღარ მალავენ. როდესაც თვისებრივად არის გაზრდილი კანდიდატის სტატუსის მიღების შანსები, ისინი პირდაპირ საუბრობენ იმაზე, რომ არსებული ხელისუფლების პირობებში ამ სტატუსის მიღება იქნება კონტრპროდუქტიული. ვერ მალავენ საკუთარ უარყოფით დამოკიდებულებას კანდიდატის სტატუსთან დაკავშირებით. მათ, პრაქტიკულად, ახალი კამპანია აქვთ გაჩაღებული – „არა რუსულ სტატუსს“, ეს მათი დამოკიდებულება და განწყობაა ამ საკითხთან დაკავშირებით“, – აღნიშნა ირაკლი კობახიძემ.

ქალბატონი სალომე მტკიცებულებას მტკიცებულებაზე გვთავაზობს იმასთან დაკავშირებით, თუ რატომ არ იყო ის გასაშვები ევროპაში, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, როდესაც პრეზიდენტი მიდის ევროპაში და ევროპელ პარტნიორებს ესაუბრება, რომ პრემიერს ან სურს, ან არ სურს ევროპაში ქვეყნის ინტეგრაცია, ეს ნიშნავს იმას, რომ სალომე ზურაბიშვილი სხვა რადიკალურ პოლიტიკოსებთან ერთად ჩართული იყო ქვეყნის სტატუსის საწინააღმდეგო აგიტაციაში.

„მისი სატელევიზიო გამოსვლაც არის სტატუსის საწინააღმდეგო აგიტაცია. როდესაც შენ ეჭვქვეშ აყენებ პრემიერის მოტივაციას ევროპულ ინტეგრაციასთან დაკავშირებით, ეს არის პირდაპირი აგიტაცია სტატუსის წინააღმდეგ. სალომე ზურაბიშვილმა მორიგი მტკიცებულება თავად შემოგვთავაზა იმის შესახებ, რომ ევროპაში ნამდვილად არ იყო გასაშვები“, – აღნიშნა კობახიძემ.

ამასთან, კობახიძე აცხადებს, რომ შესაძლო ახალი პარტია სალომე ზურაბიშვილის ჩართულობით, განწირულია მარცხისთვის.

„ჩვენ ვთქვით, რომ გვაქვს ინფორმაცია შესაძლო ახალ პარტიასთან დაკავშირებით. ზურაბიშვილი, ლომჯარია, გახარია, ასეთი გეგმები არსებობს. ასეთ პოლიტიკურ პარტიას არავითარი ცვლილების შეტანა არ შეუძლია პროცესში. ეს პარტიაც განწირული იქნება ხუთპროცენტიან ბარიერზე ჩავარდნისთვის. გამორიცხულია, ასეთმა პარტიამ მოახერხოს ბარიერის გადალახვა. ნახეთ, რამხელა ძალისხმევა დაგვჭირდა იმისთვის, რომ სალომე ზურაბიშვილი გამხდარიყო პრეზიდენტი, არც ქარიზმა ჰქონდა და უამრავ შეცდომას უშვებდა წინასაარჩევნო განცხადებებში. არ გამოვრიცხავთ, ასეთი გეგმები სადღაც იყოს მოაზრებული“, – განაცხადა კობახიძემ.

მდიდარი „ენჯეოები“ ცდილობენ, აშშ-ის ახალ ელჩს ურთიერთობების გადატვირთვის საშუალება არ მისცენ და პირიქით, ეს ურთიერთობები რამენაირად დამატებით დააზიანონ, – ამის შესახებ პარტია „ქართული ოცნების“ თავმჯდომარე ირაკლი კობახიძემ დღევანდელ ბრიფინგზე განაცხადა.

მისივე თქმით, იმედოვნებს, ელჩ რობინ დანიგანსაც ექნება აქტიური რეაგირება ყველა იმ ქმედებაზე, რომელიც ორ სახელმწიფოს შორის ურთიერთობების გაღრმავების წინააღმდეგ არის მიმართული.

„დღეს საქართველოში მოქმედმა მდიდარმა და მათთან დაკავშირებულმა „ენჯეოებმა“ გამოაქვეყნეს წერილი, რომლითაც საქართველოს ხელისუფლებას ამერიკული სანქციების რეაგირების გარეშე დატოვების გამო უსაყვედურეს. როგორც საზოგადოებას მოეხსენება, შვიდი თვის წინ, რამდენიმე მოქმედ და ყოფილ ქართველ მოსამართლეს ამერიკის შეერთებული შტატების სახელმწიფო დეპარტამენტის სახელით სავიზო შეზღუდვები დაუწესდა. საქართველოს ხელისუფლებამ სცადა, პარტნიორებისგან შესაბამისი ბრალდებების გამამყარებელი მტკიცებულებები მიეღო, თუმცა უშედეგოდ. მეტიც, მოვისმინეთ სრულიად არადამაჯერებელი განმარტება, რომ მოსამართლეებისთვის სავიზო შეზღუდვების დაწესება ღია წყაროებიდან, ანუ ტელევიზიებიდან, გაზეთებიდან და სხვა მასობრივი ინფორმაციის საშუალებებიდან მიღებულ ინფორმაციას ეფუძნებოდა. ექვსი კვირის წინ, სანქცირებულ პირთა ამერიკულ სიაში შეყვანილ იქნა საქართველოს მოქალაქე, ოთარ ფარცხალაძე. როგორც ამ საქმეზე საქართველოს სახელმწიფო უსაფრთხოების სამსახურის ხელმძღვანელმა პარლამენტის სხდომაზე განმარტა, სამსახურმა პარტნიორებისგან გამოითხოვა შესაბამისი მტკიცებულებები. თუმცა, როგორც გაირკვა, საქართველოს ხელისუფლებას არც ოფიციალურ და არც პირად შეხვედრებზე, არც ღია და არც დახურული არხებით არავითარი მტკიცებულება არ მიუღია. მეტიც, პარტნიორებმა ქართულ უწყებებს თავად სთხოვეს მტკიცებულებების მოპოვება და გაგზავნა ფარცხალაძის საქმეზე. აღნიშნული ინფორმაცია ცხადყოფს, რომ მოსამართლეებისთვის სავიზო შეზღუდვების დაწესება და ოთარ ფარცხალაძის სანქცირებულ პირთა სიაში შეყვანა, სინამდვილეში, არავითარ ფაქტებსა და მტკიცებულებებს არ ეფუძნებოდა. წარსულშიც ხშირი იყო შემთხვევები, როდესაც მდიდარი ენჯეოების უპასუხისმგებლო ქმედებების გამო, ჩვენს სტრატეგიულ პარტნიორს უხერხულობები ექმნებოდა. თუნდაც, რად ღირს არჩევნების პარალელური ხმის შედეგებთან დაკავშირებული სკანდალი, რომლითაც ერთ-ერთმა მდიდარმა ენჯეომ უმძიმესი უხერხულობა შექმნა.

ორიოდე კვირის წინ, საქართველოში ჩამობრძანდა ამერიკის შეერთებული შტატების ახალი ელჩი, ქალბატონი რობინ დანიგანი, რომელთანაც ჩვენი ხელისუფლების უმაღლესმა წარმომადგენლებმა უკვე გამართეს ძალზე პროდუქტიული შეხვედრები. გვაქვს ოპტიმიზმის მყარი საფუძველი, რომ რობინ დანიგანის ელჩობის პერიოდში, ქართულ-ამერიკული სტრატეგიული პარტნიორობა მნიშვნელოვნად გაღრმავდება. ამ ვითარებაში, მდიდარი „ენჯეოების“ განცხადება არის ელჩის დადებითი ძალისხმევის წინააღმდეგ მიმართული ნაბიჯი, რომლის აშკარა მიზანი ქართულ-ამერიკულ ურთიერთობებში არასასურველი გაუგებრობების შენარჩუნებაა. მტკიცებულებების გარეშე მოსამართლეებისთვის სავიზო შეზღუდვების დაწესებამ შექმნა სერიოზული უხერხულობა ურთიერთობებში. „ენჯეოების“ შესაბამისი ძალისხმევა, გარდა სხვა მიზნებისა, სასამართლო ხელისუფლებაზე კონტროლის მოპოვების ინტერესითაც იყო ნაკარნახევი. თუმცა, ჩვენ მაქსიმალურად ვცდილობდით, ეს საკითხი საჯარო დისკუსიაში წინა პლანზე არ წამოგვეწია, რათა უხერხულობა კიდევ უფრო არ გაგვეღრმავებინა. ამ ფონზე, როდესაც მდიდარი „ენჯეოები“ თავად ცდილობენ თავისივე გაფუჭებულის აქტუალიზაციას, ვფიქრობთ, ეს ფაქტი საგანგებო შეშფოთებას იმსახურებს. ზუსტად იგივე ძალები, რომლებიც დიდი ხნის მანძილზე დამახინჯებულ ინფორმაციას აწვდიდნენ ჩვენს პარტნიორებს, მათ შორის ეწეოდნენ აქტიურ აგიტაციას საქართველოსთვის კანდიდატის სტატუსის მინიჭების წინააღმდეგ, დღეს ცდილობენ ძველი ხელოვნური უხერხულობების დღის წესრიგში შენარჩუნებას და ამით ახალი უხერხულობების შექმნას, რის გამოც იძულებულს გვხდიან, მათი ქმედებები რეაგირების გარეშე არ დავტოვოთ. ისიც ნიშანდობლივია, რომ მდიდარი „ენჯეოები“ ზემოაღნიშნულ განცხადებას ავრცელებენ იმ ფონზე, როდესაც ქვეყანა კანდიდატის სტატუსის შესახებ ევროკომისიის გადაწყვეტილების მოლოდინშია. ევროკომისიის გადაწყვეტილების გამოცხადებამდე ერთი კვირით ადრე ხელისუფლებაზე თავდასხმა სხვა არაფერია, თუ არა საქართველოსთვის კანდიდატის სტატუსის მინიჭების წინააღმდეგ მიმართული მორიგი უხეში ქმედება. ყველაფრიდან ჩანს, რომ მდიდარი „ენჯეოები“ არც საქართველოს, არც ამერიკის და არც ევროპის ინტერესებს არ ემსახურებიან. სინამდვილეში, ისინი ემსახურებიან გლობალურ ომის პარტიას, რომლის მთავარი მიზანი საქართველოს უკრაინიზაციაა. აღნიშნულ ძალას და მის სამსახურში მყოფ „ენჯეოებს“ არ სურთ ქართულ-ამერიკული ურთიერთობების გაღრმავება და ყველანაირად ცდილობენ, ამ ურთიერთობებში ძველი, უარყოფითი ტენდენცია შეინარჩუნონ, რასაც ჩვენ ვერ დავუშვებთ. აღნიშნული „ენჯეოები“ სწორედ იმიტომ აპროტესტებდნენ „უცხოური დაფინანსების გამჭვირვალობის შესახებ“ კანონს და არ სურდათ, საკუთარი უცხოური დაფინანსება საზოგადოებისთვის გამჭვირვალე გაეხადათ, რომ თავიანთი ანტისახელმწიფოებრივი გეგმების და მათი დაფინანსების წყაროების გაშიფვრის ეშინოდათ. ახლა, მდიდარი „ენჯეოები“ ცდილობენ, ამერიკის ახალ ელჩს ურთიერთობების გადატვირთვის საშუალება არ მისცენ და პირიქით, ეს ურთიერთობები რამენაირად დამატებით დააზიანონ. იმედი გვაქვს, რობინ დანიგანსაც ექნება აქტიური რეაგირება ყველა იმ ქმედებაზე, რომელიც ორ სახელმწიფოს შორის ურთიერთობების გაღრმავების წინააღმდეგ არის მიმართული. დარწმუნებული ვართ, ქალბატონი რობინ დანიგანის ელჩობის პირობებში, ქართულ-ამერიკული ურთიერთობები და სტრატეგიული პარტნიორობა მნიშვნელოვნად გაღრმავდება, რისთვისაც მმართველი გუნდი, თავის მხრივ, ძალისხმევას არ დაიშურებს“, – განაცხადა კობახიძემ.