გარემოს ეროვნული სააგენტო მოსალოდნელი ამინდის შესახებ მოსახლეობას აფრთხილებს.
სააგენტოს ცნობით, 19 ივნისს დღის ბოლოდან 22 ივნისამდე საქართველოს უმეტეს რაიონში მოსალოდნელია ხანმოკლე წვიმა, ზოგან ძლიერი, ელჭექი და ქარი, აღმოსავლეთ საქართველოში ზოგან სეტყვა.
„მოსალოდნელმა ძლიერმა წვიმებმა საქართველოს პატარა მდინარეებზე, შესაძლებელია, წყალმოვარდნები, ხოლო ქვეყნის მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს“, – აღნიშნულია გარემოს ეროვნული სააგენტოს ინფორმაციაში.
დევნილთა, შრომის, ჯანმრთელობისა და სოციალური დაცვის მინისტრის განცხადებით, ღვიძლის გადანერგვის ოპერაციას სახელმწიფო სრულად დააფინანსებს.
ამის შესახებ ზურაბ აზარაშვილმა მთავრობის სხდომის დასრულების შემდეგ გამართულ ბრიფინგზე განაცხადა.
„მნიშვნელოვანი გადაწყვეტილებები მივიღეთ მთავრობის სხდომაზე. ერთ-ერთი საკითხი ეხება ორგანოთა ტრანსპლანტაციის ბიუჯეტში ცვლილებებს. მნიშვნელოვანია, რომ, ღვიძლის გადანერგვის შემთხვევაში, 120 000-ლარიან ოპერაციას სახელმწიფო აფინანსებდა მხოლოდ 70 000 ლარით. ეს ხშირ შემთხვევაში ისეთ სეგმენტს ეხება, სადაც რთულია დარჩენილი 50 ათასი ლარის მობილიზება და ამიტომ მივიღეთ გადაწყვეტილება, სრულად დავაფინანსოთ ოპერაციის ხარჯები, როგორც დიაგნოსტიკასთან, ისე ოპერაციასთან დაკავშირებული. ღვიძლის ტრანსპლანტაციის შემთხვევაში 120 ათას ლარს დღეიდან სრულად დაფარავს სახელმწიფო“, – განაცხადა ზურაბ აზარაშვილმა.
საქართველოს შესახებ წერს რუსული პრესაც: (Независимая газета) დღევანდელ, 19 ივნისის ნომერში დაბეჭდილია სტატია სათაურით „მიხეილ სააკაშვილმა პოლიტიკაში თავისი დაბრუნება დააანონსა“ (ავტორი – იური როქსი). „პატიმარი მიხეილ სააკაშვილი აქტიურ პოლიტიკაში ბრუნდება. მან ყველა ეროვნულ პროევროპულ და ანტირუსულ ძალას გაერთიანებისაკენ მოუწოდა, მათ შორის, განსაკუთრებით „ერთიან ეროვნულ მოძრაობას“. ექს-პრეზიდენტის მიზანია „ბიძინა ივანიშვილის პრორუსული ოლიგარქიული რეჟიმის განადგურება“. ქვეყანაში სიტუაცია მწვავდება, ძლიერდება ხელისუფლებისა და ოპოზიციის დაპირისპირება“, – ნათქვამია პუბლიკაციაში.
ავტორი მკითხველებს აცნობს საქართველოს ხელისუფლების რეაქციას, რომლის მიხედვით, მიხეილ სააკაშვილის განცხადება არასერიოზულია და „ფეიკ-პიარს“ წარმოადგენს. „იგი პატიმარია, თანაც უკრაინის მოქალაქეა და საინტერესოა, როგორ აპირებს პოლიტიკაში დაბრუნებას “, – ციტირებულია მმართველი პარტიის „ქართული ოცნების“ ერთ-ერთი ლიდერის, მამუკა მდინარაძის გამონათქვამი.
პუბლიკაციაში მიმოხილულია საქართველოს პოლიტიკურ სცენაზე მომხდარი ბოლო მოვლენები – აჭარის უმაღლესი საბჭოს თავმჯდომარის თორნიკე რიჟვაძის განცხადება ოპოზიციური „ნაციონალური მოძრაობის“ მოღალატეობრივი საქმიანობის შესახებ, რომელიც 2008 წელს რუსეთთან ომში ლაჩრულად მოქმედებდა. სწორედ ამ განცხადებამ გამოიწვია მიხეილ სააკაშვილის აღშფოთება. მას მოჰყვა „ნაციონალების“ ლიდერის ლევან ხაბეიშვილის კრიტიკული განცხადება ბიძინა ივანიშვილის მიმართ, შემდეგ კი გიორგი ვოლსკის პასუხი… სტატიაში საუბარია აგრეთვე ოპოზიციონერებზე თავდასხმის შესახებაც, როცა პარტია „გირჩის“ ლიდერს ზურაბ ჯაფარიძეს ფიზიკური შეურაცხყოფა მიაყენეს.
„საქართველოს ხელისუფლება აცხადებს, რომ ასეთ სიტუაციაში, ალბათ, შეუძლებელი იქნება ევროკავშირის რეკომენდაციების ერთ-ერთი პუნქტის შესრულება, რომელიც ქვეყანაში პოლიტიკური პოლარიზაციის შესუსტებას ეხება“, – აღნიშნავს ავტორი.
მაისის სავალუტო შემოდინებები წლიურ ჭრილში დანორმალიზდა, განსაკუთრებით აშშ დოლარში გამოხატული ექსპორტისა და იმპორტის კუთხით, სადაც საკმაოდ დაბალი მაჩვენებლები დაფიქსირდა. ეს ძირითადად წინა წლის მაღალი საბაზო ეფექტით არის გამოწვეული. გზავნილების მხრივ, აღსანიშნავია, რომ შესაბამისი შესწორების შემდეგ, ზრდის ტემპი მაინც შედარებით მაღალია. წინა პერიოდთან მიმართებით – ნაკლები, თუმცა მაინც ასევე მაღალია ტურისტული შემოდინებები მიგრანტების სრულად და ნაწილობრივ გათვალისწინების შემთხვევაშიც. წმინდა სავალუტო შემოდინებების შეფასება კვლავ ძლიერია, რაც კიდევ ერთხელ მიუთითებს, რომ მაისში ლარის სისუსტე სწორედ შეცვლილი სენტიმენტების შედეგი იყო. ამ მხრივ, საყურადღებოა, რომ უახლესი მონაცემებით, კერძოდ დეპოზიტების ყოველდღიურ სავალუტო კომპოზიციაზე დაყრდნობით, სენტიმენტები კვლავ უკვე ლარის სასარგებლოდ შეიცვალა.
მიმდინარე კვირა სებ-ის მონეტარული პოლიტიკის კომიტეტის გადაწყვეტილების კუთხით იქნება საინტერესო. თიბისი კაპიტალის შეფასებით, როგორც შერბილების, ასევე განაკვეთის უცვლელად დატოვების არგუმენტებიც არსებობს, თუმცა როგორც ჩანს, მათი უმეტესობა შერბილების მხარდამჭერია. ამ ფონზე, თიბისი კაპიტალის ბოლო პროგნოზი მიმდინარე წლის დეკემბრისათვის, რომელიც რეფინანსირების განაკვეთის 9.5%-მდე დაწევას ითვალისწინებდა, მართალია მცირედით, მაგრამ უფრო პესიმისტური ჩანს, ვიდრე ოპტიმისტური.
გაეცანით პუბლიკაციას ბმულზე.
„სააკაშვილმა ბოდიში უნდა მოუხადოს იმ სასამართლოსთვის, რომელიც ახლა მას ტანჯავს. მანამდე, ის ქართველ ხალხს ტანჯავდა მისი ხელისუფლების დროს“, – ამის შესახებ ოპოზიციონერმა დეპუტატმა იაგო ხვიჩიამ განაცხადა.
მისი თქმით, სააკაშვილს ჯერ კიდევ ჰგონია, რომ ყველაფერს სწორად აკეთებს.
„ჩემი აზრით, ჯერჯერობით მიხეილ სააკაშვილს რამე ჭკუა ნასწავლის არაფერი ეტყობა. სააკაშვილმა ბოდიშების მოხდა უნდა დაიწყოს. ხალხს ბოდიში უნდა მოუხადოს იმ სასამართლოსთვის, რომელიც ახლა მას ტანჯავს. მანამდე, ის ქართველ ხალხს ტანჯავდა მისი ხელისუფლების დროს. ბევრი საბოდიშო გამოჩნდება და რას აპატიებენ, ეს იქნება მისი პოლიტიკური შედეგი. საზოგადოების ნახევარი მის მიმართ ჯერ სამკვდრო-სასიცოცხლოდ არის დაპირისპირებული. თავად ჰგონია, რომ ყველაფერს სწორად აკეთებდა და უბრალოდ, ტყუილად გაებუტა ეს ხალხი“, – აცხადებს ოპოზიციონერი დეპუტატი.
იაპონური ყოველკვირეული ინგლისურენოვანი ჟურნალი Nikkei Asia აქვეყნებს სტატიას სათაურით „ვლადიმერ პუტინი საქართველოს „ჰიბრიდული ომის“ საცდელ პოლიგონზე აბრუნებს“ (ავტორი – ჰიროიუკი აკიტა), რომელშიც საქართველო-რუსეთის ურთიერთობის პრობლემებია მიმოხილული.
გთავაზობთ პუბლიკაციას მცირე შემოკლებით:
რუსეთმა უკრაინის წინააღმდეგ დაწყებული აგრესიული ომის დროს ბევრი სამხედრო-სტრატეგიული შეცდომა დაუშვა, რომლებმაც კრემლის გამარჯვება ეჭვქვეშ დააყენა., თუმცა ეს არ ნიშნავს იმას, რომ მოსკოვი გავლენის სფეროების გაფართოებისათვის მიმდინარე გეოპოლიტიკურ ომში მარცხდება, განსაკუთრებით ყოფილ საბჭოთა სივრცეში.
რუსეთის პრეზიდენტი ვლადიმერ პუტინი დიდი ძალისხმევით ცდილობს, რომ მეზობელი ქვეყნები თავის მხარეზე გადაიბიროს „ჰიბრიდული ომების“ დახმარებით – კულისებს მიღმა მოქმედებებით, რომლებიც მიმართულია ყოფილი საბჭოთა რესპუბლიკების დესტაბილიზებისაკენ, როგორც აშკარა და ღია, ასევე მალული ჩარევებით, კიბერშეტევების, აგიტაცია-პროპაგანდის და სხვა ძირგამომთხრელი მეთოდების ჩათვლით. ამ ტაქტიკით სარგებლობისას მოსკოვმა მნიშვნელოვან წარმატებებს მიაღწია საქართველოში.
რუსეთი საქართველოში 2008 წლის აგვისტოში შეიჭრა და მისი სეპარატისტული რეგიონების – აფხაზეთისა და „სამხრეთ ოსეთის“ ოკუპაცია მოახდინა. მას შემდეგ კრემლი ქვეყნის ტერიტორიის 20%-ს ეფექტურად აკონტროლებს. უკვე 15 წელია საქართველოს რუსეთთან დიპლომატიური ურთიერთობა გაწყვეტილი აქვს, მოსახლეობაში კი ანტირუსული განწყობები ისევ ძლიერია. 2022 წლის დეკემბერში ჩატარებული სოციოლოგიური გამოკითხვები მოწმობს, რომ ქართველების დაახლოებით 80%-ს ევროკავშირში და ნატოში გაწევრიანება სურთ. ისინი სოლიდარობას უცხადებენ უკრაინას რუსეთის წინააღმდეგ ომში, რომელშიც კიევის მხარეზე [არაოფიციალურად, მოხალისეთა სახით] თითქმის 2 ათასამდე ქართველი მეომარი იბრძვის.
მაგრამ, როგორ უცნაურადაც არ უნდა გვეჩვენოს, საქართველოს მთავრობა მოსკოვთან მიმართებით, შესამჩნევად ლოიალური გახდა. რუსეთ-უკრაინის ომი სულ რაღაც ორიოდე დღის დაწყებული იყო, როცა საქართველოს პრემიერ-მინისტრმა ირაკლი ღარიბაშვილმა თავისი განცხადებით კიევი გააღიზიანა – მთავრობის მეთაურმა აღნიშნა, რომ მისი ქვეყანა დასავლეთის მიერ გამოცხადებულ ანტირუსულ სანქციებს არ შეუერთდებოდა – „ეროვნული ინტერესების გათვალისწინებით, რადგან სანქციებით მოსახლეობა, ქართველი ხალხი დაზარალდებოდა“. ბევრმა ქართველმა პოლიტიკურმა ლიდერმა პრორუსული პოზიცია დაიკავა: მაგალითად, ირაკლი კობახიძემ, მმართველი პარტიის „ქართული ოცნების“ ხელმძღვანელმა, რომელმაც დასავლეთის ხშირი კრიტიკა დაიწყო.
ბოლო დროს საქართველოს რუსეთის ორბიტისაკენ გადახვევის ტენდენცია აშკარად დაჩქარდა. ქართულ პოლიტიკაში ისეთი მოვლენები ხდება, რომელიც მთავრობის მიერ პრორუსული პოლიტიკის გატარებაზე მიუთითებს: ეს მჟღავნდება ისეთი კანონპროექტების მიღების მცდელობაში, რომელიც ძალიან ჰგავს რუსულ კანონმდებლობას (ვთქვათ, კანონპროექტი „უცხოელი გავლენის აგენტების შესახებ“). სწორედ ამის გამო თბილისის ქუჩებში საპროტესტო აქციაზე უამრავი თბილისელი გამოვიდა, რის შემდეგაც ხელისუფლებამ კანონპროექტის განხილვა შეაჩერა და უკან გაიწვია. ირაკლი კობახიძემ კი აქციის მონაწილეები დასავლეთის მიერ მართულ პაიკებად შერაცხა.
საქართველოს მთავრობის მიდრეკილება მოსკოვისაკენ გამოიხატა აგრეთვე ორ ქვეყანას შორის ავიამიმოსვლის აღდგენით. ვლადიმერ პუტინს სურს, რომ საქართველო მტკიცედ მოექცეს რუსეთის გავლენის ქვეშ და ამიტომ გარკვეულ დათმობებზე წავიდა (განაახლა 2019 წელს შეწყვეტილი ფრენები და შემოიღო უვიზო რეჟიმი საქართველოს მოქალაქეებისათვის). თავის მხრივ, საქართველოს მთავრობა ეთანხმება კრემლის მოქმედებას და მას არავითარ წინააღმდეგობას არ უწევს. ავიამიმოსვლის აღდგენამ ქართულ საზოგადოებაში კრიტიკული განწყობა გამოიწვია, მაგრამ „ქართული ოცნების“ მთავრობა მოსკოვის ნაბიჯს დაეთანხმა.
უასაფრთხოების სფეროს ექსპერტებმა, რომლებიც 18-19 მაისს თბილისში იყვნენ შეკრებილნი (რონდელის სახელობის სტრატეგიული კვლევების ცენტრში), საქარტველოსში რუსეთის გავლენის გაძლიერების გამო შეშფოთება გამოხატეს. ზოგიერთმა განაცხადა, რომ საქართველო რუსეთის ჰიბრიდული ომების საცდელ ლაბორატორია გახდა და საბოლოო ჯამში, შეიძლება რუსეთის სატელიტ სახელმწიფოდ გადაიქცეს. კონფერენციაზე აღინიშნა, რომ ვლადიმერ პუტინი თავისი მიზნების რეალიზებისათვის „მათრახისა და თაფლაკვერის“ მეთოდით სარგებლობს.
„თაფლაკვერში“ იგულისხმება მნიშვნელოვანი ფინანსურ-ეკონომიკური მოგება რუსეთთან განვითარებული ურთიერთობების შედეგად. მართლაცდა, საქართველოსა და რუსეთის ეკონომიკური კავშირები ღრმავდება: საერთაშორისო არასამთავრობო ორგანიზაციის Transparency International-ის მონაცემებუთ, 2022 წელს საქართველოში რუსეთის მოქალაქეების მიერ დაახლოებით 15 ათასი ახალი კომპანია დარეგისტრირდა, რაც 16-ჯერ მეტია 2021 წელთან შედარებით. იმავე 2022 წელს საქართველოში რუსული პროდუქციის იმპორტის მოცულობა 79%-ით გაიზარდა და 1,8 მილიარდი დოლარი შეადგინა. ეს ფაქტი ნაწილობრივ იმით აიხსნება, რომ ბევრმარუსმა მოქალაქემ თავისი ბიზნესი რუსეთიდან საქართველოში გადმოიტანა, რათა თავი აერიდებინათ დასავლური სანქციებისა და არმიაში მობილიზებისაგან. „პირდაპირი ავიამიმოსვლის აღდგენამ ხელი შეუწყო უფრო მეტად რუსული ბიზნესი განვითარებას და რუსული კომპანიების წარმატებას“, – აღნიშნა უსაფრთხოების სფეროს ერთ-ერთმა ქართველმა ექსპერტმა.
ამასთან, ვლადიმერ პუტინი თავისი მიზნების მისაღწევად „მათრახსაც“ იყენებს – სხვადასხვა ქვეყნებს შიშს უნერგავს, რომ თუ ისინი კრემლის მითითებებს არ დაემორჩილებიან, მათაც უკრაინის მსგავსი ბედი ელოდებათ. კრემლს საქართველოში ძლიერი მოკავშირეები ჰყავს, პირველ რიგში კი მილიარდერი ბიძინა ივანიშვილი, რომელმაც თავისი ქონება ძირითადად რუსეთში დააგროვა 1990-იან წლებში, შემდეგ კი პარტია „ქართული ოცნება“ ჩამოაყალიბა, 2012 წლის საპარლამენტო არჩევნებში გაიმარჯვა და ქვეყნის პრემიერ-მინისტრი გახდა (მართალია, მცირე ხნით, მაგრამ მაინც). ითვლება, რომ ბიძინა ივანიშვილს რუსეთთან მტკიცე კავშირები აქვს შენარჩუნებული და საქართველოს ამჟამინდელ მთავრობაზე უაღრესად დიდ გავლენას ახდენს. ერთ-ერთი ყოფილი მაღალჩინოსანის აღიარებით, ბიძინა ივანიშვილი ანტიდასავლურად შეიძლება არ არის განწყობილი, მაგრამ იგი აცნობიერებს რუსეთიდან მომდინარე საფრთხეს და ამიტომ არ სურს ვლადიმერ პუტინის სახით მტერი ჰყავდეს.
საქართველოში რუსეთის მზარდი გავლენა აჩვენებს, თუ რამდენად მოხერხებულად სარგებლობს კრემლი ადამიანური რესურსებით, საინფორმაციო პოლიტიკით და დაშინებით, რომ თბილისი თავის ქსელში გაახვიოს. ის რაც საქართველოში ხდება, შეიძლება სხვა რომელიმე ყოფილ საბჭოთა რესპუბლიკაშიც მოხდეს, მათ შორის მოლდოვაშიც.
ბრიტანულ გაზეთ „გარდიანში“ (The Guardian) 18 ივნისს გამოქვეყნდა სტატია სათაურით „ქართველები ევროკავშირის წევრობაზე ოცნებობენ, მათი მთავრობა კი ვლადიმერ პუტინს უახლოვდება“ (ავტორი – ჯულიან ბორგერი. იგი საქართველოში აშშ-ში არსებული გერმანული „მარშალის ფონდის“ დაფინანსებით იმყოფებოდა).
გთავაზობთ პუბლიკაციის შინაარსს:
სოფელი ხურვალეთი „სამხრეთ ოსეთის“ [რუსეთის მიერ 2008 წელს ოკუპირებული საქართველოს სეპარატისტული რეგიონის] ადმინისტრაციულ საზღვართან ახლოს მდებარეობს, რომელსაც ოსები და რუსები „სახელმწიფო საზღვარს“ უწოდებენ. ხურვალეთიდან კარგად მოჩანს „საზღვრის“ მიღმა დისლოცირებული რუსეთის სამხედრო ბაზა. იქ ამჟამად შედარებით მცირე რაოდენობის სამხედრო ტექნიკა და რუსი ჯარისკაცები იმყოფებიან, რადგან კრემლმა მათი ნაწილი უკრაინის ფრონტზე გადაისროლა. ამის მიუხედავად, ქართველები შიშობენ, რომ თუ რუსეთი უკრაინის ომში გაიმარჯვებს, კრემლმა შეიძლება საქართველოს კიდევ ერთი ნაწილი „მოკბიჩოს“, ან ქვეყანა მთლიანად „ჩაყლაპოს“. დღეისათვის დროებითი გამიჯვნის [ცეცხლის შეწყვეტის] ხაზს ევროკავშირის სადამკვირვებლო მისია აკონტროლებს, რომლებიც „ბორდერიზაციის“ (ანუ „საზღვრის“ მცოცავად გადმოწევის) ფაქტებს აღნუსხავენ. „ბორდერიზაცია იწყება თხრილებითა და ტრანშეების გაკეთებით, შემდეგ ასობენ ბოძები და აბამენ მავთულხლართებს, დგამენ ბანერებს წარწერებით“, – ამბობს მისიის ხელმძღვანელი კლაას მაესი.
ხუთი წლის წინ, ერთ დილას, ხურვალეთელებმა გაიღვიძეს და ნახეს, რომ ოკუპანტებმა საზღვრის გაყვანა დაიწყეს. საბოლოოდ კი სოფელი ორად გაიყო: ე.წ. „საზღვარმა“ გაიარა ეზოებზე, მიწის ნაკვეთებზე, ნათესებზე… ნათესავებს და მეზობლებს ერთმანეთთან მისვლა აღარ შეუძლიათ და ვინც ამას უნებართვოდ შეცდება, მას იჭერენ და ჯარიმას ახდევინებენ.
როგორც საქართველოში ამბობენ, არსებობს საფრთხე, რომ რუსეთის სამხედრო ბაზიდან, რომელიც თბილისიდან 40 კილომეტრზე მდებარეობს, რუსულმა ტანკებმა თბილისს შეუტიონ და საერთაშორისო საავტომობილო მაგისტრალი „გადაჭრან“, თუმცა, იმის გამო, რომ რუსეთის ბაზა ამჟამად დასუსტებულია და კრემლს თავისი გასაჭირი აქვს, თბილისის ქუჩებში რუსული ტანკების გამოჩენა საეჭვოა…
მაგრამ უფრო რეალურია სხვა ეჭვი: რუსეთი საქართველოში ძალაუფლებას შეუმჩნევლად იღებს – და ეს ხდება იმ ქვეყანაში, რომლის მოსახლეობა პროდასავლურად არის განწყობილი ოპოზიციური პარტიებისა და სამოქალაქო სექტორის აქტივისტების მტკიცებით, საქართველოს „ჩუმი“ დაპყრობის მექანიზმის მუშაობას ხელს უწყობს მმართველი პარტიაც – „ქართული ოცნება“, რომელიც სიტყვით ევროკავშირისაკენ ისწრაფვის, საქმით კი სულ უფრო მეტად მიიწევს მოსკოვისაკენ. ამის სიმპტომები მრავლადაა: რუსეთ-საქართველოს შორის ავიამიმოსვლის აღდგენა, რუსული მმართველი ელიტის წევრთა ნათესავების ჩამოსვლა და ა.შ.
მმართველი პარტიის ხელმძღვანელების რიტორიკაში სულ უფრო მეტად გაისმის დასავლეთის კრიტიკა და რუსეთისადმი ლოიალური დამოკიდებულების გამოხატვა. საქართველო ოფიციალურად თითქოსდა ისწრაფვის, რომ ევროკავშირის წევრობის კანდიდატის სტატუსი მიიღოს, მაგრამ „ქართული ოცნების“ ლიდერები ისე მოქმედებენ, რომ ევროკავშირს და ნატოს თანდათან შორდებიან. წინააღმდეგობრივი განცხადებების გაკეთებაში განსაკუთრებით აქტიურობენ პარტიის ლიდერი ირაკლი კობახიძე და ქვეყნის პრემიერ-მინისტრი ირაკლი ღარიბაშვილი, რომელთა თქმით, დასავლეთი რუსეთის წინააღმდეგ ომში ჩაბმისაკენ უბიძგებს, რისთვისაც უკრაინას იყენებს. პრემიერ-მინისტრმა ბუდაპეშტში ვიზიტის დროს განაცხადა, რომ დასავლეთი ცდილობს საქართველოს ძალით თავს მოახვიოს მიუღებელი ფასეულობები, მაგალითად „ლგბტ-საზოგადოებასთან“ მიმართებით.
რა თქმა უნდა, ოპოზიცია ამ ყველაფერს ამჩნევს და მთავრობას და მმართველ პარტიას პრორუსულ ორიენტაციაში ადანაშაულებს. ასეთი პოლიტიკის გატარებით საქართველო ვერასოდეს ვერ გახდება ვერც ევროკავშირისა და ვერც ჩრდილოატლანტიკური ალიანსის წევრი“, – ამბობს პარლამენტის წევრი ოპოზიციური „ნაციონალური მოძრაობიდან“.
სხვათა შორის, საქართველოში უკვე საკმაო ხანია დაპატიმრებულია „ნაციონალური მოძრაობის“ ყოფილი ლიდერი, ქვეყნის ექს-პრეზიდენტი მიხეილ სააკაშვილი, რომელსაც მმართველობის პერიოდში ჩადენილი დანაშაულისათვის გაასამართლეს (ხელისუფლების ბოროტად გამოყენების ბრალდებით). როგორც ევროპარლამენტმა ჩათვალა, იგი პირადი შურისძიების“ მოტივით არის საპყრობილეში და მისი გათავისუფლება მოითხოვა, რაც საქართველოს მთავრობამ ყურად არ იღო. უნდა აღინიშნოს რომ ოპოზიციის თქმით, საქართველოს სასამართლო სისტემა კორუმპირებულია და კლანური სისტემაა გავრცელებული.
საქართველოს ხელისუფლება ცდილობს რუსული კანონმდებლობის მსგავსი აქტები მიიღოს, მაგალითად, კანონი უცხოელი აგენტების შესახებ, რაც ოპოზიციის ძალისხმევით იქნა გაუქმებული. თუმცა, ოპოზიციის გარკვეული წარმატების მიუხედავად, ხელისუფლება სულ უფრო არღვევს ქართულ დამოუკიდებელ მასმედიას – დააპატიმრა და გაასამართლა მმართველი პარტიისადმი კრიტიკულად განწყობილი ოპოზიციური ტელეარხის ხელმძღვანელი ნიკა გვარამია, რომელიც, ორგანიზაცია Transparency International-ის დასკვნით, პოლიტიკურად მოტივირებულად“ ჩათვალა. მმართველი პარტიის წევრებს ეკრძალებათ მთავრობის მიმართ კრიტიკულად განწყობილ მასმედიასთან კონტაქტი. ამჟამად ძალაში შედის წესი, რომელიც პარლამენტში აკრედიტებულ ჟურნალისტებს ეხება – მათ ეკრძალებათ იმ კითხვის ხელახლა დასმა, რომელზეც დეპუტატი არ პასუხობს.
თბილისში, თავისუფლების მოედანთან ძველებურად არსებობს მთავრობის მიერ მართვადი ნატოსა და ევროკავშირის საინფორმაციო ცენტრი, რომელზეც ორივე ორგანიზაციის დროსა ფრიალებს, მაგრამ ცენტრმა შეწყვიტა საინფორმაციო-პროპაგანდისტული ხასიათის ღონისძიებები და ფაქტობრივად მხოლოდ ტექნიკურ ფუნქციებს ასრულებს. ცენტრის შესასვლელი კარი მუდმივად დახურულია და მის ზღურბლთან ყვავილები იყიდება.
„ქართული ოცნების“ კრიტიკოსები ამბობენ, რომ ცენტრის შენობა „ქართული ოცნების“ მთავრობის მიერ გატარებული პოლიტიკის ნამდვილ მეტაფორას წარმოადგენს: გარედან ფასადი პროდასავლურია, შიგნით არაფერი არ კეთდება პროდასავლურად. როგორც სამოქალაქო საზოგადოების აქტივისტები ამბობენ, ასეთი ფასადი მთავრობისათვის აუცილებელია, რადგან მომავალ წელს ქვეყანაში, სადაც მოსახლეობის 80% პროდასავლურად არის განწყობილი, არჩევნები უნდა ჩატარდეს.
საბოლოო ჯამში, ოპოზიციის თქმით, მმართველი პარტია მხოლოდ ერთ ადამიანს ექვემდებარება – მის დამფუძნებელს, მილიარდერ ბიძინა ივანიშვილს, რომელმაც თავისი ქონება რუსეთში დააგროვა. იგი პრემიერ-მინისტრი იყო 2012 წლიდან, როცა საპარლამენტო არჩევნებში „ქართულმა ოცნებამ“ გაიმარჯვა, მაგრამ მცირე ხნის შემდეგ გადადგა, თუმცა ქვეყნის მთავრობაზე და პოლიტიკაზე ისევ ძლიერ გავლენას ახდენს. ამჟამინდელი პრემიერ-მინისტრი ირაკლი ღარიბაშვილი ბიძინა ივანიშვილის ბანკში მუშაობდა, ხოლო შინაგან საქმეთა მინისტრი ვახტანგ გომელაური ბიძინა ივანიშვილის დაცვის უფროსად მუშაობდა, უშიშროების სამსახურის ხელმძღვანელს კი გრიგოლ ლილუაშვილს კი ბიძინა ივანიშვილის კომპანიებში წამყვანი თანამდებობები ეკავა.
მაგნატის სასახლე მოდერნისტული სტილით – მინითა და ფოლადის კონსტრუქციებითაა აგებული და თბილისს ზემოდან გადმოჰყურებს. ბიძინა ივანიშვილს აქვს საზაფხულო რეზიდენციაც შავი ზღვის ნაპირზე, სადაც მისსავე კუთვნილ ზოოლოგიურ პარკში უამრავი ეგზოტიკური ცხოველი ბინადრობს, ხოლო დენდროლოგიურ პარკში იშვიათი ჯიშის მცენარეებია შეკრებილი – ხეები ფესვებით იძირკვებოდა და ზღვაზე ბარჟებით გადაჰქონდათ პარკში დასანერგად.
არავინ იცის, თუ რა დონით არის დამოკიდებული ბიძინა ივანიშვილი ვლადიმერ პუტინზე, რამდენად არის დავალებული მასზე, მაგრამ დამკვირვებლები (კრემლოლოგები) თვლიან, რომ რუსეთიდან ბიძინა ფულს პრეზიდენტთან გარიგების გარეშე ვერანაირად ვერ წამოიღებდა: „ჩვენთან ისეთი პოლიტიკური სისტემაა, რომელშიც მხოლოდ ერთი ადამიანი დომინირებს“, – ამბობს „გარდიანტან“ საუბარში ირაკლი ფორჩხიძე, სტრატეგიული კვლევების ქართული ინსტიტუტის ვიცე-პრეზიდენტი.
თავის მხრივ, ხელისუფლების მაღალჩინოსანი წარმომადგენელი, პარლამენტის საერთაშორისო საქმეთა კომიტეტის თავმჯდომარე ნიკოლოზ სამხარაძე უარყოფს, რომ პარტია ბიძინა ივანიშვილის პირად პროექტს წარმოადგენს: „მე პირადად მას არ ვიცნობ. რა თქმა უნდა, არიან ისინი, რომლებიც ბიძინა ივანიშვილს იცნობენ და გარკვეული პერიოდის განმავლობაში მასთან მუშაობდნენ. მე ამას არ უარვყოფ, მაგრამ ტყუილია ის, რომ „ქართული ოცნების“ წევრთა 100 პროცენტი ყველა მასთან არის დაკავშირებული“. რაც შეეხება მოსკოვთან კავშირებს, ნიკოლოზ სამხარაძის თქმით, არავითარი დამამტკიცებელი ფაქტი არ არსებობს, რომ ბიძინა ივანიშვილს მოსკოვთან კონტაქტები აქვს. იგი არ ხვდება რუს პოლიტიკოსებს და რუსეთში ბიზნესი აღარ აქვს..
რუსეთთან ავიამიმოსვლის განახლებასთან დაკავშირებით ნიკოლოზ სამხარაძე ამბობს, რომ თბილისში ავიარეისებს ისეთი რუსული კომპანიები ასრულებენ, რომლებზეც დასავლური სანქციები არ ვრცელდება: „განსხვავება ძალიან დიდია დიდია. ჩვენს აეროპორტებში არ ვიღებთ ისეთ თვითმფრინავებს, რომლებზეც აშშ-სა და ევროკავშირს რაიმე პრეტენზიები აქვთ“.
მაგრამ ავიამიმოსვლის განახლებამ აშშ-სა და ევროკავშირის გაღიზიანება მაინც გამოიწვია, განსაკუთრებით მას შემდეგ, რაც ქართულმა ავიაკომპანიამ Georgian Airways-მა რუსებისათვის ევროპისაკენ სატრანზიტო ფრენების შესაძლებლობა გამოაცხადა, რითაც დასავლური სანქციების გავლენა შეასუსტა. „ქართული ოცნების“ ხელმძღვანელობა „მტრის დაშოშმინების“ ჩარჩოებს აშკარად გასცდა“, – ამბობს ერთ-ერთი დასავლელი დიპლომატი.
ევროკავშირის წარმომადგენლის თქმით, საქართველოსა და ევროკავშირის პოლიტიკის (გადაწყვეტილებების, დეკლარაციების) ურთიერთთავდებობა 2022 წელს დაფიქსირებული 44%-დან 2023 წლის პირველ ნახევარში 341%-მდე შემცირდა, რაც ძალიან შემაშფოთებელია.
იმავდროულად თბილისში მყოფი ევროპელი დიპლომატები აცნობიერებენ, რომ ისინი დილემის წინაშე დგანან: თუ ბრიუსელი საქართველოს ევროკავშირის წევრობის კანდიდატის სტატუსს მიანიჭებს, ეს ნიშნავს, რომ ქვეყნის მთავრობას, რომელიც დემოკრატიისაგან უკან იხევს, ევროკავშირი ხელს უწყობენ, რომ ხელისუფლებაში დარჩეს და თუ არ მიანიჭებენ, ამით ბევრ ქართველს ევროპის მიმართ იმედები გაუცრუვდება, ხოლო „ქართულ ოცნებას“ მოსკოვთან კავშირების გაფართოების საბაბი მიეცემა. გარდა ამისა, მოსალოდნელია ქუჩის პროტესტების პროვოცირებაც.
როგორც ერთ-ერთმა დიპლომატმა ხაზგასმით აღნიშნა, „ევროკავშირის ნეგატიური გადაწყვეტილება საქართველოსთვის კანდიდატის სტატუსის მინიჭების თაობაზე ისეთი მოვლენების სპირალს გამოიწვევს, რომ სიტუაცია შეიძლება კონტროლიდან გამოვიდეს“.
„ქართული ოცნების“ თავმჯდომარე ირაკლი კობახიძე რამდენიმე დღის წინ თბილისის სახელმწიფო უნივერსიტეტის მე-2 კორპუსთან სტუდენტთა აქციას გამოეხმაურა, რომლებიც თსუ-ს ლექტორობიდან ირაკლი კობახიძის გადადგომას ითხოვდნენ.
კობახიძის თქმით, ხელისუფლება არავის მისცემს საშუალებას, უნივერსიტეტში პოლიტიკა შეიტანოს და ამით 2012 წლამდე წარსული პრაქტიკა დააბრუნოს.
„პოლიტიკის შეტანა უნივერსიტეტში, ეს არის კატეგორიულად მიუღებელი. ჩვენ ჩავაბარეთ წარსულს ეს პრაქტიკა 2012 წელს. 2012 წლამდე პირდაპირ შედიოდა პოლიტიკა უნივერსიტეტებში, მათ შორის თბილისის სახელმწიფო უნივერსიტეტში, პირდაპირ კონკურსები ტარდებოდა პოლიტიკური ნიშნით. არიან პროფესორები თბილისის სახელმწიფო უნივერსიტეტში, რომლებიც მხოლოდ პოლიტიკური ნიშნებით არიან გამწესებულნი. თსუ-ში არის მაგალითად ადამიანი, რომელიც ასწავლის კონკრეტულ საგანს, რომელიც თვითონ მან არ იცის, რადგან თავის დროზე არის „ნაცმოძრაობის“ კვოტით დანიშნული. მე პირადად 2010 წელს მომიწია თსუ-ს დატოვება, რადგან გავაკრიტიკე მაშინ საკონსტიტუციო ცვლილებები და მიიღეს კონკურსზე პოლიტიკური გადაწყვეტილება ჩემი თსუ-დან გაძევების თაობაზე. დღეს იგივე ხალხი, იგივე „ნაცები“ თავისი „გირჩელებით“ და ა.შ. ცდილობს პოლიტიკა დააბრუნოს თბილისის სახელმწიფო უნივერსიტეტში. ამის საშუალებას ჩვენ ბუნებრივია არ მივცემთ. თსუ არ არის პოლიტიკური აქტივობების ადგილი. თსუ-ში უნდა გაგრძელდეს სასწავლო პროცესი, ყოველგვარი პოლიტიკის გარეშე“, – განაცხადა კობახიძემ.
გამოცემა Politico-ს მიერ მოპოვებული დოკუმენტები მიუთითებს იმაზე, რომ სანქცირებული რუსული სამხედრო მრეწველობის კომპანიებმა „Промтехнология”, „ORSIS T-5000″და „ТЕТИС ПРО“ ამერიკული კომპანია Hornady-სგან ასობით ათასი ტყვია-წამალი შეიძინეს.
Politico-ს თანახმად, დასავლური ტყვია-წამლის გამოყენებაზე „ვაგნერის“ მებრძოლები ინტერვიუებშიც საუბრობენ. თუმცა, როგორც დაჯგუფების ხელმძღვანელმა, ევგენი პრიგოჟინმა Politico-ს განუცხადა, მათ „ნატოს შეიარაღების უზარმაზარი რაოდენობა აქვთ, რომელიც უკრაინის ჯარმა დატოვა“.
რუსეთთან ვაჭრობის გაგრძელებას კატეგორიულად უარყოფს Hornady-ს დირექტორიც. Politico-სთან სატელეფონო ინტერვიუში მან განაცხადა, რომ კომპანიამ რუსეთთან ურთიერთობა უკრაინაში შეჭრის დღესვე გაწყვიტა.
„კატეგორიულად ვაცხადებ, რომ რუსეთში ექსპორტს არ ვახორციელებთ და რუსეთში ექსპორტის ნებართვა 2014 წლიდან არ გვქონია. მხარს არ ვუჭერთ ნებისმიერი ჩვენი პროდუქტის ნებისმიერ რუსზე მიყიდვას და როგორც კი გავარკვევთ, როგორ ჩაუვარდათ მათ ხელში ჩვენი პროდუქტი (თუ ეს მართლა ასეა), მივიღებთ ყველა შესაძლო ზომას ამის შესაჩერებლად“, – აცხადებენ Hornady-სში.
Hornady-სთან ურთიერთობას Промтехнология-შიც უარყოფენ, თუმცა Politico წერს, რომ „აღმოჩენები ემატება მზარდ მტკიცებულებებს იმის შესახებ, რომ ლეტალური და არალეტალური სამხედრო აღჭურვილობის მარაგი კვლავ აღწევს რუსეთში, მიუხედავად იმისა, რომ დასავლეთმა უპრეცედენტო სანქციები დააწესა პრეზიდენტ ვლადიმერ პუტინის გასულ წელს უკრაინაში შეჭრის საპასუხოდ. თავდაცვის ექსპერტების შეფასებით, ომმა გამოავლინა, რომ რუსეთს სნაიპერული აღჭურვილობის წარმოება არ შეუძლია, რაც ხელს უწყობს დასავლური საბრძოლო მასალის შავი ბაზრის აყვავებას.
„ინფორმაცია ასეთი ტყვია-წამლის შესყიდვის შესახებ ჩვენს თვალწინაა: გარიგების დეტალების – იმპორტიორების, მომწოდებლებისა და პროდუქტის აღწერილობის ნახვა ნებისმიერ მსურველს შეუძლია, ვისაც აქვს წვდომა რუსულ ინტერნეტზე და ფლობს საერთაშორისო საბაჟო კლასიფიკაციის კოდებს“, – აღნიშნულია სტატიაში.
Politico წერს, რომ სანქციების დარღვევისთვის აშშ-ში მკაცრი სასჯელი მოქმედებს, რომელიც $1 მილიონი დოლარის ოდენობის ჯარიმას ან 20-წლიან პატიმრობას ითვალისწინებს.
ექსპრეზიდენტი მიხეილ სააკაშვილი სოციალურ ქსელში თბილისის საქალაქო სასამართლოში 7 ნოემბრის საქმეზე გადადებულ სასამართლოს ეხმაურება და წერს, რომ ის პუტინის და მისი ადგილობრივი მარიონეტების სამხედრო ტყვეა.
„მე დღეს უნდა გამოვსულიყავი ე.წ. სასამართლოს სხდომაზე. სპეციალურად აარჩიეს ე.წ. 7 ნოემბრის და არა პიჯაკების, ან საზღვრის კვეთის საქმე, რადგან ჩათვალეს, რომ PR-ის თვალსაზრისით თავიანთ რუსულ არხებზე ხმაურისთვის, მათთვის უფრო მოგებიანი იქნებოდა. ესეც ვერ გაბედეს!
დღეს ხალხი დაინახავდა, რომ მიუხედავად მძიმე ფიზიკური მდგომარეობისა, სულიერად ვერ გამტეხეს და უფრო მხნედ ვარ ვიდრე ოდესმე, რაც დაანგრევდა მათ მთელ პროპაგანდას.
„სასამართლო“ გადადეს გაურკვეველი ვადით, მინიმუმ შემოდგომამდე. ესეც კარგად აჩვენებს, რომ რუსული ხელისუფლება ჩამოშლილია, მაგრამ ჩვენ ბრძოლას მოვიგებთ მხოლოდ ერთიანობითა და სიმტკიცით. რა თქმა უნდა, დღევანდელი მაგალითიც ადასტურებს, რომ მე ვარ პუტინის და მისი ადგილობრივი მარიონეტების სამხედრო ტყვე, თუმცა პუტინიც კი უფრო ხშირად აჩენს ნავალნის, ვიდრე ესენი მე.
რატომ გეშინიათ ჩემი გამოჩენის? რატომ უფრთხით იმას, რომ ხალხმა თვითონ განსაჯოს თქვენ ხართ მართალი თუ მე? მე თავი გადავდე 2003-შიც, 2008-შიც, როცა არ დავტოვე საქართველო და მსოფლიო ფეხზე დავაყენე საქართველოს გადასარჩენად და 2021 წლიდან მოყოლებული დღემდე, რათა ამ სასიკვდილო განსაცდელისგან ვიხსნა საქართველო.
ჩემი ტყვეობა სამარცხვინო ფურცელია საქართველოს ისტორიაში, ისევე როგორც ნიკა გვარამიას და სხვა პოლიტპატიმრების ციხეში გამომწყვდევა. ქართველმა ხალხმა საერთაშორისო თანამეგობრობასთან ერთად ეს უსამართლობა რაც შეიძლება მალე უნდა დაასრულოს.საქართველო უნდა დაუბრუნდეს ნორმალურ, დემოკრატიულ, კონკურენტულ პოლიტიკურ პროცესს ძალადობის, პოლიტპატიმრებისა და სხვა რუსული ნაღმების გარეშე“, – წერს საქართველოს მესამე პრეზიდენტი.
არაერთხელ მითქვამს და კიდევ ერთხელ დავაფიქსირებ ჩემს პოზიციას, რომ ძალადობა კატეგორიულად მიუღებელია, – ასე გამოეხმაურა თბილისის მერი, კახა კალაძე თსუ-ში, ბორჯომსა და გორში მომხდარ ინციდენტებს.
როგორც მან აღნიშნა, კონკრეტული პარტიები და ტელევიზიები გმირად ასაღებენ ადამიანს, რომელიც ე.წ. მოლოტოვის კოქტეილს ისვრის.
„კატეგორიულად მიუღებელია ის ძალადობა, რაც ოპოზიციის მხრიდანაც ხდება იმიტომ, რომ ნახეთ ორმაგი სტანდარტი სად იკვეთება? როდესაც ახალგაზრდა ადამიანებს აქვთ მცდელობა დაწვას, ესროლოს „მოლოტოვის კოქტეილი“, ამას კონკრეტული ტელევიზიები და კონკრეტული პარტიები გმირად ასაღებენ. ეს არის ძალიან დიდი უბედურება. როდესაც ადამიანს აქვს დანაშაული და ასეთი მძიმე, აქვთ მცდელობა, რომ გმირად გამოიყვანონ. შემდეგ როცა ძალადობა ხდება, რა თქმა უნდა, ესეც ძალიან ცუდია. ამიტომ, როდესაც ერთი კონკრეტული შემთხვევაა, კონკრეტულმა პოლიტიკურმა პარტიებმა და ტელევიზიებმა კეთილი უნდა ინებონ და ყველაფერს თავის სახელი დაარქვან, თუ გვინდა ქვეყანაში სამართლიანობა იყოს. როგორ უნდა მომწონდეს და მივესალმო ძალადობას, რა თქმა უნდა, მიუღებელია“,-განაცხადა კალაძემ.
მისი შეფასებით, ეს არის ძალიან ცუდი და დამაზიანებელი. როგორც კახა კალაძემ აღნიშნა, საზოგადოებამ უნდა იცოდეს, ვინ უწყობს ხელს ახალგაზრდების რეკრუტირებას მაშინ, როდესაც რევოლუციაზე მიდის საუბარი.
„ეს არის ბოროტების პირდაპირი წახალისება. ცხადია, ეს არის ძალიან მძიმე. საზოგადოება უნდა გავერთიანდეთ და ხელი შევუშალოთ ამ ყველაფერს. ძალიან ცუდია, როდესაც ასეთი ფაქტების ფინანსური წახალისება და დაფინანსება ხდება. საზოგადოებამ უნდა იცოდეს, საიდან შემოდის ეს თანხები, ვინ აფინანსებს ამ ორგანიზაციებს, ვინ უწყობს ხელს ახალგაზრდების რეკრუტირებას რევოლუციაზე როდესაც მიდის საუბარი, ასევე დაპირისპირებაზე, სისხლზე, გადატრიალებაზე და ასე შემდეგ. ეს ყველაფერი უნდა გახდეს საჯარო. საზოგადოებამ უნდა იცოდეს, რომელი ქვეყნიდან, რომელი კონკრეტული ორგანიზაცია აფინანსებს ამ ახალგაზრდების დაჯგუფებას“, – განაცხადა კალაძემ.
გარდა ამისა, მან აღნიშნა, რომ ევროკომისიის 12 რეკომენდაციიდან ერთ-ერთი დეპოლარიზაცია იყო, თუმცა ამისთვის ოპოზიციის მხრიდან არაფერი კეთდება.
„იმის მაგივრად, რომ ყველა მოწადინებული იყოს და გადაიდგას დეპოლარიზაციისკენ ნაბიჯი, პირიქით, წახალისება ხდება. ვითომ ჩვენი მეგობარი ქვეყნებიდან შემოდის ამ ორგანიზაციების პირდაპირი დაფინანსება, სადაც მიმდინარეობს ახალგაზრდების რეკრუტირება, რომ ასწავლონ, როგორ უნდა დაუპირისპირდნენ პოლიციელებს, როგორ მოაწყონ რევოლუცია, გადატრიალება და ა.შ.“, – განაცხადა კალაძემ.
ცნობისთვის, „გირჩი-მეტი თავისუფლების“ ლიდერს გორში, „სმარტთან“ თავს დაესხნენ. პარტიის წევრის, ანა ყურაშვილის ინფორმაციით, ჯაფარიძეს თავს ერთი პირი მაშინ დაესხა, როდესაც ის მანქანაში იმყოფებოდა, შედეგად მას თვალი აქვს დაზიანებული. ასევე, გავრცელდა ინფორმაცია ბორჯომში, „გირჩი – მეტი თავისუფლების“ ახალგაზრდულ ბანაკში მომხდარ ინციდენტთან დაკავშირებით. გარდა ამისა, თბილისის სახელმწიფო უნივერსიტეტში, სადაც „ქართული ოცნების” თავმჯდომარე ირაკლი კობახიძე ლექციას ატარებდა, ხმაური იყო. ერთმანეთს ახალგაზრდები დაუპირისპირდნენ, სიტყვიერი შელაპარაკება კი, ფიზიკურ დაპირისპირებაში გადაიზარდა. როგორც „ინტერპრესნიუსს” თსუ-ს სტუდენტმა ალექსი კირტავამ განუცხადა, დაპირისპირებისას ერთ-ერთი ახალგაზრდა დაშავდა, რომელიც კლინიკაში გადაიყვანეს.
„ნაცმოძრაობა“ არის ტოქსიკური და ასეთივე ტოქსიკური გახდა ყველა, ვინც თავისი პოლიტიკური საქმიანობა მას დაუკავშირა, – ამის შესახებ პარლამენტის პირვემა ვიცე-სპიკერმა, გია ვოლსკიმ განაცხადა.
მისივე თქმით, ძნელია, ლევან ხაბეიშვილის განცხადებებს ლოგიკაში მიჰყვე, რადგან აბსოლუტურად განსხვავებულია იმ პროცესებისგან, რაც რეალურად მიმდინარეობს.
„ოპოზიციური გაერთიანება ჰქონდათ, ამისთვის შალვა ნათელაშვილის ეზო, ფანჩატური გამოიყენეს. მაშინ გაერთიანდნენ ადამიანები, ვინც ჩართული იყვნენ ანტიქართულ საქმიანობაში და ხელი შეუწყვეს რუსეთის პრიორიტეტების დაკმაყოფილებას საქართველოში. ეს არ იკმარეს და ამ პროცესებში ჩაერთო ოპოზიციის რადიკალური ფრთა, რომელმაც გადაწყვიტა, რომ ქვეყანაში მთავარია დესტაბილიზაცია. „ნაცმოძრაობას“ მიაჩნია, რომ ერთადერთი და განუმეორებელია, რადგან ატყობს, რომ ვინც გარშემო შემოიკრიბა, მათ ძალიან დაბალი რეიტინგი აქვთ და ამიტომ ფიქრობს, რომ თავად უნდა იყოს წარმმართველი, თუმცა ამავე დროს გახლეჩილია ორად და ორივე მხარე ნგრევისკენ მიექანება. რაც შეეხება „ლელოს“, ზურაბ ჯაფარიძე, „ლელო“, ვაშაძე, ხოშტარია – ამ ხალხს არ აქვს რესურსი, შორს გაიხედოს და ახალგაზრდებს რაიმე ახალი მიაწოდოს, ახალი პროგრამა დადოს. დამანგრეველის გარდა, შინაგანად არ არიან სხვა მიმართულებით მოწოდებული. „ლელოს“ აქვს პრეტენზია, იყოს აღმაშენებელი და სახელი თუ არა, ფუნქცია წაართვას მას, ვინც თავის თავს ასე უწოდა. მათი ურთიერთობები იმდენად შეუსაბამოა, რომ არ მგონია, რეალურ ოპოზიციად გამოდგეს, თუ ერთხელ და სამუდამოდ იმ სისხლიან წარსულს არ გაემიჯნებიან, რომელშიც ჩარჩა „ნაცმოძრაობა“. „ლელოსთვის“ ამის გაკეთება რთული იქნება „ნაცმოძრაობის“ მმართველ რგოლთან ურთიერთობების გამო. „ნაცმოძრაობას“ „ევროპული საქართველოც“ გამოეყო, მაგრამ მათ წითელი ხაზები არ გაავლეს, რაც მათგან გამიჯნავდა“, – აღნიშნა გია ვოლსკიმ.
„ნაციონალური მოძრაობის“ თავმჯდომარემ, ლევან ხაბეიშვილმა გუშინ განაცხადა: „გაერთიანებაზე ორი კვირის წინ დავიწყე საუბარი და ვიღაცები გადაბჟირდნენ, უახლოეს ხანებში საჯაროდ ნახავთ იმ გაერთიანებებს თუ დიდ ერთობას, რომელიც „ნაციონალური მოძრაობის“ გარშემო იქნება“.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge