რამდენიც არ უდნა გვეძახონ, რომ „ცუდები ვართ, არაფერი არ გამოგვივა, რომ ვერ შევძლებთ ერთობას, ბრძოლას, გამარჯვებას“, ჩვენ აუცილებლად გამოგვივა, ჩვენ აუცილებლად გავიმარჯვებთ, – ამის შესახებ „ნაციონალური მოძრაობის” თავმჯდომარემ, ლევან ხაბეიშვილმა „ვარდების რევოლუციის“ 20 წლისთავთან დაკავშირებით გამართულ ღონისძიებაზე სიტყვით გამოსვლისას განაცხადა.

ლევან ხაბეიშვილის თქმით, „ნაციონალურმა მოძრაობამ“ ერთხელ უკვე ამოიყვანა ქვეყანა ჭაობიდან, შესაბამისად, ახლაც გაიმარჯვებენ და ემსახურებიან ხალხს “წარსულის შეცდომებზე გამობრძმედილები”.

„არ მოგენატრათ გამარჯკვების გემო? არ მოგენატრათ გამარჯვების ყიჟინა? არ მოგენატრათ, რომ კიდევ ერთხელ დავძახოთ: “საქართველოს გაუმარჯოს?” რამდენიც არ უნდა გვეძახონ, რომ “ცუდები ვართ, არაფერი არ გამოგვივა, რომ ვერ შევძლებთ ერთობას, ბრძოლას, გამარჯვებას”, ჩვენ აუცილებლად გამოგვივა, ჩვენ აუცილებლად გავიმარჯვებთ, ჩვენ არასდროს დავნებდებით. ჩვენ ერთხელ უკვე დაგვიმარცხებია კორუფცია, ამოგვიყვანია ქვეყანა ჭაობიდან და ახლაც, ასევე, დავამარცხებთ; ასევე ავაშენებთ; ასევე ვემსახურებით ხალხს წარსულის შეცდომებზე გამობრძმედილები და ნასწავლები. დიდება საქართველოს. ღმერთმა დალოცოს საქართველო. თავისუფლება მიხეილ სააკაშვილს, პუტინის ტყვეს!”, – განაცხადა ლევან ხაბეიშვილმა.

ლევან ხაბეიშვილის განცხადებით, „ვარდების რევოლუციამ“ ფუნდამენტურად შეცვალა საქართველო და ის მიხეილ სააკაშვილის ლიდერობით განხორციელდა.

„ვარდების რევოლუცია, რომელიც მოხდა მიხელ სააკაშვილის ლიდერობით, ეს იყო მოვლენა, რომელმაც ფუნდამენტურად შეცვალა საქართველო.

ვარდების რევოლუციის შედეგად ჩამოყალიბდა თანამედროვე ქართული სახელმწიფო, ის სახელმწიფო, რომლის ადგილიც ევროპაშია“, – აღნიშნა ლევან ხაბეიშვილმა.

ჩვენ უნდა განვახორციელოთ ტოტალური შეტევა ოლიგარქატზე და გვახსოვდეს, რომ ჩვენს ტოტალურ შეტევას ექნება ტოტალური საერთაშორისო მხარდაჭერა. აქ საკითხი ზუსტად ასე დგას – ან ოლიგარქი, ან საქართველო და გამარჯვება. ჩვენ ვირჩევთ გამარჯვებას, ანუ ჩვენ ვირჩევთ საქართველოს , – ამის შესახებ საქართველოს მესამე პრეზიდენტის, მიხეილ სააკაშვილის მიმართვაშია ნათქვამი, რომელიც “ვარდების რევოლუციის” 20 წლის იუბილეზე „ერთიანი ნაციონალური მოძრაობის“ ახალგაზრდული ორგანიზაციის ხელმძღვანელმა, იგორ ნარმანიამ წაიკითხა.

როგორც სააკაშვილის მიმართვაშია აღნიშნული, “ვარდების რევოლუციამ” მყარად დააბრუნა საქართველო მსოფლიო რუკაზე.

“კიდევ ერთხელ გილოცავთ საქართველოს მრავალსაუკუნოვან ისტორიაში ერთ-ერთი ყველაზე დიდი მოვლენის – “ვარდების რევოლუციის” 20 წლის იუბილეს. “ვარდების რევოლუციამ” მყარად დააბრუნა საქართველო მსოფლიო რუკაზე. ჩვენ “ვარდების რევოლუციით” კორუფციას, კრიმინალს, უიმედობასა და რუსეთს ვუთხარით არა. დსთ-ს სივრცეში პირველად ამ პატარა საქართველომ გაბედა და სწორედ ამიტომ გვიწოდა თბილისში ჩამოსულა ამერიკის პრეზიდენტმა მთელი მსოფლიოს დემოკრატიის შუქურა. ახლაც ზუსტად ასევე ვეტყვით ოლიგარქს, რუსეთს, უიმედობას და უპერსპექტივობას არას.

დაიმახსოვრეთ, განსხვავება ივანიშვილისა და შევარდნაძე-აბაშიძის რეჟიმებს შორის არის მხოლოდ სპეცრაზმის ეკიპირებაში, მაგრამ ჩვენც მეტი ჯავშანი გვაქვს. ჩვენი ჯავშანი არის მეტი გამოცდილება, ბევრად უფრო მაგარი ახალი თაობა და ცივილიზებული დემოკრატიული სამყაროს ტოტალური მხარდაჭერა. ჩვენ უნდა განვახორციელოთ ტოტალური შეტევა ოლიგარქატზე და გვახსოვდეს, რომ ჩვენს ტოტალურ შეტევას ექნება ტოტალური საერთაშორისო მხარდაჭერა. აქ საკითხი ზუსტად ასე დგას – ან ოლიგარქი, ან საქართველო და გამარჯვება. ჩვენ ვირჩევთ გამარჯვებას, ანუ ჩვენ ვირჩევთ საქართველოს,” – აღნიშნულია სააკაშვილის მიმართვაში.

ვარდების რევოლუცია იყო მოვლენა, რომელმაც უზარმაზარი, გარდამტეხი ტრანსფორმაცია მოახდინა საქართველოს ისტორიაში, – ამის შესახებ „გამარჯვების პლატფორმის“ საარჩევნო კამპანიის ხელმძღვანელმა, გიორგი ვაშაძემ „ვარდების რევოლუციის“ 20 წლისთავისადმი მიძღვნილ ღონისძიებაზე სიტყვით გამოსვლისას განაცხადა.

გიორგი ვაშაძემ თავის გამოსვლაში ასევე ისაუბრა გეგმების შესახებ, რასაც, გამარჯვების შემთხვევაში, შეასრულებენ და, მათ შორის, აღნიშნა, რომ საქართველოს ექნება ახალი რკინიგზა, რომელიც დააკავშირებს თბილისს, სოხუმს და ბრიუსელს.

„ჩვენი მთავარი დაპირებაა, რომ გამარჯვებისთანავე უსწრაფესად შევასრულებთ ევროკავშირის ცხრა წინაპირობას და საქართველო დაჩქარებული წესით აუცილებლად გახდება ევროკავშირის წევრი სახელმწიფო, დავაჩქარებთ საქართველოს ნატო-ში გაწევრიანების პროცესს, რაც იქნება მთავარი წინაპირობა საქართველოს ტერიტორიული მთლიანობის აღდგენის.

გპირდებით, გვექნება ევროკავშირის სტანდარტების დონის დამოუკიდებელი სასამართლო, საქართველოს ექნება მაღალანაზღაურებადი სამუშაო ადგილები და ჩვენს მოქალაქეებს აღარ მოუწევთ საკუთარი სამშობლოს, საკუთარი ოჯახების, მშობლებისა და შვილების დატოვება; ახალგაზრდებს ექნებათ განვითარების შესაძლებლობა საქართველოში და არ მოუწევთ უცხოეთში წასვლა, რისთვისაც გავაკეთებთ ახალგაზრდების სტარტაპების ხელშეწყობის ერთმილიარდიან ფონდს. ისეთ უზარმაზარ კომპანიებს, როგორებიცაა Apple, Google, Amazon-ი, რომლებმაც ოფისები დახურეს რუსეთში, შემოვიყვანთ საქართველოში. ეს იქნება ჩვენი მთავრობის პრიორიტეტი, რითიც შევქნით დამატებით მაღალანაზღაურებად სამუშაო ადგილებს და შემოვიტანთ წარმოუდგენელი მასშტაბის ინვესტიციებს.

ემიგრანტებს დავაბრუნებთ საკუთარ სამშობლოში, საკუთარ სახლებში, ყველა გაჩერებულ პროექტს წელიწად-ნახევარში არა მხოლოდ დავასრულებთ, არამედ შევძენთ ახალ გეოპოლიტიკურ ფუნქციას და მნიშვნელობას, ქართული სოფლები იქნება ტურისტული მიზიდულობის ცენტრი.

საქართველოს ექნება ახალი, სწრაფი რკინიგზა, რომელიც დააკავშირებს არა მხოლოდ თბილისს და ბათუმს, თბილისსა და ზუგდიდს, არამედ თბილისს, სოხუმს და ბრიუსელს. გვექნება სწრაფი რკინიგზა, პირდაპირი, სამგზავრო რკინიგზა და ტრანსპორტი ევროკავშირის დედაქალაქამდე. ჩვენი განსაკუთრებული პრიორიტეტი იქნება მასწავლებელი, მეცნიერი, ექიმი და ჯარისკაცი. ეს არის წარმატებული ქვეყნის ფორმულა“, – განაცხადა გიორგი ვაშაძემ.

მანიფესტი ორმაგ ინტერპრეტაციას არ ექვემდებარება, თუ გვინდა, ვიბრძოლოთ და ერთ ნავში ვიყოთ, მაშინ ხელი უნდა ჩავკიდოთ ერთმანეთს, თუ არა, მშვიდობით უნდა დავსვათ წერტილი, – ამის შესახებ გიგი უგულავამ „ნაციონალური მოძრაობის“ მიერ გამოქვეყნებულ მანიფესტთან დაკავშირებით განაცხადა.

„ვფიქრობ, პროცესებს, რომელიც პარტიაში მიმდინარეობს, მას წერტილი უნდა დაესვას, ან იქით ან აქეთ. რაც არ უნდა რთული და მძიმე იყოს ეს, ჩემთვის პირადად, ძალიან მძიმეა, რადგან ბევრი ჩემი ამხანაგი და თანამებრძოლი იქითაც არის და აქეთაც, მაგრამ ის, რასაც მთელი წელია, ვუყურებთ, ეს არის უბრალოდ ამომრჩევლის ზურგის შექცევა. დღეს, როდესაც სახელმწიფოებრიობას გვართმევენ, როცა ამ პარტიის ლიდერი ციხეში ზის, ამის უფლება ჩვენ არ გვაქვს. ამიტომ მგონი, ეს მანიფესტი ორმაგ ინტერპრეტაციას არ ექვემდებარება, თუ გვინდა, რომ ვიბრძოლოთ და ერთ ნავში ვიყოთ, მაშინ ხელი უნდა ჩავკიდოთ ერთმანეთს, თუ არადა, მშვიდობით უნდა დავსვათ წერტილი. წერტილის დასმაში ვგულისხმობ იმას, რომ ან ამ „ბარდაგს“ ვუსვამთ წერტილს, ან ვაგრძელებთ. ამას წერტილი უნდა დაესვას“, – განაცხადა გიგი უგულავამ.

იმისთვის, რომ დავამარცხოთ რუსული რეჟიმი, ჩვენ გვჭირდება უპრეცედენტო ერთობა და გამარჯვების რწმენა. ვირწმუნოთ გამარჯვების და გავერთიანდეთ გამარჯვებისთვის, – ამის შესახებ „ნაციონალური მოძრაობის“ ერთ-ერთმა ლიდერმა, თინა ბოკუჩავამ „ვარდების რევოლუციის“ 20 წლისთავთან დაკავშირებით ღონისძიებაზე სიტყვით გამოსვლისას განაცხადა.

ამასთან, თინა ბოკუჩავას განცხადებით, ბიძინა ივანიშვილის „რუსულმა რეჟიმმა“ საქართველოს მესამე პრეზიდენტი, მიხეილ სააკაშვილი „ვარდების რევოლუციის“ იდეებისთვის და მიღწევებისთვის დაატყვევა.

„დღეს თქვენს წინაშე პირველ სპიკერად და დღევანდელი დღის მთავარ გმირად უნდა იდგეს პრეზიდენტი მიხეილ სააკაშვილი. პრეზიდენტი მიხეილ სააკაშვილია „ვარდების რევოლუციის“ მთავარი გმირი ქართველ ხალხთან ერთად. მთავარი სულის ჩამდგმელი და მთავარი შემოქმედი. სწორედ ამიტომ დაატყვევა ივანიშვილის რუსულმა რეჟიმმა მიხეილ სააკაშვილი, სწორედ „ვარდების რევოლუციის“ იდეებისთვის და მიღწევებისთვის, ამიტომ იმყოფება ის დღეს საპყრობილეში. ამ სულისშემძვრელ უსამართლობას ჩვენ უნდა შევებრძოლოთ და ის დროულად უნდა დავასრულოთ. მე მჯერა, რომ ეს ძალიან მალე მოხდება და ჩვენ ერთად გავაგრძელებთ „ვარდების რევოლუციას“.

პრეზიდენტი სააკაშვილი აწამეს, მოწამლეს, მაგრამ ვერ მოკლეს, რადგან ვერ მოკლეს მასში „ვარდების რევოლუციის“ იდეა. ერთიანი,ძლიერი, დემოკრატიული, ევროპული, თავისუფალი საქართველოს იდეა. ეს არის მთავარი იდეა, რომელიც ამოძრავებდა „ვარდების რევოლუციას“ და რომელიც ამძრავებს პრეზიდენტ სააკაშვილს და გვამოძრავებს ჩვენ. ეს არის იდეა, რომელიც ცოცხლობს თითოეული ჩვენგანის გულში, გონებაში და ამიტომ ვერასდროს მოკლავს მას ვერც ივანიშვილი და ვერც პუტინი.

სწორედ ამიტომ მჯერა დღეს, გამარჯვების და იმის, რომ ჩვენ ერთიანობით, მათ შორის კოალიციური ერთობით, გამარჯვების შემდეგ გავაგრძელებთ „ვარდების რევოლუციის“ იდეას და მივიყვანთ ბოლომდე ჩვენს მიზანს, რომ ჩვენი ქვეყანა შევიდეს ევროკავშირში და ნატოში და საქართველო შედგეს როგორც წარმატებული სახელმწიფო“, – განაცხადა თინა ბოკუჩავამ.

“ნაციონალური მოძრაობის” ერთ-ერთი ლიდერის ზურაბ ჭიაბერაშვილის განცხადებით, ვინც “ნაციონალური მოძრაობის” მანიფესტს არ შეუერთდება, ეს ფაქტობრივად, ნიშნავს იმას, რომ მას დამოუკიდებელი პოლიტიკური ცხოვრება ექნება.

როგორც ზურაბ ჭიაბერაშვილმა ჟურნალისტებს განუცხადა, პარტიის კარი მანიფესტზე ხელმოწერისთვის ყველასთვის ღიაა.

“მანიფესტი არის “ნაციონალური მოძრაობის” განაცხადი, რომ გვაქვს ღია პლატფორმა და ვისაც აქვს სურვილი შემოერთდეს იმ პრინციპებს, რაც მანიფესტშია ჩამოწერილი, კარი ყველასთვის ღიაა. ვინც პარტიის გაუმართლებელი კრიტიკით და პარტიის ლეგიტიმურად არჩეული სტრუქტურების ეჭვქვეშ დაყენებით ცდილობს, რომ პარტია დაასუსტოს, ის თვითონ აყენებს თავს პარტიის გარეთ. პარტიაში ამ მანიფესტზე გადაწყვეტილება მიღებულია. ახლა გადაწყვეტილება ინდივიდუალურად მისაღები აქვს იმ ადამიანებს, ვინც ამ მანიფესტს ნებისმიერი ფორმით შემოერთდება, იქნება ეს სოციალური მედია, ტელევიზია თუ ა.შ. თუ არ შემოერთდება, დამოუკიდებელ გზას აირჩევს. ჩვენ გაგვიხარდება, თუ პარტიას ისინიც შემოერთდებიან, ვისი განცხადებებიც მთელი ამ ხნის განმავლობაში სამწუხაროდ, პარტიის საწინააღმდეგოდ იყო მიმართული. ეს მათი არჩევანი იქნება. “ნაციონალური მოძრაობა” ღიაა ყველასთვის, ვინც მანიფესტს შემოერთდება, ხოლო ვინც არ შემოერთდება, დამოუკიდებელი პოლიტიკური ცხოვრება ექნება”, – განაცხადა ჭიაბერაშვილმა.

კითხვაზე, ნიშნავს თუ არა ეს განცხადება იმას, რომ ასეთ შემთხვევაში ისინი პარტია “ნაციონალურ მოძრაობას” დატოვებენ, ჭიაბერაშვილმა განმარტა: “გადაწყვეტილება არის მანიფესტი და ახლა მანიფესტზე შეერთება-არ შეერთებაზე გადაწყვეტილებას ინდივიდუალურად იღებენ”.