ძალიან კმაყოფილი ვარ იმ პროცესებით, რაც „ნაციონალურ მოძრაობაში“ მიმდინარეობს, რაც უფრო დიდხანს იქნება კლოუნად წოდებული პირი ხელმძღვანელი, მით უკეთესად გამოჩნდება მათი რეალური სახე, – ამის შესახებ საქართველოს კულტურის მინისტრმა, თეა წულუკიანმა ჟურნალისტებს განუცხადა.

მისივე თქმით, ამ ყველაფრის უკვე სერიოზულად აღქმა შეუძლებელია.

„არც იმას დავმალავ, რომ როგორც მე, ასევე ძალიან ბევრი ჩვენი თანამემამულე აღარ უკვირდება იმ პროცესებს, რაც ამ პარტიაში მიმდინარეობს. უკვე დიდი ხანია, საქმე გვაქვს ინფანტილიზმისა და არასერიოზულობის დემონსტრირებასთან“, – განაცხადა თეა წულუკიანმა.

დარჩიაშვილის მიმართვა უნდა ყოფილიყო პერსონალური – უნდა ყოფილიყო დაგმობილი მინისტერიალში ლავროვის მონაწილეობა, – ამის შესახებ „ევროოპტიმისტების“ დეპუტატმა რომან გოცირიძემ ეუთოს მინისტერიალში საგარეო საქმეთა მინისტრის, ილია დარჩიაშვილის მონაწილეობასა და სიტყვით გამოსვლასთან დაკავშირებით განაცხადა.

გოცირიძის თქმით, ყველაზე ლოგიკური გადაწყვეტილება იქნებოდა საქართველოს უარი ეთქვა მონაწილეობაზე.

„კიდევ ერთხელ დავრწმუნდით, რომ საქართველოს ბოიკოტი უნდა გამოეცხადებინა, ისევე, როგორც ეს გააკეთა 5-მა ქვეყანამ. ჩვენ ვნახეთ, რომ თავდასხმის ობიექტი იყო საქართველო და მოყვანილი იყო, როგორც დასასჯელი ქვეყნის ნიმუში. ასეთ ვითარებაში საგარეო საქმეთა მინისტრის გამოსვლა უნდა ყოფილიყო უფრო მკვეთრი, უნდა ყოფილიყო პირდაპირი პასუხი და არა ის, რომ სახლში მომზადებული რაღაც ტექსტით გამოვიდა. მასში ბუნებრივია, კრიტიკული ელემენტებიც იყო, მაგრამ როცა დარბაზში ზის ადამიანი, რომელიც ჰააგის სასამართლოზე უნდა გასამართლდეს, პერსონალური მიმართვაც უნდა ყოფილიყო მის მიმართ და სხვა ტონი უნდა ყოფილიყო გამოსვლაში. ყველაზე ლოგიკური იყო, რომ არ მიეღო საქართველოს მონაწილეობას, ბოლოსდაბოლოს თუ იღებდა, წინასწარ უნდა ყოფილიყო დაგმობილი ლავროვის დაშვება ამ კონფერენციაზე,“ – განაცხადა გოცირიძემ.

15 დეკემბერს კიდევ ერთხელ დადასტურდება, რომ „ქართული ოცნების“ ხელისუფლება ქვეყნის უახლეს ისტორიაში არის ერთადერთი ხელისუფლება, რომელმაც შეძლო ევროპისა და ევროკავშირის გზაზე ქართველი ერისთვის ყველაზე მეტი ხელშესახები შედეგის დადება, – ამის შესახებ საქართველოს კულტურის მინისტრმა, თეა წულუკიანმა კანდიდატის სტატუსთან დაკავშირებით ჟურნალისტებს განუცხადა.

მისივე თქმით, ხელისუფლება გააგრძელებს ამ გზაზე სიარულს როგორც პროდასავლური პოლიტიკური ძალა, რომელიც აღასრულებს ერის ნებას.

„ის გადაწყვეტილება, რომელიც უკვე ბრიუსელში იქნა მიღებული, არის მრავალი თაობის ნატვრისა და სულისკვეთების აღსრულება და ეს არის უმნიშვნელოვანესი. ასევე მნიშვნელოვანია, რომ 15 დეკემბერს ეს გადაწყვეტილება საბოლოო ფორმას აუცილებლად მიიღებს. ჩვენც გვაქვს ამის საფუძვლიანი რწმენა და კიდევ ერთხელ დადასტურდება, რომ „ქართული ოცნების“ ხელისუფლება ჩვენი ქვეყნის უახლეს ისტორიაში არის ერთადერთი ხელისუფლება, რომელმაც შეძლო ევროპისა და ევროკავშირისკენ მიმავალ გზაზე ქართველი ერისთვის ყველაზე მეტი ხელშესახები შედეგის დადება. ეს გახლდათ ასოცირების შეთანხმება, უვიზო მიმოსვლის რეჟიმი, თავისუფალი ვაჭრობის ხელშეკრულება და ახლა ეს უმნიშვნელოვასენი გადაწყვეტილება სტატუსთან დაკავშირებით. ჩვენ, რა თქმა უნდა, გავაგრძელებთ ამ გზაზე სიარულს როგორც პროდასავლური პოლიტიკური ძალა, რომელიც აღასრულებს საკუთარი ერის ნებას და ეს ნება ყოველთვის ისტორიულად ეკუთვნოდა ევროპულ არჩევანს“, – განაცხადა თეა წულუკიანმა.

საქართველოს კონკურენციის ეროვნულმა სააგენტომ, სწრაფი კვების მომსახურების სექტორში, მოკვლევის პროცესი დაასრულა და არაკეთილსინდისიერი კონკურენციის ფაქტი დაადგინა.

კერძოდ, საკითხი ეხებოდა შპს ,,წერეთლის მექსიკურის” საჩივრის საფუძველზე დაწყებულ საქმის შესწავლას – შპს ,,მექსიკური ჰოტ-დოგი წერეთელზე” და შპს ,,მექსიკური წერეთელზე N1″-ს მიმართ.

მოკვლევის შედეგად დადასტურდა  – მომჩივანი კომპანიის სასაქონლო ნიშნებისა და გარეგნული იერსახის გამოყენების ფაქტები. შესაბამისად, სააგენტოს გადაწყვეტილებით  ორ კომპანიას  (,,მექსიკური ჰოტ-დოგი წერეთელზე” და ,,მექსიკური წერეთელზე N1)    შესაბამისი ფინანსური სანქცია დაეკისრათ და კანონდარღვევის აღმოფხვრა დაევალათ. მხარეებს უფლება აქვთ სააგენტოს გადაწყვეტილება გაასაჩივრონ თბილისის საქალაქო სასამართლოში.

2023 წელს, სააგენტომ დაასრულა 5 მოკვლევა – დომინანტური მდგომარეობის შესაძლო ბოროტად გამოყენების, არაკეთილსინდისიერი კონკურენციის, შეთანხმებული ქმედების და სახელმწიფო ადმინისტრაციული უწყებების მხრიდან კონკურენციის შესაძლო შეზღუდვის მიმართულებით. აქედან, 1 შემთხვევაში დარღვევა არ დადგინდა, 1 შემთხვევაში განმცხადებლის მოთხოვნით შესწავლა შეწყდა, 3 შემთხვევაში დარღვევა დადგინდა და გაიცა შესაბამისი რეკომენდაციები. მოკვლევა ეხებოდა საავტომობილო საწვავის, თამბაქოს, საზღვაო გადაზიდვების, ავტოტექნიკური ინსპექტირების და სამშენებლო/ინფრასტრუქტურული მომსახურების ბაზრებს.

ამავე პერიოდში, 6 საქმეზე დაუშვებლობის გადაწყვეტილება იქნა მიღებული. ამ დროსთვის, სააგენტო 4 საკითხთან მიმართებით მოკვლევის პროცესს აწარმოებს – ფარმაციის, კინოთეატრების ელექტრონული რეალიზაციის, ავტოსადგომების და საკვები პროდუქტების ბაზრების მიმართულებით.

ოპოზიციამ დალიოს ხოლმე ნაკურთხი წყალი, რომ საშინელებათა ფილმები, ვითომ ორბანი რომ ეჩხუბება ევროკავშირს, აღარ ნახოს სიზმარში – სამადაშვილები ევროპაშიც არიან, მაგრამ არიან რაციონალური ევროპელები, რომელთა იმედი გვაქვს, – ამის შესახებ ჟურნალისტებთან „ხალხის ძალის“ წევრმა, გურამ მაჭარაშვილმა განაცხადა, რითაც უპასუხა კითხვას, ხომ არ ქმნის საქართველოსთვისაც საფრთხეს უნგრეთის პრეზიდენტის ვიქტორ ორბანის პოზიცია, რომელიც მხარს არ უჭერს უკრაინის ევროკავშირში გაწევრიანების მოლაპარაკებების დაწყებას.

მაჭარაშვილის თქმით, ოპოზიცია ახლა ორბანის ოპოზიციაში გადავიდა.

„არაერთხელ გირჩიეთ, შეიძლება პირადად თქვენ არა, მაგრამ ოპოზიციას, დალიონ ხოლმე ნაკურთხი წყალი, რომ საშინელებათა ფილმები, საფრთხეებს რომ უწოდებთ, სიზმარში აღარ ნახოთ. შავ სიზმრებს ნახულობთ, რომ ვითომ ორბანი ეჩხუბება ევროკავშირს და ევროკავშირი მოუგებს ორბანს, მერე თან საქართველოს ჩააყოლებთ ხოლმე – „ორბანის მხარეს რომ იყავი, ახლა ევროკავშირი შენ დაგჩაგრავსო“. ამ სიზმრებს თავი დაანებეთ, მომავლისკენ გაიხედეთ, ორბანი არის იმ ქვეყნის პრეზიდენტი, რომელიც ნატო-ს და ევროკავშირის წევრია. „კატა ვერ შეწვდა ძეხვსაო, პარასკევია დღესაო“ – ოპოზიციამ ვერ მოუგო ქართველ ხალხის და ქართულ სახელმწიფოს და ახლა ორბანს დაეჯახა, ორბანის ოპოზიციაში გადავიდა სალომე სამადაშვილი, რომელიც ვისი ოპოზიციაა კაცმა არ იცის. ასეთივე წარმატებით სვამდით კითხვებს, სანამ ევროკომისია მიიღებდა გადაწყვეტილებას, მაგრამ შედეგი ხომ ნახეთ, რაც იყო?! ევროპაშიც არიან ადამიანები, ვინც არასწორად აზროვნებს, სალომე სამადაშვილები, სამწუხაროდ, ევროპაშიც არიან, კუბილიუსი ვინ არის აბა, ფოტიგა?.. მაგრამ არიან რაციონალური ევროპელები, რომელთა იმედი ჩვენ გვაქვს და გვექნება მომავალშიც“, – განაცხადა მაჭარაშვილმა.

სახალხო დამცველის, ლევან იოსელიანის განცხადებით, პრეზიდენტს ყველგან შესვლისა და ყველასთან საუბრის უფლება აქვს.

აღნიშნულის შესახებ ომბუდსმენმა ჟურნალისტებს განუცხადა, როდესაც უპასუხა კითხვას, რატომ არ ეძლეოდა სალომე ზურაბიშვილს უფლება გუშინ, თსუ-ში სტუდენტებთან კამპანიის – „ჩვენი ხმა ევროპას“ ფარგლებში ესაუბრა.

„პრეზიდენტს ყველგან აქვს შესვლის უფლება და ყველასთან აქვს შეხვედრის უფლება. კონკრეტულად ამ შემთხვევასთან დაკავშირებით ვერაფერს გეტყვით, ვინ უთხრა უარი და რა მიზნისთვის. ინფორმაცია არ მაქვს“,- განაცხადა იოსელიანმა.

ცნობისთვის, საქართველოს პრეზიდენტმა სალომე ზურაბიშვილმა თბილისის სახელმწიფო უნივერსიტეტის რექტორი ჯაბა სამუშია გააკრიტიკა და განაცხადა, რომ ის სტუდენტებს უკრძალავს მაგიდის დადგმას და პეტიციაზე ხელის მოწერას.

როგორც პრეზიდენტმა აღნიშნა, უნდა მივეჩვიოთ იმას, რომ პოლიტიკა სხვა საკითხია, სახელმწიფო ინტერესები კი სხვა საკითხია და ის ყველა სივრცეში თავისუფალი უნდა იყოს.