პარტია „საქართველოსთვის“ წევრის, პარლამენტის დეპუტატის, ანა ბუჩუკურის განცხადებით, „ქალი პოლიტიკოსები საქართველოში განსაკუთრებული დარტყმის ობიექტები ხდებიან”.

მისივე შეფასებით, ეს ფაქტი ქვეყანაში ქალთა მიმართ ძალადობას ახალისებს.

„სამწუხაროდ, ქალი პოლიტიკოსები განსაკუთრებული ასე ვთქვათ, დარტყმის ობიექტები ხდებიან საქართველოშიც. ჩვენ, რაც საქართველოს პარლამენტში ვიხილეთ, არ იყო მხოლოდ, ვთქვათ თეონას [აქუბარდია] და ანას [წითლიძე] წინააღმდეგ გადადგმული ნაბიჯი, ან თეონას და ანას წინააღმდეგ განხორციელებული ვერბალური ძალადობა, არამედ, ეს იყო ყველა ქალი პოლიტიკოსის წინააღმდეგ გადადგმული ნაბიჯი. ეს არის ის, რაც ერთი მხრივ, ხელს უშლის ქალთა პოლიტიკურ გაძლიერებას და პოლიტიკაში ახალი ქალების შემოყვანას. იმიტომ, რომ, როდესაც უყურებენ როგორი თავდასხმის ობიექტი ხდება ქალი პოლიტიკაში, ძლიერი ქალი, შემდგომ თავს იკავებენ. მეორე მხრივ, ეს ნულოვანი რეაგირება – მეორე დღეს როგორ გადაეფარნენ, ამ შემთხვევაში, ბერაიას – როდესაც ხელისუფლების მხრიდან რეაქცია ნულია, ეს არის ის, რაც საბოლოოდ, ქვეყანაში ქალთა მიმართ ძალადობას ახალისებს”,- განაცხადა ანა ბუჩუკურმა.

ამასთან, ბუჩუკური ყოფილი პრეზიდენტის, მიხეილ სააკაშვილის მიერ თავის „ფეისბუქის” გვერდზე გამოქვეყნებულ პოსტსაც გამოეხმაურა, რომლის მიხედვითაც, „მომავალი არჩევნებისთვის, „ნაციონალური მოძრაობის” სიის აბსოლუტური უმრავლესობა უნდა შედგებოდეს იმ ადამიანებისგან, რომლებიც არასდროს ყოფილან პარლამენტის წევრები”.

აღნიშნულთან დაკავშირებით ბუჩუკურმა განაცხადა, რომ „მიხეილ სააკაშვილს, დიდი ალბათობით, პოლიტიკური აქტუალურობა აქვს დაკარგული და ამას განიცდის, ხან რა გზავნილს წერს და ხან რას”.

ცნობისთვის, პარლამენტის პლენარულ სხდომაზე საპარლამენტო უმრავლესობის დეპუტატმა ირაკლი ბერაიამ პარლამენტის დამოუკიდებელ დეპუტატ თეონა აქუბარდიას შეურაცხმყოფელი რეპლიკებით მიმართა. გარდა ამისა, სიტყვიერი დაპირისპირება იყო ალუდა ღუდუშაურსა და ანა წითლიძეს შორისაც. წითლიძემ ღუდუშაურს „დებილი”, “ქართული ოცნების” დეპუტატმა კი პარლამენტის ოპოზიციონერ წევრს “ბანძი” უწოდა: „შენ ხარ ბანძი ადამიანი, ჩვეულებრივი ბანძი ქალი ხარ”, – მიმართა ღუდუშაურმა წითლიძეს. აღნიშნულის შემდეგ, ირაკლი ბერაიამ ბოდიში მოიხადა.

ევროკავშირის კანდიდატის სტატუსთან დაკავშირებით პოზიტიური მოლოდინი გვაქვს. ველოდებით, რომ ევროკომისიის დასკვნაში სრულად იქნება ასახული პროგრესი, რომელიც ქვეყანას ბოლო წელიწად-ნახევრის განმავლობაში აქვს, – ამის შესახებ პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ განაცხადა.

მისივე თქმით, ბოლო დროს ოპოზიციამ რიტორიკა შეცვალა, თუმცა სინამდვილეში, არ უხარია, რომ საქართველოსთან მიმართებით, შესაძლოა, პოზიტიური გადაწყვეტილება იყოს მიღებული.

„ევროკავშირთან ურთიერთობები და გაწევრიანების პროცესი მთლიანად დაკავშირებულია პირობებთან, თუმცა არ ველოდები, რომ სანქციების დაწესებასთან დაკავშირებით პირობა გაჩნდეს, რადგან ევროკავშირს ჩვენთვის სანქციების დაწესება არასდროს მოუთხოვია. მათ კარგად ესმით ის ვითარება, რაშიც საქართველო არის. მათ ასევე კარგად ესმით ის ეკონომიკური კავშირები, რომელიც საქართველოს რუსეთთან აქვს, ამ შემთხვევაში, ვაჭრობას ვგულისხმობ. ასევე კარგად იციან, რა ტიპის პროდუქცია გადის საქართველოდან რუსეთში. ეს არის ძირითადად სოფლის მეურნეობის პროდუქცია, რაც თვითონ ევროკავშირს არ აქვს სანქცირებული რუსეთთან ვაჭრობაში. ნათლად ჩანს ის კუდები, რომლებიც ოპოზიციას გამოუჩნდა. მათ ბოლო დროს რიტორიკა შეცვალეს, ოღონდ მხოლოდ რიტორიკის დონეზე, სინამდვილეში, არ უხარიათ, რომ საქართველოსთან მიმართებით, შესაძლოა, პოზიტიური გადაწყვეტილება იყოს მიღებული. ახლა ცდილობენ, როგორმე ისეთი თემები წამოწიონ, რომელიც ჩვენი ქვეყნისთვის სასარგებლო არ იქნება, თუმცა ამით საკუთარ თავს აზიანებენ“, – განაცხადა ნიკოლოზ სამხარაძემ.

რაც შეეხება ევროკომისიის ანგარიშის გამოქვეყნების წინ ოპოზიციონერი დეპუტატების, მათ შორის სალომე სამადაშვილის ბრიუსელში ვიზიტს, საკითხის შეფასებისას სამხარაძემ აღნიშნა, რომ საზოგადოებისთვის ადვილად გასაგებია, რას უნდა ემსახურებოდეს მათი ვიზიტი.

„მგონი, საზოგადოებისთვის ადვილად გასაგებია, რას უნდა ემსახურებოდეს ოპოზიციონერი ლიდერების ერთი დღით ადრე ვიზიტი, მით უმეტეს, იმ ოპოზიციონერების ვიზიტები, რომლებიც ამ თვეების განმავლობაში თავისი ნაბიჯებით რეკომენდაციების შესრულებას ეწინააღმდეგებოდნენ. ბრიუსელში ვინც იმყოფება, მათგან რეკომენდაციების შესრულებისთვის რომელს აქვს ხმა მიცემული?“, – განაცხადა ნიკოლოზ სამხარაძემ.

სააკაშვილი ხედავს, რომ ძველ სახეებს ავტორიტეტი არ აქვს, სხვათა შორის, არც სოფო ჯაფარიძეს, რომელიც მისი დავალებით, კბილებს აცლიდა საზოგადოების დიდ ნაწილს და ასეთი არაჰოლივუდური ღიმილით დატოვეს, – ეს განცხადება პარლამენტის პირველმა ვიცე- სპიკერმა გია ვოლსკიმ ჟურნალისტებთან გააკეთა, რითაც მიხეილ სააკაშვილის ბოლოდროინდელ განცხადებებს გამოეხმაურა.

მისი შეფასებით, სააკაშვილის განცხადებები “არაადეკვატურია”. ამასთან, ვოლსკის თქმით, მას “არაფერი არ სჭირს” და ენერგიულად და მხნედ არის.

“დიდი ქაოსი – შეიძლება ერთი მოკლე სათაური ეწოდოს იმ ვითარებას, რაც “ნაცმოძრაობაშია” შექმნილი. ერთი მეორეს გამორიცხავს, რაც სააკაშვილს აქამდე უკეთებია, კერძოდ, რომ დემენცია ჰქონდა, გარდაცვალების პირას იყო და გვამური ლაქები შეემჩნეოდა, ამაზე იყო საუბარი მისი უშუალო გარემოცვიდან, ოჯახიდან და ადვოკატებიდან. ეს გარკვეული სტრატეგიული ამოცანისთვის სჭირდებოდა. დღეს ვითარება შეიცვალა და სააკაშვილს უნდა, რომ ყველა გაწიოს გვერდზე, არავინ თქვას, რომ თავადაა ავტორიტეტი და სააკაშვილი არ არის ერთადერთი და განუმეორებელი. არც არაფერი არ ჭირს, არც გვამური ლაქები აქვს, არც დემენცია და ენერგიულად და მხნედ არის. ძველი სახეები მისთვის ხან მისაღებია, ხან – მიუღებელი, რადგან მერე ფიქრობს, ვიღაცას ისე არ აწყენინოს, თავად არ აღმოჩნდეს ოფსაიდში. არეულობას და ქაოსს უმატებს თავის განცხადებებით იმ ვითარებას, რაც ისედაც მძიმეა (მის პარტიაში). არც იმას ითვალისწინებს, რომ კონკრეტულ პოლიტიკურ ჯგუფს სერიოზული დაფინანსება აქვს კეზერაშვილისგან, რომელიც რეალურად მმართველია დღეს მერაბიშვილთან ერთად “ნაცმოძრაობისა”, ამ ვითარებაში მისი განცხადება არაადეკვატურია დღეს და ვერანაირ კომენტარს უფრო მეტს, ვიდრე გავაკეთე, ვერ გავაკეთებ.

რა მდგომარეობაშიც არ უნდა იყოს, ის ხედავს, რომ ძველ სახეებს მრავალი სხვადასხვა მიზეზის გამო, არ აქვს ავტორიტეტი საზოგადოებაში, არც ხაბეიშვილს, არც მელიას და არც უამრავ ხალხს, რომელიც ამ ცალკეული პიროვნებების გარშემოა შეკრებილი და არც სოფო ჯაფარიძეს, რომელიც მისი მითითებით კბილებს აცლიდა საზოგადოების საკმაოდ დიდ ნაწილს და შემდეგ არაფერი არ დაუბრუნეს უკან, ყოველ შემთხვევაში, ასეთი არაჰოლივუდური ღიმილით დატოვეს,”- განაცხადა ვოლსკიმ.

იმის გათვალისწინებით, რომ საზოგადოების მხარდაჭერით ჩვენმა ხელისუფლებამ გაატარა ქვეყანაში ევროპული რეფორმები და დააბრუნა საქართველოში ევროპული პერსპექტივა, ველოდებით, რომ იქნება პოზიტიური შეფასება და ეს შეფასება გახდება სტატუსის მონიჭების საფუძველი, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

თალაკვაძის თქმით, საქართველო იმსახურებს, საქართველო-ევროკავშირის ორმხრივ ინტერესებშია, რომ ქვეყანამ გადადგას კიდევ ერთი არსებითი და მნიშვნელოვანი ნაბიჯი ევროინტეგრაციის გზაზე.

„მაღალი ალბათობით გვაქვს მოლოდინი, რომ სწორედ ასეთი გადაწყვეტილება იქნება მიღებული. საქართველო მიიღებს კანდიდატის სტატუსს და ჩვენ გადავალთ ევროინტეგრაციის ახალ ეტაპზე, რაც უკვე არის გაწევრიანების ეტაპი. რაც შეეხება რადიკალური ოპოზიციის შეცვლილ გზავნილებს, რიტორიკას, მათ პოლიტიკური კარდიოგრამა აქვთ არეული. ეს არის პოლიტიკური არითმია, როდესაც წლის დასაწყისში, სამი თვის განმავლობაში ამბობდნენ, რომ კანდიდატის სტატუსი საქართველოსთვის არის კრიტიკულად მნიშვნელოვანი, მაგრამ ხელისუფლება ვერ მიიღებს ამ სტატუსს, შემდეგ ამბობდნენ, რომ ხელისუფლებას კანდიდატის სტატუსს არ აძლევენ და ეს იქნება ძალიან დიდი ტრაგედია ქვეყნისთვის, ახლა ბოლო თვეა, შეცვალეს საუბარი და ამბობენ, რომ საქართველო მიიღებს კანდიდატის სტატუსს, თუმცა ეს არის შეცვლილი გეოპოლიტიკის გამოო, გეოპოლიტიკური არგუმენტით ხსნიან“, – განაცხადა თალაკვაძემ.

არჩილ თალაკვაძის განცხადებით, რუსული პროპაგანდაა, რომ ევროკავშირში ხალხი გაწევრიანდეს და ხელისუფლება – ვერა, რომელსაც რადიკალური ოპოზიცია იმეორებს.

„ცუდია, რომ რადიკალური ოპოზიცია გეოგრაფიაში ვერ ერკვევა. საქართველოს აქვს დღესაც იგივე გეოპოლიტიკა, როგორიც ჰქონდა სამი-ექვსი თვის წინ. შესაბამისად, გეოპოლიტიკური თვალსაზრისით, ჩვენ ვართ იქ, სადაც ვიყავით, თუმცა ბევრად უფრო წინ ვართ ევროინტეგრაციის თვალსაზრისით, რეფორმების და რეკომენდაციების განხორციელების თვალსაზრისით. სწორედ ეს გახდება საფუძველი, როცა საქართველო მიიღებს დადებით შეფასებას და მიიღებს კანდიდატის სტატუსს. რაც შეეხება რუსულ პროპაგანდას, რომელსაც ერთი ერთში იმეორებს რადიკალური ოპოზიცია, თითქოს დემოკრატიულ ქვეყნებში ხელისუფლება და ხალხი არის სხვადასხვა, ან ევროკავშირში ხალხი გაწევრიანდეს და ხელისუფლება – ვერა, ან პირიქით, ეს არის აბსურდი, ერთი ერთში რუსული პროპაგანდა, რომელსაც ჩვენი რადიკალური ოპოზიცია იმეორებს“, – განაცხადა თალაკვაძემ.

პოლიტიკური პარტია, რომელიც დაფუძნებული იყო რენეგატობაზე, რა თქმა უნდა, განწირულია იმისთვის, რომ შიგნით ეყოლება რენეგატები. ეს არის ამ პარტიის ბედისწერა და ასეც გაგრძელდება, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

შალვა პაპუაშვილს კითხვა დაუსვეს ბათუმის საკრებულოს წევრის, ნატალია ძიძიგურის განცხადებაზე, რომლითაც ის პარტია „საქართველოსთვის“ წევრებს ზეწოლასა და შანტაჟში ადანაშაულებს.

„ვნახეთ ეტაპები, როცა პარტიას ადამიანები განუდგნენ. როცა სიყალბესა და რენეგატობაზეა დაფუძნებული პოლიტიკური პარტია, გასაგებია, რომ შიგნით ვერ იქნება ჯანსაღი სიტუაცია. მით უმეტეს, საუბრობდნენ იმაზე, როგორი დამოკიდებულებაა შიგნით. არ მინდა, ამ საკითხებს ძალიან ჩავეძიო, რადგან მათი პრობლემაა, ვინ რატომ წავიდა და რა იყო, ერთმანეთში გაარკვიონ. მართალია, ძალიან იპრანჭება პარტია „საქართველოსთვის“, „ნაციონალურ მოძრაობასთან“ კოალიციაში არ ვართო, მაგრამ მეორე პარტნიორი ამბობს, პარტნიორები ვართო. აღიარონ ეს პარტნიორობა, რაც უფრო პატიოსანი იქნება ქართველი ხალხის წინაშე“, – აღნიშნა შალვა პაპუაშვილმა.