ლატვიამ შეაჩერა რუსეთის მოქალაქეების განცხადებების მიღება ყველა სახის ვიზაზე, – ამის შესახებ ლატვიის საგარეო საქმეთა სამინისტროს განცხადებაშია ნათქვამი.

ლატვიის საგარეო საქმეთა სამინისტროს ცნობით, „რუსეთში შიდა პოლიტიკური მოვლენების არაპროგნოზირებადი განვითარების გამო“ რუსეთის მოქალაქეების განცხადებების მიღება დროებით შეჩერებულია.

„რუსეთში საშინაო პოლიტიკური მოვლენების არაპროგნოზირებადი განვითარების გამო 2023 წლის 26 ივნისიდან რუსეთის მოქალაქეებისგან ყველა სახის ვიზაზე განაცხადის მიღება შეჩერებულია“, – აღნიშნულია განცხადებაში.

რუსეთის პრეზიდენტის თქმით, შეიარაღებული ამბოხის პირველივე წუთებიდან, მისი უშუალო დავალებით, იდგმებოდა ნაბიჯები იმისთვის, რომ სისხლისღვრა თავიდან აეცილებინათ, ამის შესახებ ვლადიმირ პუტინმა საკუთარ ვიდეომიმართვაში ისაუბრა.

პუტინმა, საზოგადოებასთან ერთად, მადლობა გადაუხადა “ვაგნერის” ჯარისკაცებს, რომლებმაც მიიღეს “ერთადერთი სწორი გადაწყვეტილება – არ წავიდნენ ძმათა მკვლელ სისხლისღვრაზე”.

“დღეს გაქვთ შესაძლებლობა, გააგრძელოთ სამსახური რუსეთში, გააფორმოთ კონტრაქტი თავდაცვის სამინისტროსთან, ან სხვა ძალოვან სტრუქტურასთან, ან – დაბრუნდეთ თქვენს ახლობლებთან. ვისაც სურს, შეუძლია ბელარუსში წავიდეს. ჩემი დაპირებები შესრულდება. ვიმეორებ – არჩევანი თქვენია, თუმცა დარწმუნებული ვარ, ეს იქნება იმ რუსი მებრძოლების გადაწყვეტილება, რომლებმაც საკუთარი ტრაგიკული შეცდომა გაიაზრეს,” – თქვა პუტინმა.

მან, ასევე, მადლობა გადაუხადა ბელარუსის პრეზიდენტს, ალექსანდრ ლუკაშენკოს გაწეული ძალისხმევისთვის სიტუაციის მშვიდობიანად გადაწყვეტისთვის, თუმცა განმარტა, რომ გადამწყვეტი როლი საზოგადოების ერთიანობამ ითამაშა.

“სამოქალაქო სოლიდარობამ აჩვენა, რომ ნებისმიერი შანტაჟი და შიდა ამბოხის მოწყობის მცდელობა მარცხისთვის არის განწირული,” – განაცხადა პუტინმა.

მიმართვის დასრულების შემდეგ კი, როგორც კრემლის პრესსამსახურის ხელმძღვანელმა, დმიტრი პესკოვმა განაცხადა, პუტინი ძალოვანი უწყებების წარმომადგენლებთან მართავს შეხვედრას – მათ შორის არიან თავდაცვის მინისტრი შოიგუ და “ეფ-ეს-ბეს ხელმძღვანელი” ბორტნიკოვი.

ჩვენ არ წავსულვართ ქვეყანაში ხელისუფლების დასამხობად, – ეს განცხადება „ვაგნერის“ ხელმძღვანელმა, ევგენი პრიგოჟინმა ვიდეომიმართვისას გააკეთა. აუდიოჩანაწერს პრიგოჟინის პრესსამსახური ტელეგრამარხზე ავრცელებს.

პრიგოჟინი საუბრობს „ვაგნერელების“ მომზადების მაღალ დონესა და მათ მიზანზე.

„ჩვენი მარში დავიწყეთ უსამართლობის გამო, გზად ჩვენ არ მოგვიკლავს არცერთი სამხედრო ხმელეთზე, სულ რაღაც 200 კილომეტრი გვაკლდა მოსკოვში შესვლამდე. მთლიანად ავიღეთ ქალაქი როსტოვი. გზად მოსახლეობა გვესალმებოდა. არ გვქონია კანონიერად არჩეული არსებული ხელისუფლების დამხობის მიზანი. გავჩერდით, რომ რუსული სისხლი არ დაგვეღვარა. ვაჩვენეთ მასტერკლასი, როგორ უნდა დაწყებულიყო 2022 წლის 24 თებერვლის ოპერაცია, თუ ამ მოქმედებებს შეასრულებდნენ „ვაგნერის“ დონის სამხედროები. მაშინ ოპერაცია სულ რამდენიმე დღეს გაგრძელდებოდა“, – ნათქვამია განცხადებაში.

პრიგოჟინს არაფერი უთქვამს იმის შესახებ, სად იმყოფება ამჟამად, თუმცა კრემლში შაბათს განაცხადეს, რომ პრიგოჟინი ბელარუსში მიემგზავრება ღალატის ბრალდებაზე შეწყალების სანაცვლოდ.

წარუმატებელი ამბოხი რუსეთს არ შეუქმნის სირთულეებს პარტნიორებთან ურთიერთობაში, – ამის შესახებ რუსეთის საგარეო საქმეთა მინისტრმა, სერგეი ლავროვმა განაცხადა.

„პარტნიორებთან, მეგობრებთან – არა, ხოლო სხვა ყველასთან – აბსოლუტურად არ მაინტერესებს, სიმართლე გითხრათ, კოლექტიური დასავლეთის ურთიერთობები ჩვენთან მისი ინიციატივით ნადგურდება, ეს ურთიერთობები არ არსებობს, შესაბამისად, ერთი ეპიზოდით მეტი თუ ერთით ნაკლები, დიდ განსხვავებას ვერ ვხედავ“, – განაცხადა ლავროვმა.

ლავროვის თქმით, ის ვარაუდობს, რომ აშშ-ის დაზვერვა იმედოვნებდა წარმატებას რუსეთში ამბოხის მცდელობაში.

„გავეცანი, როგორ შუქდება მოვლენები დასავლეთში. კერძოდ, CNN-ზე, თუ სწორად მახსოვს, თქვეს, რომ ამერიკულმა დაზვერვამ რამდენიმე დღის წინ იცოდა მოახლოებული ამბოხის შესახებ, მაგრამ გადაწყვიტა, არავისთვის ეთქვა ამის თაობაზე. როგორც ჩანს, იმ იმედით, რომ ამბოხი წარმატებას მიაღწევდა“, – აღნიშნა ლავროვმა.

რუსეთის საგარეო საქმეთა მინისტრმა აღნიშნა, რომ საფრანგეთის პრეზიდენტმა ამ სიტუაციაში რუსეთის სტრატეგიული დამარცხების შანსი დაინახა და აღნიშნა, რომ მაკრონი, ისევე როგორც უკრაინის ხელისუფლება და დასავლური მედია, მოსკოვის წინააღმდეგ მომუშავე ერთიანი „მანქანის“ ნაწილია.

ლავროვმა ისაუბრა ასევე აშშ-ის მიერ „ვაგნერის“ წინააღმდეგ შეჩერებულ სანქციებზე და აღნიშნა, რომ, მისი აზრით, ეს გადაწყვეტილება აშშ-ის მიდგომის ცვლილებაზე არ მიუთითებს.

„მე არ ვფიქრობ, რომ ეს არის ამერიკის შეერთებული შტატების მიდგომის ცვლილება. ეს არის კიდევ ერთი დადასტურება იმისა, რომ აშშ-ის მიდგომა დამოკიდებულია იმაზე, თუ რა სჭირდება შეერთებულ შტატებს ამ კონკრეტულ ეტაპზე ამა თუ იმ გარე მოთამაშისგან, იქნება ეს საერთაშორისო ასპარეზზე თუ კონკრეტულ ქვეყანაში“, – განაცხადა ლავროვმა.

ლავროვის თქმით, ვაშინგტონმა არაერთხელ აჩვენა „სრული მიკერძოება და ჩართულობა უკრაინის კრიზისთან“ დაკავშირებით.