საქართველოში მიწისძვრა მოხდა. დედამიწის შემსწავლელ მეცნიერებათა ინსტიტუტის სეისმური მონიტორინგის ეროვნული ცენტრის ინფორმაციით, მიწისძვრის ეპიცენტრი ქალაქ დმანისის სოფელი სამება იყო.
მიწისძვრის სიმძლავრემ 3.1 მაგნიტუდა შეადგინა.
ერთი კომპანიის სამი ხელმძღვანელი თანხების გაფლანგვისა და ქონების გადამალვის ფაქტებზე პასუხისგებაში მისცეს
საქართველოს ფინანსთა სამინისტროს საგამოძიებო სამსახურის მიერ გატარებული საგამოძიებო მოქმედებების შედეგად, მოქალაქეთა კუთვნილი დიდი ოდენობით თანხების გაფლანგვისა და დიდი ოდენობით ქონების გადამალვის ფაქტებზე, ერთ-ერთი კომპანიის სამი ხელმძღვანელი პირი პასუხისგებაში იქნა მიცემული.
ამის შესახებ ფინანსთა სამინისტროს საგამოძიებო სამსახურის მიერ გავრცელებულ ინფორმაციაშია ნათქვამი.
„გამოძიებით დადგინდა, რომ ბრალდებულებმა, რომელთა სამეწარმეო საქმიანობის სფეროს წარმოადგენდა ავტომანქანების ყიდვა-გაყიდვა, მოქალაქეებისგან მიიღეს ჯამში 568 120 ლარი, რომლითაც უნდა შეეძინათ ავტომანქანები და ჩამოეყვანათ საქართველოში. ნაცვლად აღნიშნულისა, ბრალდებულების მიერ მიღებული თანხები გაფლანგული და არამიზნობრივად იქნა გახარჯული. ამავე დროს, მოქალაქეებთან არსებული და მოსალოდნელი ვალდებულებისთვის თავის არიდების მიზნით, ბრალდებულებმა მოჩვენებითი გარიგებით გადამალეს კომპანიის საკუთრებაში არსებული დიდი ოდენობით, დაახლოებით, 740 000 ლარის ღირებულების ქონება, რათა დაზარალებულებს არ ჰქონოდათ ზიანის ანაზღაურების მოთხოვნის შესაძლებლობა.
გამოძიება მიმდინარეობს საქართველოს სისხლის სამართლის კოდექსის 182-ე და 205-ე პრიმა მუხლებით, რაც სასჯელის სახით ითვალისწინებს თავისუფლების აღკვეთას 7-დან 11 წლამდე ვადით”, – ნათქვამია უწყების მიერ გავრცელებულ ინფორმაციაში.
PSP აგრძელებს თურქული იაფი მედიკამენტების შემოტანას
კომპანია PSP აგრძელებს თურქეთიდან იაფი ევროპული მედიკამენტების შემოტანას.
ამჯერად კომპანიამ 25 დასახელების მედიკამენტი, 44 766 კოლოფი, შემოიტანა. ყოველდღიურად PSP-ს სააფთიაქო ქსელი მომხმარებელს მთელი საქართველოს მასშტაბით 200-ზე მეტი დასახელების თურქულ მედიკამენტს სთავაზობს.
„თურქეთიდან მედიკამენტების პროაქტიულად და გამარტივებული „აღიარებითი“ რეჟიმით შემოტანის დაშვებამ, შესაძლებლობა მოგვცა იაფი თურქული მედიკამენტები ჩვენი ქევყნის ყველა მოქალაქისთვის ხელმისაწვდომი გაგვეხადა.
ახალი რეგულაციის ამოქმედების შედეგად, 2022 წლის თებერვლიდან PSP ყოველდღიურ რეჟიმში ვახორციელებთ კომუნიკაციას თურქეთის სადისტრიბუციო კომპანიებთან ყველა მოთხოვნადი მედიკამენტის ხელმისაწვდომ ფასად შემოტანის მიზნით; ამ ეტაპზე ის 25 დასახელების მედიკამენტი შემოვიტანეთ, რომელზეც თურქეთიდან ექსპორტის ნებართვა აქვთ დისტრიბუტორებს. ამ მიმართულებით მუშაობას კვლავ აქტიურ რეჟიმში ვაგრძლებეთ, რომ მომხმარებლებს, არა მარტო საკუთარი სააფთიაქო ქსელის მეშვეობით, საქართველოს ყველა კუთხეში უწყვეტად მივაწოდოთ გარანტირებული ხარისხის მედიკამენტების ყველაზე ფართო არჩევანი“ – აცხადებენ PSP-ში.
R
“სააკაშვილი პიარში მსოფლიოს ჩემპიონია”- მამუკა გამყრელიძე
“ზელენსკიც პიარში ჩემპიონია. მან კარგად იცის, რომ ასეთი ყურადღების კონცენტრირებას პერსონაზე ერთდღიანი ეფექტი აქვს და სასწრაფოდ, ცხელ ამბავზე თავადაც ჩაერთო და არანაკლებ ხმაურიანი ნიუსი შექმნა, პრაქტიკულად გამოაძევა საქართველოს ელჩი”- ასე ეხმაურება სოციალურ ქსელში პარტია “ევროპელი დემოკრატების” გენერალური მდივანი მამუკა გამყრელიძე უკრაინის პრეზიდენტის, ვოლოდიმირ ზელენსკის მიერ Twitter-ზე გამოქვეყნებულ სტატუსს, სადაც ზელენსკი სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე.
“გუშინდელი საღამო მოვლენებით დატვირთული გამოდგა. შვეცდები თქვენთან ერთად გავაანალიზო.
1. სააკაშვილი პიარში მსოფლიოს ჩემპიონია. გუშინდელი ერთი ვიდეოჩართვით მან
ა) მიიპყრო საერთაშორისო ყურადღება;
ბ) გამოიწვია ფართო საზოგადოებაში (საერთაშორისოში, უპირველეს ყოვლისა) ემპათია ფიზიკური მდგომარეობის დემონსტრირებით;
გ) ხაზი გაუსვა საკუთარ სულიერ სიმტკიცეს და გაუტეხელობას, რითიც მომხრეებში იმედი ჩასახა.
მიზანი მთლიანად მიღწეულია;
2. ზელენსკიც პიარში ჩემპიონია. მან კარგად იცის, რომ ასეთი ყურადღების კონცენტრირებას პერსონაზე ერთდღიანი ეფექტი აქვს და სასწრაფოდ, ცხელ ამბავზე თავადაც ჩაერთო და არანაკლებ ხმაურიანი ნიუსი შექმნა, პრაქტიკულად გამოაძევა საქართველოს ელჩი;
3. ზელენსკიმ ამ აქტით რამდენიმე მიზანს მიაღწია.
ა) გამოიჩინა ზრუნვა საკუთარ მოქალაქეზე, მითუმეტეს ასეთ პოპულარულზე;
ბ) სერიოზული საიმიჯო დარტყმა მიაყენა საქართველოს ხელისუფლებას, რომელთანაც ისედაც დაძაბული აქვს ურთიერთობა;
გ) თავისი მიმართვით პარტნიორებისადმი მან სავალდებულო გახადა მათი ჩართვა სააკაშვილის სამკურნალოდ გადაყვანის პროცესში, თანაც უკვე სახელმწიფოს მეთაურის დონეზე;
4. არ გამოვრიცხავ, რომ ზელენსკის ეს განცხადება შეთანხმებული ყოფილიყოს პარტნიორი ქვეყნების, მაგალითად აღმოსავლეთ ევროპის, ლიდერებთან.
ასეთ შემთხვევაში უნდა ველოდოთ მათ განცხადებებსაც;
5. ყველაზე საინტერესო საქართველოს მთავრობის რეაგირება იქნება.
პარლამენტიდან ლანძღვას აუცილებლად მოვისმენთ. პრეზიდენტისგან სიჩუმე იქნება. მთავარი მაინც მთავრობის პოზიცია გახლავთ, რომელსაც სავარაუდოდ საგარეო საქმეთა მინისტრი გააჟღერებს. მე ხისტ განცხადებას ველი;
დასკვნისათვის ვიტყვი, რომ სააკაშვილმაც და ზელენსკიმაც საკუთარ მიზნებს მიაღწიეს. რით დამთავრდება ეს ეპოპეა შეგვიძლია მხოლოდ ვიმარჩიელოთ”- წერს სოციალურ ქსელში მამუკა გამყრელიძე
“ასეთი ულტიმატუმით გათავისუფლების მაგალითი ძნელი მოსაძებნია”-ვასილ მაღლაფერიძე
საზოგადოებრივი მაუწყებლის სამეურვეო საბჭოს თავმჯდომარე ვასილ მაღლაფერიძე უკრაინის პრეზიდენტის, ვოლოდიმირ ზელენსკის მიერ Twitter-ზე გამოქვეყნებულ სტატუსს ეხმიანება, სადაც ზელენსკი სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე.
როგორც მაღლაფერიძე აღნიშნავს, პატიმრის ამ ფორმით გათავისუფლება რომ სრულიად გამორიცხულია, რასაკვირველია, ეს ძალიან კარგად იციან უკრაინაშიც, მაგრამ, როგორც ჩანს, არსებობს მიზეზი, რის გამოც ზელენსკიც და მისი წინამორბედებიც იძულებულნი იყვნენ განსაკუთრებული მფარველობა გაეწიათ უკრაინის მოქალაქე სააკაშვილისთვის.
მისივე თქმით, ნათელია, რომ ამგვარი ულტიმატუმით დამნაშავის გათავისუფლება, ფაქტობრივად, სახელმწიფოებრიობაზე უარის თქმას ნიშნავს.
“მიუხედავავად უკრაინის პრეზიდენტის ულტიმატუმის სიმწვავისა, ბუნებრივად ჩნდება კითხვა, მართლაც სურს თუ არა ზელენსკის სააკაშვილის გათავისუფლება.
სახელმწიფოებს შორის ურთიერთობათა ისტორია იცნობს დაპატიმრებული ჯაშუშების, დისიდენტების და სხვადასხვა ტიპის პატიმრების გაცვლაზე უამრავ ღია და ფარულ შეთანხმებას სხვადასხვა ფორმით, მაგრამ, ასეთი ულტიმატუმით გათავისუფლების მაგალითი ძნელი მოსაძებნია.
ნათელია, რომ ამგვარი ულტიმატუმით დამნაშავის გათავისუფლება, ფაქტობრივად, სახელმწიფოებრიობაზე უარის თქმას ნიშნავს.
უფრო მეტიც, ასეთი ულტიმატუმი ამ თემაზე რაიმე მოლაპარაკების ან კონსულტაციების გამართვის ყოველგვარ შესაძლებლობას სპობს და ამთავრებს.
პატიმრის ამ ფორმით გათავისუფლება რომ სრულიად გამორიცხულია, რასაკვირველია, ეს ძალიან კარგად იციან უკრაინაშიც, მაგრამ, როგორც ჩანს, არსებობს მიზეზი, რის გამოც ზელენსკიც და მისი წინამორბედებიც იძულებულნი იყვნენ განსაკუთრებული მფარველობა გაეწიათ უკრაინის მოქალაქე სააკაშვილისთვის, რომელიც ხშირად არღვევდა დიპლომატიურ ეტიკეტს და უხერხულ მდგომარეობაში აგდებდა უკრაინის ხელისუფლებას.
უკრაინის ხელისუფლებაში, ალბათ, ასევე საქმის კურსში იყვნენ საქართველოში სააკაშვილის არალეგალურად შემოსვლის შესახებაც, თუმცა, ეს არ ნიშნავს, რომ ეს ამბავი ძალიან მოსწონდათ.
ერთი რამ ცხადია, შეუძლებელია, უკრაინაში არ გაეთვალათ, რომ ზელენსკის ამ ულტიმატუმმა დაასრულა ყოველგვარი მითქმა-მოთქმა სააკაშვილის კანონის გვერდის ავლით გათავისუფლებზე ან შეწყალებაზე”- წერს ვასილ მაღლაფერიძე Facebook-ზე.
რა ხდება უკრაინაში ომის 496-ე დღეს
უკრაინა კონტრშეტევით ოპერაციას განაგრძობს და იუწყება, რომ გასული დღე-ღამის განმავლობაში ქვეყნის შეიარაღებულმა ძალებმა ბახმუტის მიმართულებით წინ წაიწიეს და რუსი ოკუპანტების მიერ მოწყობილი სანგრები და პოზიციები დაიკავეს.
გენერალური შტაბის ცნობით, აღმოსავლეთ ფრონტთან ერთად, ქვეყნის დამცველები პოზიციებს სამხრეთ ფლანგზეც იმყარებენ. ბრძოლის ველზე უკრაინული ძალების წარმატების პარალელურად ვრცელდება ცნობები, რომ ღამით, უპილოტო საფრენი აპარატებით თავდასხმის საფრთხის გამო, კიევის, ჩერნიჰივის, ზაპოროჟიეს, პოლტავის, დნეპროპეტროვსკის, დონეცკის, ხარკოვისა და სუმის ოლქებში საჰაერო განგაში გამოცხადდა.
მანამდე კი საოკუპაციო ძალებმა მასირებული იერიში მიიტანეს სუმის ოლქზე. მოხდა 170-მდე აფეთქება. ვრცელდება ცნობები 5 დაღუპულისა და ნგრევის შესახებ. ოფიციალური კიევი დასავლეთს საჰაერო თავდაცვის გაძლიერების აუცილებლობაზე მიუთითებს.
უკრაინის პრეზიდენტის, ვოლოდიმირ ზელენსკის განცხადებით, სუმზე დრონების იერიშის დროს, საცხოვრებელი სახლების გარდა, დარტყმა უკრაინის უსაფრთხოების სამსახურის შენობაზეც იქნა მიტანილი.
მისივე თქმით, უკრაინაში კვლავინდებურად ჰაერსაწინააღმდეგო სისტემების ნაკლებობა აღინიშნება, რაც ტერიტორიის დაცვას ასუსტებს.
“მტერი ამით სარგებლობს, დღევანდელი დღე ამის მაგალითია – ირანული დრონებით განხორციელებული რიგითი დარტყმა, კერძოდ, საცხოვრებელ სახლებზე და ასევე, უსაფრთხოების სამსახურის შენობაზე”, – დასძინა ზელენსკიმ.
“საქართველოს ელჩს დილით გამოვიძახებთ და მასთან სათანადო საუბარი გვექნება”- დმიტრო კულება
უკრაინის საგარეო საქმეთა მინისტრი, დმიტრო კულება მიხეილ სააკაშვილის სასამართლო პროცესის კადრების გამოქვეყნების შემდეგ, საქართველოს ხელისუფლებას აკრიტიკებს.
„ევროპეისკაია პრავდას“ ცნობით, ამ საკითხზე მან უკრაინულ მედიასთან სატელევიზიო ინტერვიუში ისაუბრა.
უკრაინის საგარეო საქმეთა მინისტრმა განაცხადა, რომ სააკაშვილის დღევანდელი სასამართლო პროცესის კადრების გამოქვეყნების შემდეგ, „ყველაფერმა პიკს მიაღწია“, რის გამოც კიევმა „მკვეთრი, მაგრამ სამართლიანი ნაბიჯი“ გადადგა.
„როდესაც სახელმწიფო რაღაცით უკმაყოფილოა, პირველი რეაქცია არის პროტესტი. მეორე არის ელჩის კონსულტაციებისთვის გამოძახება და რეაქციის მესამე დონე, რამდენიმე საფეხურით მაღალი სიმძიმით, არის სთხოვო ამ ქვეყნის ელჩს, დატოვოს უკრაინა თავის მთავრობასთან კონსულტაციებისთვის. დიპლომატიაში ეს უკიდურესად მკაცრი ფორმაა, მაგრამ საქართველოს ხელისუფლება ამას იმსახურებს“, – განაცხადა კულებამ.
მისი თქმით, საქართველოს ელჩს დღეს დილით გამოიძახებენ, და „მასთან სათანადო საუბარი ექნებათ“.
უახლოესი დღეების ამინდის პროგნოზი
გარემოს ეროვნული სააგენტოს ცნობით, 4-5 ივლისს მაღალი ტემპერატურის ფონზე ცალკეულ რაიონში მოსალოდნელია ხანმოკლე წვიმა ელჭექით, აღმოსავლეთ საქართველოში შესაძლებელია სეტყვა.
ჰაერის ტემპერატურა +29, +34 გრადუსამდე მოიმატებს.
რაც შეეხება დედაქალაქს, თბილისში მხოლოდ 4 ივლისს შესაძლოა გაწვიმდეს, დანარჩენ დღეებში ცხელი და უნალექო ამინდი იქნება. ჰაერის ტემპერატურა დღის საათებში +32, +34 გრადუსი დაფიქსირდება.
4 ივლისის ასტროლოგიური პროგნოზი
ვერძი
ვარსკვლავების განლაგება დაგეხმარებათ, რომ რთულ კითხვებზე პასუხი მიიღოთ. დღის პირველი ნახევარი ხელსაყრელი დროა საოჯახო საქმეებისა და ოჯახური საკითხების მოსაგვარებლად. თუმცა ნათესავებთან ურთიერთობების გარკვევისთვის არახელსაყრელი დროა, ამიტომ ეცადეთ, ნეიტრალურ თემებზე ისაუბროთ.
კურო
შესძლოა, უსიამოვნო ამბების ეპიცენტრში აღმოჩნდეთ. მოერიდეთ ინტრიგებში ჩართვას და კოლეგებთან კონფლიქტს – ამ დღეს საქმის კეთება მარტოობაში ჯობს. ეცადეთ, უარყოფითი გავლენის შესამცირებლად გარშემო მყოფებთან ურთიერთობა შეზღუდოთ. ფიზიკური შრომა და ვარჯიში სტრესის მოხსნაში დაგეხმარებათ.
ტყუპები
რთული და დაძაბული დღეა. ბევრი რამ გაღიზიანებთ და საქმეზე კონცენტრირებაში ხელს გიშლით. კონფლიქტების თავიდან ასაცილებლად ეცადეთ, რომ ურთიერთობები შეზღუდოთ და არავითარ შემთხვევაში დისკუსიაში არ ჩაერიოთ. გირჩევთ, დროულად დაასრულოთ საქმეები, რომლებსაც მუდმივად სამომავლოდ ინახავთ. სავარაუდოდ, უახლოესი დღეების გეგმების შეცვლა მოგიწევთ.
კირჩხიბი
დრო გამონახეთ, რათა ბუნებაში გახვიდეთ და დადებითი ენერგიით დაიმუხტოთ. ქალაქის აურზაურიდან გაქცევა თქვენს ჯანმრთელობაზე სასიკეთოდ აისახება. გირჩევთ, სამსახურში კოლეგებთან კამათს და დისკუსიებს მოერიდოთ – შეიძლება უნებურად ვინმე გაანაწყენოთ.
ლომი
განწყობა მარტის ამინდივით სწრაფდ გეცვლებათ, ამიტომ სამუშაოზე ყურადღების კონცენტრაცია გიჭირთ. გირჩევთ, მნიშვნელოვანი და საპასუხისმგებლო გადაწყვეტილების მიღება დღის მეორე ნახევრისთვის გადადოთ, როდესაც თქვენი ემოციური მდგომარეობა უფრო მშვიდი და სტაბილური გახდება.
ქალწული
სამუშაო, რომელიც დღეს უნდა გააკეთოთ, ძალიან დიდ დროსა და ძალისხმევას მოითხოვს, ამიტომ თუ შესაძლებელია, მასზე უარი თქვით. ამ დღეს უცნობების რჩევა არ გამოგადგებათ, მხოლოდ საკუთარ ინტუიციას უნდა უსმინოთ და გადაწყვეტილებები დამოუკიდებლად მიიღოთ. კარგად ნაცნობი საქმეები თვითშეფასებას აგიმაღლებთ.
სასწორი
ვარსკვლავები გირჩევენ, რომ ამ დღეს კონფლიქტების თავიდან ასაცილებლად საყვარელ ადამიანთან ურთიერთობა შეზღუდოთ. გახსოვდეთ, რომ ურთიერთბრალდებები მხოლოდ სიტუაციას გააუარესებს. ეცადეთ, თავისუფალი დრო განმარტოებით გაატაროთ და გონება დაასვენოთ.
მორიელი
წარმატებული დღეა, განსაკუთრებით, მისი პირველი ნახევარი. თამამად შეგიძლიათ მნიშვნელოვანი მოლაპარაკებები დანიშნოთ ან ის აკეთოთ, რაც აქამდე არ გამოგდიოდათ. ეცადეთ, საკუთარი ხარჯები აკონტროლოთ – თავი შეიკავეთ ძვირად ღირებული, უსარგებლო ნივთების შეძენისგან.
მშვილდოსანი
ეს დღე თქვენგან ყურადღების კონცენტრაციას და თავდადებას მოითხოვს. გინდათ თუ არა, ბევრი რთული საკითხის მოგვარება და მნიშვნელოვან საქმეში წინსვლა გელით. ეცადეთ, ოპტიმისტურად, პოზიტიური შედეგისთვის განეწყოთ, ვარსკვლავების განლაგება პრობლემების დაძლევაში დაგეხმარებათ.
თხის რქა
მთელ დღეს შინაგანი დისკომფორტის განცდა გაქვთ. მალე თქვენს ცხოვრებაში ცვლილებების დრო დადგება. ეცადეთ, ამისთვის შინაგანად მოემზადოთ და წარსულის პრობლემებისა და უარყოფითი აზრებისგან გათავისუფლდეთ. მენეჯმენტი თქვენს შრომისმოყვარეობას აუცილებლად დააფასებს.
მერწყული
შესაძლოა, პარტნიორის წესიერებაში ეჭვი შეგეპაროთ. ნუ დაიჯერებთ ყველაფერს, რასაც გარშემო მყოფები გეუბნებიან და რაც მთავარია, ნუ მისცემთ მათ თქვენით მანიპულირების უფლებას. ახალი ნაცნობობა საინტერესო იქნება და საბოლოოდ ძლიერ მეგობრობაში გადაიზრდება. გაითვალისწინეთ, რომ გადაღლამ შეიძლება ნერვული აშლილობა გამოიწვიოს.
თევზები
თქვენს უყურადღებობას შეიძლება სერიოზული შეცდომა მოჰყვეს, ამიტომ გირჩევთ, შემოსული ინფორმაცია ყურადღებით შეამოწმოთ. თუ შესაძლებელია, მნიშვნელოვანი საქმეები სამომავლოდ გადადეთ და დღე მშვიდად გაატარეთ.
”ამ ფოტოებზე ძლივს ამოიცნობთ სააკაშვილს- ის სასწრაფოდ უნდა გათავისუფლდეს!”- გონჩარენკო
უკრაინის უმაღლესი რადას დეპუტატი ოლექსი გონჩარენკო მიხეილ სააკაშვილის ჯანმრთელობის მდგომარეობას ეხმაურება.
”ამ ფოტოებზე ძლივს ამოიცნობთ სააკაშვილს. ის სასწრაფოდ უნდა გათავისუფლდეს!
საქართველოს ხელისუფლებამ უმაღლესი რადას ადამიანის უფლებათა კომისარს უნდა მისცეს მისი მონახულების უფლება და ასევე, სასწრაფოდ უნდა გადაყვანონ სამკურნალოდ!
ფოტოთი თუ ვიმსჯელებთ, მდგომარეობა კრიტიკულია! სააკაშვილი უკრაინის მოქალაქეა და ჩვენ უნდა ვიბრძოლოთ მისთვის!” – წერს გონჩარენკო.
“მიხეილ სააკაშვილი უკანონო პატიმრობიდან უნდა გათავისუფლდეს” – ანდრეი ერმაკი
უკრაინის პრეზიდენტის ადმინისტრაციის ხელმძღვანელის, ანდრეი ერმაკის განცხადებით, საქართველოს მესამე პრეზიდენტი მიხეილ სააკაშვილი პატიმრობიდან უნდა გათავისუფლდეს.
„მიხეილ სააკაშვილი უკანონო პატიმრობიდან უნდა გათავისუფლდეს. ის არის სიმართლისთვის, სამართლიანობისა და დემოკრატიისთვის ბრძოლის სიმბოლო.
მისი დაკავება და ციხეში ყოფნა ადამიანის უფლებების დარღვევად მიმაჩნია“, – წერს ანდრეი ერმაკი Twitter-ში.
უკრაინაში რუსეთის შეჭრის დაწყებიდან ფინური კომპანიების რუსეთთან ვაჭრობის ბრუნვამ, სულ მცირე, 1.5 მილიარდი ევრო შეადგინა -უკრაინული მედია
უკრაინაში რუსეთის შეჭრის დაწყებიდან ფინური კომპანიების რუსეთთან ვაჭრობის ბრუნვამ, სულ მცირე, 1.5 მილიარდი ევრო შეადგინა.
ინფორმაციას უკრაინული მედია ფინეთის საზოგადოებრივი მაუწყებელზე დაყრდნობით ავრცელებს.
მონაცემების მიხედვით, უკრაინაში მასშტაბური ომის დროს, საქონელი ფინეთიდან მიეწოდებოდა, მაგალითად, რუსეთის მსხვილ მაღაროებს. ამასთან, ორმხრივი ვაჭრობის მთლიანი მოცულობა 1.5 მილიარდ ევროზე მეტია, რადგან საბაჟო მონაცემები ფინური კომპანიების მხოლოდ ნაწილს ეხება.
მაგალითად, ფინურმა კომპანია Metso Outotec-მა, რომელიც უზრუნველყოფს ტექნოლოგიითა და აღჭურვილობით სამთო, გადამამუშავებელი და ლითონის მრეწველობას, უკრაინაში რუსეთის შეჭრიდან ერთი კვირის შემდეგ გამოაცხადა, რომ წყვეტს მიწოდებას რუსეთში. სინამდვილეში კი კომპანიამ რუსეთში ვაჭრობა კიდევ რამდენიმე თვის განმავლობაში განაგრძო.
გარდა ამისა, ომის დაწყებიდან ფინურმა კომპანიებმა რუსეთიდან მნიშვნელოვანი რაოდენობის ქიმიკატები შემოიტანეს ქვეყანაში.
ფინეთის საზოგადოებრივი მაუწყებელი აღნიშნავს, მიუხედავად იმისა, რომ რუსი ოლიგარქები, რომლებიც იმ კომპანიების ბენეფიციარები არიან, სანქციების ქვეშ იმყოფებიან, აღნიშნული ვაჭრობა ლეგალური შეიძლება იყოს.
პია სარივაარას თქმით, რომელიც პასუხისმგებელია ფინეთის საგარეო საქმეთა სამინისტროში სანქციების საკითხზე, კომპანიასთან ვაჭრობა დაშვებულია იმ შემთხვევაში, თუ სანქციებს დაქვემდებარებული რუსი მფლობელის წილი 50%-მდეა.