შვებულებას რომ იხვეწებოდით, შვებულება არ გექნებათ, როცა ვიტყვით და შევიკრიბებით, მაშინ მოხვალთ, იმუშავებთ და მიხვდებით, რა არის საპარლამენტო საქმიანობა, – ასე მიმართა ფრაქცია „ქართული ოცნების“ თავმჯდომარე მამუკა მდინარაძემ ოპოზიციონერ დეპუტატებს, რომლებიც დღეს რიგგარეშე პლენარულ სხდომაზე იმყოფებოდნენ, მაგრამ რეგისტრაცია არ გაიარეს, მხოლოდ მმართველ გუნდს კი კვორუმის შეკრება გაუჭირდა.

როგორც მდინარაძემ აღნიშნა, კარგია იმის დაფიქსირება, რომ ეს საპარლამენტო ინსტრუმენტი ყოფილა და ეს ინსტრუმენტი გამოიყენეს.

„ჩვენმა ოპონენტმა კოლეგებმა ზუსტად იციან, რომ საქართველოში იმდენი დეპუტატი არ არის, რომ დღეს კვორუმი მხოლოდ უმრავლესობამ შექმნას. ჩვენი კოლეგები ფრანკოფონიის ღონისძიებაზეც არიან. იმის მცდელობას ვერ შევძლებთ, რომ კვორუმი მარტო უმრავლესობით შევკრათ. თავის დროზე ჩვენი პატივცემული კოლეგები ამას საბოტაჟს ეძახდნენ. კარგია, რომ დაფიქსირდა, რომ ეს საპარლამენტო ინსტრუმენტი ყოფილა და ეს ინსტრუმენტი გამოიყენეს.

როდესაც ჩვენი კოლეგები, ვინც ქვეყნის გარეთაა, უცხოეთიდან ჩამოვლენ და როცა ფრანკოფონიის ღონისძიებებიც დასრულდება – იქნება ეს ივლისის ბოლო რიცხვები თუ აგვისტო, მობრძანდებით და იმუშავებთ. ახლა ეს გაუკეთეთ საკუთარ თავს. შვებულებებს რომ იხვეწებოდით, შვებულება არ გექნებათ. როცა ვიტყვით და შევიკრიბებით, მაშინ მოხვალთ, იმუშავებთ და მიხვდებით, რა არის საპარლამენტო საქმიანობა. ცოტას მაინც რომ მიხვდით, უკვე კარგია“, – განაცხადა მამუკა მდინარაძემ.

ცნობისთვის, პარლამენტის რიგგარეშე სხდომაზე „თავდაცვის კოდექსის“ პროექტის მეორე მოსმენით უნდა განეხილათ. კვორუმის არქონის გამო პარლამენტის რიგგარეშე სხდომა ჩაიშალა. დღეს რეგისტრაცია მხოლოდ 65 დეპუტატმა გაიარა. შესაბამისად, კვორუმი არ შედგა და სხდომა ვერ გაიხსნა.

ზელენსკი მაგარ ტიპად მიმაჩნია და მისით აღტაცებული ვარ, მაგრამ საქართველოსთან მიმართებაში მიღებული გადაწყვეტილება არის პოლიტიკური შეცდომა, – ამის შესახებ „მოქალაქეების“ ლიდერმა, ალეკო ელისაშვილმა საქართველოს პირველ არხს განუცხადა.

მისი თქმით, ზელენსკის არახამია ჰყავს საქართველოსთან დაკავშირებით მრჩეველი და ეტყობა, ის მხოლოდ სააკაშვილზე ელაპარაკება.

„ეს არის ძალიან გულდასაწყვეტი და ჩემთვის ძალიან მიუღებელი. ზელენსკი მაგარ ტიპად მიმაჩნია და მისით აღტაცებული ვარ, მაგრამ საქართველოსთან მიმართებაში მიღებული გადაწყვეტილება არის პოლიტიკური შეცდომა. კაცი სტრასბურგის გადაწყვეტილებას რომ წაიკითხავ, ეს არ უნდა გააკეთო, რადგან დიპლომატიურ ენაზე ელჩის გამოწვევის შემდეგ, ომი იწყება და ეს რაში სჭირდება არ ვიცი. რაში სჭირდება? – როგორც ჩანს, არახამია ჰყავს საქართველოსთან დაკავშირებით მრჩეველი და ეტყობა, ის მხოლოდ სააკაშვილზე ელაპარაკება. ზელენსკი კი ვერ ხედავს, რომ სააკაშვილის იქით არის საქართველო, რომელიც მას მხარს უჭერს. სხვათა შორის, ამას კრიტიკა უკრაინის შიგნითაც მოჰყვა“, – განაცხადა ალეკო ელისაშვილმა.

ოპოზიციის განცხადებები არის ამორალური. ეს ოპოზიცია არის არა ქართული ოპოზიცია, არამედ უცხოელი აგენტები არიან, – ამის შესახებ პარტია „ქართული ოცნების“ თავმჯდომარე ირაკლი კობახიძემ კითხვის საპასუხოდ განაცხადა.

კობახიძეს კითხვით მიმართეს, როგორ შეაფასებდა ვოლოდიმირ ზელენსკის გადაწყვეტილებასთან დაკავშირებით ოპოზიციის ნაწილის რეაქციას, რომ ისინი ამაში პრობლემას ვერ ხედავენ.

„ეს კიდევ ერთი დასტურია, რომ სინამდვილეში, ეს ოპოზიცია არის არა ქართული ოპოზიცია, არამედ ისინი არიან უბრალოდ უცხოელი აგენტები. საკუთარი ქვეყნის მიმართ ასეთ დამოკიდებულებას სხვა ახსნა არ შეიძლება, ჰქონდეს. როცა საკუთარი ქვეყნის მიმართ ასეთი დამოკიდებულება აქვთ, ეს ნიშნავს, რომ ისინი არ არიან ქართველები ამ სიტყვის სათანადო გაგებით, არამედ არიან უცხოელი აგენტები. ამიტომ შეუძლიათ, საკუთარ თავს უფლება მისცენ, ასეთი განცხადებები გააკეთონ. ეს არის ამორალური და ცხადყოფს მათ დამოკიდებულებას საკუთარი ქვეყნის მიმართ“, – განაცხადა ირაკლი კობახიძემ.

უკრაინის პრეზიდენტმა, ვოლოდიმირ ზელენსკიმ განაცხადა, რომ სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე. ზელენსკის თქმით, რუსეთი საქართველოს ხელისუფლების ხელით კლავს უკრაინის მოქალაქე მიხეილ სააკაშვილს.

თავიდანვე ვამბობდით, რომ მიხეილ სააკაშვილის გამო არ ღირდა პარტნიორებთან ურთიერთობის გაფუჭება და ამიტომ „ქართულ ოცნებას“ მოვუწოდებდით, სააკაშვილი საზღვარგარეთ სამკურნალოდ გაეშვათ და პოლიტიკური ვითარებიდან მოეშორებინათ, – ამის შესახებ „გირჩის“ ლიდერმა, იაგო ხვიჩიამ განაცხადა.

მისივე თქმით, ამაში მათ „ნაციონალური მოძრაობაც“ კი არ ეთანხმებოდა.

„არათუ „ქართული ოცნება“, „ნაცმოძრაობაც“ არ გვეთანხმებოდა და მის ერთი ციხიდან მეორეში გადაყვანას ითხოვდა. საქართველოსა და უკრაინას შორის ურთიერთობის გაფუჭება სააკაშვილის გამო არ ღირს, ეს საქართველოსაც ეხება და უკრაინასაც. უბრალოდ, ჩვენი სიტუაცია რომ წარმოვიდგინოთ, გვიღირდა თუ არა ამ წუთას ბოროტებასთან მებრძოლი გმირი ქვეყნის და ხალხის გადაკიდება სააკაშვილის „ვივამედში“ ყოფნის გამო? ზელენსკის ადგილზე ასეთი განცხადება შეიძლება, არ გამეკეთებინა, მაგრამ ფაქტია, რომ საქართველოს ხელისუფლების ნაბიჯებმა ამ შედეგამდე მიგვიყვანა.

„ნაცმოძრაობა“ ხელისუფლებას ეხმარება, როცა არაფრისმომცემ ქმედებებში ხარჯავს ენერგიას, ნაცვლად იმისა, რომ პარლამენტში იყოს და „ქართულ ოცნებას“ მართლა რეალური პრობლემები შეუქმნას. კასპში რომ წავიდნენ და იქ გაილახნენ, რა მოემატა „ნაცმოძრაობას“? გუშინ „ვივამედთან“ აქციის ჩატარების გამო მიშა გარეთ არის? – პირიქით, მუხტი ჩაცხრა, რადგან ხალხმა დაინახა, რომ იკრიბებიან და იშლებიან. ამ უაზრობას მათი პარლამენტში ყოფნა სჯობს, რომ კითხვები დასვან. არასწორია ორივე. ქვეყნებს შორის ურთიერთობის გაფუჭება სააკაშვილის გამო საქართველოს მხრიდანაც შეცდომა იყო, რადგან თავის დროზე არ გადაუგზავნეს საჩუქრად სააკაშვილი და ზელენსკის მხრიდანაც არის შეცდომა, მაგრამ ამ შეცდომით ვინ უფრო მეტად ზიანდება? ჩვენს ინტერესშია, პროცესი არ დაზიანდეს“, – განაცხადა იაგო ხვიჩიამ.