ფინეთი რუსეთთან საზღვრის გასახსნელად ემზადება, – ამის შესახებ ფინეთის სამხრეთ-აღმოსავლეთ სასაზღვრო დაცვის სამსახურის უფროსის მოადგილემ, ჰეიკი აჰტიაინენმა განაცხადა.

„სასაზღვრო ბარიერების დემონტაჟისთვის რამდენიმე საათია გამოყოფილი. მოძრაობის აღდგენას დიდი დრო არ დასჭირდება“, – განაცხადა აჰტიაინენმა.

„ჩვენ უნდა ვნახოთ, საზღვრების გახსნის შემთხვევაში, გაგრძელდება თუ არა თავშესაფრის მაძიებელთა ნაკადი“, – აღნიშნა ფინეთის სასაზღვრო სააგენტოს წარმომადგენელმა.

შეგახსენებთ, რომ რუსეთთან ფინეთის საზღვარი, 30 ნოემბერს, სულ მცირე ორი კვირით დაიკეტა.

უკრაინის საჰაერო ძალების ინფორმაციით, რუსების მიერ გაშვებული Shahed-ის ტიპის 15 დრონი ჩამოაგდეს.

„2023 წლის 7 დეკემბრის ღამეს ოკუპანტებმა უკრაინას ყირიმიდან Shahed-ის ტიპის უპილოტო საფრენი აპარატებით შეუტიეს. სულ, Shahed-136/131 ტიპის 18 დრონის გაშვება დაფიქსირდა“, – ნათქვამია უკრაინის საჰაერო ძალების განცხადებაში.

საჰაერო ძალების ცნობით, რუსების თავდასხმების ძირითად მიმართულებებს ხმელნიცკის და ოდესის რეგიონები წარმოადგენდა.

უკრაინის საჰაერო ძალების განცხადებით, თავდაცვის ძალების საჰაერო თავდაცვასთან თანამშრომლობის შედეგად, მტრის მიერ გაშვებული 15 უპილოტო საფრენი აპარატის ჩამოგდება მოხერხდა.

გაერო-ს გენერალურმა მდივანმა, ანტონიუ გუტერეშმა გაერო-ს წესდების 99-ე მუხლი გამოიყენა და მოუწოდა უშიშროების საბჭოს, იმოქმედოს ღაზის სექტორში მიმდინარე ომზე. ამის შესახებ გუტერეშმა სოციალურ ქსელში დაწერა.

„გენერალური მდივნის თანამდებობაზე ჩემი ყოფნის პერიოდში პირველად, მე გაერო-ს წესდების 99-ე მუხლი გამოვიყენე. ღაზაში ჰუმანიტარული კოლაფსის რისკის ფონზე, მე მოვუწოდებ საბჭოს, დაგვეხმაროს ჰუმანიტარული კატასტროფის თავიდან აცილებაში და მხარეებს მოუწოდოს ცეცხლის შეწყვეტისკენ“, – წერს გუტერეში.

გაერო-ს წესდების 99-ე მუხლი ითვალისწინებს, რომ გენერალურ მდივანს აქვს უფლება, უშიშროების საბჭოს ყურადღების ცენტრში მოაქციოს ნებისმიერი საკითხი, რომელიც, მისი აზრით, შესაძლოა, საფრთხეს უქმნიდეს საერთაშორისო მშვიდობასა და უსაფრთხოებას.

სამხრეთ კავკასიაში არსებობს შანსი, დაიწყოს კონსულტაციები რეგიონული ინტეგრაციისთვის, პირველი კონსულტაციები ახლახან გაიმართა საქართველოში- ერთ-ერთი საერთაშორისო ღონისძიების ფარგლებში საქართველოს, სომხეთისა და აზერბაიჯანის პრემიერები შეხვდნენ ერთმანეთს, ვფიქრობ, ეს პოზიტიური ნიშანია, – ამის შესახებ აზერბაიჯანის რესპუბლიკის პრეზიდენტმა ილჰამ ალიევმა ADA-ს უნივერსიტეტში ჟურნალისტის მიერ დასმული კითხვის საპასუხოდ განაცხადა.

პოლონელმა ჟურნალისტმა იაკობ კარეიბამ ილჰამ ალიევს კითხა, ხედავს თუ არა რაიმე შანსს რეგიონული ინტეგრაციისათვის სამხრეთ კავკასიის ქვეყნების მიერ ერთგვარი ბენელუქსის მოდელის შექმნისათვის.

აზერბაიჯანის რესპუბლიკის პრეზიდენტმა აღნიშნა, რომ მსგავსი მოდელის შექმნა სავსებით რეალისტურია და საქართველოს პრემიერ-მინისტრთან ირაკლი ღარიბაშვილთან დისკუსიის დროს ეს საკითხიც განიხილეს.

ილჰამ ალიევის თქმით, საქართველოს ენერგოუსაფრთხოება სრულიად დაცულია, მიუხედავად იმისა, თუ რა მოხდება დიდ მოთამაშეებს შორის, რადგან ეს არის მიწოდების სანდო წყარო, ინტერდაკავშირებულობა, ურთიერთდამოკიდებულება, რაც კარგია და რაც მეგობრობაშია გადაზრდილი.

„არსებობს შანსი სამხრეთ კავკასიისათვის, რომ დავიწყოთ პროცესი, კონსულტაციებით მაინც. შეიძლება ჯერ ადრეა ვილაპარაკოთ ინტეგრაციაზე, მაგრამ ჩვენ შეგვიძლია დავიწყოთ კონსულტაციებით. და ვფიქრობ, პირველი კონსულტაციები გაიმართა საქართველოში, ახლახან ერთ-ერთი საერთაშორისო ღონისძიების ფარგლებში. სამხრეთ კავკასიის სამი ქვეყნის პრემიერ-მინისტრები: საქართველოს, სომხეთისა და აზერბაიჯანის პრემიერები შეხვდნენ ერთმანეთს იქ. ვფიქრობ, ეს პოზიტიური ნიშანია.

ვფიქრობ, ამას ძალიან პრაქტიკული გავლენა შეუძლია ჰქონდეს ამ თანამშრომლობაზე. თუ მაგალითად შევხედავთ საქართველოსა და აზერბაიჯანს შორის თანამშრომლობას ბოლო წლების, დამოუკიდებლობის 30 წლის მანძილზე, ჩვენ ვხედავთ, თუ როგორ არის ორი ქვეყანა ინტეგრირებული, როგორ ახორციელებს ორი ქვეყანა საერთო პროექტებს ურთიერთ სარგებლიანობისათვის და როგორ გახდა ეს ორი ქვეყანა ერთად უფრო მნიშვნელოვანი ევროპისათვის, ვიდრე ისინი იქნებოდნენ ცალ-ცალკე. შეუძლია სომხეთს შეუერთდეს ამ უკვე არსებულ პროექტებს? დიახ, როცა ხელს მოვაწერთ სამშვიდობო ხელშეკრულებას, ბუნებრივია. რა წვლილი შეუძლია სომხეთს შეიტანოს ამ თანამშრომლობაში, ამ ეტაპზე ეს ღია კითხვაა, რადგან აქ არა მარტო უფლებებზეა საუბარი, არამედ მხარეებს აქვთ ვალდებულებებიც. საქართველოს და აზერბაიჯანს უკვე აქვთ დიდი კონტრიბუცია ამ მიმართულებით, ნავთობის მილსადენები, ბუნებრივი აირის მილსადენები, ტრანსპორტირება, სარკინიგზო გზები, ენერგო კაბელი, უსაფრთხოების საკითხები. სულ ახლახან, ბაქოში შედგა სამი ქვეყნის, საქართველო, აზერბაიჯანი, თურქეთის თავდაცვის მინისტრების შეხვედრა, ეს უკვე ტრადიციული გახდა. ჩვენ გვაქვს სამმხრივი თანამშრომლობის ფორმატი, არა მარტო თავდაცვის, არამედ სხვა სფეროებში, რომელიც მოიცავს ეკონომიკისა და ა.შ. საქართველოს მთავრობა სრულად იზიარებს ამ ხედვას, ჩვენ კვლავ არ გვაქვს ნათელი პოზიცია სომხეთის მხრიდან, თუ ვიგრძნობთ მათგან ამას, ჩვენ შეგვიძლია დაწყება. ისინი უფრო უსაფრთხოდ იგრძნობენ თავს. ჩვენმა ქართველმა მეგობრებმა იციან, რომ საქართველოს ენერგოუსაფრთხოება სრულიად დაცულია, მიუხედავად იმისა, თუ რა მოხდება დიდ მოთამაშეებს შორის. რადგან ეს არის სანდო წყარო მიწოდებისა, ეს არის ინტერდაკავშირებულობა, ურთიერთდამოკიდებულება, რაც კარგია და რაც მეგობრობაშია გადაზრდილი“,- განაცხადა ილჰამ ალიევმა.

რუსეთის საგარეო საქმეთა სამინისტრომ ჟენევის მოლაპარაკებების 59-ე რაუნდის შემდეგ განცხადება გაავრცელა, სადაც საუბარია აფხაზეთისა და ცხინვალის „უსაფრთხოების გაძლიერების“ აუცილებლობაზე.

„სოხუმისა და ცხინვალის უსაფრთხოების შემდგომი გაძლიერების აუცილებლობა ნაკარნახევია შავი ზღვის რეგიონში ნატო-ს მზარდი აქტივობით, ალიანსის მიერ საქართველოს სამხედრო განვითარების გეგმების განხორციელებით და ამ ქვეყნისთვის თანამედროვე ტიპის იარაღის მიწოდებით“, – ნათქვამია განცხადებაში.

რუსეთის საგარეო უწყების განცხადებით, შეხვედრის მონაწილეებმა გამოთქვეს საერთო ინტერესი სამხრეთ კავკასიაში უსაფრთხოების სხვადასხვა ასპექტზე რეგულარული დიალოგის შესანარჩუნებლად ჟენევის ფორმატის, როგორც მრავალმხრივი მოლაპარაკებების პლატფორმის შენარჩუნების შესახებ.

უწყების მტკიცებით, აუცილებელია „სამართლებრივად სავალდებულო შეთანხმების გაფორმება „აფხაზეთისა და სამხრეთ ოსეთის წინააღმდეგ საქართველოს მიერ ძალის გამოუყენებლობის შესახებ“, ასევე დე ფაქტო საზღვრების დელიმიტაციისა და დემარკაციის პროცესის დაწყება.

ცნობისთვის, ჟენევის საერთაშორისო მოლაპარაკებების 59-ე რაუნდი 5-6 დეკემბერს გაიმართა.

ამერიკული ელიტის ნაწილი ფორმალურად მზად არის, გაწიროს უკრაინა თავისი მცირე შიდაპოლიტიკური მიზნებისთვის, – განაცხადა უკრაინის პრეზიდენტის ადმინისტრაციის ყოფილმა მრჩეველმა, ალექსეი არესტოვიჩმა.

“იმედი მაქვს, ყველამ კარგად გაიაზრა ის, რაც დღეს კონგრესში ხდება. ამერიკული ელიტის ნაწილი ფორმალურად მზად არის, გაწიროს უკრაინა თავისი მცირე შიდაპოლიტიკური მიზნებისთვის”, – დაწერა ყოფილმა მაღალჩინოსანმა Facebook-ის გვერდზე.

აშშ-ის სენატმა დაბლოკა იმ კანონპროექტის კენჭისყრაზე გატანა, რომელიც მათ შორის უკრაინისათვის დამატებითი დაფინანსების გამოყოფას ითვალისწინებდა.

უკრაინის, ისრაელისა და ტაივანის დახმარების კანონპროექტმა ვერ მიიღო საჭირო 60 ხმა აშშ-ის სენატში პროცედურული კენჭისყრის დროს.

დოკუმენტი ითვალისწინებს დამატებითი დაფინანსების გამოყოფას 106 მილიარდი დოლარის ოდენობით, აქედან 61 მილიარდი დოლარი უკრაინის დასახმარებლად.

კონგრესში “რესპუბლიკელებმა” განაცხადეს, რომ ისინი არ დაუჭერენ მხარს უკრაინის დაფინანსებას მანამ, სანამ ჯო ბაიდენის ადმინისტრაცია არ შეცვლის მიდგომას აშშ-ის საზღვრის დაცვის მიმართ.

რუსეთის პრეზიდენტი ახლო აღმოსავლეთში ვიზიტებს განაგრძობს. არაბთა გაერთიანებული საამიროების შემდეგ პუტინი საუდის არაბეთში ჩავიდა.

ერ-რიადში ის საუდის არაბეთის პრინცს, მოჰამედ ბინ სალმანს შეხვდა. მხარეებმა ჰამას-ისრაელის ომი, ნავთობის ფასები და უკრაინის კონფლიქტი განიხილეს.