„ერთიანი ნაციონალური მოძრაობის“ ყოფილი თავმჯდომარე ნიკა მელია პარტიაში მიმდინარე ამბებს ეხმაურება და აღნიშნავს, რომ პარტიაში არსებული კონფიგურაცია, პირველ რიგში, „ქართული ოცნებისათვისაა“ მოსახერხებელი.

მისივე თქმით, თუ ოპოზიცია ვერ გადაიქცევა, ცუდი ხელისუფლების კარგ ალტერნატივად, ამით ხელისუფლება იხეირებს.

„ღირსებისა და სიმართლის განმარჯვება აზარალებს „ქართულ ოცნებას“, რომელიც სრულად არის დაცლილი ერთისგანაც და მეორისგანაც, უსამართლობასთან შეგუება კი აზარალებს ოპოზიციას, თუ „ოცნების“ მრუდე და მახინჯ სარკისებრ ანარეკლად იქცევი და ხალხთან ბმას დაკარგავ, თუ „ოცნების“ მართვაში იქნება აბასთუმანში ჩაკეტილი ივანიშვილი, ხოლო „ნაციონალურ მოძრაობაში“ იზოლირებული ივანიშვილი და კეზერაშვილი, დაზარალდება ოპოზიცია და ოპოზიციური ბრძოლა. თუ ოპოზიცია ვერ გადაიქცევა, ცუდი ხელისუფლების კარგ ალტერნატივად, იხეირებს ხელისუფლება, ზუსტად ამიტომ ვამბობ, რომ თუ ვინმესთვისაა მოსახერხებელი „ნაციონალური მოძრაობის“ არსებული კონფიგურაცია, არის „ქართული ოცნებისათვის”, – აცხადებს მელია.

ქალბატონი სამნიძის აღიარებამდე ჩვენ არაერთხელ გვითქვამს, რომ ევროპულ ქვეყნებში გვხვდებოდა ინფორმაცია და კონკრეტული საკითხები ჩვენი პარტნიორების მხრიდან, როგორ მავნებლურ კამპანიას ეწეოდნენ კონკრეტული ოპოზიციონერი დეპუტატები ჩვენი ქვეყნის საწინააღმდეგოდ, – ამის შესახებ „ქართული ოცნების“ წევრმა, ანრი ოხანაშვილმა განაცხადა.

„ჩვენ ამას ვამბობდით ბევრად ადრე და კარგია, როდესაც ეს კიდევ ერთხელ აღიარებით სახეს იძენს კონკრეტული ოპოზიციონერი დეპუტატების მხრიდან“, – განაცხადა ოხანაშვილმა.

ამასთან, კითხვაზე, რომ გიორგი გახარია, ნინო ლომჯარია და სალომე ზურაბიშვილი ქმნიან პარტიას, ოხანაშვილმა აღნიშნა: „ირაკლი კობახიძის მიერ გაჟღერებული ინფორმაცია ნამდვილად ასეა. არსებობს ინფორმაციები, რომ ეს ტრიო უნდა ჩამოყალიბდეს ერთ საარჩევნო სუბიექტად. დაველოდოთ მოვლენების განვითარებას“.

ოპოზიციონერმა დეპუტატმა, ხათუნა სამნიძემ განაცხადა: „ოპოზიციაში არიან პოლიტიკოსები, რომლებიც სხვა გზავნილებით მიდიან პარტნიორებთან და ხელს უშლიან სტატუსზე გადაწყვეტილების მიღებაში, ბოლო დღეებში ამის შესახებ მეტი ინფორმაცია მივიღეთ“.

ხათუნა სამნიძემ აღიარა ის, რაზეც არაერთგზის ვსაუბრობდით და რადიკალური, კრიმინალური ოპოზიციის წარმომადგენლებს ვამხელდით, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.

მათიკაშვილი გამოეხმაურა ოპოზიციონერი დეპუტატის, ხათუნა სამნიძის განცხადებას, სადაც მან აღნიშნა: „ოპოზიციაში არიან პოლიტიკოსები, რომლებიც სხვა გზავნილებით მიდიან პარტნიორებთან და ხელს უშლიან სტატუსზე გადაწყვეტილების მიღებაში. ბოლო დღეებში ამის შესახებ მეტი ინფორმაცია მივიღეთ“.

დავით მათიკაშვილის თქმით, სამნიძის განცხადება ჩვენების მიცემის ტოლფასი განცხადებაა.

„ხათუნა სამნიძემ ფაქტობრივად განაცხადა, რომ არსებობენ თანამედროვე ორჯონიკიძეები, რომლებიც მთელ თავის საქმიანობას ანდომებენ იმას, რომ საკუთარ ქვეყანას, საკუთარ სამშობლოს, ხალხს უმტრონ. ისინი დადიან ევროპის ქვეყნების დედაქალაქებში და ჩვენს სტრატეგიულ პარტნიორებს, მეგობრებს აწვდიან ტყუილ ინფორმაციას და საკუთარ სურვილებს, საქართველომ არ მიიღოს კანდიდატის სტატუსი. სწორედ ეს არის მათი მიზანი და ამით სურთ, ვითარება გაამწვავონ, აადუღონ მდგომარეობა საზოგადოებაში, მათ თავზე მოახვიონ მცდარი განცდები ქვეყნის მომავალთან დაკავშირებით და შემდეგ ამით ისარგებლონ, მღვრიე, ბინძურ წყალში დაიჭირონ თევზი. ისინი ამას ვერ ეღირსებიან.

სამნიძის აღიარება არის  სრულყოფილი აღიარება, თუმცა ეს არ არის პირველი. ახლახან ჩვენ მოვისმინეთ ცალკეული დეპუტატებისა და კრიმინალური ოპოზიციის წარმომადგენლების განცხადებები, რომლებიც პირდაპირ ამბობდნენ, რომ საქართველომ არ უნდა მიიღოს კანდიდატის სტატუსი, რადგან ეს მათ პოლიტიკურ, ბინძურ, დესტრუქციულ ინტერესებში არ შედის. ცხადია, ეს არის ჩვენების მიცემის ტოლფასი განცხადება და პირდაპირი დასტური იმისა, რაზედაც ჩვენ, ხელისუფლება არაერთგზის ვსაუბრობდით და ვაფრთხილებდით საზოგადოებას“, – განაცხადა დავით მათიკაშვილმა.

კითხვაზე, ხომ არ აქვს ინფორმაცია, რომელ ოპოზიციონერებს გულისხმობდა ხათუნა სამნიძე, მათიკაშვილმა აღნიშნა:

„ის საუბრობდა ოპოზიციაზე. ჩვენ არაერთგზის დაგვისახელებია ის ადამიანები, რომლებიც ამ ბინძური საქმით არიან დაკავებული როგორც უშუალოდ „ნაციონალურ მოძრაობაში“, ასევე მასთან აფილირებულ სხვადასხვა პოლიტიკურ დაჯგუფებებში. ვაშაძეები და ძმანი მისნი – ეს კარგად იცის საზოგადოებამ. სამნიძემ ფაქტობრივად თქვა ის, რაზეც დიდი ხანია, საუბრობს ხელისუფლება მტკიცებულებებით გაჯერებული ტექსტებით, ასევე საუბრობს სახელმწიფო უსაფრთხოების სამსახური, სრულიად საქართველო, რომ, სამწუხაროდ, ჩვენს ქვეყანას დღეს კიდევ ჰყავს ყორღანაშვილები და ორჯონიკიძეები. ეს არის რეალობა, რომელზეც სამნიძემ ხაზგასმით ისაუბრა“, – განაცხადა დავით მათიკაშვილმა.

ევროკომისიის პრეზიდენტის მოწვევით საქართველოს პრემიერ-მინისტრი სამუშაო ვიზიტით იმყოფება ბრიუსელში – როგორც ცნობილია, იმართება „გლობალური კარიბჭის“ ფორუმი, სადაც განხილული იქნება ის შესაძლებლობები, რომლებსაც დაკავშირებადობის თვალსაზრისით სთავაზობს ევროკავშირი სხვადასხვა ქვეყნებს, მათ შორის, პოლიტიკურად ასოცირებულ ქვეყნებს, – ამის შესახებ საქართველოს საგარეო საქმეთა მინისტრმა ილია დარჩიაშვილმა განაცხადა.

ილია დარჩიაშვილის თქმით, საქართველოსთვის დაკავშირებადობის საკითხი არის ერთ-ერთი უმნიშვნელოვანესი საკითხი, რომელიც ევროკავშირთან პოლიტიკური აფილირების და ასოცირების პარალელურად ვითარდება.

„ჩვენ არაერთი ძალიან მნიშვნელოვანი საფლაგმანო პროექტები გვაქვს ევროკავშირთან, რომლებიც ფიზიკურად აახლოებს საქართველოს, რომლებიც კიდევ უფრო აუმჯობესებს ჩვენს დაკავშირებადობას ევროკავშირთან და ძალიან მნიშვნელოვანია, რომ საქართველოს პრემიერ-მინისტრი, როგორც ერთ-ერთი მთავარი მომხსენებელი, წარმოაჩენს საქართველოს ხედვას, თუ როგორ გვესახება ჩვენ მომავალში ამ მნიშვნელოვანი ინფრასტრუქტურული პროექტების განვითარება, იმისთვის, რომ საქართველო კიდევ უფრო მეტად დაახლოვდეს ფიზიკურად ევროკავშირთან.

ასევე დისკუსიები იქნება კაბელის თემატიკაზე, რომელიც ერთ-ერთი უმნიშვნელოვანესი მომავალი პროექტია, რომელსაც საქართველო, ჩვენი რეგიონი განახორციელებს ევროკავშირის ელექტროენერგიის მომარაგების თვალსაზრისით და კიდევ უფრო მეტ შესაძლებლობას შექმნის, რომ ევროკავშირი და ევროპა იყოს უფრო მეტად დივერსიფიცირებული ელექტროენერგიის მიწოდების თვალსაზრისით“, – განაცხადა საგარეო საქმეთა მინისტრმა.

აღნიშნულ ინფორმაციას საქართველოს საგარეო საქმეთა სამინისტრო ავრცელებს.

აქ რომ მოუწიათ აღიარება, სტატუსის გადავადებას რომ ითხოვდნენ, ხომ წარმოგიდგენიათ ევროკავშირში რას ეუბნებოდნენ საქართველოზე კანდიდატის სტატუსთან დაკავშირებით? – ასე გამოეხმაურა „ხალხის ძალის“ ერთ-ერთი ლიდერი გურამ მაჭარაშვილი ხათუნა სამნიძის განცხადებას იმასთან დაკავშირებით, რომ ოპოზიციის ზოგიერთი წარმომადგენელი ხელს უშლის საქართველოს კანდიდატის სტატუსის მოპოვებაში.

მაჭარაშვილის თქმით, გადაწყვეტილების მიმღები პირები, ევროკომისრები და დასავლელი ლიდერები მხარდაჭერას ჰპირდებიან საქართველოს, ქართული ოპოზიცია კი ყველანაირად უშლის ხელს საქართველოსთვის კანდიდატის სტატუსის მინიჭებას.

„სამნიძემ პირდაპირ თქვა, ოპოზიციის გარკვეული წარმომდგენლები ამბობდნენ, რომ კანდიდატის სტატუსის გადავადება სჯობს. ისინი ამტკიცებდნენ, რომ სჯობს საქართველოსთვის კანდიდატის სტატუსის მოცემა გადავადდეს, რადგან თურმე რაღაც პირობები გვქონია შესასრულებელი.

წარმოიდგინეთ, ევროკომისრები, მათ შორის, ოლივერ ვარჰეი, რომელიც არის ევროკომისარი გაფართოების საკითხებში, ამბობს, რომ საქართველოს მათგან ექნება მხარდაჭერა. ევროკომისიის პრეზიდენტი ამბობს, რომ საქართველოს ექნება მხარდაჭერა. იმავეს ამბობენ ევროკავშირის ქვეყნების ლიდერები, ხოლო რადიკალური ოპოზიციის წარმომადგენლები ამბობენ, რომ კანდიდატის სტატუსის მონიჭება უნდა გადაგვივადდეს. ამ დროს პრეზიდენტი გვიმტკიცებს, რომ თურმე ის დადის კანდიდატის სტატუსის მოსაპოვებლად, მაშინ, როდესაც ის აშავებს თავის ქვეყანას. ოპოზიციაც გვიმტკიცებს, რომ თითქოს ხელისუფლება ყველაფერს აკეთებს იმისთვის, რომ საქართველომ კანდიდატის სტატუსი არ მიიღოს. ამ დროს თვითონვე პირდაპირ ეთერში საჯაროდ აღიარებენ, რომ ვინც უნდა მიიღოს გადაწყვეტილება ამ საკითხზე, ანუ ევროკავშირი ამბობს, რომ მხარს დაგვიჭერს, ხოლო ესენი ეუბნებიან, გადაგვივადეთო. ამაზე მეტი ანტისახელმწიფოებრივი და მოღალატეობრივი ქმედება, რა უნდა იყოს. თან, პარლამენტში დებატებში გამოდიან და საუბრობენ საწინააღმდეგოს, რომ თურმე ჩვენ ვიბრძვით იმისთვის, რომ არ მივიღოთ კანდიდატის სტატუსი.

როგორც კი დარწმუნდნენ, რომ დიდი ალბათობით, მოგვცემენ კანდიდატის სტატუსს, რადიკალური ოპოზიციის წარმომადგენლები პირდაპირ ამბობენ, გადაგვივადეთ სტატუსის მოცემა, რადგან ჩვენ პირობებს არ ვასრულებთო. ეს არის მათი რეალური სახე. ამის შემდეგ თუ კიდევ ვინმეს ეჭვი ეპარება იმაში, რომ ეს რადიკალური ოპოზიცია არის მავნებლური პოლიტიკური ძალა და პირდაპირ, საჯაროდ ებრძვის საკუთარ სახელმწიფოს, ამის შემდეგ ასეთი ადამიანიც საკუთარი ქვეყნის მოღალატე იქნება. ეს ადამიანები, რომლებიც უცხოეთში დადიან თითქოსდა კანდიდატის სტატუსის მოსაპოვებლად, ახლა გამოჩნდა, რისთვისაც იბრძოდნენ.
აქ რომ მოუწიათ აღიარება, სტატუსის გადავადებას რომ ითხოვდნენ, ხომ წარმოგიდგენიათ ევროკავშირში რას ეუბნებოდნენ საქართველოზე კანდიდატის სტატუსთან დაკავშირებით? რეალობა არის ის, რომ რადიკალური ოპოზიციის გაკოტრებაზე საუბარიც აღარ არის. ის უბრალოდ უნდა გაქრეს პოლიტიკური არენიდან და დიდი იმედი მაქვს, რომ 2024-ში ქართველი ამომრჩეველი ამას გააკეთებს. ერთხელაც ვიტყვი, როგორი პოლიტიკური გემოვნებაც არ უნდა ჰქონდეს ქართულ საზოგადოებას, ის პოლიტიკურად გაზრდილია – შეიძლება, „ხალხის ძალას“, ან „ქართულ ოცნებას“ არ უჭერდეს მხარს, მაგრამ ამ პოლიტიკურ მავნებლებს არ დაუჭერს მხარს, რადგან ყველამ დაინახა, რომ ისინი „ქართულ ოცნებას“ და ხელისუფლებას კი არ ებრძვიან, არამედ ებრძვიან საკუთარ ქვეყანას. თვეების განმავლობაში რომ ჭიკჭიკებდნენ, ქვეყანაზე უნდა ვიზრუნოთ და არ გვაინტერესებს ხელისუფლებაო, ახლა ხომ გამოჩნდა, რაზე იყვნენ წასულები უცხოეთში და რა ჰქონდათ გულში? ჰქონდათ ის, რომ მოხდეს რევოლუცია და ამ გზით შეცვალონ ხელისუფლება,“ – განაცხადა გურამ მაჭარაშვილმა.სპორტის მინისტრი ქართული ალპინიზმის 100 წლისთავთან დაკავშირებით ვეტერან მთამსვლელებს შეხვდა

კულტურის, სპორტისა და ახალგაზრდობის მინისტრი თეა წულუკიანი ქართული ალპინიზმის 100 წლისთავთან დაკავშირებით ვეტერან მოყვარულ ალპინისტებს: ავთანდილ ჩხიკვაძეს (86 წელი), თამაზ შარაშენიძესა (69 წელი) და ვაჟა ჩაგელიშვილს (80 წელი) შეხვდა. შეხვედრაზე მყინვარწვერის ექსპედიციასა და ქართული ალპინიზმის განვითარების საკითხებზე ისაუბრეს.

25-30 აგვისტოს, ქართული ეროვნული ალპინიზმის 100 წლისთავთან დაკავშირებით, ბიოლოგიურ მეცნიერებათა აკადემიური დოქტორის, 86 წლის ავთანდილ ჩხიკვაძის, ხელმძღვანელობით საქართველოს მოყვარული ალპინისტების რვაკაციანმა ჯგუფმა – ავთანდილ ჩხიკვაძე, თამაზ შარაშენიძე, ვაჟა ჩაგელიშვილი, ზურაბ ტაკიძე, გიორგი ბერიანი, დავით სალდაძე, ვასილ რევიშვილი, ლუკა კვარაცხელია – მყინვარწვერზე წარმატებული ექსპედიცია განახორციელა.

გარდა ამისა, სპორტის სამინისტროს დაფინანსებით, ქართული ალპინიზმის 100 წლის იუბილესთან დაკავშირებით, ყაზბეგის მუნიციპალიტეტის სოფელ გველეთში მთამსვლელთა ფესტივალი გაიმართა. მყინვარწვერზე მასობრივი ექსპედიცია 3-7 ოქტომბერს მოეწყო და მასში 30 მთამსვლელი მონაწილეობდა.
ღონისძიებას 100-ზე მეტი სტუმარი ჰყავდა. ფესტივალი გრანდიოზული კონცერტით დამთავრდა.

შეგახსენებთ: წელს 100 წელი გავიდა მყინვარწვერზე ქართველთა პირველი ასვლიდან. ექსპედიციები, რომლებმაც საფუძველი ჩაუყარა ქართულ ალპინიზმს, 1923 წლის აგვისტოში – გიორგი ნიკოლაძის, ხოლო სექტემბერში ალექსანდრე დიდებულიძის ხელმძღვანელობით განხორციელდა.