საქართველოს პრეზიდენტმა სალომე ზურაბიშვილმა თავისუფლების მოედანი, სადაც სახალხო ზეიმი მიმდინარეობს, დატოვა.

სალომე ზურაბიშვილს ხელისუფლების წარმომადგენლების მხრიდან სცენაზე ასვლისა და ხალხისთვის მიმართვის შესაძლებლობა არ მიეცა. შეკრებილებს მხოლოდ „ქართული ოცნების“ ლიდერებმა და ევროკავშირის ელჩმა საქართველოში პაველ ჰერჩინსკიმ მიმართეს.

პრეზიდენტის თქმით, მას იმ სიხარულს, რაც ახლა აქვს, ვერაფერი შეუცვლის.

„მე ვიტყოდი ერთ რამეს, მადლობები არ მჭირდება, მადლობა არის ხალხის განწყობა, ხალხის მიზანმიმართულება და ერთად ყოფნა, ეს იქნება ჩვენთვის, ყველასთვის ბევრად მეტი, ვიდრე ერთმანეთში გაცვლილი მადლობები…..არც მწყინს, არც მიხარია….მე მიხარია, ის, რაც აქ, ხალხში ხდება. ამ მხიარულს ვერავინ შემიცვლის ვერაფრით, ამიტომ ყველას კიდევ ერთხელ, გილოცავთ“, – განაცხადა ზურაბიშვილმა.

დიახ, ჩვენ არ დავდექით ცალ ფეხზე და არ დავდექით მუხლის ჩოქებზე, არამედ დავდექით მტკიცედ და ღირსეულად მოვიპოვეთ ეს გამარჯვება – ეს ისტორიული გამარჯვება გეკუთვნით თქვენ, ჩვენს დაუმარცხებელ, გაუტეხელ, ამაყ და თავისუფლების მოყვარე ქართველ ხალხს,- ამის შესახებ საქართველოს პრემიერ-მინისტრმა ირაკლი ღარიბაშვილმა თავისუფლების მოედანზე ევროკავშირის კანდიდატის სტატუსის მოპოვების აღსანიშნავ ღონისძიებაზე სიტყვით გამოსვლისას განაცხადა.

როგორც პრემიერმა აღნიშნა, ხელისუფლებამ და ხალხმა ევროკავშირის კანდიდატის სტატუსი დამსახურებულად მოიპოვა.

„მოგესალმებით ჩემო საყვარელო ხალხო, ჩემო ძვირფასო მეგობრებო, ჩემო დებო და ძმებო, უპირველესად მინდა მადლობა გადაგიხადოთ მობრძანებისთვის. გილოცავთ კანდიდატის სტატუსის მონიჭებას!

ჩემთვის დიდი პატივია დღეს თქვენ წინაშე სიტყვით გამოსვლა. გილოცავთ ამ მართლაც ისტორიულ მოვლენას ამ ისტორიულ გადაწყვეტილებას და გილოცავთ ამ ისტორიულ გამარჯვებას.

ეს ისტორიული გამარჯვება გეკუთვნით თქვენ – ჩვენს დაუმარცხებელ, გაუტეხელ, ამაყ და თავისუფლების მოყვარე ქართველ ხალხს.

ჩვენ ვიბრძოლეთ, ბევრი ვიშრომეთ და ჩვენ ერთად გავიმარჯვეთ. ჩვენ, ხელისუფლებამ და ხალხმა დამსახურებულად მოვიპოვეთ ევროკავშირის კანდიდატის სტატუსი. ჩვენ დავიმსახურეთ ეს გამარჯვება. ჩვენ ვიშრომეთ და ჩვენ ვიბრძოლეთ, ქართველი ხალხის სახელით, თქვენი სახელით, ჩვენი ქვეყნის და ხალხისთვის და ჩვენ ერთად მოვიპოვეთ ეს გამარჯვება.

დიახ, ჩვენ არ დავდექით ცალ ფეხზე და არ დავდექით მუხლის ჩოქებზე, არამედ დავდექით მტკიცედ და ღირსეულად მოვიპოვეთ ეს გამარჯვება“,- განაცხადა პრემიერმა.

მისასალმებელია თუ სალომე ზურაბიშვილიც უერთდება სახალხო ზეიმს , – ამის შესახებ ვიცე-პრემიერმა, ეკონომიკისა და მდგრადი განვითარების მინისტრმა, ლევან დავითაშვილმა თავისუფლების მოედანზე მიმდინარე საზეიმო ღონისძიებაზე მისვლის შემდეგ განაცხადა.

ლევან დავითაშვილის თქმით, საქართველოსთვის კანდიდატის სტატუსის მინიჭება საქართველოს თითოეული მოქალაქისთვის ძალიან მნიშვნელოვანია და ყველა გაერთიანებული უნდა ზეიმობდეს.

„ეს გადაწყვეტილება არის თითოეული ქართველისთვის ძალიან მნიშვნელოვანი და დღეს თითოეული ქართველი ერთად, გაერთიანებულები უნდა ვზეიმობდეთ. ასეც არის, დღეს აქ ყველანაირი განსხვავებული აზრის მიუხედავად ადამიანები შეიკრიბნენ ერთ იდეის გარშემო და რა თქმა უნდა, ქალბატონი სალომე საქართველოს მოქალაქეა და რა თქმა უნდა, მისასალმებელია თუ ისიც უერთდება სახალხო ზეიმს და რა თქმა უნდა, მას მივესალმები“, – განაცხადა ლევან დავითაშვილმა.

ლევან დავითაშვილის განცხადებით, საქართველომ სამართლიანად მიიღო ის სტატუსი, რომელიც ჯერ კიდევ შარშან უნდა მიეღო.

„თითოეული ქართველი არის გახარებული იმიტომ, რომ ჩვენი შრომა, ჩვენი მონდომება, ჩვენი მისწრაფება დღეს დაფასდა. საქართველომ სამართლიანად მიიღო ის სტატუსი, რომელიც ჯერ კიდევ შარშან უნდა მიეღო. საქართველომ თავისი მონდომებით, თავისი შემართებით, მათ შორის თავისი პროფესიონალური ძალისხმევით დაადასტურა და დაამტკიცა, რომ ჩვენ ყველა ვალდებულებას ვასრულებდით პირნათლად“, – განაცხადა ლევან დავითაშვილმა.

ამასთან, ვიცე-პრემიერმა მადლობა გადაუხადა საჯარო მოხელეებს კანდიდატის სტატუსის მინიჭებისთვის გაწეული შრომისთვის.

„მე მინდა მადლობა გადავუხადო ყველა იმ ადამიანს, ყველა იმ საჯარო მოხელეს, რომელთა დამსახურებაც არის ძალიან დიდი, რომ ჩვენ მივიღეთ კანდიდატის სტატუსი. რომ არა საჯარო მოხელეების მაღალი დონის პროფესიონალიზმი. მონდომება, დღე და ღამე შრომა, პროფესიონალიზმი, ჩვენ ამ შედეგს ვერ მივიდოდით. ეს არის სამართლიანი გადაწყვეტილება და თითოეულ მოქალაქეს კიდევ ერთხელ ვულოცავ“, – განაცხადა ლევან დავითაშვილმა.

პარლამენტის საშემოდგომო სესია სახელმწიფო ჰიმნით დაიხურა.

პარლამენტის თავმჯდომარის, შალვა პაპუაშვილის განცხადებით, საშემოდგომო სესია დატვირთული და საინტერესო იყო.

„რაც მთავარია, შედეგიანი საშემოდგომო სესია გვქონდა, საქართველომ მიიღო ევროკავშირის წევრობის კანდიდატის სტატუსი. ამაში უდიდესი წვლილი აქვს საქართველოს პარლამენტს. გვინდა ყველა კოლეგას, ვინც ჩართული იყო ამ პროცესში, ვინც მხარი დაუჭირა იმ ცვლილებებს, რომელმაც განაპირობა ევროპული საბჭოს გუშინდელი გადაწყვეტილება, მადლობა გადაგიხადოთ“, – განაცხადა შალვა პაპუაშვილმა.

პარლამენტის რეგლამენტის თანახმად, საშემოდგომო სესია იხსნება სექტემბრის პირველ სამშაბათს და დეკემბრის მესამე პარასკევს იხურება.

პარლამენტი მუშაობას საგაზაფხულო სესიის ფორმატში, თებერვლის პირველ სამშაბათს განაახლებს.

მჯერა, მიშასთან ერთად, ქართველ ხალხთან ერთად, „ერთიანი ნაციონალური მოძრაობა“ ძალიან მალე გაიტანს საბოლოო გოლს, მიაღწევს საბოლოო გამარჯვებას და გავხსნით მოლაპარაკებას ევროკავშირში დაჩქარებული წესით გაწევრიანებასთან დაკავშირებით, – ამის შესახებ „ნაციონალური მოძრაობის“ წევრმა, თინა ბოკუჩავამ განაცხადა.

მისივე თქმით, საქართველოსთვის ევროკავშირის კანდიდატის სტატუსის მინიჭება მხოლოდ ქართველი ხალხის დამსახურებაა.

„გილოცავთ, ეს მართლაც ძალიან დიდი გამარჯვებაა. ეს გამარჯვება არის საქართველოს და ქართველი ხალხის. ამ გადაწყვეტილებით ევროპამ დაამარცხა რუსეთი და ქართველმა ხალხმა დაამარცხა რუსული რეჟიმი. ეს არის რეალობა და ეს არის გამარჯვება. ფუჭად ცდილობს რუსული ოცნება, რომ მიითვისოს ეს გამარჯვება, რადგან ეს არის მხოლოდ ქართველი ხალხის დამსახურება.

ეს გამარჯვება ქართველი ხალხის ერთიანობამ მოიტანა. ევროკავშირის კანდიდატის სტატუსმა მოგვცა შანსი, შევცვალოთ რუსული ოცნება, რომ ქართველმა ხალხმა შეცვალოს რუსული რეჟიმი და სწორედ შემდეგ შევძლებთ, შევიდეთ ევროპაში და გავხდეთ ევროპული ოჯახის სრულფასოვანი წევრი.

ადამიანი, რომელიც დღეს აუცილებლად უნდა იყოს ჩვენთან, არის მიხეილ სააკაშვილი, რომელმაც პირველმა ააფრიალა ევროკავშირის დროშა. თქვენ ხედავთ, რომ მიხეილ სააკაშვილის გული აქ არის და ის ქართველ ხალხთან ერთად, ამ გამარჯვებასთან ერთად არის. მჯერა, მიშასთან ერთად, ქართველ ხალხთან ერთად „ერთიანი ნაციონალური მოძრაობა“ ძალიან მალე გაიტანს საბოლოო გოლს, მიაღწევს საბოლოო გამარჯვებას და ჩვენ გავხსნით მოლაპარაკებას ევროკავშირში დაჩქარებული წესით გაწევრიანებასთან დაკავშირებით“, – განაცხადა თინა ბოკუჩავამ.

პარლამენტმა მესამე მოსმენით დაამტკიცა ცვლილებები, რომლის თანახმად, 2024 წლის 1-ელი ივლისიდან გაუქმდება ის არაელექტრონული პირადობის მოწმობები, რომლებიც 2011 წლის 28 ივლისამდე გაიცა.

ცვლილებების თანახმად, აღნიშნული დოკუმენტის მფლობელ პირებზე სანაცვლოდ გაცემულ ახალ პირადობის მოწმობებზე შესაბამისი პირის იგივე საიდენტიფიკაციო მონაცემები დაიტანება.

„პროექტის მიზანია, საქართველოს მოქალაქეებს გაუჩნდეთ პირადობის აღნიშნული არაელექტრონული მოწმობების საქართველოს მოქალაქის პირადობის ელექტრონული მოწმობებით – ID-ბარათებით – შეცვლის დამატებითი მოტივაცია, რაც, თავის მხრივ, ხელს შეუწყობს უახლოესი და ყოველი შემდგომი არჩევნების სათანადოდ ჩატარებას“, – ვკითხულობთ კანონპროექტის განმარტებით ბარათში.

აღსანიშნავია, რომ პარლამენტმა მანამდე დაამტკიცა პროექტი, რომლის თანახმად, ამომრჩეველს ე.წ. ლამინირებული პირადობის მოწმობით არჩევნებში ხმის მიცემის უფლება უნარჩუნდება.

ახლა ჩვენი ამოცანაა, რომ გავიმარჯვოთ არჩევნებში, გავატაროთ სწრაფი რეფორმები და დაჩქარებული წესით გავხდეთ ევროკავშირის წევრი ქვეყანა, იმისთვის, რომ საქართველოს ეროვნული დროშა ღირსეულად ფრიალებდეს მსოფლიო ცივილიზაციასთან ერთად ბრიუსელში, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ „ნაციონალური მოძრაობის“ ოფისში სიტყვით გამოსვლისას განაცხადა, სადაც კანდიდატის სტატუსის მიღებას აღნიშნავენ.

მისივე თქმით, კანდიდატის სტატუსის მიღება პირველ რიგში, ქართველი ხალხის დამსახურებაა.

„ვულოცავ მთელს საქართველოს, ქართველ ხალხს. პირველ რიგში, ეს თქვენი, ქართველი ხალხის დამსახურებაა. სრულიად ევროპამ, ევროპელმა ლიდერებმა შეისმინეს თქვენი ხმა და მოგვანიჭეს კანდიდატის სტატუსი. კანდიდატის სტატუსის მინიჭება ეს არის ჩვენი წინაპრების გამარჯვება, ეს არის ილიას გამარჯვება, ეროვნული მოძრაობის ლიდერების, ზვიად გამსახურდიას და მერაბ კოსტავას გამარჯვება, ეს არის მიშას იდეის გამარჯვება და პირველ რიგში, ეს არის იმ ახალგაზრდების გამარჯვება, რომლებიც დაუპირისპირდნენ რუსულ კანონს და წყლის ჭავლის, ცრემლსადენი გაზის მიუხედავად გაიტანეს გამარჯვების გოლი.

კიდევ უფრო მნიშვნელოვანია, რომ დღეს ადამიანები, ვინც კანდიდატის სტატუსს ჩალის ფასს ადარებდა და ადამიანები, რომლებიც ამბობდნენ, რომ არაფერი მნიშვნელობა არ აქვს კანდიდატის სტატუსს, ზეიმობენ ამ დღეს. ეს არის ხალხო თქვენი გამარჯვება.

მინდა მივულოცო მოლდოვასა და უკრაინას, რომ მათ დაიწყეს გაწევრიანებაზე მოლაპარაკება. რომ არა ქვეყნის შიგნით წინააღმდეგობა, ჩვენც მათთან ერთად დავიწყებდით კანდიდატის სტატუსზე მოლაპარაკებას. მაგრამ ჩვენი გამარჯვება კიდევ წინ არის. ახლა ჩვენი ამოცანაა, რომ გავიმარჯვოთ არჩევნებში, გავატაროთ სწრაფი რეფორმები და დაჩქარებული წესით გავხდეთ ევროკავშირის წევრი ქვეყანა, იმისთვის, რომ საქართველოს ეროვნული დროშა ღირსეულად ფრიალებდეს მსოფლიო ცივილიზაციასთან ერთად ბრიუსელში, ევროკავშირის წევრი ქვეყნების დროშებთან ერთად და ამას აუცილებლად მივაღწევთ!“- განაცხადა გიორგი ვაშაძემ.