ხელისუფლების ინტერესია, ქვეყანაში ჩატარდეს თავისუფალი, დემოკრატიული არჩევნები. ჩვენ ამისთვის ყველაფერი გავაკეთეთ. ეს ბარიერიც, რომელიც ახლაა წარმოდგენილი, მთელ ევროპულ კონტინენტზეა დამკვიდრებული, – ამის შესახებ ფრაქცია „ქართული ოცნების“ თავმჯდომარის მოადგილემ, გია ცაგარეიშვილმა „ქრონიკაში“ განაცხადა.

მისი თქმით, „ნაციონალური მოძრაობა“ ყველაფერს აკეთებს იმისთვის, რომ მარგინალიზაცია მოახდინოს ყველა ოპოზიციური ჯგუფის.

„სამწუხაროდ, ადამიანები ოპოზიციიდან ვერაფრით ვერ დაეხსნენ „ნაციონალური მოძრაობის“ მარწუხებს. ყოველთვის თავს მიდევნიან ხოლმე იქ, საიდანაც გამოსვლა ძალიან უჭირთ. რა თქმა უნდა, ეს აწყობს „ნაციონალურ მოძრაობას“ და ყველაფერს აკეთებს იმისთვის, რომ მარგინალიზაცია მოახდინოს ყველა ოპოზიციური ჯგუფის და ეს კარგად გამოსდით ამ ადამიანებს. ამიტომ, პარტიებმა, რომლებიც დღესაც არიან პარლამენტში წარმოდგენილი, ან ისინი, რომლებიც ცდილობენ გადალახონ ბარიერი და მეთერთმეტე მოწვევის პარლამენტში მოხვდნენ, ყველაფერი უნდა გააკეთონ იმისთვის, რომ როგორმე „ნაციონალური მოძრაობის“ დღის წესრიგს ჩამოშორდნენ.

ხელისუფლების ინტერესია, ქვეყანაში ჩატარდეს თავისუფალი, დემოკრატიული არჩევნები. ჩვენ ამისთვის ყველაფერი გავაკეთეთ ეს ბარიერიც, რომელიც ახლაა წარმოდგენილი, მთელ ევროპულ კონტინენტზეა დამკვიდრებული. ფაქტობრივად ყველგან 4 ან 5%-იანი ბარიერია, მგონი ჰოლანდიაში ნულოვანი ბარიერი, დანარჩენი ევროკავშირის წევრ ქვეყნებში და არაწევრ ქვეყნებშიც, ფაქტობრივად ყველგან 4-5%-იანი ბარიერია“, – აღნიშნა გია ცაგარეიშვილმა.

ბექა დავითულიანი ხათუნა სამნიძის განცხადებას გამოეხმაურა, რომელშიც „რესპუბლიკური პარტიის“ ლიდერმა კახა კალაძე ოპოზიციასთან თანამშრომლობის შესახებ ნათქვამი სიტყვების გამო გააკრიტიკა. საპარლამენტო უმრავლესობის წევრმა გაიხსენა, რომ სამნიძემ თვითონ ამხილა ოპოზიციის ნაწილი იმაში, რომ ისინი ქვეყნისთვის კანდიდატის სტატუსის მინიჭების საწინააღმდეგოდ მოქმედებდნენ.

„თავად ხათუნა სამნიძემაც აღნიშნა, რომ ოპოზიციის წარმომადგენლები ჩადიოდნენ ბრიუსელში და ამბობდნენ, რომ არ შეიძლება „ქართული ოცნების“ ხელისუფლების პირობებში საქართველოსთვის კანდიდატის სტატუსის მინიჭება. ამ ფონზე რა გაუკვირდა სამნიძეს, რომ ვინმეს ეჭვი ეპარება, რომ თანამშრომლობის განწყობა არსებობს ოპოზიციის მხრიდან დამატებითი 9 რეკომენდაციის შესრულებაში და კახა კალაძემ ამ თვალსაზრისით სკეპტიციზმი გამოთქვა. ცოტა გაუგებარია და როგორც მინიმუმ, უტიფრობაა ამაზე რაღაც შეცხადება. თუ ვინმეს თანამშრომლობა უნდა, შედგება ფორმატები, კარი ღიაა და ვნახავთ რისი გამკეთებლები არიან“, – განაცხადა დავითულიანმა.

ხათუნა სამნიძემ კახა კალაძის განცხადებას უპასუხა, რომელშიც თბილისის მერმა თქვა, რომ მისთვის, გამოცდილებიდან გამომდინარე, ევროკომისიის ახალი დათქმების შესრულების მიზნით, ოპოზიციასთან თანამშრომლობა წარმოუდგენელია. „რესპუბლიკური პარტიის“ ლიდერი ამბობს, რომ ევროინტეგრაციის პროცესი ოპოზიციისა და ხელისუფლების ერთობლივი თანამშრომლობის გარეშე შეუძლებელია.

რაში გვჭირდება ასეთ მავნებლებთან თანამშრომლობა?! ის, ვინც აქტიური, კონსტრუქციული და აქცენტირებული იყო, რომ დიახ, საქართველოს უნდა მიეღო კანდიდატის სტატუსი, მათთან ახლაც ვთანამშრომლობთ და მომავალშიც გავაგრძელებთ, – ამის შესახებ პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ, ირაკლი ზარქუამ განაცხადა.

ზარქუა ხათუნა სამნიძის განცხადებას გამოეხმაურა, რომელმაც კახა კალაძის განცხადებას უპასუხა, რომელშიც თბილისის მერმა თქვა, რომ მისთვის, გამოცდილებიდან გამომდინარე, ევროკომისიის ახალი დათქმების შესრულების მიზნით, ოპოზიციასთან თანამშრომლობა წარმოუდგენელია.

„სულ რამდენიმე ხნის წინ თავის კოლეგებს თვითონ [ხათუნა სამნიძე] არ იყო რომ საყვედურობდა, რომ თურმე საბოტაჟს ეწეოდნენ მთელი ამ პერიოდის განმავლობაში ქართული სახელმწიფოს წინააღმდეგ?! ასეთ ოპოზიციასთან რა საერთო გვაქვს? წლებია ვერ შემოვიყვანეთ სამუშაო ჯგუფებში, რომ ან ერთი ადეკვატური იდეა ჰქონოდათ, ან რეფორმებში მიეღოთ მონაწილეობა. რაში გვჭირდება ასეთ მავნებლებთან თანამშრომლობა?! ის, ვინც აქტიური, კონსტრუქციული და აქცენტირებული იყო, რომ დიახ, საქართველოს უნდა მიეღო კანდიდატის სტატუსი, მათთან ახლაც ვთანამშრომლობთ და მომავალშიც გავაგრძელებთ“, – აღნიშნა ზარქუამ.

რუსებმა უკრაინაში მებრძოლი საქართველოს 2 მოქალაქე, გიორგი ჩუბიტიძე და გეორგი გოგლიძე ტყვედ აიყვანეს. პატიმრების დაკითხვის ამსახველი ვიდეო ინტერნეტში ვრცელდება. ამის შესახებ „ეხო კავკაზა“ რუსეთის თავდაცვის სამინისტროზე დაყრდნობით იუწყება.

დონეცკის რეგიონში საქართველოს მოქალაქეების დატყვევების შესახებ ინფორმაციას რადიო თავისუფლებისა და კავკასიის ეხოს ქართული სამსახურის ორი წყარო ადასტურებს. ერთ-ერთი მათგანი ამბობს, რომ ჩუბიტიძე და გოგლიძე 12 ნოემბერს დააკავეს.

გავრცელებული ინფორმაციით, ოკუპანტების მიერ დატყვევებული ქართველი მებრძოლები უკრაინის შეიარაღებული ძალების უცხოურ ლეგიონში მსახურობდნენ.

უკრაინაში მებრძოლი ქართული ეროვნული ლეგიონის ლიდერმა მამუკა მამულაშვილმა რადიო თავისუფლების ქართულ სამსახურს განუცხადა, რომ აღნიშნული პირები მის ქვედანაყოფში არ მსახურობდნენ.

საქართველოს საგარეო საქმეთა სამინისტროს განცხადებაზე კომენტარი ჯერ არ გაუკეთებია.