საქართველოს პრემიერ-მინისტრი ირაკლი ღარიბაშვილი ეუთოს საპარლამენტო ასამბლეის პრეზიდენტ პია კაუმას შეხვდა. მთავრობის ადმინისტრაცის ინფორმაციით, მთავრობის მეთაურმა პია კაუმას ეუთოს საპარლამენტო ასამბლეის პრეზიდენტად არჩევა მიულოცა და დაუდასტურა საქართველოს სურვილი, გააგრძელოს ნაყოფიერი თანამშრომლობა ეუთოს საპარლამენტო ასამბლეასთან.

საუბარი შეეხო 2024 წლის საპარლამენტო არჩევნებს. როგორც პრემიერ-მინისტრმა აღნიშნა, საქართველოს ხელისუფლება განსაკუთრებულ მნიშვნელობას ანიჭებს გამჭვირვალე, თავისუფალი და სამართლიანი საპარლამენტო არჩევნების ჩატარებას საერთაშორისო სტანდარტებისა და ევროპის საუკეთესო დემოკრატიული პრაქტიკის შესაბამისად.

მთავრობის მეთაურის თქმით, საქართველო მზადაა უზრუნველყოს არჩევნების მონიტორინგი სხვადასხვა საერთაშორისო ორგანიზაციისა და ინსტიტუტის, მათ შორის, ეუთოს საპარლამენტო ასამბლეის წარმომადგენლების მიერ.

შეხვედრაზე საქართველოსთვის კანდიდატის სტატუსის მინიჭებასთან დაკავშირებით ევროკომისიის რეკომენდაციაზე ისაუბრეს.

პრემიერ-მინისტრმა ხაზი გაუსვა აღნიშნული რეკომენდაციის ისტორიულ მნიშვნელობას.

განიხილეს რეგიონში არსებული ვითარება. როგორც პრემიერმა აღნიშნა, საქართველომ უკვე გადადგა ნაბიჯები მეზობლებს შორის კომუნიკაციისა და რეგიონში სტაბილურობის ხელშეწყობის მიმართულებით და კვლავ რჩება ერთგული, წვლილი შეიტანოს სამხრეთ კავკასიაში მშვიდობისა და სტაბილურობის განმტკიცებაში.

შეხვედრაზე საუბარი შეეხო რუსეთის მიერ საქართველოს ოკუპირებულ ტერიტორიებზე არსებულ ვითარებას. მთავრობის მეთაურმა ეუთოს საპარლამენტო ასამბლეის პრეზიდენტს მადლობა გადაუხადა ეუთო-ს რეგიონში კონფლიქტების მშვიდობიან მოგვარებასთან დაკავშირებულ საკითხებზე დათმობილი ყურადღებისათვის.

ჩვენი პარტნიორების მხრიდან მოლოდინი, რომ ხელისუფლება ასეთ რამეს იძიებდეს, აბსოლუტურად ბუნებრივია, ამიტომ აშშ-ს ელჩის განცხადება ლეგიტიმურია, – ამის შესახებ „ევროპული საქართველოს“ ლიდერმა, გიგა ბოკერიამ განაცხადა, რითაც ოთარ ფარცხალაძის სანქცირებაზე აშშ-ის ელჩის განცხადებას გამოეხმაურა.

ბოკერიას თქმით, ყოფილი გენერალური პროკურორი, ოთარ ფარცხალაძე ივანიშვილის რეჟიმის სახეა და მის დავალებებს ასრულებდა.

„ჩვენ ამ ქვეყნის მოქალაქეებს სხვა პასუხისმგებლობა გვაქვს. ჩვენ ვიცით, რომ ფარცხალაძე საკუთარ თავს არ წარმოადგენდა ამ საქმეში, ის წარმოადგენდა რეჟიმს, ეს არის პრობლემა. ფარცხალაძე ივანიშვილის რეჟიმის სახეა და მის დავალებებს ასრულებდა. საჯაროდ იყო ცნობილი, რომ ის მოსკოვში წავიდა და იქ ჩვენი მტრისთვის ხელსაყრელ ინფრასტრუქტურას აკეთებდა. ჩვენი მოსახლეობის პასუხისმგებლობაა ეს ხელისუფლება გამოვცვალოთ“, – განაცხადა ბოკერიამ.

ინფორმაციისთვის, აშშ-ს ახალი ელჩის, რობინ დანიგანის განმარტებით, აშშ-ის მხრიდან საქართველოს ყოფილი მთავარი პროკურორის, ოთარ ფარცხალაძის წინააღმდეგ სანქციების დაწესება საქართველოს მთავრობამ უნდა გამოიყენოს მინიშნებად, რომ შემთხვევა შეუძლიათ გამოიძიონ.

ჩვენ არ გვაქვს რესურსი ვიმუშაოთ სამხედრო ტყვეების გათავისუფლებაზე, უკრაინული მხარე შეიძლება იყოს ჩართული შესაბამის მოლაპარაკებებში რუსულ მხარესთან – ერთადერთი, რაც შეიძლება განიხილოს ჩვენმა სახელმწიფომ, არის კონსტიტუციური ვალდებულება, იზრუნოს საკუთარ მოქალაქეზე განურჩევლად ადგილსამყოფელისა, – ამის შესახებ მმართველი პარტიის თავმჯდომარე ირაკლი კობახიძემ ჟურნალისტებთან, რუსეთში ტყვედ ჩავარდნილ საქართველოს მოქალაქეებთან დაკავშირებით განაცხადა, რომლებიც უკრაინის მხარეს იბრძოდნენ.

კობახიძე აცხადებს, რომ ამ თვალსაზრისით, ბერკეტი არის შვეიცარიის საელჩო და წითელი ჯვარი.

„გამომდინარე იქიდან, რომ ეს ორი მოქალაქე არის სამხედრო ტყვე, ჩვენ არ გვაქვს რესურსი, რომ ამ საკითხზე ვიმუშაოთ ამ ჭრილში, როგორც სამხედრო ტყვეების გათავისუფლებაზე. ისინი არიან რუსეთ-უკრაინის ომის სამხედრო ტყვეები და შესაბამისად, უკრაინული მხარე შეიძლება იყოს ჩართული შესაბამის მოლაპარაკებებში რუსულ მხარესთან. ჩვენ ამის რესურსი არ გვაქვს, ბუნებრივია. თქვენ გახსოვთ ბაიდენის, ჯონსონის განცხადებები, ისინი მოუწოდებდნენ თავის მოქალაქეებს, არ წასულიყვნენ რუსეთ-უკრაინის ომში, რატომ – იმიტომ რომ შემდეგ შესაბამის ქვეყანას აღარ ექნებოდა რესურსი ემუშავა ტყვეების გათავისუფლებაზე ასეთი განვითარების შემთხვევაში. ერთადერთი, რაც შეიძლება განიხილოს ჩვენმა სახელმწიფომ, არის კონსტიტუციური ვალდებულება, იზრუნოს საკუთარ მოქალაქეზე განურჩევლად ადგილსამყოფელისა და ბერკეტი არის შვეიცარიის საელჩო, წითელი ჯვარი. ამ ფორმით თუ რაიმეს გაკეთება შეიძლება, ყველაფერს გააკეთებენ შესაბამისი უწყებები. დანარჩენზე გიპასუხებენ შესაბამისი უწყებები“, – განაცხადა კობახიძემ.

შეიძლება ფარცხალაძის საქმე მალე დაიხუროს, ამიტომ სრულად ვიზიარებ აშშ-ს ელჩის პოზიციას. მათი შეშფოთება გასაგებია- ჩვენ ეს პოზიცია დიდი ხანია გვაქვს,- ამის შესახებ დეპუტატმა ხატია დეკანოიძემ განაცხადა, რითაც ოთარ ფარცხალაძის სანქცირებაზე აშშ-ის ელჩის განცხადებას გამოეხმაურა.

დეკანოიძის შეფასებით, თუ საქართველოს ხელისუფლება აშშ-ს ელჩის ლანძღვას გააგრძელებს და შესაბამისობაში არ მოიყვანს საგარეო პოლიტიკას, დიდი შანსია კანდიდატის სტატუსზე ჩავარდა გვქონდეს.

„საპარლამენტო ოპოზიციას გვქონდა მცდელობა, შეგვექნება საგამოძიებო კომისია დასანქცირებულ მოსამართლეებზე, იმიტომ, რომ თუ ჩვენ ვსაუბრობთ, რომ საქართველო უნდა გახდეს ევროკავშირის წევრი ქვეყანა, პირველი არის ის, რომ ქვეყანა შესაბამისობაში მოვიდეს საგარეო პოლიტიკასთან, რაც არ ხდება. ეს დათქმა არის სერიოზული დათქმა და ამიტომ, რა თქმა უნდა, ჩვენი პარტნიორები ძალიან სერიოზულად უყურებენ იმას, რომ ფარცხალაძე, რომელიც არის „ეფესბეს“ აგენტი თავისუფლად გადაადგილდება. გარდა ამისა, შეიძლება ფარცხალაძის საქმე მალე დაიხუროს, ამიტომ სრულად ვიზიარებ აშშ-ს ელჩის პოზიციას. მათი შეშფოთება გასაგებია. ჩვენ ეს პოზიცია დიდი ხანია გვაქვს. ხელისუფლება უნდა ესმოდეს ძალიან მარტივი რამ – 15 დეკემბერს გადაწყდება, მოხდება თუ არა კანდიდატის სტატუსის ფორმალიზება. ჯერ არაფერია გადაწყვეტილი, ეს არის პირველი ეტაპი. თუ საქართველოს ხელისუფლება აშშ-ს ელჩის ლანძღვას გააგრძელებს, ასევე ჩვენი პარტნიორების და შესაბამისობაში არ მოიყვანს საგარეო პოლიტიკას, რა თქმა უნდა, დიდი შანსია სტატუსზე ჩავარდა გვქონდეს“, – განაცხადა დეკანოიძემ.

ძველი პირადობის მოწმობებით ხმის მიცემის შესაძლებლობის გაჩენა, არის პოლიტიკური გადაწყვეტილება უმრავლესობის მხრიდან, რომ გაჩნდეს პირდაპირი მესიჯი – დიახ, შესაძლებელია მომავალ არჩევნებზე გაყალბებას ჰქონდეს ადგილი, – აღნიშნული განცხადება პარლამენტის პლენარულ სხდომაზე დეპუტატმა ხათუნა სამნიძემ გააკეთა.

როგორც სამნიძემ აღნიშნა, ძველი პირადობის მოწმობებით ხმის მიცემის საკითხი დღის წესრიგში საერთოდ არ იდგა და “გაუგებარია, რატომ გააჩინა ის უმრავლესობამ“.

სამნიძის თქმით, შესაძლებელია ისეთი კამპანიის წარმოება, რომ მოქალაქეებმა თანამედროვე პირადობის დამადასტურებელი მოწმობები აიღონ და არჩევნებზე ძველი პირადობის მოწმობების გამოყენება არ მოხდეს.

„ეს არის პოლიტიკური ნების საკითხი. როცა ვლაპარაკობთ, რომ სისტემა გაუმჯობესდა, საზოგადოებას ელექტრონული სისტემით ხმის მიცემის შესაძლებლობას ვაძლევთ და ნაბიჯი გადავდგით წინ, ახლა უკან დაბრუნება და ძველი პირადობის მოწმობებით ხმის მიცემის შესაძლებლობის გაჩენა, ეს არის პოლიტიკური გადაწყვეტილება უმრავლესობის მხრიდან, რომ გაჩნდეს პირდაპირი მესიჯი, რომ დიახ, შესაძლებელია მომავალ არჩევნებზე გაყალბებას ჰქონდეს ადგილი“, – განაცხადა სამნიძემ.

77 მომხრე, 7 – წინააღმდეგი – პარლამენტმა კენჭისყრის ამ შედეგით, პირველი მოსმენით, მხარი დაუჭირა დეპუტატ ფრიდონ ინჯიას საკანონმდებლო ინიციატივას, რომლითაც არაელექტრონული – ე.წ. ლამინირებული პირადობის მოწმობის მქონე მოქალაქეებს არჩევნებში მონაწილეობის და ხმის მიცემის შესაძლებლობა ექნებათ.

ამასთან, კენჭისყრის წინ, პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა ოპოზიციონერ კოლეგებს ფრიდონ ინჯიას კანონპროექტზე შემდგომი კონსულტაციები და ალტერნატიული ინიციატივების წარმოდგენა შესთავაზა.