ეგვიპტიდან ღაზას სექტორში ჰუმანიტარული დახმარებით სავსე რამდენიმე სატვირთო მანქანა შევიდა. ამის შესახებ BBC წერს.

გამოცემის ინფორმაციით, რაფაში მანქანებს მოსახლეობა გაეკიდა და საკვების ყუთები მოძრავი სატვირთოებიდან გადმოიღეს. ზოგი კი მიწაზე დაყრილი ყუთებიდან იღებდა საკვებს.

გაეროს ლტოლვილთა სააგენტოში აღნიშნავენ, რომ ასეთი შემთხვევა დღეს არაერთხელ მოხდა და ამბობენ, რომ მშიერი ხალხი სატვირთოებს აჩერებს და საკვებს პირდაპირ ადგილზე იღებს, რის გამოც დახმარების განაწილება მოსახლეობაში რთული ხდება.

რუსეთს არ შეუძლია, ზოგიერთი ქვეყნის მსგავსად, ძეხვის სანაცვლოდ დათმოს სუვერენიტეტი და ვინმეს სატელიტი გახდეს, – ამის შესახებ რუსეთის პრეზიდენტმა, ვლადიმერ პუტინმა „ერთიანი რუსეთის“ კონგრესზე სიტყვით გამოსვლისას განაცხადა.

მისი თქმით, რუსეთი იქნება სუვერენული ძალა, ან საერთოდ არ იარსებებს.

„უნდა გვახსოვდეს, არასოდეს დავივიწყოთ და ვასწავლოთ ჩვენს შვილებს, რომ რუსეთი ან იქნება სუვერენული, თვითკმარი ძალა, ან საერთოდ არ იარსებებს“, – აღნიშნა პუტინმა .

მისი მტკიცებით, რუსეთი თავად განსაზღვრავს და შექმნის საკუთარ მომავალს.

ამასთან, რუსეთის პრეზიდენტი დასავლეთის მიერ დაწესებულ სანქციებზეც ისაუბრა და აღნიშნა, რომ დასავლეთის მხრიდან ზეწოლის მიუხედავად საზოგადოებამ და ხელისუფლების ყველა შტომ მოწიფულობა და სტაბილურობა გამოავლინა.

„ჩვენმა საზოგადოებამ და ხელისუფლების ყველა შტომ გამოავლინა სიმწიფე, ძალა და სტაბილურობა. ჩვენ ვუპასუხეთ გამოწვევებს, რადგან თანმიმდევრულად, ნაბიჯ-ნაბიჯ, ყოველწლიურად მივყვებით სუვერენიტეტის განმტკიცების გზას”, – განაცხადა პუტინმა.

ცნობისთვის, რუსეთის მმართველი პარტია „ერთიანი რუსეთის“ კონგრესმა საპრეზიდენტო არჩევნებში ვლადიმერ პუტინის კანდიდატურას ერთხმად დაუჭირა მხარი, – ინფორმაციას რუსული მედია ავრცელებს.

„კენჭისყრაზე გამომაქვს წინადადება, რუსეთის ფედერაციის პრეზიდენტის პოსტზე 2024 წლის 17 მარტს დაგეგმილ არჩევნებში ვლადიმერ პუტინის კანდიდატურის დასახელების მხარდაჭერაზე“, – განაცხადა პარტიის თავმჯდომარემ. დიმიტრი მედვედევმა ხმის მიცემის პროცედურის დაწყებამდე.

ვლადიმერ პუტინმა გასულ კვირას განაცხადა, რომ საპრეზიდენტო არჩევნებში მონაწილეობას მიიღებს. პუტინი რუსეთის პრეზიდენტად ოთხჯერ – 2000, 2004, 2012 და 2018 წლებში – აირჩიეს. ქვეყნის კონსტიტუციაში ცვლილებების მიღების შემდეგ მან უფლება მოიპოვა, კენჭი 2024 წლის არჩევნებშიც იყაროს.

ვლადიმირ პუტინის განცხადებით, რუსეთს ფინეთთან პრობლემები არ ჰქონია მანამ, სანამ ეს ქვეყანა „ნატოში არ შეათრიეს“. ამის შესახებ რუსეთის პრეზიდენტმა ერთ-ერთი ადგილობრივი ტელეკომპანიის ეთერში განაცხადა.

„ჩვენ რა, ფინეთთან რაიმე კამათი გვქონდა? ყველა კამათი, მათ შორის ტერიტორიული, რომლებიც მე-20 საუკუნის შუაში გვქონდა, დიდი ხანია გადაწყვეტილია. პრობლემები არ გვქონდა. ახლა გვექნება. იმიტომ რომ ახლა ლენინგრადის სამხედრო ოლქს შევქმნით და იქ დამატებით სამხედრო ქვედანაყოფებს განვათავსებთ. რაში სჭირდებათ ეს? რაღაც სისულელეა“, – განაცხადა პუტინმა.

ამასთან, მან დასძინა, რომ რუსეთს ნატოს ქვეყნებთან ომის არც გეოპოლიტიკური, არც ეკონომიკური და არც სამხედრო ინტერესი არ აქვს.

ფინეთი ნატოს წევრი 4 აპრილს გახდა. ქვეყანას ჩრდილოატლანტიკურ ალიანსში გაწევრიანების შესახებ განაცხადი რუსეთის უკრაინაში შეჭრის შემდეგ შეიტანა.

პოლონეთის სოფლის მეურნეობის მინისტრის მოადგილე ამბობს, რომ ევროკავშირში გაწევრიანების შემდეგ უკრაინისთვის 20 წლით უნდა დაიხუროს სოფლის მეურნეობის ბაზარი. ეს განცხადება მიხაილ კოლოძეიჩაკმა გააკეთა, რომელიც პოლონეთის სეიმში დონალდ ტუსკის „სამოქალაქო კოალიციის“ სიით შევიდა.

მისი თქმით, პოლონეთმა უკრაინის ევროკავშირში გაწევრიანების შემთხვევაში, საკუთარი ინტერესები უნდა დაიცვას. მიხაილ კოლოძეიჩაკის განმარტებით, უკრაინის სოფლის მეურნეობაში დომინირებს 95 ფერმერთა საქმიანობა.

„სწორედ ამიტომ უნდა დავიცვათ ჩვენი ინტერესები, მაგალითად, როგორც გერმანიამ გააკეთა, როდესაც პოლონეთი გაწევრიანდა ევროკავშირში – მაშინ პოლონელებისთვის შრომის ბაზარი გაყინული იყო 8 წლით. დღეს უნდა ვთქვათ, რომ უკრაინის სოფლის მეურნეობისა და კვების პროდუქტები, ნედლი და გადამუშავებული, არ უნდა შევიდეს პოლონეთში, მაგალითად, უკრაინის ევროკავშირში გაწევრიანების შემდეგ 20 წლის განმავლობაში“, – აღნიშნა პოლონელმა მაღალჩინოსანმა.