„თვითონ ამბობს, ჩემი გული უკრაინას ეკუთვნისო და რა ვქნათ ჩვენ? მისი გული თუ უკრაინას ეკუთვნის, ჩემი პოზიცია სხვანაირი რატომ უნდა იყოს“, – ამის შესახებ „ხალხის ძალის“ ერთ-ერთმა ლიდერმა გურამ მაჭარაშვილმა მიხეილ სააკაშვილის შესახებ მედიასთან განაცხადა.

მაჭარაშვილმა ასევე, ზოგადად ოპოზიციის შესახებ ისაუბრა და აღნიშნა, რომ ოპოზიციონერები იმაზეც კი ვერ თანხმდებიან, ტრიბუნიდან განცხადება ვინ უნდა გააკეთოს და ერთმანეთის კანონპროექტებსაც არ უჭერენ მხარს.

„ლელოს კონსოლიდაცია თავის თავში და პარტიაში უჭირს, რადგან აირჩია ხალხმა 4 წევრი და თავმჯდომარე თავქუდმოგლეჯილი გამოვარდა მოადგილესთან ერთად პარლამენტიდან, რა გვინდა პარლამენტშიო. ახლა ამბობენ, მომავალ პარლამენტში აგვირჩიოს ხალხმაო, ალბათ, იმისთვის, რომ ისევ გამოვიდნენ იქიდან. რაც შეეხება მინისტრთა ე.წ ჩრდილოვან კაბინეტს, ეს ფილმი ჩვენ ვნახეთ, როდესაც 2 თუ 3 წლის წინ ვაშაძემ თქვა, მე უნდა ვიყო ოპოზიციის პრემიერ-მინისტრობის კანდიდატიო, მერე მიხეილ სააკაშვილი დაასახელა „ნაციონალურმა მოძრაობამ“. ვაშაძე პრემიერ-მინისტრობის კანდიდატად წარადგინეს კი არა, 4-იდან 2 კაცი ძლივს შერჩა პარლამენტში დღეს და მიხეილ სააკაშვილი „ნაციონალურმა მოძრაობამ“ ვივამედში გაამწესა პრემიერობის ნაცვლად. დღეს ეს ხალხი ვერ თანხმდება იმაზე, ტრიბუნიდან ვინ გააკეთოს განცხადება და ერთმანეთის კანონპროექტებს არ უჭერენ მხარს. რომელ მინისტრების „პორტფელებს“ გაინაწილებენ ესენი, რომ კოალიცია შექმნან შემდგომ? ეს უკვე სასაცილო გახდა“, – განაცხადა გურამ მაჭარაშვილმა.

ჩვენთვის ევროატლანტიკური მისწრაფებები არის იგივე, პრინციპში, პრეზიდენტი ურსულა ფონ დერ ლაიენიც იმავეზე საუბრობს. ძალიან ვწუხვარ, რომ ვხედავ მზადყოფნას, რომ რაც შეიძლება ნეგატიური ინტერპრეტაცია მიეცეს საქართველოს ლიდერთა მიერ გაკეთებულ განცხადებებს, – ამის შესახებ სახელმწიფო მინისტრმა, თეა ახვლედიანმა ევროკავშირი-საქართველოს საპარლამენტო ასოცირების კომიტეტის სხდომაზე განაცხადა.

ახვლედიანის თქმით, საქართველოში გაკეთებული განცხადებები, ხშირად არასწორად არის აღქმული.

„როგორც საქართველოს მთავრობის წევრმა, თქვენი ნებართვით თავს უფლება მივეცი, ძალიან მოკლე კომენტარი გავაკეთო, რადგან საქართველოს პრემიერ-მინისტრი ბატონი ირაკლი ღარიბაშვილი სამჯერ იყო ნახსენები დღევანდელ გამოსვლებში. უპირველეს ყოვლისა, ქალბატონო თავმჯდომარევ, იმ ციტატასთან დაკავშირებით, რომელიც თქვენ ახსენეთ ბუდაპეშტში მისი გამოსვლიდან, მსურს, აღვნიშნო, რომ, რა თქმა უნდა, ეს ციტატა თქვენ მოიყვანეთ კონტექსტის გარეშე. ამ ციტატას წინ უძღოდა ის, რომ პრემიერ-მინისტრმა ხაზი გაუსვა სამოქალაქო თანასწორობას საქართველოში, იმას თუ რამდენად დაცულია ყველას უფლებები. მან ასევე ისაუბრა უმცირესობათა უფლებებზე, რომელთა დაცვაც საქართველოში პრიორიტეტს წარმოადგენს. ბატონმა ლუკ დევინმა ახსენა პრემიერ-მინისტრის კიდევ ერთი ციტატა GLOBSEC-იდან და დასვა კითხვა თუ რას ნიშნავდა ეს ციტატა. გეტვით, რასაც ნიშნავდა: ეს ნიშნავს, რომ სუვერენული სახელმწიფოს წინააღმდეგ განხორციელებული სამხედრო აგრესია და შეჭრა, რომელსაც ადგილი ჰქონდა 2008 წელს საქართველოში, იყო საერთაშორისო სამართლის მთავარი პრინციპების სერიოზული დარღვევა, ეს იყო გაერო-ს ქარტიის პრინციპების დარღვევა, მათ შორის სუვერენული სახელმწიფოს არჩევანის უფლების დარღვევა, რაც იმას ნიშნავს, რომ საქართველოს როგორც სუვერენული სახელმწიფოს და ქართველი ხალხის უფლებაა აირჩიოს ევროკავშირსა და ნატო-ში ინტეგრაცია და დიახ, ჩვენ თავს დაგვესხნენ იმისათვის, რომ შეეჩერებინათ ქვეყნის წინსვლა ამ გზაზე. იგივე მოხდა უკრაინის შემთხვევაშიც და მოვიყვან ციტატას, ევროკომისიის პრეზიდენტის ქალბატონ ურსულა ფონ დერ ლაიენის ციტატას, რომელიც მან ასევე GLOBSEC-ზე წარმოთქვა: „პირველად ჩვენს ისტორიაში (სხვათა შორის უნდა აღვნიშნო რომ ეს 21-ე საუკუნეში უკვე მეორედ მოხდა და არა პირველად) ქვეყანა არის თავდასხმის ქვეშ, რადგან მას აქვს სურვილი გახდეს ევროპული ოჯახის წევრი. ეს არის უკრაინის სუვერენული უფლება და მისი ხალხის მიერ მკაფიოდ გაცხადებული ნება და ა.შ“, – განაცხადა ახვლედიანმა.

სახელმწიფო მინისტრის თქმით, სამწუხაროა, რომ საქართველოს ლიდერთა მიერ გაკეთებულ განცხადებებს ნეგატიური ინტერპრეტაცია მოჰყვება ხოლმე.

„ჩვენთვის ევროატლანტიკური მისწრაფებები არის იგივე, პრინციპში, პრეზიდენტი ურსულა ფონ დერ ლაიენიც იმავეზე საუბრობს. ძალიან ვწუხვარ, რომ ვხედავ მზადყოფნას, რომ რაც შეიძლება ნეგატიური ინტერპრეტაცია მიეცეს საქართველოს ლიდერთა მიერ გაკეთებულ განცხადებებს. იმედი მაქვს, დღის მეორე ნაწილში მოვისმენთ ჩვენი პრემიერ მინისტრისა და სხვა ლიდერების იმ ციტატებს, რომელიც ეხება იმას თუ რამდენად ვუფრთხილდებით და ვაფასებთ ჩვენს ძალისხმევასა და ვალდებულებას, დავაკმაყოფილოთ ყველა კრიტერიუმი და მოთხოვნა. მესამე ციტატა, რომელიც ქალბატონმა თანათავმჯდომარემ ახსენა, მჯერა ამ ციტატასაც გამოეხმაურებიან საქართველოს პარლამენტის წევრები, თუმცა არასოდეს ჩემს სახელმწიფოში არ ყოფილა არცერთი შემთხვევა, რომ სხვა ქვეყნის მთავრობის, მაგალითად უკრაინის მთავრობის წევრთა ცალკეული იდეები და მოსაზრებები თუ ევროპარლამენტის წევრთა მოსაზრებები გაგვეთანაბრებინა ევროპული ინსტიტუტების ან სახელმწიფოთა საერთო მოსაზრებებთან. ამიტომ, ვერ დაგეთანხმებით, რომ პრემიერ-მინისტრის მიერ გაკეთებული ეს განცხადება იყო ანტიდასავლური. პირველ რიგში, კონტექსტი იყო აბსოლუტურად სხვაგვარი“, – განაცხადა ახვლედიანმა.

თბილისის მერის კახა კალაძის განცხადებით, 2008 წლის აგვისტოს მოვლენების დროს საქართველოს უცხოელი მეგობრების მხრიდან მხოლოდ შეშფოთება გამოიხატა.

კალაძემ აღნიშნული კომენტარი გააკეთა უკრაინაში მიმდინარე მოვლენებსა და ნატო-ს გაფართოებასთან დაკავშირებით ჟურნალისტის კითხვის საპასუხოდ, რომელიც პრემიერ-მინისტრის განცხადებას ეხებოდა.

„ახლა გაიგეთ, რომ ეს ძალიან დიდი პრობლემაა? ახლა მოისმინეთ პირველად? მაკრონის განცხადებები არ მოგისმენიათ? სხვა, ჩვენი უცხოელი მეგობრების განცხადებები არ მოგისმენიათ ამასთან დაკავშირებით? ქალბატონი ვიოლას განცხადება არ მოგისმენიათ? რა თქმა უნდა, ევროპულ მომავალზე იყო საუბარი და მოვისმინე. არაერთი განცხადება მაქვს მოსმენილი. ზელენსკის განცხადება არ გაქვთ მოსმენილი? მესმის, რომ მწარეა სიმართლე და არ სურთ, მისი მოსმენა. ის უბედურება, რაც 2008 წელს მოხდა ჩვენს ქვეყანაში, როდესაც ტერიტორიები დავკარგეთ, უამრავი ადამიანი დაიღუპა, როგორც მშვიდობიანი მოსახლეობა, ასევე ჩვენი გმირი ჯარისკაცები, რა იყო, რა ნაბიჯები გადაიდგა ე.წ. მეგობრების მხრიდან? მხოლოდ აღშფოთება და შეშფოთება. ეს არის რეალობა“, – აღნიშნა დედაქალაქის მერმა.

ძალიან ვწუხვარ, თუ თქვენ ხედავთ, რომ ჩვენს დღევანდელ დისკუსიას მივყავართ პოლარიზაციამდე საქართველოში. ჩემი რჩევა იქნება – ნუ ადანაშაულებთ სხვებს! სარკეში ჩაიხედეთ და დაინახეთ, რისი გაკეთება შეგიძლიათ უკეთესად! – ასე მიმართა ევროპარლამენტარმა მარინა კალიურანდმა „ქართული ოცნების“ წევრს, გარემოს დაცვისა და ბუნებრივი რესურსების კომიტეტის თავმჯდომარე მაია ბითაძეს, საქართველო-ევროკავშირის ასოცირების საპარლამენტო კომიტეტის მეთორმეტე შეხვედრაზე.

კალიურანდის განცხადებით, როდესაც ევროპარლამენტარები აკეთებენ შეფასებას, რომ მათ ესმით ანტიდასავლური რიტორიკა, რომ ისმის ბრალდებები პარლამენტის წევრების წინააღმდეგ, რომ არის ბრალდებები ევროპარლამენტის პოლიტიკური ფრაქციებისა და ევროკავშირის სხვა ინსტიტუციების წინააღმდეგ, ჩვენ ეს მოწმენდილ ცაზე არ მოგვაქვს, ეს არის თქვენი ლიდერების მიერ გაკეთებული კონკრეტული განცხადებები, ეს გამოწვეულია ქართველი ლიდერების განცხადებებით. ამის დასტურად ევროპარლამენტარმა კალიურანდმა საქართველოს პრემიერ-მინისტრის მიერ მიცემული ინტერვიუდან ის ციტატა წაიკითხა, რომელიც ევროპარლამენტს ეხებოდა.

„როდესაც მე ვახსენე აგრესიის წახალისება, მე ვგულისხმობდი საქართველოს პრემიერ-მინისტრის ინტერვიუს, რომელიც მან მისცა 12 მარტს ტელეკომპანია „იმედს“, სადაც მან თქვა: „ევროპარლამენტმა საკუთარ თავს მიხედოს, რატომ გვკარნახობენ რა გავაკეთოთ, მათი სურვილი იყო და არის საქართველოს ჩართვა რუსეთის წინააღმდეგ ომში!“ ეს არის პრემიერ-მინისტრის სიტყვები. თუ გსურთ მე განცხადებების ორი გვერდი მაქვს და შემიძლია კითხვა გავაგრძელო, გსურთ ყველა განცხადების მოსმენა ?! მე მხოლოდ იმის თქმა მსურდა, რომ როდესაც ჩვენ ვამბობთ, რომ გვესმის ანტიდასავლური რიტორიკა, რომ ისმის ბრალდებები პარლამენტის წევრების წინააღმდეგ, რომ არის ბრალდებები ევროპარლამენტის პოლიტიკური ფრაქციებისა და ევროკავშირის სხვა ინსტიტუციების წინააღმდეგ, ჩვენ ეს მოწმენდილ ცაზე არ მოგვაქვს, ეს არის თქვენი ლიდერების მიერ გაკეთებული კონკრეტული განცხადებები, რომელიც ჩვენ გვესმის და ვიღებთ აქ ბრიუსელში. და ასევე მინდა ვთქვა, რომ ძალიან ვწუხვარ თუ თქვენ ხედავთ, რომ ჩვენს დღევანდელ დისკუსიას მივყავართ პოლარიზაციამდე საქართველოში. ჩემი რჩევა იქნება, ნუ ადანაშაულებთ სხვებს, სარკეში ჩაიხედეთ და დაინახეთ, რისი გაკეთება შეგიძლიათ უკეთესად“, – განაცხადა კალიურანდმა.

ცნობისთვის, მაია ბითაძის შეფასებით, რომელიც მან საქართველო-ევროკავშირის ასოცირების საპარლამენტო კომიტეტის მეთორმეტე შეხვედრაზე გააკეთა, ის განცხადებები, რაც მან მოისმინა შეურაცხმყოფელი და იმედის გამაცრუებელი იყო. ბითაძის თქმით, ზოგი განცხადება, არა დეპოლარიზაციის, არამედ პოლარიზაციისკენ გადადგმული ნაბიჯია.

თბილისის მერის კახა კალაძის განცხადებით, მნიშვნელობა არ აქვს, ლევან ხაბეიშვილს დატოვებენ თუ არა „ნაციონალური მოძრაობის“ ლიდერად, რადგან ამ პარტიის წარმომადგენლები მარცხისთვის არიან განწირული.

„არ ვიცი მათი დაპირისპირების საგანი. ლევან ხაბეიშვილი დღეს „ნაციონალური მოძრაობის“ ლიდერია. სხვათაშორის, პარტიის თავმჯდომარეობის არჩევნებში მას ვგულშემატკივრობდი. ერთი რამ ცხადია, ვიცით, ვინც იყო შემოქმედი რადიკალიზმის, ბოროტების, იმ უბედურების, რაც ქვეყანაში 2012 წლამდე ხდებოდა. ამ პოლიტიკურ პარტიებს და მათ წარმომადგენლებს მომავალი არ აქვთ, განწირული იქნებიან მარცხისთვის. ჩვენი ქვეყნის მოსახლეობის დიდმა ნაწილმა, სამწუხაროდ, თავის თავზე გამოსცადა ეს უბედურება, შესაბამისად, წარსულს მოსახლეობა არასდროს დაუბრუნდება“, – განაცხადა კახა კალაძემ.

მისი განმარტებით, მომავალი არჩევნებისთვის ოპოზიციის კონსოლიდაცია არაფერს შეცვლის, რადგან ისინი ერთი იდეოლოგიის მატარებლები არიან.

„ისინი ერთი მრწამსის ადამიანები არიან. ერთ დროს ერთი კონკრეტული ფრთის – სააკაშვილის გაერთიანების ქვეშ იყვნენ, შემდეგ დაიშალნენ, შექმნეს საკუთარი პარტიები, როგორ გამოვლენ არჩევნებში, ცალკეულად, თუ გაერთიანებულად, ეს არაფერს ცვლის“, – აღნიშნა კახა კალაძემ.