პრეზიდენტი ისე როცა მოქმედებს, რომ ეროვნული ბანკის კოორდინაცია ჩაშლილი იყოს, იძულებული ვხდებით, ისეთი ნაბიჯი გადავდგათ, რაც ამ ინსტიტუტის გამართულ მუშაობას უზრუნველყოფს, – ამის შესახებ პარლამენტის საპროცედურო საკითხთა კომიტეტის თავმჯდომარე ირაკლი ქადაგიშვილმა საქართველოს პირველ არხს განუცხადა.

მისი თქმით, პრეზიდენტი ცდილობს, რომ ხელისუფლებას ყველაფერში პოლიტიკური წინააღმდეგობა გაუწიოს.

„საბოლოო ჯამში, პოლიტიკური პასუხისმგებლობა ეკისრება არა პრეზიდენტსა და ეროვნულ ბანკს, არამედ ხელისუფლებას, თუ როგორია ქვეყანაში ინფლაცია, ლარის კურსი, მონეტარული პოლიტიკა. ინსტიტუციური დამოკიდებულება ისე არ უნდა გავიგოთ, რომ ეს არ არის მჭიდრო თანამშრომლობის არეალი. რა თქმა უნდა, უნდა იყოს თანამშრომლობა და ამის ჩაშლაზეა საუბარი, რისი დაძლევაც გვინდა. ხელისუფლება იმ პასუხისმგებლობას ვერ მოიხსნის, რომელიც მის წინაშეა. პრეზიდენტი ცდილობს, რომ ის პოლიტიკა, რაც ბოლო ერთი წელია აირჩია, ხელისუფლებას ყველაფერში პოლიტიკური წინააღმდეგობა გაგვიწიოს. ეს ღიად და აშკარად იკვეთება მის განცხადებებში თუ ქმედებებში. რა მიზანი აქვს, ეს ცალკე მსჯელობის საგანია“, – განაცხადა ირაკლი ქადაგიშვილმა.

პარტია „ხალხისთვის” ლიდერი, ანა დოლიძე გამოდის ინიციატივით და სახელმწიფოს მოუწოდებს გაატაროს რეალური პოლიტიკა ახალგაზრდა ოჯახების მიმართ.

ანა დოლიძე მიიჩნევს, რომ სახელმწიფომ ახალგაზრდა ოჯახებს პირველი უძრავი ქონება უნდა დაუსუბსიდიროს.

„კობახიძის ცინიზმს უნდა დავუპირისპიროთ რეალური პოლიტიკა, რომელიც დღეს სახელმწიფოს არ გააჩნია. სახელმწიფოს უნდა ჰქონდეს პოლიტიკა ახალგაზრდა ოჯახების მიმართ. ევროპის ყველა ქვეყანაში არის სხვადასხვა ტიპის მხარდამჭერი პროგრამები ახალგაზრდა ოჯახების მიმართ. დღევანდელი ეკონომიკური მდგომარეობიდან გამომდინარე, ასობით ახალგაზრდა ოჯახს უწევს კრედიტის გადახდა დიდი ხნის განმავლობაში, ამას ემატება გაზრდილი ფასები ყველა მიმართულებით. ჩემი შეთავაზებაა სახელმწიფომ დაასუბსიდიროს ახალგაზრდა ოჯახების პირველი შენაძენი ბინა/სახლი. ეს არის აპრობირებული მეთოდი ბევრ ქვეყანაში. ეს ყოველივე ხელს შეუწყობს ახალგაზრდა ოჯახების გაძლიერებას და არ გვექნება ის შედეგი, რაც დღეს განქორწინებების მიმართულებით გვაქვს, დიდი ნაწილი სწორედ ფინანსურ მდგომარეობას უკავშირდება”, – განაცხადა ანა დოლიძემ.

ანა დოლიძის განცხადებას პარტია „ხალხისთვის“ ავრცელებს.

ვენეციის კომისიამ საქართველოს პარლამენტის მიერ ინიცირებულ კანონს „დეოლიგარქიზაციის შესახებ“ რეკომენდაცია არ გაუწია. ოფიციალურ დოკუმენტში აღნიშნულია, რომ კანონპროექტი ქართულმა მხარემ არ უნდა მიიღოს.

კომისიის ანგარიშში აღნიშნულია, რომ უკრაინისა და საქართველოს და მოლდოვას კონტექსტი ერთმანეთისგან განსხვავდება და ამ ქვეყნების მიდგომები საქართველოს არ გამოადგება.

„ვენეციის კომისია რეკომენდაციას უწევს, რომ კანონპროექტი არ იქნეს მიღებული.

საქართველოში ოლიგარქიული გავლენის წინააღმდეგ საბრძოლველად საჭიროა:

• არსებული სისტემური ღონისძიებების სიღრმისეული და ყოვლისმომცველი ანალიზის ჩატარება
მათი ნაკლოვანებები სტრუქტურის, უფლებამოსილების და კოორდინაციის თვალსაზრისით;

• მაკორექტირებელი, დამატებითი ან დამატებითი კანონმდებლობის ან ზომების შემუშავება, რომებიც
მოიცავს:

🔴 ეფექტური კონკურენციის პოლიტიკის ჩამოყალიბებასა და განხორციელებას;

🔴 მაღალი დონის კორუფციის წინააღმდეგ ბრძოლის გაძლიერებას და მის პრევენციას;

🔴 სახელმწიფო შესყიდვების გამჭვირვალობისა და ანგარიშვალდებულების დაცვას;

🔴 მედიის პლურალიზმისა და მედიის მფლობელობის გამჭვირვალობის გაძლიერებას;

🔴 ფულის გათეთრების საწინააღმდეგო პოლიტიკის შემდგომი გაძლიერებას;

🔴 პოლიტიკური პარტიებისა და საარჩევნო კამპანიების დაფინანსების წესების გაძლიერებას;

🔴 საგადასახადო კანონმდებლობის ცვლილებას.

ვენეციის კომისია ხაზს უსვამს, რომ ზემოაღნიშნული სისტემის ფუნქციონირებისთვის, საჭიროა სასამართლო სისტემის ჰოლისტიკური რეფორმა, რომელიც მიზნად ისახავს მისი დამოუკიდებლობის, მთლიანობის უზრუნველყოფას და მიუკერძოებლობას“, – აღნიშნულია კომისიის განცხადებაში.