რუსეთი უკრაინას Shahed-ის დრონების გამოყენებით წუხელ კიდევ ერთხელ დაესხა თავს, – ინფორმაციას უკრაინული მედია ავრცელებს.

მათივე ინფორმაციით, აფეთქებების ხმა თავდაპირველად მიკოლაივში გაისმა, შემდეგ კი – ოდესაში. საჰაერო ძალების ცნობით, მიკოლაივისა და ოდესის გარდა უპილოტო საფრენი აპარატებით თავდასხმის საფრთხე არსებობს ხერსონის, ზაპოროჟიეს, დონეცკისა და დნეპროპეტროვსკის ოლქებში. ბალისტიკური იარაღის გამოყენების საფრთხე კი პოლტავას, ჩერკასის, დნეპროპეტროვსკის, ხარკოვის, კიროვოგრადის ოლქებში.

მიკოლაივის ოლქის სამხედრო ადმინისტრაციის ხელმძღვანელის, ვიტალი კიმის განცხადებით, თავდასხმის შემდეგ ქალაქში ხანძარი გაჩნდა, თუმცა მსხვერპლი არ მოჰყოლია. ქალაქის მერმა, ალექსანდრე სენკევიჩმა ხანძარს საკმარისად სერიოზული უწოდა. „ადგილზე სახელმწიფო საგანგებო სიტუაციების სამსახურის მაშველები მუშაობენ“, – აღნიშნა მან.

40-მდე იერიში მიიტანეს რუსმა ოკუპანტებმა სუმის ოლქზეც. იქ 252 აფეთქება მოხდა, დაიღუპა 2, დაშავდა 10 ადამიანი. დრონებით თავდასხმის შესახებ ცნობას ავრცელებს ოდესის საოლქო ადმინისტრაციაც. მათივე განცხადებით, შავ ზღვაში ოკუპანტების რაკეტმზიდების გააქტიურება შეინიშნება.

ბალისტიკური რაკეტებით დაბომბვის საშიშროების გამო, უკრაინის რამდენიმე ოლქში განგაში იყო გამოცხადებული.

ხუთი ადამიანი დაიღუპა, შვიდი კი დაშავდა ვარშავასთან ახლოს მომხდარი ავიაკატასტროფისას ხუთი ადამიანი დაიღუპა, შვიდი კი დაშავდა.

ინფორმაციას BBC ავრცელებს.

მცირე ზომის თვითმფრინავი სოფელ ჰრცინოში ჩამოვარდა და ანგარს დაეცა, რომელსაც, ძლიერი ქარიშხლის გამო, ადგილობრივები აფარებდნენ თავს.

გავრცელებული ცნობით, თვითმფრინავში სამი პილოტი იმყოფებოდა. ერთი დაიღუპა, ორი კი დაშავდა. ავარიის გამომწვევ მიზეზად ავდარი სახელდება.

გაერთიანებული სამეფოს საგარეო საქმეთა მინისტრის, ჯეიმს კლევერლის განცხადებით, მსოფლიო ვერ დაუშვებს უკრაინაში მიმდინარე ომის გაჭიანურებას და მოუწოდებს რუსეთის პრეზიდენტს, ვლადიმერ პუტინს, სასწრაფოდ გაიყვანოს ჯარები უკრაინიდან.

„ვერ დავუშვებთ, რომ ეს ომი კიდევ 500 დღეს გაგრძელდეს. პრეზიდენტ ზელენსკის ათპუნქტიანმა გეგმამ წინსვლის გზა აჩვენა. უკრაინას მშვიდობა სურს. ჩვენ გვინდა მშვიდობა. მთელ მსოფლიოს სურს მშვიდობა”, – განაცხადა ბრიტანეთის საგარეო უწყების ხელმძღვანელმა ნიუ-იორკში, გაერო-ს უშიშროების საბჭოს სხდომაზე სიტყვით გამოსვლისას.

მან ხაზგასმით აღნიშნა, რომ სამართლიანი და ხანგრძლივი მშვიდობა არის ის, რაც საერთაშორისო საზოგადოებას სურს და რუსეთმა ეს არჩევანი დღესვე უნდა გააკეთოს უკრაინიდან მთელი თავისი ჯარის გაყვანით.

„ბატონო პუტინო, დააბრუნეთ თქვენი ჯარები შინ, დაასრულეთ ეს ომი ახლავე“, – აღნიშნა კლევერლიმ.

კანადაში ტყის ხანძრების შედეგად 10 მილიონ ჰექტარზე მეტი ტერიტორია დაიწვა, რაც ისლანდიის ფართობის ტოლია, – ამის შესახებ ინფორმაციას The Guardian-ი ავრცელებს.

ხანძარს ორი მეხანძრის სიცოცხლე ემსხვერპლა.

სინოპტიკოსები აცხადებენ, რომ მოსალოდნელია მაღალი ტემპერატურის ზაფხულის დარჩენილ პერიოდში შენარჩუნება.

ხანძრების გამო, 120 000-ზე მეტი ადამიანი იძულებული გახდა, საკუთარი საცხოვრებელი დაეტოვებინა, შეფერხდა ნავთობისა და გაზის წარმოება ალბერტაში. კანადის ტყის პროდუქტების ასოციაციის ხელმძღვანელმა, დერეკ ნაიბორმა ადგილობრივ მედიას განუცხადა, რომ ხანძრების გამო ქარხნები დროებით დაიხურა.

ყველაზე რთული მდგომარეობაა კანადის დასავლეთში, ბრიტანეთის კოლუმბიაში, სადაც ასობით ხანძარი მძვინვარებს. სიტუაციას კიდევ უფრო ართულებს გვალვა. პროვინციაში ხანძართან ბრძოლაში კანადელ მეხანძრეებს ავსტრალიელი, ამერიკელი, მექსიკელი და ახალი ზელანდიელი მეხანძრეებიც ეხმარებიან. კანადის სატყეო სამსახურის ჩრდილოეთ სატყეო ცენტრის გენერალური დირექტორის, მაიკლ ნორტონის განცხადებით, მიმდინარე ხანძრის სეზონის დასაძლევად საჭიროა საერთაშორისო მხარდაჭერის უპრეცედენტო დონე.

აშშ, სხვა ქვეყნებთან ერთად, გააგრძელებს მუშაობას უკრაინიდან მარცვლეულის გატანის უზრუნველსაყოფად, – ამის შესახებ თეთრი სახლის სტრატეგიული კომუნიკაციების კოორდინატორმა ეროვნული უსაფრთხოების საკითხებში, ჯონ კირბიმ განაცხადა.

ამასთან, აშშ-ის სახელმწიფო მდივანმა, ენტონი ბლინკენმა შავი ზღვის მარცვლეულის შეთანხმებიდან რუსეთის გასვლა “არაკეთილსინდისიერ” ნაბიჯად შეაფასა და განაცხადა, რომ შეთანხმება რაც შეიძლება სწრაფად უნდა აღდგეს.

„იმედი მაქვს, რომ ამას ყველა ქვეყანა ყურადღებით ადევნებს თვალს. დაინახავენ, რომ რუსეთი პასუხისმგებელია საკვების იმ ადამიანებისთვის მიწოდებაზე უარის თქმაზე, რომლებსაც ეს უკიდურესად სჭირდებათ მთელ მსოფლიოში და ფასების ზრდის ხელშეწყობაზე იმ დროს, როდესაც ბევრ ქვეყანაში ძალიან მძიმე ინფლაციაა“, – განაცხადა ბლინკენმა.

მისი თქმით, უკრაინელები, აშშ და სხვა ქვეყნები ეძებენ, არსებობს თუ არა სხვა ვარიანტები შავი ზღვის გავლით ბაზარზე მარცვლეულის უსაფრთხოდ ტრანზიტისთვის, როგორიცაა სარკინიგზო და საავტომობილო, მაგრამ, მისი თქმით, ალტერნატივების მოძიებაში არსებობს გამოწვევები.

„გამოწვევა ასეთია: თუ რუსეთი დაასრულებს ამ ინიციატივას და აგზავნის მესიჯს, რომ მარცვლეული და სხვა საკვები პროდუქტები ვერ დატოვებს უკრაინას შეუფერხებლად, ვფიქრობ, ეს საშინელ გავლენას მოახდენს მათ გატანაზე, თუნდაც სხვა ვარიანტები იყოს. სხვა ქვეყნები, კომპანიები, გადამზიდველები და ა.შ., ძალიან შეშფოთებულები იქნებიან იმით, თუ რა მოუვა მათ გემებს და მათ პერსონალს, თუ რუსეთი ეწინააღმდეგება უკრაინიდან საკვები პროდუქტების ნებისმიერ ექსპორტს“, – აღნიშნა ბლინკენმა.

შეგახსენებთ, რუსეთის ხელისუფლებამ გუშინ განაცხადა, რომ მოსკოვი შავი ზღვის მარცვლეულის შეთანხმებას ტოვებს.

ორი თვის წინ დაკარგული ავსტრალიელი მეზღვაური და მისი ძაღლი წყნარ ოკეანეში იპოვეს.

ისინი ამ ხნის განმავლობაში უმი თევზით იკვებებოდნენ და წვიმის წყლის სვამდნენ.

ექიმების თქმით მამაკაცის მდგომარეობა სტაბილურია.

სიდნეის მკვიდრმა, 51 წლის ტიმ შადოკმა ძაღლთან ერთად აპრილში მექსიკიდან საფრანგეთის პოლინეზიისკენ გაცურა, რა დროსაც ძლიერმა ქარიშხალმა მისი ნავი დააზიანა და ის წყნარი ოკეანის ჩრდილოეთ ნაწილში აღმოჩნდა.

„მძიმე განსაცდელი გამოვიარე ზღვაში. უბრალოდ დასვენება და კარგი კვება მჭირდება, რადგან დიდი ხნის განმავლობაში მარტო ვიყავი ზღვაში. სხვა მხრივ, ძალიან ჯანმრთელად ვარ“. – ამბობს მეზღვაური ინტერვიუში.

უკრაინის პრეზიდენტი აცხადებს, რომ, შეთანხმებიდან რუსეთის გასვლის მიუხედავად, მარცვლეულის ექსპორტი გაგრძელდება.

ამის შესახებ ნათქვამია ვოლოდიმირ ზელენსკის განცხადებაში, რომელსაც მისი პრესმდივანი აქვეყნებს.

„ჩვენ გვქონდა ორი შეთანხმება: უკრაინა, თურქეთი, გაერო; მეორე შეთანხმება: რუსეთი, თურქეთი, გაერო. ამიტომ როდესაც რუსეთი ამბობს, რომ აჩერებს შეთანხმებას, ის არღვევს შეთანხმებას გაერო-ს გენერალურ მდივან ანტონიო გუტერეშთან, თურქეთის პრეზიდენტ ერდოღანთან და არა ჩვენთან. ჩვენ მათთან არანაირი შეთანხმება არ გვქონდა“, – ნათქვამია განცხადებაში.

ზელენსკის განმარტებით, საგარეო საქმეთა სამინისტროს დაავალა, მოამზადოს „ოფიციალური სიგნალი“ გაერო-სა და თურქეთისთვის, რათა მათ უპასუხონ უკრაინის პრეზიდენტს, რომ მზად არიან, გააგრძელონ ინიციატივა.

„რუსეთის გარეშეც კი საჭიროა ყველაფრის გაკეთება, რათა შევძლოთ შავი ზღვის დერეფნით სარგებლობა. ჩვენ არ გვეშინია. ჩვენ მოგვმართეს ხომალდების მფლობელმა კომპანიებმა. მათ თქვეს, რომ მზად არიან, თუ უკრაინა გამოუშვებს ტვირთს, ხოლო თურქეთი მას გაატარებს – ყველა მზადაა, გააგრძელოს მარცვლეულის მიწოდება“, – განაცხადა ზელენსკიმ.