ჩვენს საბოლოო მიზანს წარმოადგენს ნატო-ში გაწევრიანება, საქართველოს უკვე აქვს ყველა არსებითი ინსტრუმენტი ალიანსში წევრობისთვის, – ამის შესახებ ნატო-ში საქართველოს ელჩმა, ვიქტორ დოლიძემ განაცხადა.

ვიქტორ დოლიძის თქმით, ეს არაერთხელ უთქვამთ უმაღლესი დონის შეხვედრებზე.

„მოგეხსენებათ, ჩვენს საბოლოო მიზანს წარმოადგენს ნატო-ში გაწევრიანება, რაშიც აბსოლუტურად დარწმუნებული ვარ, თუმცა რა ფორმატით მოხდება, როგორ მოხდება, ეს იქნება MAP-ი, თუ MAP-ის გარეშე, ამას არსებითი მნიშვნელობა აღარ აქვს. საქართველოს უკვე აქვს ყველა არსებითი ინსტრუმენტი ნატო-ში წევრობისთვის. ეს არაერთხელ თქმულა უმაღლესი დონის შეხვედრებზე და, მგონი, როგორც ნატო-ელები, ასევე ქართველები ამასთან დაკავშირებით ვყალიბდებით.

რაც შეეხება ვაშინგტონის სამიტს, მომავალი წელი გვაქვს ძალიან ამბიციური, რეალისტური და საქართველოსთვის კანდიდატობის მიცემა გზას უხსნის როგორც ევროპულ, ასევე ევროატლანტიკურ ინტეგრაციას. მნიშვნელოვანი გეგმები გვაქვს ამასთან დაკავშირებით. დარწმუნებული ვართ, როგორც ვაშინგტონში, ასევე ბრიუსელსა და თბილისში შედგება უმაღლესი დონის დელეგაციების ვიზიტები და არა მხოლოდ პრაქტიკულად, შინაარსობრივად იქნება გამართული ჩვენი თანამშრომლობის მექანიზმები, წინ გადადგმული ნაბიჯები გვექნება როგორც ევროკავშირის, ასევე ნატო-ს მხრივ“, – განაცხადა ვიქტორ დოლიძემ.

ოპოზიციას საამაყო ამ პროცესში არაფერი აქვს, საკუთარ თავზე რომ ილაპარაკონ, შესაბამისად, ცდილობენ, რომ რაღაცნაირად იქნებ ხელისუფლებას მოცხონ ჩირქი, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.

„ოპოზიციისთვის ახლა მთავარია, როგორმე თავი მიიტანოს საპარლამენტო არჩევნებამდე. საამაყო ამ პროცესში არაფერი აქვთ, საკუთარ თავზე რომ ილაპარაკონ. შესაბამისად, ცდილობენ, რომ რაღაცნაირად იქნებ ხელისუფლებას მოცხონ ჩირქი. ჩვენი ამოცანაა დავიწყოთ რეკომენდაციების შესრულება. მოლოდინი საკმაოდ პოზიტიურია ჩვენი მხრიდან, თუმცა, იმასაც ვითვალისწინებთ, რომ ერთ-ერთი რეკომენდაცია იქ არის არჩევნების ჩატარებასთან დაკავშირებით. თუ იმას გავითვალისწინებთ, რომ არჩევნები 26 ოქტომბერსაა, ჩვენ ამ რეკომენდაციების სრულად შესრულებას ნოემბრამდე ვერ შევძლებთ და ეს პერიოდიც უნდა იყოს გათვალისწინებული“,- აღნიშნა სამხარაძემ.

საქართველოს მთავრობამ ევროკომისიის მიერ განსაზღვრული ნაბიჯების შესრულების სამოქმედო გეგმა გამოაქვეყნა.

ჩვენ გვაქვს ძალიან სერიოზული გამოწვევები როგორც უსაფრთხოების, ისე ეკონომიკური და გეოპოლიტიკური თვალსაზრისით და საქართველო არის ამერიკის შეერთებული შტატების ყველაზე ახლო მოკავშირე რეგიონში, – ამის შესახებ საქართველოს ელჩმა აშშ-ში დავით ზალკალიანმა ელჩების კონფერენციაზე ჟურნალისტებთან განაცხადა.

მისი თქმით, ევროინტეგრაციის გზაზე აშშ-ის მხარდაჭერა უაღრესად ფასეული, საჭირო და დროული იყო.

„ამერიკის შეერთებული შტატები არის საქართველოს მთავარი სტრატეგიული პარტნიორი და სწორედ ამ კუთხიდან გამომდინარე ჩვენი მიმდინარე წლის თანამშრომლობა, აქტიური კომუნიკაცია და კონტაქტები სწორედ განპირობებული იყო ამ დატვირთვით. ყველამ კარგად ვიცით, თუ რაოდენ დიდი როლი ენიჭება ამერიკის შეერთებულ შტატებს და მათ მხარდაჭერას საქართველოს ევროპული ინტეგრაციის გზაზე. მიმდინარე წელს უმაღლესი დონის შეხვედრები იყო და ერთ-ერთი ასეთი გადამწყვეტი შეხვედრა იყო ნიუ-იორკში საქართველოს პრემიერსა და ამერიკის შეერთებული შტატების უსაფრთხოების საკითხებში პრეზიდენტის მრჩეველთან ჯეკ სალივანთან. ვფიქრობ, რომ მათი მხარდაჭერა იყო უაღრესად ფასეული, საჭირო და ძალიან დროული და ეს თანამშრომლობა დარწმუნებული ვარ რომ თვისობრივად უფრო მაღალ დონეზე გადავა 2024 წელს. ჩვენ გვაქვს ძალიან სერიოზული გამოწვევები როგორც უსაფრთხოების, ისე ეკონომიკური და გეოპოლიტიკური თვალსაზრისით და საქართველო არის ამერიკის შეერთებული შტატების ყველაზე ახლო მოკავშირე რეგიონში. ჩვენი თანამშრომლობა უკვე 30 წელზე მეტს ითვლის და ყოველ წელს ეს თანამშრომლობა კიდევ უფრო მყარდება და ძლიერდება. ჩვენ ვასრულებთ უაღრესად მნიშვნელოვან ფუნქციას რეგიონში ყველა იმ საკითხში, სადაც აქვს ამერიკის შეერთებულ შტატებს ინტერესი. მინდა განსაკუთრებით გამოვყო სამხრეთ კავკასიაში საქართველოს როლი და პრემიერის აქტიური მედიაცია სამხრეთ კავკასიაში გრძელვადიან მშვიდობის დამყარების საქმეში. ჩვენი ამერიკელი პარტნიორები ძალიან აფასებენ ამას ისე, როგორც ყველა ჩვენს ჩართულობას სერიოზული გეოპოლიტიკური გამოწვევების კონტექსტში, რომელიც ადრე დაკავშირებული იყო ავღანეთთან, რომელიც არის დაკავშირებული დღეს თანამშრომლობასთან საერთო გამოწვევების წინააღმდეგ ბრძოლაში და დარწმუნებული ვარ, რომ მომავალი წელი გამორჩეული იქნება ჩვენ გვექნება ძალიან საინტერესო და აქტიური კონტაქტები ჩვენს ამერიკელ პარტნიორებთან“, – განაცხადა ზალკალიანმა.

საქართველოს ევროინტეგრაციის პროცესში გერმანიის ფედერაციული რესპუბლიკა ჩამოყალიბდა, როგორც მტკიცე მხარდამჭერი, ლიდერი ქვეყანა, ამას მოწმობს მაღალი დონის, ორმხრივი შეხვედრების უპრეცედენტო დინამიკა, რომელიც ბუნებრივია, მომავალ წელსაც გაგრძელდება, – ამის შესახებ გერმანიაში საქართველოს ელჩმა, ლევან იზორიამ განაცხადა.

იზორიას განცხადებით, გერმანიაში გამართული შეხვედრების დღის წესრიგის მთავარი, პრიორიტეტული თემა არის და იქნება ევროკავშირში სრულფასოვანი გაწევრიანება.

„ის შეხვედრები, რომელიც წლის განმავლობაში შედგა, იყო განმსაზღვრელი ფაქტორი, რომ მიგვეღო ევროკავშირის კანდიდატი ქვეყნის სტატუსი. ამაში თავისი განსაკუთრებული როლი შეიტანა პრემიერ-მინისტრის აქტიურმა დინამიკამ, მისმა ვიზიტებმა გერმანიის ფედერაციულ რესპუბლიკაში. ათი თვის განმავლობაში თითქმის ოთხჯერ შედგა მაღალი დონის კომუნიკაცია. წელსაც ეს იყო დაკავშირებული პირისპირ შეხვედრასთან. მინდა, ასევე გავიხსენო ქალბატონი ბერბოკის ვიზიტი მარტის თვეში. განმსაზღვრელი გახლდათ 2 ნოემბრის კონფერენცია, სადაც ბატონი მინისტრის მოხსენებით გამოსვლამ გადამწყვეტი როლი ითამაშა პოზიტიური გადაწყვეტილების გაცემის თვალსაზრისით. გერმანიის ფედერაციული რესპუბლიკა ასევე პოზიტიურად შეხვდა მთავრობის მყისიერ რეაგირებას, როდესაც 27 ნოემბერს სახელმწიფო კომისიის მიერ განისაზღვრა რეკომენდაციების განხორციელების მიზნით კონკრეტული გეგმა. ჩვენ ახლა უკვე გვაქვს სამოქმედო გეგმა, რომ ჩვენი თანამშრომლობის პლატფორმა, როგორც ევროკავშირთან, ისე განსაკუთრებით მის ლიდერ ქვეყანასთან, გერმანიის ფედერაციულ რესპუბლიკასთან იყოს კონკრეტული ფორმატებით განსაზღვრული“, – განაცხადა იზორიამ.

ლევან იზორიას თქმით, მომავალი წელი საქართველო-გერმანიის ურთიერთობებში არანაკლებ საინტერესო იქნება.

„მომავალი წელი უფრო მეტი სამუშაო ვიზიტით იქნება დახუნძლული. ამას კარგი წინაპირობა აქვს. იცით, რომ სულ რაღაც ერთი კვირის წინ პირველად, ჩვენი ქვეყნის დიპლომატიური ურთიერთობების ისტორიაში, გახლდათ შინაგან საქმეთა ფედერალური მინისტრი სტუმრად. მოეწერა ხელი მნიშვნელოვან დოკუმენტს და გერმანიამ, ჩვენ, როგორც უსაფრთხო ქვეყანა გვაღიარა იმის გათვალისწინებით, რომ ჩვენთან ადამიანის უფლებებს იცავენ“, – აღნიშნა იზორიამ.

ეს არის მთავრობის სამოქმედო გეგმა სხვადასხვა მიმართულებით სამოქმედო გეგმების შექმნის შესახებ – მთავრობის მიერ გამოქვეყნებული დოკუმენტი ფარატინა ქაღალდია, – ასეთია ოპოზიციონერი დეპუტატის თინა ბოკუჩავას შეფასება.

ბოკუჩავას განცხადებით, ევროკომისიის რეკომენდაციების შესრულების თაობაზე მთავრობის ე.წ. სამოქმედო გეგმაც დეზინფორმაციის ინსტრუმენტია, რომლითაც ხალხის მოტყუებას ცდილობენ, თითქოს „ქართული ოცნება“ ევროკომისიის რეკომენდაციების შესასრულებლად რაიმეს აკეთებს ან მომდევნო თვეებში გააკეთებს.

„ქართული ოცნება“ დოკუმენტს ამდენი ხანი ასაიდუმლოებდა და ვიხილით სამოქმედო გეგმა იმის თაობაზე თუ როგორ შეიქმნება სამოქმედო გეგმები სხვადასხვა მიმართულებით. სხვა ეს დოკუმენტი არაფერს ამბობს. ეს არის არაფრისმთქმელი ფარატინა ქაღალდი, რომელიც ცხადყოფს, რომ ხელისუფლებას არანაირი ნება და პოლიტიკური გეგმა რეფორმების განსახორციელებლად არ გააჩნია – ეს არის ფარატინა ქაღალდი“, – განაცხადა თინა ბოკუჩავამ.