„გირჩი – მეტი თავისუფლება“ და „დროა“ საარჩევნო გაერთიანებას ქმნიან. ამის შესახებ ინფორმაციას ორივე პარტიის პრესსამსახურები ავრცელებენ.
„ჩვენ გვაერთიანებს:
– ნულოვანი თანამშრომლობა რუსულ რეჟიმთან;
– მომავლის მკაფიო ხედვა;
– მოტივაცია, შევცვალოთ საბჭოთა, ერთპარტიული სისტემა თანამედროვე, დასავლური ტიპის, კოალიციური მმართველობით.
ჩვენ ვქმნით ნორმალურ არჩევანს საქართველოს მოქალაქეებისთვის“, – ნათქვამია პარტიების პრესსამსახურების ინფორმაციაში.
თბილისის საკრებულოში წარდგენილი განაშენიანების რეგულირების გეგმის ირგვლივ შექმნილი აჟიოტაჟი პოლიტიკური ნარატივია, – ამის შესახებ დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა.
მისი თქმით, ოპოზიცია მიზანმიმართულად ცდილობს აღნიშნული მიმართულების დისკრედიცატიას და საზოგადოების შეცდომაში შეყვანას.
„ე.წ. ოპოზიცია ახორციელებს კამპანიას, თითქოს მშენებლობა და განვითარება ერთგვარი დანაშაულია. თან ამას ამბობენ ადამიანები, რომელთა დამსახურებაა ყველა ის უბედურება, რაც კი ქალაქს დაემართა. დედაქალაქის განვითარება განაშენიანების რეგულირების გენერალური გეგმის მიხედვით ხდება. შესაბამისად, გენერალური გეგმის ერთ-ერთი კომპონენტი ქალაქის ცენტრში არსებული სივრცეებია, რომლებიც ცარიელია და უნდა განვითარდეს. ნებისმიერ ადამიანს შეუძლია ნახოს, ყველა პროექტთან დაკავშირებით, რომელიც საკრებულოში იყო წარდგენილი, რა მოთხოვნები და ვალდებულებებია გაწერილი, მაგრამ ეს არავის აინტერესებს. მხოლოდ პოლიტიკური ნარატივია, რომ მშენებლობა ცუდია, დანაშაულია და ა.შ.“, – განაცხადა კახა კალაძემ.
მისი თმით, დედაქალაქის ხელისუფლება ბიზნესის წარმომადგენლებს პარტიული კუთვნილების მიხედვით არ არჩევს.
„არის ნარატივი, რომ კონკრეტული სამშენებლო კომპანიები პარტია „ქართული ოცნების“ შემომწირველები არიან და როგორ შეიძლება, მისმა მხარდამჭერებმა აღნიშნული პროექტები განახორციელონ. ეს „ნაცური“ ნარატივი, უფრო სწორად, ლიბერალიზმით შენიღბული ფაშიზმია, რომელიც, სამწუხაროდ, ქვეყანაში გვაქვს. საბა ბუაძის ლოგიკით, უნდა გავუშვათ ჩვენი შესაბამისი სამსახურები მამუკა ხაზარაძესთან, რომელსაც დიდი ბიზნესი აქვს ამ მიმართულებით და ლისის ტბის მიმდებარე ტერიტორიების განაშენიანებას კანონიერად ახორციელებს, უნდა ჩამოვართვათ ყველაფერი. ეს არის საბა ბუაძისეული აზროვნება. არ იფიქროთ, დანარჩენებს მასზე მეტი გონებრივი შესაძლებლობა ჰქონდეს. ყველა ერთნაირია. როდესაც ისინი ხელისუფლებაში იყვნენ, ეს დამოკიდებულება ჰქონდათ. ვერც იაზრებთ, რატომ ხართ იქ, სადაც ხართ. მერწმუნეთ, ასე იქნებით, ვიდრე სწორ ანალიზს არ გააკეთებთ, თუ რა უბედურება მოუტანეთ ხალხს. დღეს კი იმყოფებით ოპოზიციაში და საზოგადოებას აჩვენებთ, როგორი არ უნდა იყოს ოპოზიცია“, – აღნიშნა კახა კალაძემ.
თბილისის მერის განცხადებით, სამშენებლო სექტორი ქვეყნის ეკონომიკის განვითარების უმნიშვნელოვანეს კომპონენტს წარმოადგენს.
„ჩვენ არ და ვერ გავაჩერებთ ქალაქის აღმშენებლობას, მაგრამ ამას არ გავაკეთებთ ისე, როგორც აკეთებდით თქვენ. საუკეთესო მაგალითი იმისა, როგორ არ უნდა მოექცე საკუთარ ქალაქს, არის სპორტის სასახლის მიმდებარე ტერიტორია. ასეთი ბევრი მაგალითი არსებობს. თქვენ მიერ გასხვისებული სკვერების, სპორტული მოედნების გამოსყიდვა მუნიციპალიტეტს უზარმაზარი თანხები უჯდება. ის, რომ ქვეყნის ეკონომიკური განვითარება ორნიშნა რიცხვით იყო, ამაში სამშენებლო სექტორს დიდი როლი აქვს, ზუსტად ამას ებრძვიან ისინი. საკრებულოს იმ წევრებს კი, რომლებმაც წარდგენილ პროექტებს მხარი დაუჭირეს, დიდი მადლობა, მინდა, გადავუხადო“, – განაცხადა კახა კალაძემ.
საქართველოს პრეზიდენტი სალომე ზურაბიშვილი საფრანგეთის პრეზიდენტს, ემანუელ მაკრონს შეხვდა. ზურაბიშვილისა და მაკრონის განცხადების ვიდეომასალა სოციალურ ქსელში გავრცელდა.
„მოგესალმებით პარიზიდან. ძალიან ბედნიერი ვარ, რომ საფრანგეთის პრეზიდენტთან მქონდა ძალიან სასარგებლო საუბარი ჩვენს ევროპულ კანდიდატურაზე“, – განაცხადა სალომე ზურბიშვილმა.
„სლოვაკეთი, საპარლამენტო არჩვნების შემდეგ, შეიძლება რუსეთის კიდევ ერთი ევროპელი მოკავშირე გახდეს, – ნათქვამია ბრიტანული გაზეთის „გარდიანის“ (The Guardian) მიერ გამოქვეყნებულ სტატიაში სათაურით „სლოვაკეთი – რუსეთის სავარაუდო მოკავშირე ევროპაში: არჩევნებში, შესაძლოა, ვიქტორ ორბანის მომხრე რობერტ ფიცომ გაიმარჯვოს“ (ავტორი – ჯონ კამფნერი). გამოკითხვების მიხედვით, 30 სექტემბერს დაგეგმილი არჩევნების წინ რეიტინგით ლიდერობს ყოფილი პრემიერ-მინისტრი რობერ ფიცო, რომელიც აქებს მოსკოვის პოლიტიკას და უნგრეთის პრემიერს ვიქტორ ორბანს ბაძავს.
გთავაზობთ პუბლიკაციის შინაარსს:
სლოვაკეთს ევროკავშირი სერიოზულად არ უყურებს, მაგრამ ამ ქვეყანას სინამდვილეში დიდი მნიშვნელობა აქვს, ვიდრე ამას ბრიუსელი უყურებს. სექტემბრის საპარლამენტო არჩევნების შედეგები გავლენას მოახდენს არამხოლოდ სლოვაკეთის საშინაო და საგარეო პოლიტიკაზე, არამედ მის ფარგლებს გარეთაც.
თუ გამოკითხვებს დავუჯერებთ, არჩევნებში მემარცხენე-ცენტრისტული პარტიის SMER-ის („კურსი – სოციალ-დემოკრატია“) გამარჯვების შემთხვევაში ქვეყნის მმართველობაში რობერტ ფიცო დაბრუნდება – სწორედ ის პოლიტიკოსი, რომლისთვისაც უნგრელი „ალტერნატიული მემარჯვენეების“ ლიდერი ვიქტორ ორბანი სამაგალითო და მისაბაძ პოლიტიკოსს წარმოადგენს. მოკლედ, სულ მალე ევროკავშირისა და ნატოს შიგნით შეიძლება „სიმშვიდის კიდევ ერთი დამრღვევი“ გაჩნდეს.
როგორც კი რუსეთი უკრაინას თავს დაესხა, სლოვაკეთმა მხარი კიევს დაუჭირა და პრაქტიკულად ყველანირად ეხმარებოდა. სწორედ ბრატისლავამ მისცა კიევს უანგაროდ საბჭოური ავიაგამანდგურებლები. ქვეყნის პრემიერ-მინისტრი მიმდინარე წლის მაისამდე პარტია „დემოკრატების“ წარმომადგენელი – ედუარდ ჰეგერი იყო, ამჟამად კი მთავრობას ლიუდვიგ ოდორი ხელმძღვანელობს. თუ რობერტ ფიცო გახდება პრემიერ-მინისტრი, სლოვაკეთის კურსი 180 გრადუსით შებრუნდება, რუსეთის სასარგებლოდ.
ქვეყანა, რომელშიც სულ ხუთი მილიონი ადამიანი ცხოვრობს, დღეისათვის დასავლეთისა და რუსეთის პოლიტიკური პროპაგანდის ერთგვარ პოლიგონს წარმოადგენს, რომელშიც მასობრივი ინფორმაციის საშუალებებიც არიან ჩაბმულნი, რაც ტავის მხრივ, საზოგადოებრივ აზრზე გავლენას ახდენს. მაგალითად, გამოკითხვების შედეგები მოწმობს, რომ სლოვაკეთის მოსახლეობის მხოლოდ 40% თვლის, რომ უკრაინასთან ომში რუსეთი მთავარ პასუხისმგებელს წარმოადგენს.
როცა 1993 წელს ყოფილი ჩეხოსლოვაკია ჩეხეთად და სლოვაკეთად გაიყო, ბრატისლავას კურსი დასავლეთში ეჭვს ბადებდა. სლოვაკეთი ნატოში და ევროკავშირში, სხვებთან შედარებით, საკმაოდ გვიან მიიღეს. ყველას ეგონა, რომ ქვეყანა უკვე დამშვიდდა და სრულად იქნა ინტეგრირებული დასავლეთთან. მაგრამ გამოჩდა რობერტ ფიცო, რომელმაც პოპულისტური ლოზუნგების ქადაგება დაიწყო. იგი ქვეყნის პრემიერ-მინისტრი ორჯერ გახდა – 2006-2010 და 2012-2018 წლებში. იმ პერიოდებში რობერტ ფიცო დასავლეთს კი აკრიტიკებდა, მაგრამ არ არღვევდა საერთაშორისო პოლიტიკაში შექმნილ ბალანსს.
მაგრამ რაც სემდეგ მოხდა, მთელი სლოვაკეთი შეარყია: ახალგაზრდა ჯურნალისტმა იან კუციაკმა კორუფციის ფაქტების გამოკვლევა დაიწყო, რომელთანაც რობერტ ფიცოს მთავრობას ჰქონდა გარკვეული კავშირი. 2018 წლის თებერვალში კი დაქირავებულმა პირებმა ჟურნალისტი იან კუციაკი და მისი საცოლე, არქეოლოგი მარტინა კუშნიროვა დახოცეს. მოსახლეობის საპროტესტო გამოსვლების ფონზე რობერტ ფიცოს მთავრობა იძულებული გახდა რომ გადამდგარიყო.
2019 წელს საპრეზიდენტო არჩევნების შედეგად, ქვეყნის მეთაური იურისტი ზუზანა ჩაპუტოვა გახდა. ჩატარდა საპარლამენტო არჩევნებიც, ჩამოყალიბდა ახალი მთავრობა, მაგრამ… როგორც კი ხელისუფლება მუშაობას შეუდგა, პანდემია დაიწყო, რასაც თანამდევი პრობლემები მოჰყვა. სლოვაკეთში ოთხ წელიწადში ოთხი პრემიერი შეიცვალა. დღეს ქვეყანა ერთ ადგილს ტკეპნის.
ასეთი სიტუაცია რობერტ ფიცოსათვის სიგნალი გამოდგა, რომ იგი დიდ პოლიტიკაში საოცრად სწრაფად დაბრუნებულიყო. იგი ბაზავს ვიქტორ ორბანს, სულ უფრო მარჯვენა მხარეს იხრება, გმობს „უკრაინელ ფაშისტებს“ და აკრიტიკებს ხელისუფლებას კიევისათვის იარაღის მიწოდების გამო. ახლახანს რობერტ ფიცომ განაცხადა, რომ პრეზიდენტი ზუზანა ჩაპუტოვა „აშშ-ის აგენტია“. ფიცო მხარს უჭერს დონალდ ტრამპს და სოციალურ ქსელში აქტიურობს – ანტიდასავლური პოზიციის გამოხატვის სახით. ამ ყველაფერმა პრეზიდენტის ფიალა აავსო და მან განაცხადა, რომ ქვეყანაში შექმნილი სიტუაცია „ყელში ამოუვიდა“ და უარს ამბობს მეორე ვადით არჩევნებში მონაწილეობაზე.
გამოკითხვების შედეგების თანახმად, რობერ ფიცოს პარტია სლოვაკეთში ყველაზე მეტი პოპულარობით სარგებლობს. მე შევხვდი პარტია „სმერ“-ის ლიდერს ლიუბოშ ბლახას, რომელიც დასავლეთსა და რუსეთს შორის მიმდინარე კონფლიქტს კულტურების გავლენის ამსახველ ომად განიხილავს. „ჩვენ რუსეთ-უკრაინის ომს აშშ-ის ომადაც განვიხილავთ, რომელსაც ვაშინგტონი რუსეთის წინააღმდეგ უკრაინის მიწაზე აწარმოებს. დემოკრატია ამ შემთხვევაში არაფერ შუაში არ არის. საქმე ეხება იმას, რომ რუსეთი თავის კულტურულ და ეროვნულ იდენტურობას იცავს [თავის ისტორიულ ტერიტორიაზე], იმ ლიბერალური სიგიჟისაგან, რომლითაც დასავლეთია შეპყრობილი“, – ამბობს პარტიის ლიდერი.
რა თქმა უნდა, სლოვაკეთში მიმდინარე საარცევნო კამპანიამ შედეგად საბოლოო მომენტში შეიძლება სიურპრიზიც მოიტანოს და ყველაზე პოპულარული პარტია ქვეყნის მმართველი არ გახდეს, თუმცა უდაო ის ფაქტი, რომ რობერტ ფიცო „ფერფლისგან აღსდგა“, მსხვილი პოლიტიკური მოთამაშე გახდა და ის პოლიტიკა, რომელსაც მისი პარტია ატარებს, ისევ მოდაშია. ეს ყველაფერი იმას მოწმობს, რომ ევროპის შუაგულში ლიბერალური დემოკრატიის მიმართ რწმენა საკმაოდ შერყეულია.
29 აგვისტოს მოსულმა უხვმა ნალექმა 300-მდე ობიექტი და ინფრასტრუქტურა დააზიანა, – ამის შესახებ თბილისის მერმა კახა კალაძემ თბილისის მთავრობის სხდომაზე განაცხადა.
„29 აგვისტოს მოსულმა უხვმა ნალექმა მნიშვნელოვანი ზიანი მიაყენა თბილისის ინფრასტრუქტურას. მთელი ღამის განმავლობაში მოქალაქეების მხრიდან შემოდიოდა ინფორმაცია ცხელ ხაზზე. საგანგებო რეჟიმში მუშაობდნენ გამგეობებისა და საქალაქო სამსახურების წარმომადგენლები.
სტიქიის შედეგად დაზიანდა სახურავები, სადარბაზოები, შლამით გადაივსო სანიაღვრე და წყალარინების ქსელები, ასევე, დაზიანდა გრუნტის დამჭერი კედლები, განსაკუთრებით ნაძალადევის რაიონში. რამდენიმე კერძო სახლიდან, მათი ავარიულობის გამო, გავიყვანეთ ადგილობრივი მცხოვრებლები.
29 აგვისტოს 21 საათიდან 30 აგვისტოს დღის ბოლომდე, უამინდობასთან დაკავშირებით, რაიონულ გამგეობებს მერიის ცხელი ხაზიდან გადაეცათ 600-ზე მეტი შეტყობინება. მერიის შესაბამისი სამსახურების წარმომადგენლებმა დაზიანებული საცხოვრებელი ობიექტები და მასთან დაკავშირებული დაზიანებული ინფრასტრუქტურა აღრიცხეს, რომელიც, დაახლოებით, 300-მდეა.
რაიონების მიხედვით, დაზიანებული ობიექტები განაწილდა შემდეგნაირად:
1. გლდანი – 136
2. ნაძალადევი – 114
3. საბურთალო – 92
4. ვაკე – 78
5. სამგორი – 65
6. დიდუბე – 49
7. ისანი – 30
8. მთაწმინდა – 24
9. კრწანისი – 19
10. ჩუღურეთი – 19
დაზიანებული ინფრასტრუქტურის აღსადგენად გამოყოფილია შესაბამისი თანხები. უკვე დაწყებულია და უახლოეს პერიოდში განხორციელდება სტიქიით გამოწვეული ზიანის აღმოფხვრა“,- აღნიშნა კალაძემ.
ამერიკული გამოცემა „ბლომბერგი“ (Bloomberg) აქვეყნებს სტატიას სათაურით „ომისაგან უცხოეთში გაქცეული უკრაინელების ნახევარი სამშობლოში, ალბათ, არასოდეს არ დაბრუნდება“.
გთავაზობთ პუბლიკაციას მცირე შემოკლებით:
კიევში არსებული ეკონომიკური სტრატეგიის ცენტრის მიერ ჩატარებული გამოკვლევის თანახმად, 3,3 მილიონი უკრაინელი ლტოლვილი ანუ ქვეყნის მოსახლეობის თითქმის 8% – შეიძლება სამშობლოში არ დაბრუნდეს.
საინტერესოა, რომ მსგავსი კვლევა გასული წლის დეკემბერშიც გამოქვეყნდა და თუ მათ ერთმანეთს შევადარებთ, განსხვავება თვალშისაცემია – არდამბრუნებელთა რაოდენობა უკვე 600 ათასითაა გაზრდილი. როგორც ანალიტიკოსები აღნიშნავენ, უცხოეთში დამრჩენთა მომატება განპირობებულია ომის გაგრძელებით, რომელიც უკვე წელიწადნახევარზე მეტია მიმდინარეობს, რუსეთის მიერ უკრაინის ენერგოსისტემაზე განხორციელებული დარტყმებით და უკრაინელთა ადაპტაციით საზღვარგარეთული ცხოვრების პირობებისადმი.
რაც უფრო დიდხანს გასტანს ომი, მით უფრო მეტი უკრაინელი დარჩება სამუდამოდ საზღვარგარეთ. ეკონომიკური სტრატეგიის ცენტრის შეფასებით, მათი საერთო რაოდენობა დაახლოებით 6,7 მილიონი იქნება. ამასთან, რადგან უკრაინელ ლტოლვილთა დიდი უმრავლესობა ქალები და ბავშვები არიან, შესაბამისად, სულ უფრო მეტი უკრაინელი ქალი იქნება დაინტერესებული თავიანთი შვილებისათვის თავშესაფრის უზრუნველყოფით.
„ადამიანებს, რომლებმაც საომარი მოქმედებების ზონა დატოვეს, მათ, პრინციპში, უკან დასაბრუნებელი მიზეზი არ აქვთ, მათი სახლები და ქონება განადგურებულია“, – ნათქვამია გამოკვლევაში, – ამიტომაც მათი დაბრუნება დამოკიდებული იქნება, იმაზე, თუ რამდენად სწრაფად აღდგება მშობლიური მხარე, ქალაქი თუ სოფელი და მიიღებენ თუ არა ისინი მთავრობის მხარდაჭერას ქვეყნის სხვა რეგიონში დასახლების საკითხში“.
უკრაინელი ტოლვილების სამშობლოში დაუბრუნებლობის პერქპექტივა უკრაინას დიდ პრობლემებს შეუქმნის ომისშემდგომი აღდგენის გეგმებთან დაკავშირებით. როგორც გამოკვლევაშია აღნიშნული, უკრაინის მოსახლეობის პოტენციური ყოფნა საზღვარგარეთ ქვეყნის ეკონომიკას შემდგომი დარღვევით ემუქრება (უკრაინის ეკონომიკა ისედაც ძლიერაა დაზარალებული ომისაგან). მთლიანი შიდა პროდუქტის (მშპ) შემცირება წელიწადში 6,9%-ით არის მოსალოდნელი.
უკრაინის ეკონომიკის სამინისტროს განცხადებით, იმისთვის, რომ 2032 წლისათვის ქვეყნის ეკონომიკი ზრდა გაორმაგდეს, უკრაინას 4,5 მილიონი მცხოვრები აკლდება, მუშებისა და მეწარმეების სახით. შედარებისათვის: რუსეთთან ომამდე უკრაინის მოსახლეობა 43 მილიონ მცხოვრებს შეადგენდა.
ეკონომიკური სტრატეგიის ცენტრის დასკვნით, საზღვარგარეთ უკრაინელთა რაოდენობის მატება დემოგრაფიისათვის საშიშ ზღვარს უახლოვდება. 6,7 მილიონი უკრაინელიდან ნახევარზე მეტი ევროკავშირის ქვეყნებში ცხოვრობს, განსაკუთრებით პოლონეთში და გერმანიაში. სამწუხაროდ, გამოკვლევის მიხედვით, თავდაპირველად ისინი სოციალური შეღავათებით სარგებლობდნენ, ამჟამად კი ლტოლვილთა მნიშვნელოვანმა ნაწილმა შემოსავლები დაკარგა.
ანალიტიკური ცენტრი მოუწოდებს უკრაინის მთავრობას, რომ ითანამშრომლოს ევროკავშირის ქვეყნებთან, გაუადვილოს ლტოლვილებს სამშობლოში დაბრუნება, გაუწიოს რეპატრიანტებს დახმარება ქონების აღდგენისა და სახლების მშენებლობის საქმეში, დაეხმაროს ბავშვებს რეინტეგრაციაში. ცენტრმა ასევე მოუწოდა ევროკავშირს, რომ ომის დასრულების შემდეგ უკრაინელებს მატერიალურად დაეხმაროს.
ღვინის ეროვნული სააგენტოს ცნობით, 6 სექტემბრის მდგომარეობით, რთველი 2023 წლის ფარგლებში, ჯამში გადამუშავებულია 20 ათასამდე ტონა ყურძენი.
მათი განმარტებით, აქედან, 11 ათას ტონამდე რქაწითელი, 7,5 ათას ტონამდე საფერავი და დანარჩენი სხვადასხვა ჯიშის ყურძენია.
„ექსპორტის ზრდის ფონზე და ყურძნის შესყიდვაზე არსებული მოთხოვნის გათვალისწინებით, მიმდინარე წელს აქტიურობით გამოირჩევა კერძო სექტორი, რაც ასევე ყურძნის შესასყიდ ფასზეც აისახა: ძირითადი ინდუსტრიული ჯიშების რქაწითელის საშუალო ფასი 2023 წლის რთველის ამ პერიოდში შეადგენს 1,08 ლარს (2022 წელს იყო 0,92 ლარი), ხოლო საფერავის 1,56 ლარს (2022 წელს- 1,50 ლარი). ხარისხიან რქაწითელში კერძო საწარმოების მიერ დაფიქსირდა 1 კგ – 1,35 ლარი, ხოლო საფერავში – 1,80 ლარის გადახდაც.
ამასთან ერთად, შეუფერხებლად მიმდინარეობს 2 სექტემბერს მოსული სეტყვითა და ძლიერი ქარის შედეგად დაზიანებული ყურძნის ჩაბარება. სახელმწიფო ღვინის საწარმოს შპს “მოსავლის მართვის კომპანიის” მიერ გადამუშავებულია 2080 ტონა დაზიანებული ყურძენი. მევენახეები შპს “მოსავლის მართვის კომპანიას” დაზიანებულ ყურძენს 90 თეთრად აბარებენ. დასეტყვილი ყურძნის ჩაბარება დღეს 6 ლოკაციაზე მიმდინარეობს შემდეგ მუნიციპალიტეტებში: თელავი (2 ლოკაცია), სიღნაღი, ყვარელი და გურჯაანი (2 ლოკაცია)“,-აღნიშნულია ინფორმაციაში.
გარემოს ეროვნული სააგენტოს ინფორმაციით, დღეს დასავლეთ და აღმოსავლეთ საქართველოში ნავარაუდევია ხანმოკლე წვიმა, ელჭექთან ერთად.
დედაქალაქში ჰაერის ტემპერატურა 35 გრადუსს მიაღწევს. სინოპტიკოსების პროგნოზით, ხვალიდან, საქართველოს უმეტეს რაიონში წვიმაა მოსალოდნელი.
დიდი ბრიტანეთი კერძო სამხედრო კომპანია „ვაგნერს“ ტერორისტულ ორგანიზაციად გამოაცხადებს.
ინფორმაციას დიდი ბრიტანეთის შინაგან საქმეთა სამინისტროზე დაყრდნობით, Sky News-ი ავრცელებს.
ტელეარხის ცნობით, შესაბამისი ბრძანებულების პროექტს, რომელიც დაჯგუფების აკრძალვას გულისხმობს, ქვეყნის პარლამენტი დღეს განიხილავს.
„ბრძანებულების თანახმად, რუსულ დაჯგუფებაში წევრობა ან მისი მხარდაჭერა ქვეყნის ტერიტორიაზე 14 წლამდე თავისუფლების აღკვეთით დაისჯება, ასევე „ვაგნერის“ აქტივები, შესაძლოა, ტერორისტული ქონების კატეგორიას განეკუთვნოს, მათი შემდგომი კონფისკაციით“, – აცხადებენ დიდი ბრიტანეთის შინაგან საქმეთა სამინისტროში.
„ვაგნერი” – ძალადობრივი და დესტრუქციული ორგანიზაციაა, რომელიც საზღვარგარეთ რუსეთის პრეზიდენტის, ვლადიმერ პუტინის სამხედრო იარაღად გამოიყენება. სანამ პუტინის რეჟიმი ფიქრობს იმაზე, თუ რა მოუხერხოს მონსტრს, რომელიც შემქმნელი თვითონაა, ამ კომპანიის მუდმივი მადესტაბილიზებელი საქმიანობა კვლავ ინერციით კრემლის პოლიტიკურ მიზნებს ემსახურება. ისინი ტერორისტები არიან, ეს მარტივია და გასაგებია”, – განაცხადა უწყების ხელმძღვანელმა, სუელა ბრავერმანმა.
შეგახსენებთ, რომ „ვაგნერის“ დაჯგუფებამ, მისი ხელმძღვანელის, ევგენი პრიგოჟინის დაღუპვამდე, შესამჩნევი როლი ითამაშა უკრაინაში რუსეთის შეჭრის დროს. ის ასევე აქტიურ მონაწილეობას იღებდა სირიაში, ცენტრალურ აფრიკის რესპუბლიკაში, სუდანში და ლიბიაში არსებულ კონფლიქტებში.
რუსული ძალები, წუხელ, ოდესის ოლქის იზმაილის რაიონს დრონებით დაესხნენ თავს, რის შედეგადაც ერთი ადამიანი დაიღუპა, – ინფორმაციას უკრაინული მედია ოდესის საოლქო-სამხედრო ადმინისტრაციის ხელმძღვანელზე, ოლეგ კიპერზე დაყრდნობით ავრცელებს.
„სამწუხაროდ, ერთი ადამიანი დაიღუპა, სოფლის მეურნეობის საწარმოს მძიმედ დაშავებული თანამშრომელი საავადმყოფოში გარდაიცვალა”, – აღნიშნა კიპერმა.
მისი თქმით, თავდასხმის შედეგად პორტთან ახლოს მდებარე ობიექტები დაზიანდა.
“დაზიანდა ახლოს მდებარე ობიექტები და სასოფლო-სამეურნეო ინფრასტრუქტურის ობიექტები: ლიფტები, ადმინისტრაციული შენობები, სასოფლო-სამეურნეო საწარმოები.
“ქართული ოცნების” დეპუტატის, გია ვოლსკის განცხადებით, ევროკომისიის ვიცე-პრეზიდენტის, ჯოზეფ ბორელის ვიზიტისას საუბარი არამხოლოდ 12 რეკომენდაციის შესრულებაზე, არამედ ევროკავშირისა და საქართველოს ურთიერთობაზეც იქნება. ამის შესახებ მან ჟურნალისტებს განუცხადა.
„ლაპარაკი არ იქნება მხოლოდ 12 რეკომენდაციის შესრულებაზე. რასაკვირველია, წამყვანი თემაა, მაგრამ საერთოდ ევროკავშირისა და საქართველოს ურთიერთობების განვითარებასა და პერსპექტივაზე იქნება საუბარი. ასოცირების ხელშეკრულება გვავალებს ძალიან ბევრი რამის გაკეთებას. ჩვენ საკმაოდ დიდი პოზიტივი გვაქვს ამ მიმართულებით და თუკი რეიტინგებს შევადარებთ, თუკი კომპეტენტური საერთაშორისო ორგანიზაციების მიერ გაკეთებულ ანალიზს შევადარებთ, დავინახავთ, რომ საქართველო საკმაოდ მყარ პოზიციაზე დგას არამარტო კანდიდატ ქვეყნებს შორის, არამედ ევროკავშირის ქვეყნების ფორმატშიც და ამ თემებზე იქნება საუბარი. იმედია, რომ რადიკალური ოპოზიცია ახლა მაინც დაინახავს იმ რეალობას თუ რა სჭირდება საქართველოს ხვალინდელი დღისთვის – სტაბილურობა და არა რევოლუციური სცენარი, რომელსაც ისინი ავითარებენ,”- განაცხადა გია ვოლსკიმ.
რაც შეეხება ევროკავშირის კანდიდატი ქვეყნის სტატუსის მინიჭებასთან დაკავშირებით მოლოდინებს, მმართველი პარტიის დეპუტატის განცხადებით, მას ამ მიმართულებით პოზიტიური მოლოდინი აქვს
„მოლოდინი რასაკვირველია პოზიტიურია. ძალიან ბევრია გაკეთებული და მიღწეული. მიუხედავად გამოწვევებისა, ჩვენ საკმაოდ მყარად ვდგავართ პოზიციაზე და წელგამართულები ვართ, როცა ვსაუბრობთ ევროკავშირისა და საქართველოს მომავალ ურთიერთობაზე”,- აღნიშნა ვოლსკიმ.
რუსულმა ძალებმა დღეს დილით უკრაინაზე მასიური სარაკეტო შეტევა განახორციელეს, – ინფორმაციას უკრაინული მედია ავრცელებს.
მათივე ინფორმაციით, მტრის თავდასხმა, უმეტესად დედაქალაქ კიევისკენ იყო მიმართული.
„წინასწარი მონაცემებით, რუსებმა სტრატეგიული ავიაციის თვითმფრინავიდან Tu-95MS-დან, X-101 / 555 / 55 ტიპის ფრთოსანი რაკეტები ისროლეს. ამავდროულად, იყო სხვა ტიპის, სავარუდოდ ბალისტიკური, რაკეტებიც”, – განაცხადა კიევის სამხედრო ადმინისტრაციის ხელმძღვანელმა, სერგეი პოპკომ.
მისი ინფორმაციით, რუსების კუთვნილი ყვველა სამიზნე, რომელიც დედაქალაქის მიმართულებით მოძრაობდა, უკრაინის საჰაერო თავდაცვის ძალებმა და საშუალებებმა გაანადგურეს. ამ დროისთვის არსებული ინფორმაციით, თავდასახმას მსხვერპლი არ მოჰყოლია.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge