რასაც ახლა ირაკლი ღარიბაშვილი აკეთებს, პირდაპირ რუსული დავალების შესრულებაა – უსამართლობაზე რომ საუბრობ, თუ რამეა დღეს უსამართლო, უსამართლოა ის, რომ შენ ხარ პრემიერ-მინისტრი! უსამართლოა, რომ “ქართული ოცნებაა” იმ საქართველოს მმართველი პოლიტიკური ძალა, რომლის მოსახლეობის აბსოლუტურ უმრავლესობას ევროკავშირის წევრობა უნდა! – ამ განცხადებით “სტრატეგია აღმაშენებლის” ლიდერი გიორგი ვაშაძე პრემიერ-მინისტრის ირაკლი ღარიბაშვილისა და ევროკავშირის უმაღლესი წარმომადგენლის ჯოჟეფ ბორელის დღევანდელ პრესკონფერენციას გამოეხმაურა.

ვაშაძის შეფასებით, “პრემიერ – მინისტრად წოდებული ირაკლი ღარიბაშვილის მხრიდან ევროინტეგრაციის პროცესის ღია და დაუფარავ საბოტაჟს ჰქონდა ადგილი”.

მისივე თქმით, “დღევანდელი საზიზღრობის შემდეგ, რუსული ინტერესების გამტარებელი “ქართული ოცნება” პოლიტიკურ სანაგვეზე უნდა წავიდეს”.

„წარმოუდგენელია იმის ყურება, რაც ჩვენ ყველამ ვნახეთ. სადამდე დაეცით ხალხო! რა დღეში ხართ! როგორი სამარცხვინოები ხართ! ასეთი კონსენსუსი ევროპის მხრიდან, რომ სურთ, საქართველო ევროკავშირის წევრად იხილონ და ასეთი ანტიქართული ქმედება, რასაც თქვენ სჩადიხართ! რას აკეთებთ?! ნუთუ დარჩა ვინმე საქართველოში, ვინც ფიქრობს, რომ ამ ადამიანებს საქართველოს ევროკავშირში შეყვანა უნდა?!

წარმოგიდგენიათ ხალხო, საჯაროდ ასე ღიად რომ საბოტაჟში არიან, რას აკეთებენ დახურულ კარს მიღმა?!

ხართ სამარცხვინოები, ანტიქართველები, ანტიეროვნულები, რუსული ინტერესების გამტარებლები!

ჯოზეფ ბორელის მთავარი გზავნილი იყო, რომ ევროკავშირი საქართველოს არ მიატოვებს. როგორიც არ უნდა იყოს დეკემბერში ევროკავშირის გადაწყვეტილება, უნდა ვიცოდეთ, რომ “ქართულ ოცნებას” ხელისუფლებიდან ვუშვებთ და ყველა იმ რეფორმას ვატარებთ, რაც საქართველოს სჭირდება.

ამ მავნებლებს, რომლებიც ქართველი ხალხის ნებას ეწინააღმდეგებიან, ერთიანობა უნდა დავუპირისპიროთ და ეს ხალხი პოლიტიკურ სანაგვეზე გავუშვათ. ვინ ხართ საერთოდ – სად გაიზარდეთ, სად ისწავლეთ, რანაირად მიყიდეთ სული რუსეთს იმ დონეზე, რომ ასე საჯაროდ და დაუფარავად სჩადიხართ იმას, რასაც სჩადიხართ!

ნუთუ დარჩა საქართველოში ვინმე, ვინც დღევანდელი დღის შემდეგ იტყვის, რომ “ქართულ ოცნებას” ევროკავშირი უნდა, მაგრამ კანდიდატის სტატუსს არ გვაძლევენ. დღევანდელი დღის შემდეგ საზოგადოებრივი კონსენსუსი უნდა იყოს, რომ “ქართულ ოცნებას” უნდა რუსეთი, ხოლო ქართველ ხალხს – ევროკავშირი”, – განაცხადა გიორგი ვაშაძემ.

ჯოზეფ ბორელისგან გავიგე, რომ ყველაფერი ესმის, რაც ჩვენს თავს ხდება. სტატუსს ახლა არ ვიმსახურებთ, თუმცა ევროკავშირს ესმის, რომ სტატუსის არმოცემა, შეიძლება, საფრთხე იყოს გარუსების თვალსაზრისით, – ამის შესახებ „გირჩის“ ლიდერმა, იაგო ხვიჩიამ საქართველოს პირველ არხს განუცხადა.

იაგო ხვიჩიას თქმით, არ გამორიცხავს, საქართველომ სტატუსი რაღაც დათქმებით მიიღოს.

„ადამიანი საქართველოში ჩამოსულია იმ განწყობით, რომ ოღონდ ჩვენ რაიმე გავაკეთოთ, რათა მიგვიღონ, მაგრამ „ქართული ოცნება“ იბრძვის, რომ არაფერი გააკეთოს. არ გამოვრიცხავ, სტატუსი რაღაც დათქმებით მოგვცენ. ამიტომ ოპოზიციამ ერთად უნდა იმუშაოს იმაზე, რა შეიძლება იყოს ასეთი დათქმები, რომ მისი შესრულება პრინციპული იყოს და რაღაცნაირად გარანტი, რომ ისინი სხვა რამეს არ გააკეთებენ, რაც ევროპას არ უნდა“, – განაცხადა იაგო ხვიჩიამ.

არასოდეს არ თქვათ, რომ ევროკავშირი მიატოვებს საქართველოს, – ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ევროკომისიის ვიცე-პრეზიდენტმა ჯოზეფ ბორელმა საქართველოს პრემიერ-მინისტრთან ირაკლი ღარიბაშვილთან ერთად გამართულ პრესკონფერენციაზე ჟურნალისტის კითხვის საპასუხოდ განაცხადა.

ჯოზეფ ბორელმა ხაზი გაუსვა, რომ ეს პოზიცია მისთვის მიუღებელია.

„არასოდეს არ თქვათ, რომ ევროკავშირი მიატოვებს საქართველოს, არასოდეს. ასეთი რამ არასდროს არ იქნება ჩემს მიერ მიღებული, ეს პოზიცია ჩემთვის მიუღებელია, არც მიუტოვებია, არც მიატოვებს. ამავდროულად, უნდა ვთქვა, რომ ეს პროცესი არის დამსახურებაზე დაფუძნებული. თქვენ უნდა შეასრულოთ გარკვეული პირობები. თქვენზეა ეს საქმე. მე ნუ მეუბნებით. ბავშვი რომ მიდის გამოცდაზე, პროფესორმა მიმტყუვნაო ხომ არ იტყვის, თვითონ უნდა აჩვენოს, რომ იცის ეს საქმე, ეს თემა, ეს საგანი. ამიტომ, ჩვენი შეფასება არის ობიექტური, ნუ გექნებათ ეს განწყობა, თქვენ არავინ არ მიგატოვებთ. მთელი ძალისხმევა და ენერგია ჩადეთ ამ ვალდებულების შესრულებაში, ამ მოთხოვნების შესრულებაში. ეს არის კარგი და სწორი მიდგომა. ევროკავშირი საქართველოს არ ტოვებს, არ მიატოვებს. ჩვენ გვაქვს ეკონომიკური და საინვესტიციო გეგმა, სადაც 1.3 მლრდ ევროა მობილიზებული და ეს მოხმარდება საქართველოში კონკურენტუნარიანობის გაუმჯობესებას, ინფრასტრუქტურის გაუმჯობესება, საქართველოსთან გეგმები გვაქვს. ჩვენ ყველაფერი გვესმის, გვესმის ის ინტერესები, რაც საქართველოსთან ასოცირდება ჩვენს მხედველობაში და ჩვენს თვალში. ამიტომ, საქართველო არის ჩვენს ინტერესთა მიმართულებით. თქვენ განა გვემუდარებით, ჩვენ გვინდა, რომ თქვენ იყოთ ევროკავშირის წევრი. ამიტომ არის, რომ ჩამოვედი და გესაუბრებით. საქმეა გასაკეთებელი, დროც არის, გააკეთეთ, ნუ იფიქრებთ მიტოვების თემაზე საერთოდ”, – განაცხადა ჯოზეფ ბორელმა.

მეორე ფრონტის გახსნის საკითხი არის ხმაური, პროპაგანდა და დეზინფორმაცია, სისულელე იქნება, ევროკავშირში ვინმემ იფიქროს, რომ საქართველოში ვინმეს ომი უნდა, არ მოუსმინოთ, – ამის შესახებ ევროკავშირის უმაღლეს წარმომადგენელმა, ჯოზეფ ბორელმა „მთავარი არხის“ კითხვის საპასუხოდ განაცხადა.

„მთავარი არხის“ ჟურნალისტმა ბორელს დაუსვა კითხვა, რომლის მიხედვითაც, „მუდმივი თავდასხმაა დასავლელ პარტნიორებზე ომში ჩართვის მცდელობაში დადანაშაულებასთან დაკაშვირებით“.

ბორელის თქმით, ეს ყველაფერი ხალხის მოსაწამლად ხდება.

„ძალიან ვწუხვარ, რომ ასეთი მცდარი ხმები ვრცელდება, რადგან ეს ქმნის პრობლემას. ეს ყველაფერი ხალხის მოსაწამლად ხდება, რომ გზავნილები შეილახოს, უნდობლობა წარმოიქმნას ქვეყანაში. ქვეყანაში რუსული პროპაგანდა არის ძალიან ინტენსიური, ასეთი მიმართულებით მათ თავი აქვთ გამოჩენილი მთელ მსოფლიოში. რაც შეეხება თანხვედრას ჩვენს პოლიტიკაში, ჩვენ გვაქვს მიმართულება, რომელზეც კონსენსუსის და ერთსულოვნების პრინციპით ვმუშაობთ. ყველაფერს ვაკეთებთ, რათა ერთიანი მიდგომა გვქონდეს, რაზეც ვცდილობთ შეთანხმების მიღწევას. ჩვენ გვაქვს შიგადაშიგ განსხვავებული მოსაზრებები, მაგრამ ზუსტად ამიტომ მოვითხოვთ კანდიდატებისგან, ჩვენი პოზიციის თანმხვედრი იყოს მათი პოზიცია, როდესაც კანდიდატები გადაიზრდებიან წევრ სახელმწიფოდ, მათაც შეძლონ იმავეს კეთება, რათა თავსებადი იყოს მათი პოლიტიკა. დიახ, საქართველოს თავსებადობის მაჩვენებელი არ არის ძალიან მაღალი, ასოცირების შეთანხმებაში ეს მიმართულება დაფიქსირდა. ჩვენ გვქონდა პრემიერ-მინისტრთან ამაზე საუბარი, ძალიან თავაზიანად ვახსენეთ ეს საგარეო საქმეთა სამინისტროშიც და გიდასტურებთ, ეს ის საკითხია, რომელიც უნდა გაუმჯობესდეს, ეს მაჩვენებელიც უნდა გაუმჯობესდეს. ჩვენ ვაღიარებთ, რომ სანქციებისგან თავის ავლის მიმართულებასთან ბრძოლაში საქართველო კარგად მუშაობს. ეს უნდა იქნეს ხაზგასმით ახსნილი, განმარტებული და ნახსენები, მაგრამ საგარეო პოლიტიკა ჩვენთან უნდა მოვიდეს თავსებადობაში და ყველა ქვეყნის მოთხოვნაც ეს არის“, – განაცხადა ბორელმა.