ევროპის სიმტკიცე ჩვენთვის ფუნდამენტურია, რათა ევროპული პერსპექტივა კანდიდატის სტატუსად გადაიქცეს, რეალობაში, როცა რუსეთი ცდილობს ომი, რომელსაც უკრაინაში აგებს, ჰიბრიდული ფორმით აქ განახორციელოს, – ამ ის შესახებ საქართველოს პრეზიდენტმა სალომე ზურაბიშვილმა Rencontres Économiques d’Aix-en-Provence-ის ეკონომიკური ფორუმზე განაცხადა.

სალომე ზურაბიშვილმა ვრცლად ისაუბრა ევროპის ერთიანობაზე, მისი თქმით, ევროპამ უკვე აჩვენა, რომ ძალა შეინარჩუნა და შეინარჩუნებს.

ეკონომიკური გამოწვევების კონტექსტში სალომე ზურაბიშვილმა ისაუბრა საქართველოს მაგალითზეც და განაცხადა, რომ რუსების „შემოდინებასთან“ დაკავშირებული ეკონომიკური მდგრადობა სახიფათოა.

„მრავალი პროგნოზი გაკეთდა, რომ ზამთარი ძალიან მძიმე იქნებოდა, დღეს ამბობენ, რომ მომდევნო ზამთარი იქნება ძალიან მძიმე, მაგრამ რეალურად, ევროპამ უკვე აჩვენა, რომ ძალა შეინარჩუნა და შეინარჩუნებს. ასევე ვხედავთ, ძლიერი ევროპის პერსპექტივის ხელახლა გახსნას, რომელიც დიდი ხანია არ გვინახავს და რასაც ველოდებით, ეს თავდაცვითი ევროპაა. ამ მომენტში ძალიან მნიშვნელოვანია ერთიანობის წარმოჩენა, რაც ძალიან მნიშვნელოვანი ელემენტია ჩვენთვის, ვინც ჯერ კიდევ ამ ევროპული ერთობის გარეთაა, რადგან უსაფრთხოების მოლოდინი ისაა, რაც მნიშვნელოვნად განაპირობებს ჩვენს მიდგომას.

საქართველოსთვის, რომელიც ამ ერთობის გარეთაა, (თავის მხრივ, გაუძლო ეკონომიკურ ზეწოლას, ჩვენ შედარებით განსხვავებული ეკონომიკური ზეწოლა გვაქვს) ეკონომიკური მდგრადობა რუსების შემოდინებასთანაა დაკავშირებული, რომლებმაც შემოიტანეს ვალუტა და ასე რომ ვთქვათ, შექმნეს ახალი ბაზარი. ეს საკმაოდ სახიფათოა, რადგან ეს დამოკიდებულების ერთ-ერთი ახალი ფორმაა და განსხვავებული, რომელიც საყურადღებოა. ეს არ არის ერთადერთი რისკი, რომელიც ჩვენს წინაშეა.

თქვენ იცით, რომ საქართველოს გამოვლილი აქვს ორი ომი რუსეთთან, ბოლო 2008 წელს, მისი ტერიტორიის 20% ოკუპირებულია, ნათელია რუსეთის პირდაპირი ზეწოლა. ევროპის სიმტკიცე ჩვენთვის ფუნდამენტურია, რათა გასულ წელს მინიჭებული ევროპული პერსპექტივა კანდიდატის სტატუსად გადაიქცეს, იმ რეალობაში, როცა დღეს რუსეთი ცდილობს, რომ ომი, რომელსაც ის უკრაინაში აგებს, ჰიბრიდული ფორმით აქ განახორციელოს“, – განაცხადა საქართველოს პრეზიდენტმა ფორუმზე.

თუ სუსტები ვართ და რადარებზე არ ვჩანვართ, რას მოგვდევენ ქვებით, დაგვანებონ ამ „სუსტებს“ თავი და გვაცადონ მოსახლეობასთან შეხვედრა , – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა განაცხადა, რითაც რეგიონებში პარტიის წარმომადგენლებსა და მოსახლეობას შორის შეხვედრის დროს მომხდარ ინციდენტებს გამოეხმაურა.

როგორც ხაბეიშვილმა, მედიასთან განაცხადა, აღნიშნული ინციდენტები ადასტურებს იმას რომ ხელისუფლებას „ნაციონალური მოძრაობის“ ეშინია.

მისივე თქმით, „ქართულ ოცნებას“ მსოფლიოში აღარ დარჩა პარტნიორი, რომელიც მეგობრულად იქნება განწყობილი მათ მიმართ.

„ირაკლი კობახიძე, ირაკლი ღარიბაშვილი და კოლექტიური პუტინისტები „ნაციონალურ მოძრაობაზე“ სხვანაირად რომ საუბრობდნენ, ეს გამიკვირდებოდა და ვიფიქრებდი, რომ პრობლემა გვაქვს. ისინი წლებია ასრულებენ „ნაციონალურ მოძრაობას“.

სახელმწიფოებრივად მნიშვნელოვანი საქმეა, როცა საქართველოს ჰყავს რუსული ხელისუფლება. „ქართულ ოცნებას“ მსოფლიოში აღარ დარჩა პარტნიორი. ვერ მეტყვით რომელიმე ქვეყანას, რომელიც მეგობრულად არის განწყობილი რუსული პარტიის მიმართ. მეტიც, სადაც იყვნენ გაერთიანებულები – “სოციალისტურ პარტიაში“, იქიდანაც გამოაბუნძულეს. ამიტომ ჩვენდა სამწუხაროდ საქართველოსი რუსული დიქტატურაა, რომელიც დამყარებულია რუსი ოლიგარქის პირობებში.

რუსულ პარტიასთან ბრძოლა რთულია, როცა მათთან საუბარს აზრი არ აქვს. გუშინ საგარეჯოში პენსიონერებს ვესაუბრებოდი, ისინი ქვებს ისროდნენ. მანამდე, კასპში ვესაუბრებოდი პენსიონერებს, კიდევ ქვებს ისროდნენ. უფრო ადრე, გარდაბანში მოსახლეობას ვხვდებოდი , ჩემი ავტომობილის საბურავების დაჭრით იყვნენ დაკავებულები.

თუ სუსტები ვართ და რადარებზე არ ვჩანვართ, რას მოგვდევენ ქვებით დაგვანებონ ამ „სუსტებს“ თავი და გვაცადონ მოსახლეობასთან შეხვედრა. ეს ადასტურებს იმას,რომ მათ ეშინიათ.

ჩვენ ხალხზე მაღალი წარმოდგენის ვარ და არ მგონია, რომ ქვის სროლა იყოს ნორმალური დამოკიდებულება ქართველებს შორის“,- განაცხადა ხაბეიშვილმა.

კითხვაზე, რა იგებს ამით „ქართული ოცნება“ , ხაბეიშვილი პასუხობს, რომ ამით უნდათ, რომ საზოგადოებას აჩვენონ, „თითქოს ხალხი უპირისპირდება“.

„რუსები ესენი არიან, რუსულ კანონებს ესენი იღებენ, ხალხ ძარცვავენ და თურმე ხაბეიშვილის მისდევს ხალხი“,- აღნიშნა ხაბეიშვილმა.

ჟორიკა რურუა საკუთარ მეწილეებთან ერთად – ყანჩაველი, მერაბ ტყეშელაშვილი – ატარებენ ლგბტ-ფესტივალს. უნდა იცოდნენ, რომ თუ სასწრაფოდ არ გააუქმებენ ამ ხელშეკრულებას, ისინი გახდებიან თანამონაწილეები და ლგბტ-პროპაგანდისტები, – ამის შესახებ საზოგადოებრივი მოძრაობის „საქართველო უპირველეს ყოვლისა“ დამფუძნებელმა, ვატო შაქარიშვილმა განაცხადა.

მისივე თქმით, თუ ლგბტ-ფესტივალი არ ჩაიშლება, ამას შეიძლება ძალიან ცუდი პროცესები მოჰყვეს.

„ჟორიკა რურუა საკუთარ მეწილეებთან ერთად – ყანჩაველი, მერაბ ტყეშელაშვილი – ატარებენ ლგბტ-ფესტივალს. უნდა იცოდნენ, რომ თუ სასწრაფოდ არ გააუქმებენ ამ ხელშეკრულებას, ისინი გახდებიან თანამონაწილეები და ლგბტ-პროპაგანდისტები. ძალიან მაღალია ვნებათაღელვა, ტემპერატურა და მინდა მათ ვუთხრა, რომ თუ აღნიშნულ გადაწყვეტილებას არ მიიღებენ, ისინი გახდებიან მაპროვოცირებლები იმ ძალიან ცუდი პროცესებისა, რომელიც შეიძლება მივიღოთ იმ შემთხვევაში, თუ ისინი არ სასწრაფოდ ჩაშლიან ამ ფესტივალს“, – აცხადებს შაქარიშვილი.

შსს-ს ინფორმაციით, 8 ივლისს კონკრეტულ ლოკაციაზე, შემოსაზღვრულ ადგილას, „თბილისი პრაიდის“ ფარგლებში დაგეგმილი დახურული ღონისძიების უსაფრთხო გარემოში ჩატარების მიზნით, სამინისტროს წარმომადგენლები კომუნიკაციაში არიან შეკრების ორგანიზატორებთან. ამ დახურული ღონისძიების მშვიდ ვითარებაში ჩატარების მიზნით, პოლიციის შესაბამისი დანაყოფები მობილიზებულნი იქნებიან ყველა საჭირო ლოკაციაზე და კომპეტენციის ფარგლებში დაიცავენ მართლწესრიგს და უსაფრთხოებას.

ის რაც ხდება ენმ-ის და სხვა ოპოზიციური ჯგუფების მიმართ ზუსტი კალკია იმისა, რასაც აკეთებდა ასლან აბაშიძე აჭარაში და ლევან მამალაძე ქვემო ქართლში“, – ამის შესახებ ექსპრეზიდენტი მიხეილ  სააკაშვილი სოციალურ ქსელში წერს.

მისი თქმით, აუცილებელია ერთიანობა და საქართველოს მტერი მხოლოდ რუსეთია.

„ვამაყობ ჩვენი კასპისა და საგარეჯოს აქტივით. ის რაც ხდება „ერთიანი ნაციონალური მოძრაობის“ და სხვა ოპოზიციური ჯგუფების მიმართ ზუსტი კალკია იმისა, თუ რასაც აკეთებდა ასლან აბაშიძე აჭარაში და შევარდნაძის დავალებით ლევან მამალაძე ქვემო ქართლში.

მე აღტაცებული ვარ „ნაცმოძრაობის“ წევრების გამბედაობით და ზუსტად ასეთია ენმ-ის ტრადიცია.
ასევე, ყოჩაღ „ფორმულას“ და მიშა მშვილდაძეს და მის კოლეგებს – როგორ ზუსტად ამხილეს მაფიოზური ძალადობრივი აპარატი.

კიდევ ერთხელ დასტურდება თუ რატომ არის აუცილებელი ერთიანობა. არანაირი უკან დახევა არ იქნება – მე მოვუწოდებ ჩვენი რიგების გაძლიერებისკენ. რაც მეტნი ვიქნებით და კოორდინირებული, მით ნაკლებად შეძლებენ ძალადობრივი სცენარის თავზე მოხვევას.

საქართველო ეკუთვნის ყველა მის მოქალაქეს და არა ერთ მუჭა ორგანიზებულ კრიმინალებს, რომელთაც უზარმაზარი ქონება მიითვისეს.

საქართველო ეკუთვნის ევროპულ სამყაროს და არაა აზიური დესპოტების უმწეო დანამატი. საქართველოს მთავარი პარტნიორი არის უკრაინა, რომელსაც უღალატა ამ რუსულმა ბანდამ ხოლო საქართველოს მტერი არის რუსეთი.

ამ კვირებში და დღეებში დაჩქარდა საქართველოს ჰიბრიდული დაპყრობა დესანტებით მოსკოვიდან დაწყებული და ტიუმენით დამთავრებული.

ამიტომ ახლა საჭიროა სიფხიზლე და მობილიზაცია, ჩვენ ბევრნი ვართ, ძლიერები ვართ, მთავარია ჩვენი რიგები შევკრათ და გავაფართოოთ“, – წერს მიხეილ სააკაშვილი.

საქართველოს პრემიერ-მინისტრი ირაკლი ღარიბაშვილი სომხეთის რესპუბლიკის პრემიერ-მინისტრს ნიკოლ ფაშინიანს შეხვდა.

პირისპირ საუბრის დროს ორი ქვეყნის პრემიერ-მინისტრებმა განიხილეს საქართველოსა და სომხეთის რესპუბლიკას შორის პოლიტიკურ, ეკონომიკურ და კულტურულ სფეროში თანამშრომლობის დინამიკა. შეხვედრისას მიმოიხილეს აგრეთვე რეგიონსა და მსოფლიოში არსებული უსაფრთხოების გარემო და გამოწვევები.

როგორც მთავრობის მეთაურმა აღნიშნა, მშვიდობიანი სამეზობლოს ინიციატივის ფარგლებში, საქართველო კვლავაც გამოხატავს მზადყოფნას მიმართოს ძალისხმევა რეგიონის მშვიდობიანი განვითარებისთვის.

პრემიერებმა შეხვედრისას ხაზი გაუსვეს ორ ქვეყანას შორის არსებულ ისტორიულ და კულტურულ კავშირებს.

რეგიონული სტაბილურობისა და კეთილდღეობის ხელშეწყობის ერთობლივი სწრაფვით, სომხეთმა და საქართველომ მოილაპარაკეს სტრატეგიულ საკითხებზე მაღალი დონის დიალოგის დაწყებაზე, რაც დამატებით სტიმულს მისცემს ჩვენს წარმატებულ თანამშრომლობას და ამავდროულად ხელს შეუწყობს რეგიონულ მშვიდობასა და სტაბილურობას.

ყურადღება გამახვილდა სავაჭრო-ეკონომიკურ საკითხებზე. პრემიერ-მინისტრებმა გამოთქვეს მზადყოფნა, რომ ქვეყნებს შორის ეკონომიკური თანამშრომლობა ახალ ეტაპზე გადავიდეს.

პირისპირ შეხვედრის შემდეგ, ირაკლი ღარიბაშვილმა და ნიკოლ ფაშინიანმა გაფართოებულ ფორმატში განიხილეს ქვეყნებს შორის თანამშრომლობის დინამიკა.

განსახილველ საკითხთა შორის იყო სხვადასხვა სფეროში არსებული ნაყოფიერი თანამშრომლობის მიმართულებები. ხაზი გაესვა ტრანსპორტის, ვაჭრობის, ენერგეტიკის, კულტურისა და სხვა მიმართულებით ქვეყნებს შორის თანამშრომლობის პოზიტიურ დინამიკას.

შეხვედრაზე ხაზი გაესვა ორი ქვეყნის მთავრობათაშორისი ეკონომიკური კომისიის როლს, რომელიც მნიშვნელოვანი პლატფორმაა საქართველოსა და სომხეთის რესპუბლიკას შორის კავშირების გასაძლიერებლად.
გაფართოებულ შეხვედრაზე მხარეებმა ეკონომიკის სფეროში თანამშრომლობის ახალი მიმართულებები მიმოიხილეს. შეხვედრას ესწრებოდნენ საქართველოსა და სომხეთის მინისტრთა კაბინეტის წევრები.