ევროკომისია დღეს მთავარ ანგარიშს გამოაქვეყნებს, რომელიც ევროკავშირში გაწევრიანების მსურველი ქვეყნების პროგრესის შესახებ პირველი ოფიციალური მიმოხილვა იქნება. ვრცელდება ინფორმაცია იმის შესახებ, რომ ევროკომისია რეკომენდაციას გაუწევს საქართველოსთვის ოფიციალური კანდიდატის სტატუსის მინიჭებას, – ამის შესახებ The Guardian-ი წერს.

გამოცემის ცნობით, რაც შეეხება უკრაინასა და მოლდოვას, რომლებსაც კანდიდატის სტატუსი 2022 წლის ივნისში მიენიჭათ, მოსალოდნელია, რომ ევროკომისია გასცემს რეკომენდაციას გაწევრიანების შესახებ ოფიციალურ მოლაპარაკებების დაწყებაზე.

ევროკომისია რეკომენდაციას გაუწევს ევროკავშირის ლიდერებს, უკრაინასთან და მოლდოვასთან გაწევრიანების შესახებ მოლაპარაკებები დაიწყოს, საქართველოს კი კანდიდატის სტატუსი მიანიჭონ, – ინფორმაციას გამოცემა Politico ოფიციალურ პირებზე დაყრდნობით ავრცელებს, რომელთა ვინაობასაც არ ასაჯაროებს.

„მწვანე შუქი უკრაინისა და მოლდოვისათვის: ევროკომისრების კაბინეტის ხელმძღვანელები, რომლებიც ორშაბათს ჰებდოს ყოველკვირეულ საკოორდინაციო შეხვედრაზე შეიკრიბნენ, უკვე შეთანხმდნენ იმ დიდ კითხვებზე, რომლებიც გაშუქდება დღევანდელ გაფართოების ანგარიშში: ისინი რეკომენდაციას გაუწევენ ევროკავშირის ლიდერებს უკრაინასთან და მოლდოვასთან გაწევრიანების მოლაპარაკებების დაწყებასთან დაკავშირებით – იმ პირობებით, რომ ქვეყნები გაატარებენ კანონის უზენაესობის დაცვასთან დაკავშირებულ რეფორმებს. კარგი ამბავია თბილისისთვისაც: ისინი ასევე რეკომენდაციას გაუწევენ, რომ ევროკავშირის მთავრობებმა საქართველოს მიანიჭონ კანდიდატის სტატუსი“,- წერს გამოცემა ორ ოფიციალურ პირზე დაყრდნობით.

საქართველოსთვის ევროკავშირის წევრობის კანდიდატის სტატუსის მოსანიჭებლად დადებითი წინასწარი დასკვნის მოლოდინი აქვს „ხალხის ძალის“ ერთ-ერთ ლიდერს დიმიტრი ხუნდაძეს. ამის შესახებ მან ჟურნალისტებთან საუბრისას განაცხადა.

„მოლოდინი არის პოზიტიური, მიუხედავად ოპოზიციის მცდელობისა, რომ ეს მოლოდინი გამქრალიყო, რომ ის სამუშაო, რაც მმართველმა გუნდმა ჩაატარა საზოგადოების დაკვეთით, არ მისულიყო კონკრეტულ შედეგამდე. მე ვფიქრობ, ისინი ამ შემთხვევაში კიდევ ერთხელ დარჩებიან გაწბილებულები და საქართველო დამსახურებულად მიიღებს ევროკავშირის წევრობის კანდიდატის სტატუსს,“ – განაცხადა დიმიტრი ხუნდაძემ.

მანვე აღნიშნა, რომ ხელისუფლება მზადაა შემდგომშიც გააგრძელოს ევროინტეგრაციის გზაზე გასატარებელი რეფორმების განხორციელება. „რა თქმა უნდა, ამისათვის არის გარკვეული რეფორმები განსახორციელებელი და მმართველი გუნდი ამაზე უარს არასდროს ამბობს,“ – განაცხადა დიმიტრი ხუნდაძემ.

ქვეყანა, რომელიც ერთ დროს იყო მოწინავე ასოცირებულ ტრიოში, დღეს ელოდება სტატუსს, ტრიოს დანარჩენი ორი წევრი კი ერთი ნაბიჯით წინაა – წელიწად ნახევარი ხელისუფლებამ პროცესის დასაზიანებლად გამოიყენა, შეფასება არ იქნება პოზიტიური, – ამის შესახებ პარტია “საქართველოსთვის” წევრმა ბექა ლილუაშვილმა განაცხადა.

რაც შეეხება სტატუსის მიღებას, ლილუაშვილის მოლოდინი ამ მხრივ პოზიტიურია, თუმცა, როგორც აღნიშნავს, იმ მიზეზებს შორის, რის გამოც ქვეყანა სტატუსს მიიღებს, ხელისუფლების ნაბიჯები არ იქნება.

“თვენახევრის წინ იყო დაახლოებით ზეპირი მოსმენა, სადაც გაჟღერდა ხელისუფლების შეფასება. სამოსნობა – მე ასე ვარქმევ ამას, სხვას ვერაფერს დაარქმევ, როცა 12 – დან 3 რეკომენდაციაა შესრულებული. მის შემდეგ “ქართულ ოცნებას” რაიმე არსებითი ნაბიჯი რეკომენდაციების შესასრულებლად არ გადაუდგამს. პირიქით, მიუხედავად იმისა, რომ ჩვენ გადავდგით არაპოპულარული ნაბიჯი და სამუშაო ჯგუფებში შევედით, არც ერთი ჩვენი რეკომენდაცია რეფორმებთან დაკავშირებით არ გაუთვალისწინებიათ. ხშირ შემთხვევაში, “ქართული ოცნება” არათუ არ ასრულებდა რეკომენდაციებს, არამედ ხელს უშლიდა ამას, მაგალითად, როცა გამოვიდნენ და დეკლარირებულად თქვეს, რომ არ მოახდენდნენ იუსტიციის უმაღლეს საბჭოში გადაწყვეტილებების მიღების წესის ცვლილებას. რატომ? – რადგან ეს ნიშნავს სასამართლოში გავლენის ბერკეტების შესუსტებას, ჩახსნას. მე არ მგონია, რომ რაიმე არსებითი პროგრესი დაფიქსირდეს, რადგან ქვეყანა, რომელიც ერთ დროს იყო მოწინავე ასოცირებულ ტრიოში, დღეს ელოდება სტატუსს, ხოლო ტრიოს დანარჩენი ორი წევრი ერთი ნაბიჯით წინაა და გაწევრიანების მოლაპარაკებებში ერთვება, ჩვენ კი სტატუსის მოლოდინში ვართ, რადგან მთელი წელიწადნახევარი ხელისუფლებამ პროცესის დასაზიანებლად გამოიყენა. ამიტომ, შეფასება არ იქნება პოზიტიური სამწუხაროდ და “ქართულ ოცნებას” სიმართლისთვის თვალის გასწორება მოუწევს. რაც შეეხება სტატუსის მიღებას, თუკი ჩამოვთვლიდით, რის გამო მოგვცემენ სტატუსს, ამაში არ მოხვდებოდა ხელისუფლების ნაბიჯები. ამოვიღოთ რა ნაბიჯები გადადგა, თუ ერთი გადაწყვეტილებით მცირე ნაბიჯს წინ გადავდგამდით, სხვა გადაწყვეტილებით, იმპიჩმენტი იქნებოდა, ცესკოს დაქვემდებარება, იუსტიციის უმაღლესი საბჭოს თაღლითურად დაკომპლექტება თუ სხვა, ორი ნაბიჯით უკან მიდიოდა ხელისუფლება. ამიტომ რის გამოც შეიძლება გვაძლევდნენ სტატუსს, ამ ჩამონათვალში ეს ნამდვილად არ მოხვდება, მოხვდება დანარჩენი ბევრი სხვა რამ, დაწყებული გეოპოლიტიკით, გაგრძელებული საქართველოს მოქალაქეთა ნებით, მათ შორის, ჩვენი მოკრძალებული წვლილით, გააზრების იმ საკითხით, რომ ხელისუფლება დროებითია და ეს არ უნდა იყოს მიზეზი იმის, რომ წაართვა სახელმწიფოს ევროპული მომავალი, როცა ხედავ, რომ მოქალაქეები ურყევად ამ პროცესის ერთგულნი არიან,”- განაცხადა ლილუაშვილმა.

ევროკავშირის გაფართოების შესახებ ევროკომისიის ყოველწლიური ანგარიში დღეს გამოქვეყნდება. ანგარიშში შეფასებული იქნება იმ ქვეყნების მიერ მიღწეული პროგრესი, რომლებიც ბლოკში გაერთიანებისკენ ისწრაფვიან, მათ შორის დოკუმენტში საქართველოს მიერ ევროკომისიის მიერ განსაზღვრული 12 პრიორიტეტის შესრულებაც იქნება შეფასებული.

რეფორმები ჩააგდო „ქართულმა ოცნებამ“, მაგრამ მოლოდინი მაქვს, რომ გეოპოლიტიკა, გაფართოება, ჩვენი ხალხის არჩევანი იქნება დანახული, – ამის შესახებ „სტრატეგია აღმაშენებლის“ დეპუტატმა პაატა მანჯგალაძემ განაცხადა.

მანჯგალაძე ელოდება, რომ ევროკომისიის ანგარიში, რომელიც რეკომენდაციების შესრულების თვალსაზრისით მდგომარეობას ასახავს, კრიტიკული იქნება, პოლიტიკური გადაწყვეტილება კი, დადებითი.

“ქართული ოცნება” სულ იცვლის პოზიციას და რთულია პოზიციაში მისდიო. ხალხი, რომელიც საუბრობდა, რომ კანდიდატის სტატუსს ჩალის ფასი აქვს და თავისთვის დაიტოვონო, სათაგურია და თავი შეაყოფინეს ქვეყანასო, დღეს საუბრობენ, რომ დაიმსახურეს სტატუსი. მოგვცენ და იყოს ამის მთქმელი ხალხის დამსახურება.

ჩვენ ვიცით, რომ გარდა რეფორმებისა, რასაც ქვეყანას სთხოვენ, საბოლოო ჯამში, მიიღება პოლიტიკური გადაწყვეტილება, პროცესი თავის არსით პოლიტიკურია. რეფორმები ჩააგდო “ქართულმა ოცნებამ”, მაგრამ მე მოლოდინი მაქვს, რომ გეოპოლიტიკა, გაფართოება, ჩვენი ხალხის არჩევანი იქნება დანახული. შეფასებას ველოდები კრიტიკულს და ჩვენ გვეტყვიან, რომ რეკომენდაციების ნახევარიც არ გვაქვს შესრულებული, მაგრამ არ უნდათ, მოლდოვას და უკრაინას დააშორონ ქვეყანა ამ გზაზე, ეს იქნება ალბათ, ჩვენთვის შესაძლებლობის მოცემის მთავარი განმსაზღვრელი, რომ კარი არ დაიხუროს და გავაგრძელოთ სვლა ამ გზაზე,”- განაცხადა მანჯგალაძემ.

ევროკავშირის გაფართოების შესახებ ევროკომისიის ყოველწლიური ანგარიში დღეს გამოქვეყნდება. ანგარიშში შეფასებული იქნება იმ ქვეყნების მიერ მიღწეული პროგრესი, რომლებიც ბლოკში გაერთიანებისკენ ისწრაფვიან, მათ შორის დოკუმენტში საქართველოს მიერ ევროკომისიის მიერ განსაზღვრული 12 პრიორიტეტის შესრულებაც იქნება შეფასებული.