პირობები შესრულდება, მით უმეტეს, თუ მათ ჩავხედავთ, ვნახავთ, რომ პრინციპში, ახალი არაფერია – ძირითადად საუბარია დაწყებული რეფორმების ბოლომდე მიყვანაზე ,- ამის შესახებ საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ განაცხადა.

რაც შეეხება საგარეო პოლიტიკის თანხვედრას, სამხარაძე აცხადებს, რომ ამ მხრივაც არ არსებობს რაიმე პრობლემა და ეს ეხება ევროკავშირის განცხადებებზე მიერთებას.

მისივე თქმით, საქართველო შეიძლება არ მიუერთდეს მხოლოდ კონკრეტულ ქვეყნებთან დაკავშირებით განცხადებებს არაღიარების პოლიტიკიდან გამომდინარე, რათა ამ ქვეყნებს საშუალება არ მისცენ, რომ შემდეგ “შური იძიონ” და აღიარონ ოკუპირებული ტერიტორიების დამოუკიდებლობა.

“ჩვენ მზადყოფნას ვაფიქსირებთ, რომ ახალი პირობები, რაც ახალ ეტაპზე გადასასვლელად გაჩნდა, ( ეს ახალი ეტაპი ნიშნავს მოლაპარაკებების დაწყებას ), ეს რეკომენდაციები და პირობები შესრულდება, მით უმეტეს თუ ჩავხედავთ პირობებს, ვნახავთ, რომ აქ შეუსრულებელი და პრინციპში, ახალი არაფერი არ არის, ძირითადად საუბარი არის დაწყებული რეფორმების ბოლომდე მიყვანაზე და საქართველოს მხრიდან ევროკავშირის საგარეო პოლიტიკაზე, ევროკავშირის განცხადებების უფრო მეტ მიერთებაზე. ამასთან დაკავშირებით დაწყებული გვაქვს საუბრები ევროკავშირთან. ერთადერთი საკითხი, რომელიც ჩვენ გვაღელვებს ამ შემთხვევაში არის ის, რომ არაღიარების პოლიტიკა იყოს წარმატებული და დარწმუნებული ვარ, ამ სულისკვეთებით ევროკავშირთან ერთად ვიპოვით იმ ფორმულას, რომ შესაძლებელი იქნება ჩვენი მიერთების მაჩვენებელი ევროკავშირის საგარეო პოლიტიკურ განცხადებებზე იყოს ბევრად უფრო მაღალი და ამავდროულად საფრთხე არ შევუქმნათ ჩვენს არაღიარებით პოლიტიკას”, – განაცხადა სამხარაძემ.

მინდა მივულოცო ქართველ ხალხს ეს მნიშვნელოვანი ნაბიჯი, ეს არის უმნიშვნელოვანესი გადაწყვეტილება. ეს არის კიდევ ერთი დადასტურება, რომ ევროკავშირი არის საქართველოს ერთგული მეგობარი, – ამის შესახებ პარტია „ლელოს” ერთ-ერთმა ლიდერმა, ბადრი ჯაფარიძემ განაცხადა.

ჯაფარიძის განცხადებით, ქართველმა ხალხმა დამსახურებულად მიიღო საქართველოსთვის კანდიდატის სტატუსი მინიჭების რეკომენდაცია.

„ამავდროულად, მინდა მივუსამძიმრო “ქართულ ოცნებას”. ევროკომისიის ეს გადაწყვეტილება, მიუხედავად მათი ყველა მცდელობისა, მათ მიერ განხორციელებული საბოტაჟისა, მიუხედავად იმისა, რომ მათ არ შეასრულეს რეკომენდაციების დიდი ნაწილი, ევროკომისიამ მაინც მიიღო დადებითი გადაწყვეტილება ქვეყნისთვის ევროკავშირის წევრობის კანდიდატის სტატუსის მინიჭებასთან დაკავშირებით. ქართველმა ხალხმა მიიღო დამსახურებულად ეს გადაწყვეტილება ევროკომისიის მხრიდან. ეს გადაწყვეტილება არის ქართველი ხალხის თავდაუზოგავი ბრძოლის შედეგი. ახლა უკვე გვაქვს გასავლელი უმნიშვნელოვანესი ეტაპი, როდესაც ევროპულმა საბჭომ უნდა მიიღოს ერთხმად გადაწყვეტილება სტატუსის მინიჭებასთან დაკავშირებით”, – აცხადებს ჯაფარიძე.

გილოცავთ დღევანდელ დღეს, დაფასებულია ქართველი ხალხის ნება – ევროკავშირმა რუსეთთან პირისპირ არ დაგვტოვა! – ასე ეხმაურება კანდიდატის სტატუსთან დაკავშირებით ევროკომისიის რეკომენდაციას “სტრატეგია აღმაშენებლის” ლიდერი გიორგი ვაშაძე.

ვაშაძის შეფასებით, ქართველი ხალხის დამსახურებით ქვეყანამ ევროკავშირის გზაზე დიდი ნაბიჯი გადადგა.

“ნამდვილად უმნიშვნელოვანესი დღეა – ჩვენ დიდი ნაბიჯი გადავდგით ევროკავშირისკენ და სწორედ ქართველი ხალხის, თქვენი დამსახურებაა ეს ყველაფერი, რაც ძალიან მკაფიოდ იყო ჩვენი ევროპელი პარტნიორების მხრიდან აღნიშნული. დიდი მადლობა ჩვენს ევროპელ სტრატეგიულ პარტნიორებს, მათ ვინც, მიუხედავად ძალიან ბევრი პრობლემისა, ქართველი ხალხის ნება დააფასეს, მნიშვნელოვანი ნაბიჯი გადადგეს და რეკომენდაცია გაწიეს, რომ საქართველომ ევროკავშირის კანდიდატის სტატუსი მიიღოს.

წელიწადნახევრის მანძილზე, „ქართული ოცნება“ ხელისშეშლის მეტს არაფერს აკეთებდა იმისთვის, რომ ჩვენ კანდიდატის სტატუსი არ მიგვეღო, მაგრამ დღეს მათ წააგეს ქართველ ხალხთან პირველ რიგში და დიახაც, გაიმარჯვა ჩვენმა ევროპულმა სულისკვეთებამ, რომ საქართველო იყოს ევროკავშირის სრულუფლებიანი წევრი. ძალიან ბევრი რეფორმაა გასაკეთებელი და დღეს ამ განცხადებით ხაზგასმული იყო ოპოზიციის პოზიტიური როლი, სამოქალაქო სექტორის როლი და პირველ რიგში, რა თქმა უნდა, ქართველი ხალხის როლი.

ჩვენ ახლა გვჭირდება დიდი ერთიანობა იმისთვის, რომ შემდგომი ერთი თვის მანძილზე, სადაც საბოლოო გადაწყვეტილება უნდა მიიღოს ევროკავშირის 27 წევრმა ქვეყანამ, იყოს სრული კონსესუსი და მზაობა.

იმედი მაქვს, რომ ვერ შეძლებს საბოტაჟსა და წინააღმდეგობის პროცესს „ქართული ოცნება“ და ხალხის ნებას დაემორჩილება – გაუწევს ანგარიშს იმ დიდ ნაბიჯს, რომელიც ევროკავშირმა ჩვენკენ გადმოდგა.

დიდი მადლობა პირადად ქალბატონ ურსულას ამ მნიშვნელოვანი განცხადებებისთვის, რომელშიც, აბსოლუტურად, ყველაფერია ნათქვამი. ხალხო, ყველაფერი ხომ დღესავით ნათელია, რამხელა დეზინფორმაციის კამპანია მოქმედებდა საქართველოში, რომ ევროკავშირის სტატუსს არაფერი მნიშვნელობა არ აქვს, რომ თითქოს ვიღაც რაღაცას გვაძალებს, მაგრამ დიდი ინვესტიცია ჩადო ევროკავშირმა ჩვენში, საქართველოში და არ დაგვტოვა რუსეთთან პირისპირ.

აი, ესაა მნიშვნელოვანი დღევანდელ დღეს. საქართველოს გზა არის ევროკავშირისკენ, საქართველოს გზა არის განვითარებისკენ, არასდროს რუსეთი საქართველოში არ იქნება და რაც მთავარია, დეკემბერი – დიდი ნაბიჯი უნდა გადავდგათ და ჯერ მხოლოდ დასაწყისია, გულწრფელად მიხარია, რომ ჩვენ ყველას ერთად შეგვიძლია, რომ ვთქვათ – ფუნდამენტი შექმნა ევროკომისიამ, ახლა კი უნდა ვიყოთ მობილიზებული, რომ „ქართული ოცნების“ მხრიდან ხელისშეშლა არ მოხდეს და მთავარია, რომ ჩვენი ძალისხმევა იყოს ერთიანი”, – განაცხადა გიორგი ვაშაძემ.

მე პირადად არ ვარ დაპირისპირებაში არც პრეზიდენტთან, არც ოპოზიციასთან, მე არავითარი საქმე არ მაქვს მათთან – ყველამ აკეთოს თავისი საქმე, ოპოზიციას ვუსურვებ დიდხანს დასვენებას, – ამის შესახებ საქართველოს პრემიერ-მინისტრმა, ირაკლი ღარიბაშვილმა პრესკონფერენციაზე განაცხადა.

მისივე თქმით, საქართველოს პრეზიდენტსა და ოპოზიციას ევროინტეგრაციის გზაზე არაფერი გაუკეთებიათ.

„მე პირადად არ ვარ დაპირისპირებაში არც პრეზიდენტთან, არც ოპოზიციასთან. მე არავითარი საქმე არ მაქვს მათთან. ჩვენ გვაქვს ძალიან ბევრი საქმე გასაკეთებელი ჩვენი ხალხისთვის, ჩვენი ქვეყნისთვის. გასაგებია ახლა იგივე ქალბატონი პრეზიდენტის მოტივაციაც და ჩვენი ხელმოცარული ოპოზიციის მოტივაციაც. როგორც ჩანს, მათ ბოლო პერიოდის განმავლობაში გაიგეს, რომ გადაწყვეტილება შეიცვალა და პოზიტიური რეკომენდაცია იქნებოდა, რომელიც დღეს დადასტურდა, ამიტომ ეს იყო მათი მხრიდან უსუსური მცდელობა, რომ რაიმენაირად ბოლო კვირებში მაინც ჩართულიყვნენ ამ პროცესში და რაღაცა ქულა მაინც წაეღოთ.

მე მინდა ხაზგასმით და მკაფიოდ განვაცხადო, არც პრეზიდენტს, სამწუხაროდ, არც ოპოზიციას არაფერი გაუკეთებიათ ჩვენი ქვეყნის ევროინტეგრაციის გზაზე. არც შარშან, არც შარშან წინ და არც ბოლო 10 წლის განმავლობაში. თუ ვინმემ რაიმე გააკეთა, რაიმე ხელშესახები შედეგი მოუტანა ჩვენს ხალხს, ეს არის „ქართლი ოცნება“.

პრეზიდენტს აქვს თავისი როლი, საკუთარი კონსტიტუციური უფლებამოვალეობანი. მე მინდა ყველამ კარგად გაიაზროს თავისი კონსტიტუციური უფლებამოვალეობანი, როგორც პრეზიდენტმა, ასევე პრემიერ-მინისტრმა, პარლამენტმა და ყველამ. მე ვიცი ჩემი უფლებამოვალეობანი და რა თქმა უნდა, მივყვები კონსტიტუციას და ჩვენს მთავარ კანონს. ვიცავ და ვასრულებ პირნათლად. ვემსახურები ჩვენს ქვეყანას. ასევე მოვუწოდებდი პრეზიდენტს და ყველას კარგად ჩაიხედონ საკუთარ უფლებამოვალეობებში და გაერკვნენ. მე არ მსურს პრეზიდენტთან რაიმე პოლემიკაში შესვლა. პრეზიდენტს თავისი ფუნქცია აქვს განსაზღვრული, მთავრობას თავისი, პარლამენტს თავისი, ასე რომ ყველას ჩვენი საქმე გვაქვს. ყველამ აკეთოს თავისი საქმე – ეს იქნებოდა ჩემი რეკომენდაცია ყველასთვის. ოპოზიციას ვუსურვებ დიდხანს დასვენებას,“ – განაცხადა ღარიბაშვილმა.

მინდა ყველას მოგილოცოთ ევროკომისიის დღევანდელი დასკვნა და მიღწეული შედეგების აღიარება, – ამის შესახებ მამუკა მდინარაძემ „ქართლი ოცნების“ ოფისში გამართულ ბრიფინგზე განაცხადა. მმართველი პარტიის აღმასრულებელმა მდივანმა და ფრაქცია „ქართული ოცნების“ თავმჯდომარემ აღნიშნა, რომ საქართველომ 2012 წლიდან მოყოლებული ბევრ ხელშესახებ წარმატებას მიაღწია ევროინტეგრაციის გზაზე არა მხოლოდ 12 რეკომენდაციის ფარგლებში, არამედ მასშტაბური და ყოვლისმომცველი ასოცირების ხელშეკრულებით გათვალისწინებული რეფორმებით.

„დღევანდელი პოზიტიური რეკომენდაცია, პირველ რიგში, ამ შრომისა და შესაბამისი შედეგების აღიარებაა. მიუხედავად უამრავი ნეგატიური და დამაზიანებელი კამპანიისა, მიუხედავად პირდაპირი საბოტაჟისა ევროკავშირის წევრობის კანდიდატის სტატუსთან დაკავშირებით, ჩვენ შევძელით მიგვეღო სამართლიანი რეკომენდაცია ევროკომისიისგან. მადლობა გვინდა გადავუხადოთ ევროკომისიის წარმომადგენლებს სამართლიანი და ობიექტური რეკომენდაციის გაცემისთვის, რომელიც არის კიდევ ერთი წინგადადგმული ნაბიჯი ევროკავშირში სრულფასოვანი ინტეგრაციისკენ.

მადლობა ყველას, ვინც ჩართული იყო ამ პოზიტიური დასკვნის მომზადების და საქართველოში არსებული დემოკრატიული პროგრესის ობიექტურად შეფასების პროცესში. მადლობა საქართველოს მთავრობის და საქართველოს პარლამენტის თითოეულ წევრს, თითოეულ საჯარო მოსამსახურეს, ვინც დაუღალავად და კეთილსინდისიერად მუშაობდა ამ შედეგის მისაღწევად. და რაც მთავარია, მადლობა ქართველ ხალხს, რომლის სიმტკიცემ და ყველა სიტუაციაში გონიერებამ მოგვცა საშუალება ღირსებისა და სიმართლის დაცვით გვევლო ამ რთულ გზაზე. საქართველოს მთავრობასა და პარლამენტს ინტენსიური ურთიერთობა ჰქონდა ევროკომისიის წარმომადგენლებთან, განსაკუთრებით ბოლო პერიოდის განმავლობაში და თანხმდებოდა რეკომენდაციების შესრულებასთან დაკავშირებული უამრავი დეტალი, რამაც, როგორც ხედავთ, მნიშვნელოვანი როლი შეასრულა პოზიტიური შეფასების გაცემაში. ბუნებრივია, ევროკომისიის მიერ მომზადებული დასკვნა კიდევ უფრო გვიმყარებს რწმენას, რომ მიმდინარე წლის 15 დეკემბერს ჩვენ დამსახურებულად მივიღებთ ევროკავშირის წევრობის კანდიდატის სტატუსს“, – განაცხადა მდინარაძემ.

ევროკომისიამ საქართველოსთვის კანდიდატის სტატუსის მინიჭების რეკომენდაცია გასცა.