საქართველოს ძლიერი ჯარი უნდა ჰყავდეს, რომელიც გამოყენებული არ უნდა იყოს პოლიტიკური მიზნებისთვის, რასაც „ქართული ოცნება“ ცდილობს. ეს ცვლილებები თავდაცვისუნარიანობასთან არაფერ კავშირშია, – ამის შესახებ „გირჩის“ წევრმა, სანდრო რაქვიაშვილმა საქართველოს პირველ არხს განუცხადა.

მისი თქმით, შემოთავაზებული „თავდაცვის კოდექსი“ თავდაცვისუნარიანობას, ფაქტობრივად, დაანგრევს.

„მთავრობას ბინების მშენებლობას ავალდებულებს, მაგრამ არ ავალდებულებს, იარაღი იყიდოს. წვევამდელების გაწვევა მხოლოდ იმიტომ სჭირდებათ, რომ იფიქრონ არა ჯარზე, არამედ წინასაარჩევნოდ ახალგაზრდებზე ზეწოლის ინსტრუმენტები ჰქონდეთ. ასევე, კანონპროექტში დისკრიმინაციაა ჩადებული – იმისათვის, რომ „ბიბლიურ თავისუფლებას“ შეეხონ, ცვლილებები ყველა კონფესიას ეხება და მხოლოდ მართლმადიდებლებს შეუძლიათ, ჯარში არ წავიდნენ. ამ კოდექსის ნაკლოვანებაზე შეიძლება, დღეები ვილაპარაკოთ და ეს რომ არ მოხდეს, „ქართულ ოცნებას“ შეეშინდა და პროცედურებს არღვევს. ჩვენ მართლა ჯარი უნდა გვყავდეს და ადამიანები სამწლიანი ციხით არ უნდა დავაშინოთ, რომ ჯარში წავიდნენ. არ გვინდა, რომ იძულება იყოს, ჯარში ადამიანები ნებაყოფლობით უნდა მიდიოდნენ. ეს ყველაფერი ისე უნიჭოდ გააკეთეს, რომ ცვლილებების მიღებას მარტში აპირებდნენ, ახლა ივლისია და ვერ მიიღეს. ყველაფერზე წავიდნენ – ეთიკისა და პროცედურების ნორმები დაარღვიეს. კანონს, მუხლების ნაცვლად, თავებით განვიხილავთ. ეს მხოლოდ იმიტომ კეთდება, რომ „ქართულ ოცნებას“ შეეშინდა, ხალხს სიმართლე დაენახა“, – განაცხადა რაქვიაშვილმა.

პარტია „პროგრესი და თავისუფლებას“ ლიდერი კახა ოქრიაშვილი განცხადებას ავრცელებს, რომელსაც  უცვლელად გთავაზობთ:

„უკვე წელიწადზე მეტია, „რუსული ოცნება“ ქვეყანას გაურკვევლობაში აცხოვრებს: ქართველი ხალხი ვიძინებთ და ვიღვიძებთ ერთი კითხვით – მოგვანიჭებენ თუ არა ევროკავშირის კანდიდატი ქვეყნის სტატუსს, შევალთ თუ არა ოდესმე ნატო-ში და ექნება თუ არა ჩვენს ქვეყანას სრული უსაფრთხოება.

კანდიდატის სტატუსი, როგორც ასეთი, გარანტირებულ წევრობას არ ნიშნავს – ეს ნიშნავს, რომ სწორ ნაბიჯებს ვდგამთ სახელმწიფო სტრუქტურების მშენებლობის გზაზე და სახელისუფლო განშტოებებს შორის დემოკრატიული ბალანსია, რაც წარმოადგენს ზოგადად დემოკრატიის იდეას და გარანტიას.

ამ პირობებში, პასუხი ერთმნიშვნელოვანია: ვიდრე ეს სახელმწიფო „რუსულ ოცნებას“ და ბატონ ივანიშვილის ექნება მიტაცებული, ანუ სრულყოფილი დემოკრატია არ იქნება ქვეყანაში, ჩვენ ვერც ნატო-ს და ვერც ევროკავშირის წევრი ვერ გავხდებით! ამ სტრუქტურებში გაწევრიანების მთავარი პირობა სწორედ დემოკრატიაა – ნატო-სა და ევროკავშირში მხოლოდ დემოკრატიული ქვეყნების ადგილია. მეორეს მხრივ, ვერც რუსეთში შეგვათრევენ, რადგან საქართველოს მოსახლეობის 80%-ზე მეტს ევროკავშირი და ნატო სურს!

გამოსავალი მრავალია, მაგრამ საუკეთესო გამოსავალი ერთია – არჩევნების გზით, პოლიტიკურად უნდა „ჩავრეცხოთ“ აგენტებით გამოტენილი „რუსული ოცნება“! – აცხადებს ოქრიაშვილი.

ჟენევაში საერთაშორისო მოლაპარაკებების 58-ე რაუნდი იწყება. მოლაპარაკებების მონაწილეები შვეიცარიაში უკვე იკრიბებიან.ქართულ დელეგაციას საგარეო საქმეთა მინისტრის მოადგილე ლაშა დარსალია ხელმძღვანელობს .

„ვითარება კიდევ უფრო დამძიმებულია, განსაკუთრებით საქართველოს ოკუპირებულ ტერიტორიებზე. გრძელდება ის დესტრუქციული ქმედებები, რომლებსაც რუსეთის ფედერაცია და მისი საოკუპაციო რეჟიმები ახორციელებენ. შესაბამისად, ამ ფონზე წარიმართება მოლაპარაკებების ეს რაუნდი.

როგორც კი დევნილთა თემა დადგება, რუსეთის ფედერაცია ყოველთვის შლის რაუნდს, მაგრამ მნიშვნელოვანია ის, რომ დღეს იქნება ეს თუ ხვალ, რუსეთს მოუწევს თავისი საერთაშორისო ვალდებულებების შესრულება და ამაში განსაკუთრებული როლი უკავია ჩვენი პარტნიორების პოზიციას. ცალკე მინდა ხაზი გავუსვა იმ მტკიცე მხარდაჭერას, რომელიც საქართველოს პარტნიორების მხრიდან აქვს.

ამ წუთას საქართველოს მოქალაქეების უპრეცედენტოდ მაღალი რაოდენობა არის დაკავებული. რუსეთი პერიოდულად აკავებს ხოლმე საქართველოს მოქალაქეებს, იყენებს ამას როგორც ზეწოლის მექანიზმს და შემდგომ რამდენიმე მათგანის გათავისუფლება უნდა წარმოაჩინოს როგორც წინ გადადგმული ნაბიჯი. ეს არის ცალსახად პროვოკაციული მიდგომა და პროვოკაციული მიდგომა ზოგადად“, – აცხადებს დარსალია.