როგორც ჩანს, კომუნისტური პარტიის გამოცდილება ჩვენი ისტორიული წარსულიდან კობახიძისთვის საკმარისი არ არის და რაღაც ახლის ძიებაშია ჩინეთის კომუნისტურ პარტიაში, – ასე ეხმიანება პარტია „საქართველოსთვის“ წევრი ბექა ლილუაშვილი „ქართული ოცნების“ დელეგაციის ჩინეთში ვიზიტს.

როგორც მან აღნიშნა, გაუგებარია, რატომ გახდა აუცილებელი ჩინეთთან ურთიერთობების სტრატეგიული პარტნიორობის დონეზე აყვანა.

„ჩინეთთან სტრატეგიული პარტნიორობის დოკუმენტი გააფორმეს და ახალ ეტაპზე აიყვანეს ურთიერთობა, მე არ ვიცი, რაში მდგომარეობდა ამის საჭიროება. ჩვენ ჩინეთთან ფანტასტიური ეკონომიკური ურთოერთობები გვაქვს, ჩვენი, მათ შორის, გახარიას ხელმოწერილია თავისუფალი ვაჭრობის შესახებ შეთანხმება და ამის შემდეგ რა საჭირო იყო პარტნიორულ დონეზე ურთიერთობების აყვანა, მე არ ვიცი. როგორც ჩანს, კომუნისტური პარტიის გამოცდილება ჩვენი ისტორიული წარსულიდან კობახიძისთვის საკმარისი არ არის და რაღაც ახლის ძიებაშია ჩინეთის კომუნისტურ პარტიაში,”- განაცხადა ლილუაშვილმა.

ამასთან, ლილუაშვილმა პარლამენტიდან განცხადებით მიმართა მედიის ნაწილის ხელმძღვანელებს, ასევე ბიძინა ივანიშვილს და მოუწოდა დებატებისთვის ტელევიზიების კარი გახსნას.

„მივმართავთ ეგრეთ წოდებულ სახელისუფლებო ტელევიზიების („იმედის“, „რუსთავი 2“-ის, „საზოგადოებრივი მაუწყებელის“) ფორმალურ ხელმძღვანელებს, ფორმალურ მფლობელებს და რეალურ მეპატრონეს ბიძინა ივანიშვილს:

ბოლო რამდენიმე წელია, ივანიშვილმა სრული კონტროლი მოიპოვა ამ არხებზე და ისინი აქცია „ოცნების“ პოლიტიკურ იარაღად, რომელსაც ის იყენებს ხალხისთვის სიმართლის დასამალად.

ამ თვალსაზრისით, სატელევიზიო პროპაგანდამ მიაღწია „ნაცმოძრაობის“ ხელისუფლების პროპაგანდისტულ სიმაღლეებს.

„ოცნება“ დღეს „ნაცების“ მსგავსად მედიას იყენებს მოდელირებული რეალობის შექმნის, fake-ის გავრცელებისა და ხალხისათვის სიმართლის დასამალად.

სააკაშვილის მოგონილი მედია ბოიკოტის კოპირების გზით, შეშინებული კობახიძეები, მდინარაძეები, კალაძეები და სხვები ხალხის წინაშე ანგარიშვალდებულების ნაცვლად, სტუდიებში სხედან და კომფორტულად, საკუთარ თავს ელაპარაკებიან.

ჩვენ მოვუწოდებთ ივანიშვილს და „ოცნებას“ გახსნან სატელევიზიო არხების ეთერები დებატებისთვის.

გახსნან პირდაპირი ეთერები ყველასთვის! ვიმეორებ ყველასთვის და არა მხოლოდ სააკაშვილის თათბირების გასაშუქებლად, სასამართლო დარბაზიდან!”- აღნიშნა ლილუაშვილმა პარლამენტში გამართულ ბრიფინგზე.

მისივე თქმით, გახარიას გუნდი ელოდება ივანიშვილისგან, თავად როდის იტყვის ღიად თანხმობას ან უარს გახარიასთან დებატებზე.

ჩვენი ამოცანა არის ის, რომ წელს ქვეყანაში დაიწყოს ცვლილებები, რომელიც სჭირდება ჩვენ ხალხს -„ლელო“ ყველაფერს გააკეთებს იმისთვის, რომ ეს ცვლილებები დადგეს,- ამის შესახებ პარტია „ლელოს“ პოლიტსაბჭოს თავმჯდომარემ ბადრი ჯაფარიძემ პოლიტსაბჭოს სხდომის დასრულების შემდეგ განაცხადა.

როგორც ჯაფარიძემ პარტიის ოფისში გამართულ ბრიფინგზე აღნიშნა, ცვლილებები ქვეყნისთვის აუცილებელია, რომელიც უნდა დადგეს 2024 წელს ჩატარებული არჩევნების შედეგად.

„ჩვენი ამოცანა არის ის, რომ წელს ქვეყანაში დაიწყოს ცვლილებები, რომელიც სჭირდება ჩვენ ხალხს, ცვლილებები, რომელიც მოიტანს სიმშვიდეს, ჰარმონიულ განვითარებას, რომელიც გაამთლიანებს საზოგადოებას, დააჩქარებს ქვეყნის ინტეგრაციას ევროკავშირში და რომელიც საბოლოო ჯამში, უზრუნველყოფს იმას, რომ ჩვენი თითოეული მოქალაქე იცხოვრებს ღირსეულად, ყველასთვის უზრუნველყოფილი იქნება თანაბარი პირობები და ქვეყანა აუცილებლად გახდება რეგიონში ერთ-ერთი წამყვანი. ამას მოიტანს სწორედ ის ცვლილებები, რომელიც ქვეყნისთვის აუცილებელია, რომელიც უნდა დადგეს ამ წელს ჩატარებული არჩევნების შედეგად. „ლელო“ ყველაფერს გააკეთებს იმისთვის, რომ ეს ცვლილებები დადგეს, ეს ცვლილებები სიკეთის მომტანი იყოს ჩვენი ქვეყნისთვის, ჩვენი საზოგადოებისთვის და ერთხელ და სამუდამოდ ქვეყანა დაადგეს განვითარების შეუქცევად გზას“,-განაცხადა ბადრი ჯაფარიძემ.

ცნობისთვის პარტია „ლელოში“ პოლიტსაბჭოს სხდომა გაიმართა, პოლიტსაბჭოს თავმჯდომარედ აირჩიეს ბადრი ჯაფარიძე, თავმჯდომარის მოადგილედ ანა ნაცვლიშვილი, ხოლო, პარტიის გენერალური მდივანი ირაკლი კუპრაძე გახდა.

პარტია „ლელოში“ შიდაპარტიული არჩევნები დასრულდა. პარტიის პოლიტსაბჭომ თავმჯდომარედ ბადრი ჯაფარიძე მის მოადგილედ კი ანა ნაცვლიშვილი აირჩია. ამის შესახებ განცხადება პარტიის ერთ-ერთმა ლიდერმა მამუკა ხაზარაძემ პოლიტსაბჭოს სხდომის დასრულების შემდეგ განაცხადა,.

დღეს პოლიტსაბჭოს სხდომამ ირაკლი კუპრაძე ოფიციალურად დაამტკიცა გენერალური მდივნის თანამდებობაზე.

„დღეს „ლელოში“ დამთავრდა საარჩევნო პროცესი. მოგეხსენებათ, რომ 22 დეკემბერს ჩვენ ჩავატარეთ ყრილობა, სადაც არჩეული იქნა პოლიტსაბჭოს 21 წევრი. დღეს ჩატარდა პოლიტსაბჭოს სხდომა, სადაც არჩეულ იქნა პოლიტსაბჭოს თავმჯდომარე და მისი მოადგილე, ასევე დამტკიცდა გენერალური მდივნის კანდიდატურა. მინდა წარმოგიდგინოთ ბადრი ჯაფარიძე, რომელიც ერთხმად იქნა არჩეული პოლიტსაბჭოს თავმჯდომარედ, ასევე ანა ნაცვლიშვილი, პოლიტსაბჭოს თავმჯდომარის მოადგილედ და ის წაიყვანს პოლიტსაბჭოში აღმასრულებელ მიმართულებას. ასევე ირაკლი კუპრაძე დამტკიცდა პარტიის გენერალურ მდივნად. მინდა გითხრათ. რომ ამით ჩვენ დავასრულეთ შიდა პარტიული არჩევნები და შეიძლება ითქვას, რომ დღეიდან პარტია სრულიად მობილიზებულია იმისთვის. რომ საკმაოდ სერიოზული გამარჯვება მოიტანოს 2024 წლის არჩევნებისთვის. გამარჯვებაში ჩვენ ვგულისხმობთ იმას, რომ შევცვალოთ ქართველი ხალხის ცხოვრება, რომ ეს ქვეყანა გავხადოთ წარმატებული, შევქმნათ ძალიან ბევრი სამუშაო ადგილი, გავაორმაგოთ ბიუჯეტი, შევქმნათ პირობა, რომ ჩვენი ემიგრაცია დაუბრუნდეს სამშობლოს და ჩვენს ახალგაზრდებს მივცეთ საქართველოში სამუშაოს დაწყების საშუალება, ჩვენს პენსიონერებს მივცეთ ღირსეული ცხოვრების საშუალება. ასე რომ, ჩვენ ვართ სრულად მობილიზებულები, იმისთვის, რომ 2024 წელი არა მხოლოდ ჩვენი პარტიისთვის, არამედ სრულიად საქართველოსთვის გახდეს გარდამტეხი და გამარჯვების წელი“,- განაცხადა მამუკა ხაზარაძემ.

რასაც ჩვენ ჩინეთთან ურთიერთობების გაღრმავების კუთხით ვხედავთ, არის უპირველეს ყოვლისა რევანში პოლიტიკურ დასავლეთზე. ეს არის ამერიკის და ევროპული კავშირის წინააღმდეგ გადადგმული ნაბიჯები, – ამის შესახებ “ლელოს” ერთ-ერთმა ლიდერმა, გრიგოლ გეგელიამ განაცხადა, რითაც “ქართული ოცნების” დელეგაციის ჩინეთში ვიზიტი შეაფასა.

მისივე თქმით, ჩინეთს აქვს მთელი რიგი ისეთი ინტერესები, რომელიც არ არის და ვერ იქნება დამოუკიდებელი, თავისუფალი, სუვერენული საქართველოს ინტერესებთან თანხვედრაში, შესაბამისად, უნდა აირჩიო ან ერთი, ან მეორე.

„სავაჭრო დონეზე ქვეყნებს შორის ურთიერთობები კარგი და მისასალმებელია, რომელი ქვეყანაც არ უნდა იყოს ის, ბუნებრივია, გარდა რუსეთის ფედერაციისა და მასთან აფილირებული ავტოკრატიებისა, მაგრამ რასაც ჩვენ ვხედავთ ჩინეთთან ურთიერთობების გაღრმავების კუთხით, ეს არის უპირველეს ყოვლისა რევანში პოლიტიკურ დასავლეთზე. ეს არის ამერიკის და ევროპული კავშირის წინააღმდეგ გადადგმული ნაბიჯები და არა საქართველოს ინტერესების დივერსიფიკაციის კუთხით გადადგმული ნაბიჯები. ძალიან მარტივად – “ქართული ოცნება” აკეთებს ყველაფერს იმისთვის, რომ დასავლელ პარტნიორებს უთხრას რომ მას, “ქართულ ოცნებას” გააჩნია განსხვავებული ღირებულებითი ღერძი, რომელიც აღარ ემთხვევა ამერიკის და ევროპული კავშირის გეოპოლიტიკურ და საგარეო ინტერესებს,” – განაცხადა გეგელიამ.