ჩვენ შევძელით ის, რაც იყო მნიშვნელოვანი, რომ ევროპის დედაქალაქში გვეჩვენებინა საქართველო და მისი კულტურა ზუსტად ისე, როგორც ჩვენ, ქართველები აღვიქვამთ მას, – ამის შესახებ კულტურის მინისტრმა, თეა წულუკიანმა განაცხადა.
„საქართველოს მთავრობამ და კულტურის სამინისტრომ ღირსეულად გაართვეს თავი ამ ფესტივალის მაღალ დონეზე ჩატარებას, რამაც შესანიშნავი და უნიკალური ფონი შექმნა ქვეყნისა, რომელმაც მიაღწია წარმატებას და მიიღო წინა წლის დეკემბერში ევროკავშირში წევრობის კანდიდატის სტატუსი. ეს იყო შესანიშნავი აკომპანემენტი ჩვენი ქვეყნისთვის, მთელი პანოპლია კულტურული ღონისძიებებისა, რომელმაც აქაურ ევროპელ მსმენელს, მაყურებელს, დამთვალიერებელს კიდევ ერთხელ შეახსენა, რომ საქართველო არის ევროპული ქვეყანა და ქართული კულტურა ერთი მხრივ არის თვითმყოფადი და თავისი ფესვებით ნამდვილად ევროპული კულტურის ქვეყანა. ყველას მინდა ვუთხრა მადლობა და მივულოცო წარმატებით ჩატარებული რამდენიმეთვიანი უმნიშვნელოვანესი ფესტივალი და ერთი-მეორეზე წარმატებული ღონისძიებები.
თუ უფრო სუბიექტურები ვიქნებით, ვიტყვით, რომ 99% პროცენტი, რომელთა ინიციატორიც იყო საქართველოს მთავრობა და კულტურის სამინისტრო, ყველა ჩატარდა ანშლაგით. ჩვენ შევძელით ის, რაც იყო მნიშვნელოვანი, რომ ევროპის დედაქალაქში გვეჩვენებინა საქართველო და მისი კულტურა გვეჩვენებინა ზუსტად ისე, როგორც ჩვენ, ქართველები აღვიქვამთ მას, როგორც ჩვენ წარმოგვიდგენია ჩვენი თავი ევროპაში და არ წარმოვჩენილიყავით ისე, როგორც ჩვენ წარმოვუდგენივართ სხვას. ეს ძალიან მნიშვნელოვანი იყო, რომ ჩვენ სცენაზე გვყოლოდნენ ჩვენი ჩოხიანი ღირსეული კაცები, გვყოლოდა მოცეკვავეთა მთელი კოჰორტა, რომელმაც ღირსეულად წარმოადგინა საქართველო. გვყოლოდა ჩვენი ვახტანგ კახიძე, რომელმაც აჩვენა, რომ საქართველო არა მხოლოდ ფოლკლორის, არამედ მაღალი დონის მუსიკის ქვეყანაა. გვყოლოდა აშუღი ნარგილე, რომელიც ერთადერთი ქალია ამ დარგში და მას ეჩვენებინა, რომ ჩვენ ვართ მრავალეროვანი, მრავალეთნიკური კონფესიებით და მათ შორის ჰარმონიული თანაცხოვრების ქვეყანა“, – აღნიშნა წულუკიანმა.
ფესტივალი „ევროპალია-საქართველო“ ბრიუსელში დღეს სრულდება.
