ჩვენი თანამშრომლობა ჩინეთთან არის უკიდურესად მნიშვნელოვანი სხვადასხვა თვალსაზრისით, ჩვენთვის მნიშვნელოვანია პოლიტიკური თანამშრომლობა ჩინეთთან, ჩვენთვის მნიშვნელოვანია ეკონომიკური თანამშრომლობა და ამ თანამშრომლობას შეუძლია ძალიან კონკრეტული ხელშესახები შედეგების მოტანა ჩვენი ქვეყნისთვის და ჩვენი ქვეყნის მოსახლეობისთვის – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

ირაკლი კობახიძის თქმით, ჩინეთში ოფიციალური ვიზიტის ფარგლებში შეხვედრები გაიმართა მმართველი პარტიის საერთაშორისო დეპარტამენტის ხელმძღვანელთან, მინისტრ ლიუ ძინჩაოსთან, მინისტრის მოადგილესთან, ასევე სახელმწიფო საბჭოსთან არსებული კვლევითი ცენტრის ხელმძღვანელობასთან.

„შევხვდით მმართველი პარტიის საერთაშორისო დეპარტამენტის ხელმძღვანელს, მინისტრ ლიუ ძინჩაოს, ასევე მინისტრის მოადგილეს, ასევე შეხვედრა გვქონდა სახელმწიფო საბჭოსთან არსებული კვლევითი ცენტრის ხელმძღვანელობასთან. ძალიან საინტერესოა საუბარი თანამშრომლობის გაღრმავებაზე. შარშანდელი წელი იყო ისტორიული ჩინეთსა და საქართველოს შორის ურთიერთობების გაღრმავების თვასაზრისით. ხელი მოეწერა სტრატეგიული პარტნიორობის შეთანხმებას და ჩვენი მიზანია ბუნებრივია, ამ თანამშრომლობის შეთანხმების სათანადო იმპლემენტაციის უზრუნველყოფა და ამას ემსახურება ჩვენი ვიზიტი. არის ბევრი სფერო, სადაც შესაძლებელია ურთიერთობების გაღრმავება, რა თქმა უნდა, მნიშვნელოვანია პოლიტიკური ასპექტის გაღრმავება, მნიშვნელოვანია ეკონომიკური ურთიერთობების გაღრმავება და ამას უნდა ჰქონდეს ძალიან კონკრეტული ხელშესახები შედეგები. ძალიან დიდ მნიშვნელობას ვანიჭებთ ურთიერთობების განვითარებას საქართველოსა და ჩინეთს შორის“ – განაცხადა ირაკლი კობახიძემ.

მიკვირს, როცა სტრატეგიას ისე სახავენ, რომ ვიღაც თანამშრომლობას აპირებს მელიასთან, მაგრამ არ აპირებს „ნაციონალურ მოძრაობასთან“. გეგონება, მელია რომელიმე სხვა პარტიიდან ან დაჯგუფებიდან იყოს მოსული. შიდა განხეთქილების შედეგად ნანგრევების კონფიგურაციაა, რასაკვირველია, დღეს ისევ საუბარია „ნაცმოძრაობის“ თანამშრომლობაზე, – ამის შესახებ პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა.

სარჯველაძის თქმით, დადასტურდა, რომ ვიდრე მელია „ნაცმოძრაობაში“, პარტიის ხელმძღვანელი იყო, „ლელო“ და „ნაცმოძრაობა“ ურთიერთთავსებადი პარტიები ყოფილან.

„ოპოზიციაში მიმდინარე გადაჯგუფებებს არაფერი აქვს საერთო კეთილსინდისიერ და პრინციპულ პოლიტიკასთან. სინამდვილეში, ეს ნაკარნახებია მხოლოდ მერკანტილური მიზნებით, რომ საკუთარი ვიწროპარტიული გადმოსახედიდან ნახონ შესაძლებლობა, ბარიერი გადალახონ. ამ გაერთიანებებს სხვა ფუნქცია არ აქვთ. შეუძლებელია, ვინმემ ახსნას, რა არის იდეოლოგიური თანხვედრა „ლელოსა“ და მელიას შორის. ამის დადგენა შეუძლებელია, რადგან გამოკვეთილი არ ყოფილა. ცალკეულ ლიდერებს პერსონალური თავსებადობა როგორი აქვთ, ეს არის ამ გაერთიანება-არგაერთიანების განმსაზღვრელი. ვითომ „ნაცმოძრაობასთან“ ართანამშრომლობა ნაკარნახევია იმით, რომ კარგად ხვდებიან, „ნაცმოძრაობასთან“ თანამშრომლობა იმდენად უარყოფითი ფაქტორი და იარლიყია, ამის გამხელა არავის უნდა. წარმოიდგინეთ, „ნაცმოძრაობიდან“ გამოძევებულ ხალხთან თანამშრომლობა რამდენად დამაზიანებელი შეიძლება აღმოჩნდეს, იგივე „ლელოსთვის“. ეს ის შეცდომებია, რაც შემოდგომაზე ოპოზიციის წარუმატებლობის მიზეზი იქნება. რაც შეეხება „ლელოს“ შანსებს, საარჩევნო ბარიერის გადალახვის შანსი პრაქტიკულად არ აქვს. ალბათ, წინა არჩევნებზე დაფიქსირებული მაჩვენებლის გაუმჯობესების პერსპექტივაც კი არ აქვთ, თუ არ ჩავთლით იმ შესაძლებლობებს, რაც ოპოზიციურ ფლანგზე „ნაცმოძრაობის“ დიდი ფიასკოს შემდეგ გაჩნდა. შეიძლება, ოპოზიციურად განწყობილი ამომრჩევლის ნაწილი აღმოჩნდეს, ვისაც ეს ჯგუფი იზიდავდეს. როგორც ჩანს, მელიასთან დაწყებული კონსულტაციაც ამ მიზანს ემსახურება. „ლელოს“ განახლების განა რა რესურსი აქვს, თავისი თავის გასჭირვებია. არ მგონია, მათ რაიმე პერსპექტივა ჰქონდეთ, რომ განახლება შეძლონ“, – აღნიშნა მიხეილ სარჯველაძემ.

შეგახსენებთ, მამუკა ხაზარაძემ 2023 წლის 28 დეკემბერს განაცხადა, რომ „ლელოს“ ნიკა მელიასთან ერთიანი სტრატეგიული პარტნიორობა ექნება, თუმცა არჩევნების წინ გაერთიანებას და ახალი სახელით წარდგომას არ გამორიცხავს. დღეს კი, „ლელოს“ წევრმა, ბადრი ჯაფარიძემ აღნიშნა, რომ ამ მომენტისთვის ნიკა მელიასთან არანაირი კონსულტაცია არ მიმდინარეობს.

რუსეთის საოკუპაციო ძალების წარმომადგენლებმა, ოკუპირებულ სოფელ ახმაჯის მიმდებარედ საქართველოს მოქალაქე უკანონოდ დააკავეს. ამის შესახებ ინფორმაცია საქართველოს უსაფრთხოების სამსახური ავრცელებს.

უწყების მიერ გავრცელებული ინფორმაციის თანახმად, აღნიშნული ინციდენტის შესახებ ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული „ცხელი ხაზი“.

„ინფორმაცია უკანონო დაკავების მორიგი ფაქტის შესახებ დაუყოვნებლივ ეცნობა ჟენევის საერთაშორისო დისკუსიების თანათავმჯდომარეებსა და საერთაშორისო პარტნიორებს.

ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად.

საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას”,- ნათქვამია ინფორმაციაში.

პოლიტიკურ სპექტრს ვაიძულებთ, რომ „ნაცები“ წავიდნენ „ნაცებთან“, ხოლო დანარჩენ ოპოზიციურ პარტიებს, რომელთაც არც „ნაცობა“ უნდათ და არც „ქოცობა“, კარი გავუხსნათ, – ამის შესახებ „გირჩის“ წევრმა, იაგო ხვიჩიამ განაცხადა.

ხვიჩიას თქმით, ჯერჯერობით პოლიტიკური ვაჭრობა მაინც „ნაცების“ კართან მიდის და ამიტომ მთავარი ყურადღება იქით არის გადატანილი.

„როგორც კი „ნაცებთან“ ვაჭრობა მორჩება და ვერ შეთანხმდებიან, ალბათ შემდეგ საინტერესო იქნება, ის ვერშეთანხმებული ხალხი რას იზამს. რაზე ვაჭრობენ? ძირითადად საარჩევნო სიაზე ვაჭრობენ. „ნაცებში“ სიას ვინ დაალაგებს, არ ვიცი, თუმცა წინა სიაც არ იყო მაინც და მაინც კარგად დალაგებული. ამიტომ თუ იგივე ხალხი აკეთებს სიას, შეიძლება, დალაგებული არ იყოს. იმედი მაქვს, რომ მიხეილ სააკაშვილი უარყოფით გამოცდილებას და სიაზე შეცდომას გაითვალისწინებს. პარტიის არსებული შემადგენლობა გასაახლებელია“, – განაცხადა იაგო ხვიჩიამ.

„ქართული ოცნებისგან“ ნულია იმის მოლოდინი, რომ ისინი ევრორეკომენდაციებს შეასრულებენ – მათ რეფორმების განხორციელების არანაირი სურვილი და პოლიტიკური ნება არ გააჩნიათ, – ამის შესახებ „ლელოს“ ერთ-ერთმა ლიდერმა, ანა ნაცვლიშვილმა ჟურნალისტებთან საუბრისას განაცხადა.

მისივე თქმით, „ქართულ ოცნებას“ რეფორმების გასატარებლად 11 წელი ჰქონდა.

„ჩვენ ვაპირებთ, რომ ხელისუფლებაში მოსვლიდან ძალიან მალე, ყველა ის ფუნდამენტური რეფორმა განვახორციელოთ, რომელიც უზრუნველყოფს, საქართველო გახდეს ევროკავშირის სრულუფლებიანი წევრი. „ქართული ოცნებისგან“ ნულია იმის მოლოდინი, რომ ისინი ამ რეფორმებს გაატარებენ,“ – აღნიშნა ნაცვლიშვილმა.

მისივე შეფასებით, „ქართული ოცნება“ კორუფციული გარიგებების შემოქმედი და მფარველია.

„ქართული ოცნება“ არის კორუფციული ხელისუფლება, რომელმაც თავისი თავი გაათანაბრა კორუფციასთან და არის პირდაპირ მფარველი და შემოქმედი ამ კორუფციული გარიგებების,“ – განაცხადა ნაცვლიშვილმა.

ბიძინა ივანიშვილი აცდენილია ქვეყნის მიზნებიდან – მას მხოლოდ პირადი კეთილდღეობა ამოძრავებს, ჩვენ გვინდა, რომ ეს შევცვალოთ და ქვეყანა ჩვენი მოქალაქეების ინტერებიდან გამომდინარე იმართებოდეს, – ამის შესახებ პარტია “ლელოს” ერთ-ერთმა ლიდერმა, ბადრი ჯაფარიძემ ჟურნალისტებთან საუბრისას განაცხადა.

მისივე თქმით, “ლელო” უახლოეს პერიოდში საკუთარ გეგმებზე მოსახლეობის ინფორმირებას გააგრძელებს.

“მას [ბიძინა ივანიშვილს] ამოძრავებს ყოველთვის მხოლოდ და მხოლოდ მისი პირადი უსაფრთხოება, პირადი კეთილდღეობა და ჩვენ გვინდა, ეს შევცვალოთ, რომ ქვეყანა იმართებოდეს არა ვინმეს პირადი კეთილდღეობის და ინტერესებიდან გამომდინარე, არამედ ჩვენი მოქალაქეების ინტერებიდან გამომდინარე. რაც შეეხება “ლელოს” – ჩვენ გვაქვს მკაფიო გეგმა. უახლოეს პერიოდში ჩვენ გავაგრძელებთ საზოგადოების ინფორმირებას იმ გეგმებზე, რომელიც ჩვენ გაგვაჩნია, კონკრეტულ ნაბიჯებზე, რომელსაც ჩვენ გადავდგამთ როგორც კი “ქართული ოცნება” შეიცვლება და სათავეში პროევროპული დემოკრატიული კოალიციური მმართველობა მოვა,” – განაცხადა ჯაფარიძემ.

მან ასევე “ერთიანი ნაციონალური მოძრაობის” ყოფილ თავმჯდომარესთან, ნიკა მელიასთან შესაძლო თანამშრომლობაზე დასმულ კითხვას უპასუხა და აღნიშნა, რომ “ამ ეტაპზე, არანაირი კონსულტაცია არ მიმდინარეობს”.

გარდა ამისა, მან “ქართული ოცნების” დელეგაციის ჩინეთში ვიზიტზე ისაუბრა და აღნიშნა, რომ მნიშვნელოვანია, ჩინეთმა საქართველოს დეოკუპაციის მიმართ მხარდაჭერა მკაფიოდ გამოხატოს.

“ჩინეთთან ურთიერთობაში ეკონომიკური ასპექტი ძალიან მნიშვნელოვანია, მაგრამ ძალიან მნიშვნელოვანია, რომ ჩინეთმა მკაფიოდ გამოხატოს მხარდაჭერა საქართველოს დეოკუპაციის მიმართ, რაც არის ძალიან პრინციპული და ძალიან კრიტიკული ჩვენი ქვეყნისთვის,” – განაცხადა ჯაფარიძემ.