ონის მუნიციპალიტეტის მერი სერგო ხიდეშელი აცხადებს, რომ სასტუმრო „სანსეტ შოვის“ მიმდებარე ტერიტორიიდან, სადაც მეწყერი ჩამოწვა, მოქალაქეების ევაკუაცია უახლოეს ხანში დაიწყება.

როგორც სერგო ხიდეშელი აცხადებს, კურორტ შოვის ტერიტორიაზე სასტუმრო „სანსეტ შოვის“ მიმდებარედ, სავარაუდოდ მაღალ მთაში დაგუბებულმა მდინარემ მეწყრული პროცესი განავითარა.

„ჩამოიშალა მიწის დიდი მასა და დაგუბების შედეგად ასევე წყლის მასა წამოვიდა. შემთხვევის ადგილზე მობილიზებული არიან შესაბამისი სამსახურები, მათ შორის საპოლიციო ძალები, საგანგებო სიტუაციების მართვის სამსახური. ასევე სასაზღვრო პოლიციის ორი ვერტმფრენი წუთი-წუთზე იქნება უკვე ადგილზე და მოხდება კურორტის ტერიტორიაზე მყოფი მოქალაქეების გადმოყვანა უსაფრთხო ადგილზე. საევაკუაციო გეგმა რა თქმა უნდა სამაშველო სამსახურთან ერთად შემუშავდა. რაც შეეხება დაშავებულებს, ამაზე კონკრეტულად ვერ გაგცემთ პასუხს, რადგან არ გამაჩნია დაზუსტებული ინფორმაცია“, – განაცხადა ონის მერმა.

გზები და მისასვლელი ხიდები კურორტ შოვამდე წაღებულია, ადგილზე იმყოფება სამაშველო ჯგუფი და წამოსულია ვერტმფრენიც თბილისიდან, – ამის შესახებ რაჭის გუბერნატორმა, პაპუნა მარგველიძემ საქართველოს პირველ არხს განუცხადა.

მისი თქმით, დაშავებულთა შესახებ ჯერ ინფორმაცია არ აქვთ.

„დაშავებულების შესახებ ჯერჯერობით არაფერი ვიცით. მიმდინარეობს სამუშაოები ამ მხრივაც. ვეკონტაქტებით, იქ ვინც არის ჩარჩენილი. დანგრეულია კოტეჯებიც. სამაშველო  უკვე ადგილზეა. პირველ რიგში მოქალაქეების ევაკუაცია იქნება საჭირო და ამ მხრივ ვამუშავებთ გეგმას“, – განაცხადა მარგველიძემ.

შინაგან საქმეთა სამინისტრომ შოვში მეწყერთან დაკავშირებით განცხადება გაავრცელა. როგორც შსს-ში განაცხადეს, მომხდარის შესახებ ინფორმირებულია ყველა შესაბამისი უწყება და ადგილზე მობილიზებულია შესაბამისი ტექნიკა.

„საზოგადოებრივ მართვის ცენტრ 112-ში შემოსულია არაერთი შეტყობინება შოვში მდებარე სასტუმრო „სანსეტ შოვში“ მეწყერის შედეგად მიწის მასის ჩამოშლასთან დაკავშირებით, გვსურს, საზოგადოებას მივაწოდოთ ინფორმაცია, რომ მომხდარის შესახებ ინფორმირებულია ყველა შესაბამისი უწყება, ადგილზე მობილიზებულია შესაბამისი ტექნიკა და ასევე, ხდება ტექნიკის დამატება. შემთხვევის ადგილზე შინაგან საქმეთა სამინისტროს სასაზღვრო პოლიციის ორი ვერტმფრენით მიემგზავრებიან საგანგებო სიტუაციების მართვის სამსახურის მაშველები და სხვა საპოლიციო დანაყოფის წარმომადგენლები. ამ ეტაპზე, დაშავებულების შესახებ დაზუსტებული ინფორმაცია არ არის, დამატებით ინფორმაციას ეტაპობრივად მოგაწვდით“, – ნათქვამია განცხადებაში.

ახლა კარგად ვართ, მეწყერიც შეჩერებულია – ველოდებით ვერტმფრენს, – ამის შესახებ „სანსეტ შოვის“ თანამშრომელმა, ქეთი მაისურაძემ განაცხადა.

მისივე ინფორმაციით, მსხვერპლი არ არის.

„ახლა კარგად ვართ, მეწყერიც შეჩერებულია. ყველაფერი კარგად არის. რაც მთავარია, მსხვერპლი არ არის. კიბით ჩამოვიყვანეთ სტუმრები, უკანა მხრიდან. ყველანი კარგად ვართ. დროულად იყოჩაღეს და კარგად არის ყველაფერი. მეწყერიც შეჩერებულია. ხიდები წაღებულია, ველოდებით ვერტმფრენს”, – ამბობს ქეთი მაისურაძე „ფორმულასთან“ რომელიც „სანსეტ შოვში“ იმყოფება.

ცნობისთვის, რაჭაში, შოვში მეწყერი ჩამოწვა. არსებული ინფორმაციით, სტიქიის ზონაში ჩარჩენილი არიან ადამიანები. როგორც „ინტერპრესნიუსს“ საგანგებო სიტუაციების მართვის სამსახურში განუცხადეს, ჯერჯერობით დაშავებულების შესახებ ზუსტი ინფორმაცია არ აქვთ, თუმცა სტიქიის ადგილზე უკვე მიდიან შინაგან საქმეთა სამინისტროს შესაბამისი დანაყოფები.