ტელეკომპანია „მთავარის“ გენერალურმა დირექტორმა, ნიკა გვარამიამ რუსთავის მე-12 სასჯელაღსრულების დაწესებულება დატოვა. ​გვარამიას რუსთავის ციხესთან ოჯახის წევრები, მეგობრები და მხარდამჭერები დახვდნენ.

როგორც გვარამიამ განაცხადა, შეწყალებას არ ელოდა.

„გულწრფელად გეტყვით, რომ არ ველოდი გათავისუფლებას, არ ვიყავი ამისთვის მზად. მინდა, გამოვეხმაურო იმას, რაც სალომე ზურაბიშვილმა გამოაცხადა დღეს. მე ვფიქრობ, ეს მას ჩემთვის ნამდვილად არ გაუკეთებია. მან ეს გააკეთა საკუთარი ქვეყნისთვის, რომლის პრეზიდენტიც არის. ვფიქრობ, რომ ეს მას ღირსებას მატებს, ნამდვილად.

არ ვაპირებ გაჯიუტებული ვიყო ჩემ შეცდომაში. გულწრფელად გეტყვით, რომ ის ვიდეოები, რომელსაც დიდი ეჭვი მაქვს, ამ დღეების განმავლობაში გამოიყენებენ მის წინააღმდეგ. მე არ მომწონს ჩემი თავი ამ ვიდეოებში, საძაგლობაა ქალთან მიმართებით ასე მოქცევა და ბოდიშს ვუხდი ამის გამო.

თუმცა არ შემიძლია, არ ვთქვა, რომ არც ის უნდა გაჯიუტდეს თავის შეცდომაში, როგორც პრეზიდენტი და უნდა გაათავისუფლოს მიხეილ სააკაშვილი. უნდა გვესმოდეს,როდესაც ქვეყანაში არსებობს მინიმუმ 500 ათასი ადამიანი, ვინც მიიჩნევს, რომ მათთვის სახელმწიფოებრიობასთან ასოცირებული მთავარი პირი არის მძევალი, ასეთ ვითარებაში ქვეყანაში სიმშვიდე ვერ იქნება. მით უმეტეს ვერანაირი დეპოლარიზაცია. ამიტომ კიდევ ერთხელ მოვუწოდებ სალომე ზურაბიშვილს, როგორც პრეზიდენტს, ნუ გაჯიუტდება თავის შეცდომაში და გაათავისუფლოს მიხეილ სააკაშვილი, ეს ძალიან მნიშვნელოვანია ამ ქვეყნისთვის.

არ მგონია, რომ რელევანტური იყოს არგუმენტი, რომ მაშინ სხვები გაბრაზდებიან. შეიძლება, სხვები გაბრაზდებიან, ადამიანების რაღაც რაოდენობა, მაგრამ ბრაზი გაივლის სწრაფად. სამაგიეროდ, იმ ადამიანების, ვისზეც მე ვისაუბრე, უსამართლობის შეგრძნება არ გაივლის იქამდე, ვიდრე სააკაშვილი არის უსამართლო პატიმრობაში. მოდით, არ შევაფასოთ, სამართლიანში თუ უსამართლოში, პირდაპირ ვთქვათ, რომ არ ღირს გარისკვა ადამიანის სიცოცხლით.ვისაც ეჭვი ეპარება მის ჯანმრთელობაში, სჯობს, ეს ეჭვი სიცოცხლის სასარგებლოდ გადაწყვიტოს თავის თავშიც, მათ შორის სალომე ზურაბიშვილმაც. თუ არსებობს რამე ეჭვები, გადაწყვიტეთ სიცოცხლის სასარგებლოდ, რადგან სჯობს შეგეშალოთ სიცოცხლის სასარგებლოდ, ვიდრე სიკვდილის სასარგებლოდ.

არ ვთვლიდი და დღემდე არ ვთვლი, რომ შეწყალება უნდა მეთხოვა, რადგან უდანაშაულო მგონია ჩემი თავი და ამას აუცილებლად დავამტკიცებ“,- განაცხადა ნიკა გვარამიამ.

ამასთან, ნიკა გვარამიამ განაცხადა, რომ „მთავარი არხის“ ხელმძღვანელობას აღარ გეგმავს.

საქართველოს პრეზიდენტმა, სალომე ზურაბიშვილმა ნიკა გვარამია შეიწყალა.

მნიშვნელოვანი აქტი გამოსცა საქართველოს პრეზიდენტმა, ოღონდ ეს არ არის ერთი კონკრეტული ადამიანისთვის გამოცემული აქტი, ეს არის ჩვენი ქვეყნის ეროვნული ინტერესებისთვის მნიშვნელოვანი, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა განაცხადა.

„მინდა, მივულოცო ყველას, ნიკას მეგობრებს, თანამებრძოლებს  და  ჩვენი ქვეყნის მოქალაქეებს, თუნდაც განსხვავებული პოზიციისას, რადგან მათ კარგად უნდა იცოდნენ, რომ მთავარი ოპოზიციური არხის გენერალური დირექტორი რომ გამოგონილი, აბსურდული ბრალით არის დაკავებული, ასე ევროკავშირის კანდიდატის სტატუსს არ მოგვცემენ.

ახლა მნიშვნელოვანია ასევე პრეზიდენტ სააკაშვილის თავისუფლება, რაზეც ასევე საუბრობენ ღიად დიპლომატები, ჩვენი დასავლელი პარტნიორები და შემდეგ ყველამ ერთად უნდა გავათავისუფლოთ ამ რუსული რეჟიმისგან ჩვენი ქვეყანა“, – განაცხადა ლევან ხაბეიშვილმა რუსთავის მე-12 სასჯელაღსრულების დაწესებულებასთან, სადაც ნიკა გვარამიას ციხიდან გამოსვლას „მთავარი არხის“ თანამშრომლები, ოჯახის წევრები, მეგობრები და გულშემატკივრები ელოდებიან.

საქართველოს პრეზიდენტმა, სალომე ზურაბიშვილმა ნიკა გვარამია შეიწყალა.

თბილისის საქალაქო სასამართლომ 2022 წლის 16 მაისს ნიკა გვარამიას სამი წლითა და ექვსი თვით პატიმრობა მიუსაჯა ტელეკომპანია „რუსთავი 2“-ის ხელმძღვანელობის პერიოდში უფლებამოსილების ბოროტად გამოყენების საქმეზე. 2022 წლის 2 ნოემბერს სააპელაციო სასამართლომ ნიკა გვარამიას პატიმრობის ვადის ნაწილში გადაწყვეტილება არ შეცვალა. განაჩენი ადვოკატებმა უზენაეს სასამართლოში გაასაჩივრეს. უზენაესმა სასამართლომ კი გვარამიას საქმე განსახილველად არ მიიღო.

ჰელსინკის კომისია ნიკა გვარამიას შეწყალების შესახებ საქართველოს პრეზიდენტის, სალომე ზურაბიშვილის გადაწყვეტილებას ეხმიანება.

„დღეს პრეზიდენტმა სალომე ზურაბიშვილმა შეიწყალა ნიკა გვარამია, რომელიც საქართველოს მთავრობის მიერ დევნილი და უსამართლოდ დაპატიმრებული იყო. მადლობა, ქალბატონო პრეზიდენტო, გამბედაობისა და ლიდერობის კიდევ ერთი მაგალითისთვის“, – წერია ჰელსინკის კომისიის განცხადებაში.

საქართველოს პრეზიდენტმა ნიკა გვარამია შეიწყალა.

გაფართოების საკითხებში ევროკომისარმა, ოლივერ ვარჰეიმ სტოკჰოლმში, ევროკავშირის ევროპის საკითხთა მინისტრების არაფორმალური შეხვედრის შემდეგ ზეპირი ანგარიში წარადგინა.

როგორც ვარჰეიმ აღნიშნა, საქართველომ სრულად შეასრულა სამი რეკომენდაცია, კერძოდ – გენდერული თანასწორობისა და ქალთა მიმართ ძალადობა; ადამიანის უფლებათა ევროპული სასამართლოს გადაწყვეტილებების გათვალისწინება სასამართლო განხილვისას; სახალხო დამცველის გამჭვირვალე პროცესით დანიშვნა.

ამასთან, ვარჰეიმ თქმით, კიდევ შვიდი რეკომენდაციის შესრულების მხრივ მიღწეულია გარკვეული პროგრესი.

„საქართველოსთან დაკავშირებით 12 პრიორიტეტი იქნა განსაზღვრული, საიდანაც სამი მათგანი შესრულდა. კიდევ შვიდი რეკომენდაციის შესრულების მხრივ კი საქართველომ გარკვეულ პროგრესს მიაღწია. ეს სფეროებია; პოლიტიკური პოლარიზაციის მოგვარება, სახელმწიფო ინსტიტუტების სრულად ფუნქციონირების უზრუნველყოფა და საარჩევნო ჩარჩოს შემდგომი გაუმჯობესება, გამჭვირვალე და ეფექტური სასამართლო რეფორმის სტრატეგიის მიღება და განხორციელება, ანტიკორუფციული სტრატეგიის დამოუკიდებლობის გაძლიერება, ორგანიზებული დანაშაულის წინააღმდეგ ბრძოლის გაძლიერება, მოწყვლადი ჯგუფების უფლებათა დაცვა და გაძლიერება, გადაწყვეტილების მიღების პროცესში სამოქალაქო საზოგადოების ჩართვის უზრუნველყოფა. პარლამენტის წევრთა უმეტესობამ დაასრულა ბოიკოტი პარლამენტში, რამდენიმე კანონი იქნა მიღებული პარტიათაშორისი მხარდაჭერით ამ კრიტერიუმის სრულად დაკმაყოფილებისთვის. საქართველომ უნდა უზრუნველყოს პარლამენტის ეფექტური კონტროლი და დაასრულოს მკაცრი რიტორიკა და პატივი სცეს მიღებულ პოლიტიკურ შეთანხმებას, კერძოდ, ევროკავშირის შუამავლობით მიღწეულს, რომელსაც 19 აპრილის შეთანხმება ჰქვია; მეორე ნაბიჯი – სახელმწიფო ინსტიტუტების სრული ფუნქციონირების უზრუნველყოფა და საარჩევნო სისტემის შემდგომი გაუმჯობესება. მთავრობამ მიიღო საჯარო ადმინისტრირების რეფორმის სტრატეგია და სამოქმედო გეგმა, საარჩევნო კოდექსსა და კანონში განხორციელდა ცვლილებები პოლიტიკური გაერთიანების შესახებ ვენეციის კომისიისა და ოდირის რეკომენდაციებთან შესაბამისობისთვის, თუმცა საქართველომ უნდა გააუმჯობესოს საპარლამენტო კონტროლი, რათა ადეკვატურად გამოიძიოს საარჩევნო დარღვევებთან დაკავშირებული ბრალდებები, როგორც ეს ოდირის ანგარიშშია ხაზგასმული და უკან უნდა გაიწვიოს საარჩევნო ცვლილებები, რომელიც ცენტრალური საარჩევნო კომისიის თავმჯდომარის დანიშვნას უკავშირდება;

მესამე ნაბიჯი – ინკლუზიური და ეფექტური სასამართლო რეფორმა, მათ შორის იუსტიციის უმაღლესი საბჭო. საქართველომ უნდა წარადგინოს ცვლილებები მართლმსაჯულების რეფორმასთან დაკავშირებით ვენეციის კომისიაში მეორე მოსაზრების მისაღებად, რათა მიიღოს მართლმსაჯულების უფრო ფართო რეფორმა, განსაკუთრებით, იუსტიციის უმაღლეს საბჭოში; დაბოლოს, დანიშნოს არამოსამართლე წევრები იუსტიციის უმაღლეს საბჭოში. მეოთხე პუნქტს რაც შეეხება, ახალი ანტიკორუფციული ბიურო დაარსდა იმისთვის, რომ საქართველომ სრულად უპასუხოს ამ პუნქტს, საჭიროა იმის უზრუნველყოფა, რომ ბიურომ იმუშაოს დამოუკიდებლად და კანონპროექტთან დაკავშირებით მოხდეს კონსულტაციები ვენეციის კომისიასთან. ჩვენ ვთხოვთ საქართველოს, გადახედოს გადაწყვეტილებას ეკონომიკური თანამშრომლობისა და განვითარების ორგანიზაციის ანტიკორუფციული ბიუროდან გამოსვლის შესახებ; რაც შეეხება მეექვსე პუნქტს – ორგანიზებულ დანაშაულს, საქართველომ გააძლიერა ურთიერთობა „ევროპოლთან“ და წევრ სახელმწიფოებთან. ახლა საქართველოს სჭირდება, რომ შეასრულოს ევროპული საბჭოს ყველა რეკომენდაცია; მერვე – ადამიანების და მოწყვლადი ჯგუფების უფლებების დაცვა. საქართველომ უნდა უზრუნველყოს, რომ ადამიანის უფლებების სამოქმედო გეგმის სტრატეგია მოამზადოს ინკლუზიური გზით, უზრუნველყოს ლგბტქი საზოგადოების წევრების შეკრება და გამოხატვის თავისუფლება; მეათე პუნქტი – სამოქალაქო საზოგადოების ჩართულობა გადაწყვეტილების მიღების პროცესში ყველა დონეზე. საქართველოს სჭირდება კონსტრუქციული დიალოგის განახლება სამოქალაქო საზოგადოებასთან და შეასრულოს რეგულარული და გამჭვირვალე კონსულტაციები;

რაც შეეხება დეოლიგარქიზაციას, საქართველომ მიაღწია შეზღუდულ პროგრესს. ამ მიმართულებით ვენეციის კომისიამ ბოლო დასკვნაში თქვა, რომ კანონპროექტი არ უნდა მიღებულიყო ამ ფორმით და ამასთან დაკავშირებით, მინდა, მივესალმო რამდენიმე დღის წინ მმართველი პარტიის მიერ გაკეთებულ განცხადებას, რომ ეს კანონპროექტი მიღებული არ იქნება. ახლა საქართველო უნდა ფოკუსირდეს სისტემური მიდგომის ჩამოყალიბებაზე ვენეციის კომისიის რეკომენდაციების გათვალისწინებით, მათ შორის კონკურენციის პოლიტიკისა და პოლიტიკური პარტიების დაფინანსების წესების გაძლიერებით; დაბოლოს, მედია პლურალიზმი და მედია მფლობელების წინააღმდეგ სისხლის სამართლის პროცედურები. საქართველომ ამ ნაბიჯის შესრულებაში წარმატებას ვერ მიაღწია. საქართველოს სჭირდება შესწორებები კანონში მაუწყებლობის შესახებ ევროპული საბჭოს რეკომენდაციების გათვალისწინებით, უნდა უზრუნველყოს ჟურნალისტების უსაფრთხოება და ასევე, აამაღლოს ჟურნალისტებისა და მედიამფლობელების თავისუფლების დაცვა“, – განაცხადა ვარჰეიმ.