ოლენა ზელენსკა აცხადებს, რომ უკრაინელებს სასიკვდილო საფრთხე ემუქრებათ, თუ დასავლეთის ქვეყნები ფინანსურ მხარდაჭერას შეწყვეტენ. ამის შესახებ უკრაინის პირველმა ლედიმ „ბიბისისთან“ ინტერვიუში განაცხადა მას შემდეგ, რაც აშშ-ის სენატში რესპუბლიკელმა სენატორებმა უკრაინის დახმარების კანონპროექტი დაბლოკეს.

ექსკლუზიური ინტერვიუს სრული ვერსია ბრიტანეთის საზოგადოებრივი მაუწყებლის ეთერში კვირას გავა.

„ჩვენ ძალიან გვჭირდება დახმარება. მარტივად რომ ვთქვათ, ჩვენ არ შეგვიძლია ამ სიტუაციით დაღლა, რადგან თუ ამას გავაკეთებთ, მოვკვდებით. მსოფლიო თუ დაიღლება, ისინი ჩვენ უბრალოდ სასიკვდილოდ გაგვწირავენ. ჩვენთვის ძალიან მტკივნეულია იმის ხილვა, რომ დახმარების მგზნებარე მზადყოფნა შეიძლება, შესუსტდეს. ჩვენთვის ეს სიცოცხლის საკითხია. შესაბამისად, ამის ნახვა მტკივნეულია“, – განაცხადა ოლენა ზელენსკამ.

შეერთებული შტატები თუ შეწყვეტს უკრაინის მხარდაჭერას, რუსეთი მოადგება ნატო-ს საზღვრებს და ჩვენ მოგვიწევს დავიწყოთ მოქმედება ნატო-ს მეხუთე მუხლის შესაბამისად ამერიკელების სისხლის ფასად. თეთრი სახლის ცნობით, ამის შესახებ აშშ-ის ეროვნული უსაფრთხოების საბჭოს სტრატეგიული კომუნიკაციების კოორდინატორმა, ჯონ კირბიმ განაცხადა.

კირბიმ აღნიშნა, რომ რუსეთის პრეზიდენტი ვლადიმირ პუტინი მოელის, რომ აშშ შეწყვეტს უკრაინის მხარდაჭერას, რაც მისთვის დიდი საჩუქარი იქნება.

კირბის თქმით, თუ პუტინი უკრაინას საჩუქრად მიიღებს, ის ნატო-ს ზღურბლთან აღმოჩნდება. „და როგორც მანამდე ვთქვი, თუ ფიქრობთ, რომ ახლა უკრაინის მხარდაჭერის ფასი მაღალია, დაფიქრდით, იმ შემთხვევაში თუ ჩვენ მოგვიწევს მეხუთე მუხლის ამოქმედება ჩვენი ვალდებულების შესაბამისად, რა დაუჯდება ეს ეროვნულ ხაზინას და  ამერიკელებს რა სისხლის ფასად {დაუჯდება}“, – განაცხადა კირბიმ {კონგრესის მისამართით}.

მან ასევე აღნიშნა, რომ რუსეთის პრეზიდენტი ამ ომის დასაწყისიდანვე ეყრდნობოდა მოვლენების ასეთ განვითარებას, რადგან არ სჯეროდა, რომ დასავლეთი შეძლებდა ერთიანობის შენარუნებას, არ სჯეროდა, რომ რომ შეერთებულ შტატებს საკმარისი ძალა ექნებოდა.

„თუ ზრუნავთ ჩვენს ეროვნულ უსაფრთხოებაზე, თქვენ უნდა დაინახოთ ბატონი პუტინი, ისეთი, როგორიც არის, თქვენ უნდა დაინახოთ რუსეთი, ისეთი, როგორიც არის და გესმოდეთ, რომ უკრაინელების დახმარება გამარჯვებაში {და ისინი არ გვთხოვენ ომში ფიზიკურად მონაწილეობას}, ჩვენი, ევროპისა და ყველა ჩვენი მოკავშირის ეროვნული უსაფრთხოების ინტერესებშია“, – განაცხადა ჯონ კირბიმ.

ღაზაში ცეცხლის დაუყოვნებლივ შეწყვეტის შესახებ გაერო-ს უსაფრთხოების საბჭოს რეზოლუციას აშშ-მა ვეტო დაადო. კენჭისყრის დროს რეზოლუციას მხარი საბჭოს 13-მა წევრმა ქვეყანამ დაუჭირა, ბრიტანეთმა კი თავი შეიკავა.

გაერო-ს უსაფრთხოების საბჭოში აშშ-ის წარმომადგენელმა განაცხადა, რომ პროცესი შესაბამისი კონსულტაციების ნაკლებობას განიცდიდა და არ ითვალისწინებდა ვაშინგტონის რეკომენდაციებს. ამერიკელი დიპლომატის თქმით, რეზოლუცია არ გმობდა „ჰამასს“.

„არცერთი ქვეყანა არ უნდა შეეგუოს იმას, რაც „ჰამასმა“ ჩაიდინა 7 ოქტომბერს. რომელიმე ჩვენს ქვეყანაზე რომ ასეთი თავდასხმა განეხორციელებინათ, ყველას გვექნებოდა მოლოდინი, რომ ეს საბჭო კიდევ ერთხელ დაადასტურებდა ჩვენს უფლებებს, დაგვეცვა ჩვენი მოქალაქეები. რეზოლუციის ყველაზე არარეალური ნაწილია მისი მოწოდება ცეცხლის უპირობო შეწყვეტის შესახებ. ეს, უბრალოდ, დატოვებს „ჰამასს“ ადგილზე, შეძლებს, გადაჯგუფდეს და გაიმეოროს ის, რაც გააკეთა 7 ოქტომბერს. ეს რეზოლუცია არსებითად ამბობს, რომ ისრაელმა, უბრალოდ, უნდა მოითმინოს ეს“, – განაცხადა აშშ-ის წარმომადგენელმა.

გაერო-ს უსაფრთხოების საბჭოში ბრიტანეთის წარმომადგენელმა კი თავის შეკავება იმით ახსნა, რომ დიდი ბრიტანეთი ვერ მიცემდა ხმას რეზოლუციას, რომელიც არ გმობს „ჰამასის“ მიერ 7 ოქტომბერს ისრაელის წინააღმდეგ ჩადენილი სისასტიკეს.