ნიკა მელია აცხადებს, რომ პარტიას აფუძნებს. ამის შესახებ მან ტელეკომპანია „მთავარი არხის“ ეთერში განაცხადა.

მელიას თქმით, პარტია ძალიან მალე დაფუძნდება და მუშაობას ხვალიდან დაიწყებენ.

„ეს პარტია ძალიან ბევრს გააკეთებს ქართული დემოკრატიისთვის. იქნებიან სკეპტიკოსები, ბევრი მინახავს ასეთი, მაგრამ შემდეგ მათ პოზიცია შეუცვლიათ. ყველაზე მართალი პოლიტიკური პარტია, რომელზეც უნდა დაშენდეს კვალიფიკაცია, ცოდნაც, ხედვაც, იქნება ის პარტია, რომელიც დაფუძნდება და დაფუძნდება ძალიან მალე, გონივრულ ვადაში. ამ საკითხთან დაკავშირებით ხვალიდან დავიწყებთ მუშაობას. მნიშვნელოვანი მუშაობა იქნება გასატარებელი და შესაბამის პერიოდში დაფუძნდება“, – განაცხადა ნიკა მელიამ.

ნიკა მელიამ დღეს გამართულ ბრიფინგზე განაცხადა, რომ „ნაციონალურ მოძრაობას“ ტოვებს და მიდის წინ, მომავლისკენ.

„ნაციონალური მოძრაობა“ მივიდა ლოგიკურ დასასრულამდე, რასაც ჰქვია დაშლა, რაც პრაქტიკულად, მელიამ მოგვილოცა, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილი ნიკა მელიას მიერ „ნაციონალური მოძრაობის“ დატოვებას გამოეხმაურა.

„ხანგრძლივი პოლიტიკური ჭინთვების შემდეგ, როგორც იქნა მელიამ „ნაციონალური მოძრაობა“ დატოვა, თუმცა ამას წინ უძღოდა ათამდე მუნიციპალიტეტში ფრაქცია „ნაციონალური მოძრაობის“ წევრების განცხადება, რომ „ნაციონალური მოძრაობა“ დატოვეს. მელიას განცხადებაში ყველაზე მეტად მნიშვნელოვანი იყო ის, რომ მან „ნაციონალური მოძრაობა“ უკვე, როგორც წარსული, ისე მოიხსენია. ეს ზუსტად იმის მტკიცებულებაა, რასაც ვამბობდით, რომ ამ პოლიტიკური პარტიის ლოგიკური დასასრული იქნება ის, რომ გაქრება პოლიტიკური ველიდან. ნიკა მელია უკვე „ნაციონალურ მოძრაობას“ მოიხსენიებს, როგორც წარსულს და ამ შემთხვევაში, ის არ იქნება გამონაკლისი.

თავად „ნაციონალურ მოძრაობაში“ მიმდინარე პროცესებს რაც შეეხება, ვხედავთ, რომ ფორმალურ თავმჯდომარეს, ხაბეიშვილს ამერიკაში ვიზიტი დაუჯდა იმად, რომ შესაძლოა, თვითმფრინავშივე აღარ იყოს თავმჯდომარე და რიგითი წევრი ჩამოვა აეროპორტში.  ამერიკაში ერთი ვიზიტი პრაქტიკულად, ათამდე მუნიციპალიტეტში ფრაქციის გაუქმება დაუჯდა და ამ ვიზიტს ხაბეიშვილი უწოდებს წარმატებულს. ერთი ან ორი ასეთი „წარმატებული“ ვიზიტი ამერიკაში და ალბათ ხაბეიშვილი მხოლოდ თავის მძღოლთან ერთად დარჩება „ნაციონალურ მოძრაობაში“. სხვა მეტი აღარავინ დახვდება.

ეს არის რეალური სახე „ნაციონალური მოძრაობის“. ხელისუფლებაში როცა იყვნენ, ასეთი დამოკიდებულებით მართავდნენ  ქვეყანას და როცა ოპოზიციაში არიან, ზუსტად ასე უდგებიან საკუთარი პარტიის წევრების ინტერესებს, საზოგადოების ინტერესები საერთოდ აღარ აინტერესებთ. ამიტომ მივედით იმ ლოგიკურ დასასრულამდე, რასაც ჰქვია „ნაციონალური მოძრაობის“ დაშლა, რაც პრაქტიკულად, მელიამ მოგვილოცა“, -განაცხადა გურამ მაჭარაშვილმა.

ნიკა მელიამ დღეს გამართულ ბრიფინგზე განაცხადა, რომ „ნაციონალურ მოძრაობას“ ტოვებს და მიდის წინ, მომავლისკენ.

„ერთიანი ნაციონალური მოძრაობის“ ყოფილი თავმჯდომარე, ნიკა მელია პარტიას ტოვებს. გადაწყვეტილების შესახენ ნიკა მელიამ ბრიფინგზე განაცხადა.

მელიას თქმით, ბოლო თვეების განმავლობაში, ყველაფერი გააკეთა იმისთვის, რომ „ნაციონალურ მოძრაობაში“ შენარჩუნებულიყო პრინციპები, მაგრამ მიიღო “ყრუ კედელი”.

მელიას შეფასებით, შეიქმნა “მოჯადოებული წრე” და “მანკიერ წრეში” დარჩენა ნიშნავს უარის თქმას სიმართლეზე, ღირსებაზე, მორალზე და საქართველოს მომავალზე.

ნიკა მელიას თქმით, მაშასადამე, მიდის წინ მომავლისკენ და წარსულს ტოვებს წარსულში.

ამასთან, მელიას განცხადებით, „ნაციონალურმა მოძრაობამ“ პოლიტიკურ სტანდარტად აქცია არაფორმალური მართვა, კულუარული გავლენები, პოლიტიკითა და პოლიტიკოსებით ვაჭრობა, განსხვავებული აზრის დევნა და დემოკრატიისათვის კარის დაკეტვა.

„ბოლო 11 წლის განმავლობაში არ შემიწყვეტია ბრძოლა ივანიშვილის რეჟიმის წინააღმდეგ, რადგან ვთვლიდი და ვთვლი, რომ ეს ხელისუფლება, საქართველოს უკარგავს განვითარების პერსპექტივას და ართმევს მომავალს. მომავალს, რომელიც ქვეყანას უნდა ჰქონდეს გაცილებით უკეთესი, ვიდრე აქვს აწმყო.

ვიბრძოდი პარლამენტის ტრიბუნიდან, ქუჩიდან, საერთაშორისო პლატფორმებიდან და ციხის საკნიდან. ვცდილობდი ვყოფილიყავი ყველგან, სადაც ილახებოდა ხალხის თავისუფლება.

ამ პროცესში არ მქონია სხვა არანაირი პოლიტიკური მიზანი, გარდა ხალხის და ჩემი ქვეყნის ინტერესისა.

11 წლის თავზე, ჩვენ ქვეყანაში გვაქვს პოლიტიკური კლიმატი, რომელიც მთლიანად დაფუძნებულია, მხოლოდ ფულსა და არაფორმალურ ინტერესებზე, გვაქვს გახრწნილი პოლიტიკური სისტემა, სადაც გასაქანი არ ეძლევა პატიოსნებას, წესიერ, გამოცდილ ადამიანებს, ახალგაზრდებს, ზნეობრივ და გულწრფელ პოლიტიკას, იდეალისტებს.

მოსყიდვა და პოლიტიკური ვაჭრობა არის ბიძინა ივანიშვილის პოლიტიკის საფუძველი და სამწუხაროდ, თამაშის ეს წესები მიიღო პოლიტიკოსების არცთუ ისე მცირე ნაწილმა.

ისინი ცდილობენ ამორალურობა აქციონ პოლიტიკურ სტანდარტად, პოლიტიკაში წარმატების წინაპირობად. ამ სტანდარტის გამზიარებელი პოლიტიკოსები ერთმანეთს არწმუნებენ, რომ პრინციპების დათმობით უფრო მეტს მიაღწევენ, ვიდრე პრინციპების ერთგულებით და მერე ყველა ასეთი პოლიტიკოსი ერთად, ამაში ცდილობს დაარწმუნოს ხალხი;

დღეს ბევრი თქვენგანი ფიქრობს, ქალაქში, სოფელში, ქუჩაში, მაღაზიაში – კი არ ვარგა ბიძინა ივანიშვილი, მაგრამ ვერ მოერევი, ცუდია, მაგრამ ფული აქვს ბევრი და ვერ მოერევი.

მე მჯერა, რომ ბიძინა ივანიშვილის დამარცხება შესაძლებელია, მაგრამ მე არ მჯერა, რომ ფულის დამარცხება შესაძლებელია ფულით, უღირსობის უღირსობით, პოლიტიკური კორუფციის დამარცხება შესაძლებელია პოლიტიკური კორუფციით, არ მჯერა, რომ პოლიტიკური ვაჭრობა მარცხდება პოლიტიკური ვაჭრობით. მე მჯერა, რომ სისტემური ბოროტების წინააღმდეგ ბრძოლაში ჩვენ გვჭირდება სუფთა წარსული, რეპუტაცია, ცოდნა,პატიოსნება, გამბედაობა – აი, ეს არის გამარჯვების ახალი გზა და არა პოლიტიკურ ვაჭრობებში ჩართვა, ეს არის ჩემი პოლიტიკური იდეალები, ეს არის ჩემი, როგორც პოლიტიკოსის ხედვა.

ბოლო თვეების განმავლობაში, ყველაფერი გავაკეთე იმისათვის, რომ „ნაციონალურ მოძრაობაში“ შენარჩუნებულიყო (გაემარჯვა ამ პრინციპებს) ეს პრინციპები, მაგრამ მივიღე ყრუ კედელი.

შეიქმნა მოჯადოებული წრე, რომელიც ითვალისწინებს ყველას ინტერესს, გარდა ხალხის ინტერესისა. ამ მანკიერ წრეში დარჩენა ნიშნავს უარის თქმას სიმართლეზე, ღირსებაზე, მორალზე და საქართველოს მომავალზე.

პოლიტიკური კლასის დიდ ნაწილს მიაჩნია, რომ ბრძოლის მთავარი იარაღი დღეს არის ფული, მე კი მიმაჩნია, რომ პოლიტიკური ბრძოლის მთავარი იარაღი არის სიმართლე, სიტყვის ფასი, გულწრფელობა.

სამწუხაროდ, „ნაციონალურმა მოძრაობამაც“ თავის პოლიტიკურ სტანდარტად აქცია არაფორმალური მართვა, კულუარული გავლენები, პოლიტიკითა და პოლიტიკოსებით ვაჭრობა, განსხვავებული აზრის დევნა, დემოკრატიისათვის კარის დაკეტვა. ეს პარტიაც პოლიტიკაში გამდიდრებულმა ადამიანებმა გადააქციეს ვიწრო კლუბურ მოძრაობა

ვიცი რა ხდება თქვენს გულებში, ჩემს გულშიც იგივე ტრიალებს. თქვენ რომ დაკარგეთ ნდობა პოლიტიკური კლასის, მეც ასევე დავკარგე პოლიტიკური კლასის დიდი ნაწილის ნდობა. ახლა მაქვს ორი არჩევანი – ან ვითვალთმაქცო ისე როგორც უმეტესობამ, მოვირგო ეს ნიღაბი და ნიღბით ვიყო, ან ვიყო ბოლომდე გულწრფელი, საკუთარ თავთან და თქვენთან მართალი. ან უნდა მივიღო პოლიტიკური კორუფციული თამაშის წესები ან დავრჩე ხალხთან და ერთად შევცვალოთ ეს თამაშის წესები.

დარწმუნებული ვარ, სიმართლეს ყოველთვის იმაზე მეტი მხარდამჭერი ეყოლება, ვიდრე ვინმემ შეიძლება ხალხი იყიდოს. მართალი ხალხი – არ იყიდება, ჩვენ კი პოლიტიკაში მათთვის სივრცე უნდა გავაჩინოთ.

ყველა ადამიანი, ვინც ამ ბრძოლაში იქნება, მიიღებს ინდივიდუალურ, სინდისით ნაკარნახებ გადაწყვეტილებას და ვიქნებით ძალიან ბევრნი, სწორი ადამიანების ღირებულებით ერთობაში და ვივლით წინ მომავლისკენ და დავამარცხებთ ივანიშვილის ოლიგარქიულ მმართველობას.

მაშასადამე, მივდივარ? დიახ, მივდივარ წინ მომავლისკენ და წარსულს ვტოვებ წარსულში.

ამ ქვეყანაში ოლიგარქიას სურს დაწეროს საქართველოს ისტორია, მაგრამ საქართველოს ისტორიას დაწერს ქართველი ხალხი“, – განაცხადა ნიკა მელიამ.