სლოვაკეთი დღეიდან უკრაინის საზღვართან სატვირთო მანქანების გადაადგილებას ისევ დაბლოკავს. აღნიშნულის შესახებ ინფორმაციას ადგილობრივი მედია ავრცელებს.

სლოვაკეთის საგზაო ტრანსპორტის გაერთიანება UNAS-ი უკრაინის საზღვართან დაბლოკვას ადგილობრივი დროით 15:00 საათიდან განაახლებს. როგორც მედია წერს, სლოვაკეთის ტერიტორიაზე სატვირთო ტრანსპორტის შესვლა დაიბლოკება, მგზავრთა გადაადგილება კი არ შეიზღუდება.

მედიის ცნობით, სლოვაკეთის საგზაო ტრანსპორტის გაერთიანების მთავარი მოთხოვნა უკრაინელი გადამზიდავებისთვის სალიცენზიო ნებართვის აღდგენაა.

შეგახსენებთ, 6 ნოემბრიდან უკრაინის საზღვართან გადასასვლელ პუნქტებს ბლოკავენ პოლონელი გადამზიდავებიც. მათი მთავარი მოთხოვნა უკრაინული გადამზიდავებისთვის სალიცენზიო ნებართვის აღდგენაა. ამასთან, ევროკომისიამ განაცხადა, რომ უკრაინელი სატვირთო მანქანების მძღოლებისთვის სანებართვო სისტემის აღდგენას ეწინააღმდეგება.

ისრაელის თავდაცვის მინისტრის, იოავ გალანტის განცხადებით, ტერორისტულმა დაჯგუფება „ჰამასმა“ 7 ოქტომბრის თავდასხმაზე ისრაელის საპასუხო ნაბიჯი არასათანადოდ შეაფასა.

„ძნელია დემოკრატიების ომებში ჩართვა, მაგრამ როგორც კი ომში ვართ, ბევრად ძლიერები ვართ, რადგან ვიბრძვით ჩვენი ღირებულებების დასაცავად“, – განაცხადა გალანტმა.

მისი თქმით, ისრაელი ტერორიზმის წინააღმდეგ თავისუფალი სამყაროს ფრონტზე იბრძვის.

„პირველ სახლში ხანძრის დროს საჭიროა მისი შეჩერება, რათა არ გავრცელდეს სოფელსა და ეკლესიაში. ისრაელი პირველ სახლს ჰგავს. ჩვენ ვიბრძვით თავისუფალი სამყაროს ფრონტზე ტერორიზმის წინააღმდეგ“, – აღნიშნა ისრაელის თავდაცვის მინისტრმა.

მისი თქმით, პალესტინის მხარდამჭერი აქტივისტების მიერ მიწოდებულ დახმარებას გლობალური ტერორი იყენებს.

„ჰამასის“ პროპაგანდა გავლენას ახდენს უნივერსიტეტებსა და საპროტესტო აქციებზე და მიედინება ფული იმაში, რაც ააქტიურებს ტერორისტულ ქსელებს მთელს მსოფლიოში“, – აღნიშნა გალანტმა.

რუსეთის გაჩერება უკრაინაშია აუცილებელი, – ამის შესახებ განცხადება აშშ-ის სახელმწიფო მდივანმა, ენტონი ბლინკენმა „სიენენთან“ ინტერვიუში გააკეთა.

მისივე თქმით, წინააღმდეგ შემთხვევაში რუსეთს შეუძლია, აშშ უფრო ფართო კონფლიქტში ჩაითრიოს.

„ვფიქრობ, ერთადერთი ხალხი, ვინც ბედნიერი იქნება, თუ აშშ უკრაინის სამხედრო მხარდაჭერის შემცველ ფინანსურ პაკეტს კონგრესში კენჭს არ უყრის და არ დაამტკიცებს, მოსკოვში, თეირანსა და პეკინში ზის. ახლა დროა, ვიმოქმედოთ, წინააღმდეგ შემთხვევაში ჩვენ ვიცით, რა მოხდება – პუტინი წინ წაიწევს დაუსჯელად და ჩვენ ვიცით, რომ ის უკრაინაში არ გაჩერდება და ის შესაძლოა, თავს დაესხას ნატო-ს წევრ ქვეყანას. ეს კი ჩვენ კონფლიქტში ჩართვას ნიშნავს, რადგანაც ჩვენ გვაქვს ნატო-ს წევრების წინაშე აღებული ვალდებულება“, – განაცხადა ბლინკენმა.

შეერთებული შტატების სახელმწიფო მდივანი, ენტონი ბლინკენი ისრაელს მოუწოდებს, „ჰამასთან“ ომის დროს პალესტინელი მშვიდობიანი მოსახლეობის დასაცავად მეტი გააკეთოს.

ბლინკენის თქმით, ისრაელმა დიდი მნიშვნელობა უნდა მიანიჭოს მშვიდობიანი მოსახლეობის დაცვას და უზრუნველყოს, რომ ჰუმანიტარული დახმარება მიიღონ მათ, ვისაც სჭირდებათ.

„კრიტიკულად მნიშვნელოვანია დავრწმუნდეთ, რომ სამხედრო ოპერაციები შექმნილია სამოქალაქო დაცვის ირგვლივ. ვფიქრობ, განზრახვა არსებობს. მაგრამ შედეგები ყოველთვის არ ვლინდება“, – აღნიშნა აშშ-ის სახელმწიფო მდივანმა. ამასთან, ბლინკენმა კიდევ ერთხელ დაადასტურა აშშ-ის პოზიცია, რომელიც ისრაელის მიერ ცეცხლის შეწყვეტას არ ემხრობა.

„“ჰამასი“ ჯერ კიდევ ცოცხალი, ჯერ კიდევ უვნებელი და იმ განზრახვით არსებობს, რომ კიდევ, კიდევ და კიდევ გაიმეოროს 7 ოქტომბერი. ეს უბრალოდ გააგრძელებს პრობლემას“, – აღნიშნა ბლინკენმა.

ღაზაში ცეცხლის შეწყვეტის შანსები სულ უფრო მცირდება, – ამის შესახებ კატარის პრემიერ-მინისტრმა, შეიხმა მუჰამედ ბინ აბდულრაჰმან ალ-ტანიმ დოჰას ფორუმზე გამოსვლისას განაცხადა.

„ისრაელის მიერ ღაზის დაბომბვა ავიწროებს ფანჯარას ახალი ზავისთვის“, – აღნიშნა ალ-ტანიმ.

კატარის პრემიერ-მინისტრის თქმით, კატარი გააგრძელებს ძალისხმევას, რათა ზეწოლა მოახდინოს ორივე მხარის მიერ ცეცხლის შეწყვეტისკენ.

ამასთან, კონფერენციაზე სიტყვით გამოსვლისას, პალესტინის პრემიერ-მინისტრმა, მოჰამედ შტაიემ განაცხადა, რომ ისრაელს „არ უნდა მიეცეს უფლება, განაგრძოს საერთაშორისო ჰუმანიტარული სამართლის დარღვევა“ და მოითხოვა საერთაშორისო სანქციების დაწესება.

უკრაინის პრეზიდენტმა, ვოლოდიმირ ზელენსკიმ განაცხადა, რომ არგენტინის პრეზიდენტის ინაუგურაციის ცერემონიაზე უნგრეთის პრემიერ-მინისტრ ვიქტორ ორბანს „გულწრფელად ესაუბრა“.

„ინაუგურაციის ფარგლებში, რამდენადაც ეს შესაძლო იყო, გულწრფელად ვესაუბრე უნგრეთის პრემიერ-მინისტრ ორბანს და ნათელია, რომ ეს საუბარი ჩვენს ევროპულ საქმეებზე იყო“, – განაცხადა ზელენსკიმ.

მანამდე ცნობილი გახდა, რომ არგენტინაში ვიზიტით მყოფი ზელენსკი ტელეფონით ესაუბრა საფრანგეთის პრეზიდენტს, ემანუელ მაკრონს, რომელმაც პარასკევს პარიზში ვიქტორ ორბანს უმასპინძლა.

შეგახსენებთ, უნგრეთის პრეზიდენტი ვიქტორ ორბანი უკრაინასთან ევროკავშირის წევრობის მოლაპარაკებების დაწყებას ეწინააღმდეგება. ორბანი აცხადებს, რომ 14-15 დეკემბერს დაგეგმილ ევროკავშირის სამიტზე აღნიშნულ გადაწყვეტილებას მხარს არ დაუჭერს.

გამთენიისას უკრაინის დედაქალაქ კიევში აფეთქებების ხმა ისმოდა, რის შემდეგაც საჰაერო განგაში გამოცხადდა, – ინფორაციას უკრაინული მედია კიევის საქალაქო-სამხედრო ადმინისტრაციასა და უკრაინის საჰაერო ძალებზე დაყრდნობით ავრცელებს.

მედიის ცნობით, კიევზე რუსეთის საჰაერო იერიშის შედეგად ოთხი ადამიანი დაშავდა, დაზიანდა შენობები. მედია წერს, რომ უკრაინის საჰაერო თავდაცვამ კიევის თავზე გაანადგურა მტრის რვა რაკეტა და 18 „შაჰედის“ ტიპის უპილოტო საფრენი აპარატი.

კიევის მერის, ვიტალი კლიჩკოს თქმით, რაკეტის ფრაგმენტები ჩამოვარდა დარნიცკისა და გოლოსევსკის რაიონებში. მისივე თქმით, ფრაგმენტებმა საცხოვრებელი კორპუსის სახურავი დააზიანა.

ამასთან, ღამის განმავლობაში ავდეევკის მიმართულებით 82 სამხედრო შეტაკება დაფიქსირდა. ბახმუტის მიმართულებით თავდაცვის ძალებმა მოიგერიეს მტრის 11 შეტევა დონეცკის ოლქის გრიგორიევკას, ბოგდანოვკას, ივანოვსკის, კლეშჩეევკასა და ანდრეევკას რაიონებში.