უფასო კვების პროგრამა საჯარო სკოლებში არის კრიტიკულად მნიშვნელოვანი იმისთვის, რომ ბავშვებს სკოლებში არ შიოდეთ, – ამის შესახებ „ნაციონალური მოძრაობის“ დეპუტატმა ანა წითლიძემ პლენარულ სხდომაზე პოლიტიკური განცხადებების ფორმატში განაცხადა.

მისი თქმით, ფრაქცია „ერთიანმა ნაციონალურმა მოძრაობამ“ ინტერპელაციისას განათლებისა და მეცნიერების მინისტრს UNDP-თან ერთად შემუშავებული სპეციალური პროგრამა გააცნო.

„როდის უნდა გახდნენ ბავშვები პრიორიტეტული სახელმწიფოსთვის და როდის უნდა დაიწყოთ უფასო კვების განხორციელება საჯაროს სკოლებში? ფრაქცია „ერთიანმა ნაციონალურმა მოძრაობამ“ ინტერპელაციისას განათლებისა და მეცნიერების მინისტრს UNDP-თან ერთად შემუშავებული სპეციალური პროგრამა გააცნო, როგორ უნდა დაიწყოს სწრაფად და ხარისხიანად უფასო კვების პროგრამა სკოლებში. ჯერჯერობით ამ მხრივ პროგრესი არ გვაქვს“, – განაცხადა ანა წითლიძემ.

იმის გამო, რომ ქვეყანა ვითარდება და ძალიან ბევრი წინსვლა აქვს, მათ შორის, ეკონომიკურ და სოციალურ საკითხებში, რადგან ქვეყანაში სიტყვის თავისუფლება, დემოკრატიული ინსტიტუტები ფართოდ და ძლიერად არის წარმოდგენილი, რევოლუციური სცენარების განხორციელების არანაირი შესაძლებლობა არ არის. ერთადერთი, რაზეც აქცენტი კეთდება, ეს არის პროვოკაციების მოწყობა და სწორედ ამ პროვოკაციების განეიტრალება იყო ის, რაც უსაფრთხოების სამსახურმა განაცხადა, – განაცხადა პლენარულ სხდომაზე საპარლამენტო უმრავლესობის წევრმა, ირაკლი ქადაგიშვილმა.

მისი თქმით, ევროკავშირს დღეს კვლავ უდგას დღის წესრიგში საქართველოსათვის კანდიდატის სტატუსის მინიჭება-არმინიჭების საკითხი.

„საბოლო ჯამში, მათი არჩევანიც ძალიან რთულია გამომდინარე იქიდან, რომ საქართველო ობიექტურად, ყველა შეფასებით, გაცილებით წინ არის მთელ რიგ საკითხებში, ვიდრე უკვე კანდიდატი ქვეყნები. ამიტომ, რთული იქნება, მათ შორის, 12 რეკომენდაციის შესრულების კუთხით, უარი ეთქვას საქართველოს კანდიდატის სტატუსზე. ამავდროულად, გეოპოლიტიკურადაც ძალიან რთულია, რომ ამ ვითარებაში მთლიანად მთელ სამხრეთ კავკასიაზე და საქართველოზე უარი განაცხადო, მაგრამ ამის პარალელურად, ჩვენ ვხედავთ, რომ მიმდინარეობს მაინც მიზანმიმართული დარტყმა საქართველოს ამ პერსპექტივის მიმართ“, – აღნიშნა ირაკლი ქადაგიშვილმა.

ეს არის ძალიან მარტივი კაზუსი, მხოლოდ საქართველოს კონსტიტუციის 52-ე მუხლი ადგენს საქართველოს პრეზიდენტის უფლებამოსილებებს საგარეო ურთიერთობების სფეროში. ამ მუხლში წერია, რომ საქართველოს პრეზიდენტს მხოლოდ მთავრობის თანხმობით შეუძლია წარმომადგენლობითი უფლებამოსილების განხორციელება და ასევე მოლაპარაკებების წარმოება, – ამის შესახებ „ქართული ოცნების“ თავმჯდომარემ, ირაკლი კობახიძემ საკონსტიტუციო სასამართლოში განაცხადა.

კობახიძის თქმით, პრეზიდენტმა ითხოვა თანხმობა, არ მიუღია ეს თანხმობა და მაინც განახორციელა ვიზიტი, რითაც დაირღვა კონსტიტუცია.

„ამდენად მარტივია ეს კაზუსი. ასეთი კაზუსები შეტანილია პირველი კურსის სახელმძღვანელოებში. ასეთ მარტივ თემებზეა საუბარი, საჭირო იყო თანხმობა, არ მიუღია, მაინც წავიდა, დაირღვა კონსტიტუცია. მით უფრო მარტივად არის საქმე, რომ პრეზიდენტმა თავად აღიარა რეალურად ვიზიტების არაკონსტიტუციურობა, კერძოდ, მან თავად ითხოვა თანხმობა, მას გაცნობიერებული ჰქონდა, რომ შესაბამისი ვიზიტის განხორციელება საჭიროებდა თანხმობას, შეგნებული ჰქონდა ეს და მას შემდეგ, რაც ვერ მიიღო თანხმობა, მაინც განახორციელა ვიზიტი. მას რომ ჰქონოდა რწმენა, რომ შესაბამის ვიზიტს არ სჭირდებოდა თანხმობა, არც მიმართავდა მთავრობას თანხმობის თხოვნით ასევე, მან განაცხადა, რომ მისი ვიზიტები არ იყო დაფინანსებული ბიუჯეტიდან, მისი კერძო ხარჯებით იყო ეს ვიზიტები, რაც არის მორიგი აღიარება, თუ იყო ლეგიტიმური, რატომ არ დააფინანსა ბიუჯეტიდან, ეს არის მორიგი აღიარება, რომ ვიზიტები იყო არალეგიტიმური, არაკონსტიტუციური და სწორედ ამის გამო მოუწია მას საკუთარი ჯიბის ფულის დახარჯვა. მას რომ დაეხარჯა ბიუჯეტის ფული, ეს კონსტიტუციის დარღვევასთან ერთად იქნებოდა სისხლის სამართლის დანაშაულიც, რადგან ეს არის არამიზნობრივი ხარჯი. როდესაც ახორციელებ არალეგიტიმურ ვიზიტის და ამაში ხარჯავ ბიუჯეტის ფულს, ეს დამატებით არის სისხლის სამართლის დანაშაული, გარდა კონსტიტუციის დარღვევისა. როდესაც იმპიჩმენტზეა საუბარი, იქ შეიძლება, გქონდეს კონკრეტული დეპუტატების იმედი, რომ ისინი მხარს არ დაუჭერენ შენს გადაყენებას, მაგრამ თუ ჩადიხარ დანაშაულს, აქ პოლიტიკოსების იმედზე ვერ იქნები და ვერ დაარღვევ კონსტიტუციას. ამიტომ, მას გაცნობიერებული ჰქონდა, რომ მიდიოდა არალეგიტიმურ ვიზიტში, ამიტომ დახარჯა არა ბიუჯეტის ფული, არამედ თავისი ფული, ეს არის აშკარა აღიარება, რომ მას გაცნობიერებული ჰქონდა მისი ვიზიტების არაკონსტიტუციური ბუნება“, – განაცხადა კობახიძემ.

საქართველო ცარიელი ხელით ნამდვილად არ მიდის დეკემბრამდე, – ამის შესახებ საქართველოს პარლამენტის ევროინტეგრაციის კომიტეტის თავმჯდომარემ, მაკა ბოჭორიშვილმა განაცხადა.

მისივე თქმით, ფაქტია, რომ ეს დამოკიდებულება, რაც იყო რეკომენდაციების შესრულების პროცესში და ის ნაბიჯები, რაც გადაიდგა, მიმართული იყო მხოლოდ და მხოლოდ ერთი მიზნისთვის, რომ საქართველომ მიიღოს კანდიდატის სტატუსი წლის ბოლოს.

„საქართველო ცარიელი ხელით ნამდვილად არ მიდის დეკემბრამდე. საქართველომ 1 წლის განმავლობაში ძალიან მნიშვნელოვანი ნაბიჯები გადადგა, რომ 12 რეკომენდაცია შესრულებულიყო და ჩვენ ვნახავთ ევროკომისიის შეფასებებს. ერთი რამ ფაქტია, რომ ეს დამოკიდებულება, რაც იყო რეკომენდაციების შესრულების პროცესში და ის ნაბიჯები, რაც გადაიდგა, მიმართული იყო მხოლოდ და მხოლოდ ერთი მიზნისთვის, რომ საქართველომ მიიღოს კანდიდატის სტატუსი წლის ბოლოს. თუმცა, რა თქმა უნდა, არსებობს პოლიტიკური კომპონენტი და ახლა სწორედ მნიშვნელოვანია, ევროკავშირის წევრ ქვეყნებთან მათი პოზიციების კონსოლიდაციაზე საუბარი“,- აღნიშნა ბოჭორიშვილმა.

საკონსტიტუციო სასამართლოში „ქართული ოცნება“ ისეთი წარმომადგენლობითი დელეგაციითაა ჩასული, რომ მგონია, რომ შესაძლოა, სასამართლოს ზეწოლადაც კი შეფასდეს, – ამის შესახებ „გირჩის“ წევრმა, იაგო ხვიჩიამ საქართველოს პრეზიდენტის წინააღმდეგ საკონსტიტუციო სარჩელის განხილვაზე საუბრისას განაცხადა.

ხვიჩიას თქმით, დიდი მოლოდინი არ აქვს, რომ საკონსტიტუციო სასამართლოს წინ აღუდგება ხელისუფლების ნებას.

„საკონსტიტუციო სასამართლოში ამდენი მაღალჩინოსნის მიბრძანება რაღაცნაირად აღსანიშნავიც კია, შესაბამისად, მეეჭვება, რომ ისინი იქ პროცესის წასაგებად მიდიოდნენ. დიდი მოლოდინი არ მაქვს საკონსტიტუციო სასამართლოსი, რომ წინ აღუდგებიან ხელისუფლების ნებას, ხოლო რაც შეეხება მართებულობას, ბატონმა ბორელმა პირდაპირ გვითხრა, ყველაზე ცუდი დრო შეარჩიეთ ამისთვისო, უთხრა „ქართულ ოცნებას“, ისინი ამის მერე აგრძელებენ იმავეს. რაც შეეხება პარლამენტში რა მოხდება, მიაღწევენ თუ არა პრეზიდენტის იმპიჩმენტს ქოცები, ეს დამოკიდებულია იმაზე რამდენს გადაიხდიან. მაგალითად, მათ თუ დახარჯეს იმპიჩმენტზე იმის ნახევარი ფული მაინც, რაც პრეზიდენტის არჩევაზე დახარჯეს, რა თქმა უნდა, რიგი დადგება ჩემი კოლეგების, ვინ დააჭერს მწვანე ღილაკს ხელს. ასეთი კანდიდატი ბევრია და ვფიქრობ, ჩემს კოლეგებში ნაწყენიც კი დარჩებიან, რომ არ შეხვდეთ შესაბამისი წილი და ისე მოხდეს პრეზიდენტის გადაყენება, მათ გარეშე“, – განაცხადა იაგო ხვიჩიამ.