მკითხველის „საბას“ ჟიურის ხუთივე წევრის ვინაობა ცნობილია. მკითხველები, რომლებმაც 3 თვის განმავლობაში ყველაზე დიდი დრო დაუთმეს SABA Reader-ში კითხვას არიან:

ლადო აბულაძე – 1100 წაკითხული საათი;
ქრისტინე კოხია – 1000 წაკითხული საათი;
ნათია ოქრომელიძე – 930 წაკითხული საათი;
ნინო გაფრინდაშვილი – 915 წაკითხული საათი;
ნათია იორდანიშვილი – 500 წაკითხული საათი.

შერჩევის პროცესი 8 მაისიდან დაიწყო და ყველაზე აქტიური მკითხველების სტატისტიკა საჯარო იყო აპლიკაცია SABA Reader-ში. ჟიურის შერჩევის პროცესში 1700-მდე მკითხველი იყო ჩართული, რომლებმაც სამი თვის განმავლობაში, ჯამში 3 000 000 წუთზე მეტი დაუთმეს კითხვას, ხოლო კითხვის ჯამური მაჩვენებელი კონკურსის პირობებში 25%-ით გაიზარდა.

მკითხველის „საბას“ ჟიური შეირჩა შემდეგი კრიტერიუმებით:

• ჟიურის წევრს უნდა შეეძლოს ქართულ ენაზე კითხვა და ამჟამად უნდა ცხოვრობდეს საქართველოში.
• არ უნდა იყოს მწერალი ან ლიტერატორი.
• არ უნდა მუშაობდეს საგამომცემლო სექტორში.
• არ უნდა იყოს „წლის საუკეთესო დებიუტის“ ნომინაციაში ნომინირებულის ოჯახის წევრი.

შეგახსენებთ, ჟიური გამარჯვებულს დებიუტის მოკლე სიიდან ხმათა უმრავლესობით გამოავლენს. ტრადიციულად, „საბას“ ჟიურის მსგავსად გაიმართება მკითხველთა ჟიურის სხდომები, მათი მუშაობის პრინციპებიც იგივეა. მკითხველების ჟიური თავის რჩეულს პრემიას შემოდგომით, საბა 2023-ის დაჯილდოების ცერემონიალზე გადასცემს.

„საბას“ ისტორია 2002 წელს, თიბისისა და პოეტ რატი ამაღლობელის მიერ ლიტერატურული პრემია „საბას“ დაარსებით იწყება. კონკურსის კვალდაკვალ 2012 წელს შეიქმნა ელექტრონული წიგნების სახლი „საბა“, რომელიც აერთიანებს მრავალფეროვან ლიტერატურას – კლასიკურ და თანამედროვე, ქართულ და უცხოურ მხატვრულ ტექსტებს. 2019 წლიდან შეიქმნა მკითხველთა პლატფორმა „საბკულტურა“ და მასთან ერთად განახლდა აპლიკაცია Saba Reader-ი. დღეს „საბას“ ბიბლიოთეკაში 7 000-ზე მეტი ელექტრონული და ხმოვანი წიგნი იყრის თავს.

R

სსიპ საქართველოს მწერალთა სახლს 2023 წლის 4 სექტემბრიდან ქეთევან დუმბაძე უხელმძღვანელებს. ამის შესახებ საქართველოს კულტურის, სპორტისა და ახალგაზრდობის მინისტრის ბრძანება უკვე გამოიცა.

კულტურის, სპორტისა და ახალგაზრდობის სამინისტროს ცნობით, 2023 წლის საშემოდგომო სესიაზე მწერალთა სახლის ახალ ხელმძღვანელს, კანონით დადგენილი წესით, საქართველოს პარლამენტის წევრის უფლებამოსილება შეუწყდება.

„საქართველოს კულტურის, სპორტისა და ახალგაზრდობის სამინისტრო ქეთევან დუმბაძეს ულოცავს მწერალთა სახლის დირექტორად დანიშვნას და უსურვებს წარმატებებს.

შეგახსენებთ: ქეთევან დუმბაძე ამჟამად საქართველოს პარლამენტის კულტურის კომიტეტის თავმჯდომარის მოადგილე და დიასპორისა და კავკასიის საკითხთა კომიტეტის წევრია.

1978-1983 წლებში ქეთევან დუმბაძე სწავლობდა ივანე ჯავახიშვილის სახელობის თბილისის სახელმწიფო უნივერსიტეტის ფილოლოგიის ფაკულტეტზე, ლიტერატურული ურთიერთობებისა და მხატვრული თარგმანის განხრით. მას პროფესიული საქმიანობის მრავალმხრივი გამოცდილება აქვს.

1977-1993 წლებში იგი მუშაობდა მწერალთა კავშირთან არსებულ მხატვრული თარგმანისა და ლიტერატურული ურთიერთობების მთავარ სარედაქციო კოლეგიაში.

გამოქვეყნებული აქვს არაერთი სტატია ადგილობრივ და უცხოურ პრესასა და პერიოდიკაში. ასევე, მას გამოქვეყნებული აქვს კლასიკური და თანამედროვე ავტორების თარგმანები.

1990-იანი წლებიდან 2013 წლამდე აქტიურად საქმიანობდა სატელევიზიო სფეროშიც. არის არაერთი ტელევიზიის საინფორმაციო, შემეცნებითი, საავტორო გადაცემებისა და პროექტების ავტორი და პროდიუსერი.

1993-1999 წლებში იგი სხვადასხვა პოზიციას იკავებდა საქართველოს პრეზიდენტის პრესსამსახუში. 2013-2017 წლებში იყო საქართველოს კულტურისა და ძეგლთა დაცვის მინისტრის მრჩეველი, 2018 წელს – საქართველოს განათლების, მეცნიერების, კულტურისა და სპორტის სამინისტროს ექსპერტი, ასევე, ლიტერატურულ-საგანმანათლებლო პროექტის – „ცოცხალი წიგნები“ – ხელმძღვანელი“,-აღნიშნულია ინფორმაციაში.

სასწრაფოდ ჩატარდეს საერთაშორისო აუდიტი რიკოთის მშენებლობასთან დაკავშირებით. უნდა შემოწმდეს უსაფრთხოება, ეკოლოგიური ზემოქმედება, გარემოს დაცვა, მეწყერსაშიში ზონები, მონიტორინგის სისტემა, ფინანსები , – ამის შესახებ პარტია „ლელოს” ლიდერმა, მამუკა ხაზარაძემ განაცხადა.

მისივე თქმით, არავითარი გარანტია არ არსებობს, რომ ადამიანების უსაფრთხოება დაცული იქნება.

„დასანქცირებულ ჩინურ კომპანიას რომ ასეთ მნიშვნელოვან საქმეს ჩააბარებ და ევროპიდან მოზიდულ თანხებს გადაუხდი, რომელიც ჩვენი გადასახდელია, დანაშაულის ტოლფასია.

რაც ყველაზე მნიშვნელოვანია, სამწუხაროდ, არავითარი გარანტია არ არსებობს, რომ ადამიანების უსაფრთხოება დაცული იქნება – არაერთი ქართველი გეოლოგი და ამ საქმის მცოდნე ამბობს, რომ პროცესი უდიდესი დარღვევებით მიდის, რიკოთი შეიძლება შემდეგ დიდ კატასტროფად გვექცეს.

აღარაფერს ვამბობ “ატკატებსა” და კორუფციაზე, ყველამ ყველაფერი იცის, კონტრაქტორმაც და ქვეკონტრაქტორმაც, უბრალოდ, ამაზე ხმამაღლა საუბარი “არ მოსულა”. “ოცნება” ხომ ცდილობს “გრუზინებად” აქციოს ჩვენი საზოგადოება, ქვეყანა ხომ ახალი რუსული სტანდარტით – გაგებით იმართება და არა კანონებით და სტანდარტებით.

დავფიქრდეთ, საით მიდის ქვეყანა?! ჩვენ ერთად უნდა შევცვალოთ რუსეთის სამსახურში მყოფი ხელისუფლება. რუსული მმართველობა სხვა კი არაფერია – კორუფცია, ნეპოტიზმი და ადამიანის დაცულობისა და მისი ინტერესების უგულებელყოფა. დროა, ეს ყველაფერი დასრულდეს! ჩვენი შვილების მომავალი განვითარებულ და ძლიერ მსოფლიოშია!”, – აცხადებს მამუკა ხაზარაძე.

გარემოს ეროვნულ სააგენტოს ინფორმაციით, ქვეყნის მასშტაბით მაღალი ტემპერატურა კვირის ბოლომდე შენარჩუნდება.

უწყების ცნობით, აღმოსავლეთ საქართველოში ტემპერატურა 39-40 გრადუსს მიაღწევს, რაც ტყის ხანძრების რისკს ზრდის.

11 აგვისტოს დღის მეორე ნახევრიდან დასავლეთ საქართველოსა და აღმოსავლეთ საქართველოს ზოგიერთ რაიონში წვიმიანი ამინდია მოსალოდნელი.